Si Jesus Nanudlo sa Jerico

Kinabuhi ug Ministeryo ni Jesus

UNYA si Jesus ug ang dakong panon sa katawhan nga mibiyahe uban niya miabot sa Jerico, nga usa ka siyudad nga duolan sa usa ka oras nga biyahe gikan sa Jerusalem. Sa tin-aw duha ka siyudad ang Jerico, ang karaang Hudiyohanong siyudad nga mga usa ka kilometro ug tunga gikan sa mas bag-o Romanhon nga siyudad. Sa miagi ang dakong panon sa katawhan sa karaang siyudad ug nagkaduol sa bag-o, duha ka buta nga mga makalilimos nakadungog sa kagubot. Ang usa kanila ginganlag Bartimeo.

Sa pagkahibalo nga si Jesus ang milabay didto, si Bartimeo ug ang iyang kauban misinggit: “Ginoo, Anak ni David, kaloy-i intawon kami!” Sa dihang gibadlong sila sa panon sa katawhan sa paghilom, misamot sila sa pagsinggit ug uban sa labi pang makusog nga mga tingog: “Ginoo, Anak ni David, kaloy-i intawon kami!”

Nakadungog sa kagubot, mihunong si Jesus. Iyang gisultihan kadtong miuban kaniya sa pagtawag niadtong misinggit. Ilang giduol ang mga buta ug miingon sa usa kanila: “Sumalig ka, tindog, gitawag ikaw niya.” Uban sa dili-hitupngang kalipay, giwakli sa tawo ang iyang kupo, milukso sila ug miduol kang Jesus.

“Unsa may gusto mong buhaton ko alang kaninyo?” Nangutana si Jesus sa duha ka lalaki.

“Ginoo, makakita na unta kami,” sila nangaliyopo.

Giabot ug kaluoy, gihikap ni Jesus ang ilang mga mata. Sumala sa asoy ni Marcos, si Jesus miingon sa usa kanila: “Lumakaw ka, ang imong pagsalig nakapaayo kanimo.” Dihadiha ang buta nga mga makalilimos nakakita, ug tino nga silang duha misugod sa paghimaya sa Diyos. Sa nakakita ang tanang mga tawo sa nahitabo, sila midayeg usab sa Diyos. Sa walay langan, si Bartimeo ug ang iyang kuban misugod sa pagsunod kang Jesus.

Sa miagi si Jesus sa Jerico, hilabihan ka daghan ang panon sa mga tawo. Gustong makakita ang tanan sa usa nga nakaayo sa mga tawong buta. Ang mga tawo misugod sa pagduot diha kang Jesus gikan sa tanang direksiyon, ug ingong resulta, ang uban wala gayod makakita kaniya. Apil kanila mao si Zaqueo, ang hepe sa tanang mga maniningil ug buhis sa sulod ug sa palibot sa Jerico. Siya mubo kaayo aron makakita sa nagakahitabo.

Busa midagan pag-una si Zaqueo ug mikatkat sa usa ka kahoy nga sikomoro sa dalan nga agian ni Jesus. Gikan ning bantaaw nga dapit, siya makakita sa tanan. Sa nagkaduol ang panon sa mga tawo, si Jesus nanawag ngadto sa kahoy: “Zaqueo, dali ug kanaog, kay kinahanglan adto ako moabot sa imong balay karong adlawa.”

Mikanaog si Zaqueo nga nalipay ug midalidali pagpauli aron makaandam alang sa iyang halangdon nga bisita. Apan sa pagkakita sa mga tawo sa nagakahitabo, silang tanan misugod sa pagbagolbol. Ilang giisip kini nga dili maayo alang kang Jesus nga mahimong bisita niining matanga sa tawo. Abi god ninyo, si Zaqueo nadato tungod sa panikas sa iyang negosyo nga pagpangolekta ug buhis.

Daghang tawo misunod, ug sa dihang misulod si Jesus sa balay ni Zaqueo, sila mireklamo: “Misulod siya sa pag-abot uban sa tawong makasasala.” Apan nakita ni Jesus nga may posibilidad nga maghinulsol si Zaqueo. Ug wala mabalo si Jesus, kay si Zaqueo mibarog ug miingon: “Tan-awa! Ang katunga sa akong mga kabtangan, Ginoo, ihatag ko sa mga kabus, ug kon ugaling diha man kanilay akong gikalimbongan ug bisan unsa, igauli ko kini sa upat ka pilo.”

Gipamatud-an ni Zaqueo nga tinuod ang iyang paghinulsol pinaagi sa paghatag sa katunga sa iyang mga kabtangan ngadto sa kabus ug pinaagi sa paggamit sa katunga aron ibayad ug balik niadtong iyang nalimbongan. Dayag siya makabanabana gikan sa iyang mga rekord sa buhis kon pilay iyang nautang niining mga tawhana. Busa siya misaad sa paghimog upat ka pilo nga pag-uli, sumala sa balaod sa Diyos nga nagaingon: ‘Kon makakawat ang usa ka tawo ug usa ka karnero, iyang bayran kini ug upat ka karnero tungod niadtong usa ka karnero.’

Nalipay si Jesus sa paagi sa pagsaad ni Zaqueo sa pag-apod-apod sa iyang mga kabtangan, kay Siya miingon: “Ning adlawa karon ang kaluwasan nahiabot niining balaya, tungod kay siya usab anak man ni Abraham. Kay ang Anak sa tawo mianhi sa pagpangita ug sa pagluwas sa nawala.”

Dili pa dugay, gisambingay ni Jesus ang kahimtang sa ‘ang nawala’ sa iyang sugilanon mahitungod sa anak nga usikan. Karon kita dunay tinuod-kinabuhing pananglitan sa usa ka nawala kinsa nakit-an. Bisan pag ang relihiyosong mga lider ug kadtong misunod kanila nagbagolbol ug nagreklamo mahitungod sa pagtagad ni Jesus sa mga tawo nga sama kang Zaqueo, si Jesus nagpadayon sa pagtan-aw ug sa pagpasig-uli niining nangawalang mga anak ni Abraham. Mateo 20:29-34; Marcos 10:46-52; Lucas 18:35–19:10; Exodo 22:1.

◆ Sa tin-aw, diin nahibalag ni Jesus ang buta nga mga makililimos, ug unsay iyang gihimo kanila?

◆ Kinsa si Zaqueo, ug nganong mikatkat man siya sa kahoy?

◆ Sa unsang paagi gipamatud-an ni Zaqueo ang iyang paghinulsol?

◆ Unsang pagtulon-an ang atong makat-onan gikan sa pagtagad ni Jesus kang Zaqueo?