Ikaw ba Nagabuhat sa Kabubut-on sa Diyos?

SA ILANG balay-sa-balay nga ministeryo duha sa mga Saksi ni Jehova nakahibalag ug usa ka pari sa Episcopal Church. Siya daw maayong tawo, bungoton, mga 60 anyos, nagsul-ob ug T-shirt nga nagpasundayag sa ngalan sa iyang simbahan. Dihadiha, siya miingon: “Unta ang mga membro sa among simbahan sama kaninyo kamasiboton diha sa pagpakaylap sa Pulong, apan hangyoon ko kamo nga dili na moduaw sa akong balay.”

Oo, adunay daghang tawo nga modayeg sa buluhaton sa mga Saksi ni Jehova ug modayeg kanila tungod sa ilang kasibot ug kadasig. Apan, dili gayod sila interesado sa ginabuhat sa mga Saksi, ni naghunahuna nga buhaton nila ang buluhaton mismo. Hinuon, kining dayag nagkasumpaking kahimtang sa mga kalihokan dili bag-o. Nahisgotan kana ni Jesus sa iyang adlaw, ug malig-on niyang gipasiugda ang punto pinaagi sa usa ka makapalihok-sa-hunahuna nga ilustrasyon.

“Unsay inyong hunahuna? Usa ka tawo may duha ka anak. Miadto sa una, siya miingon, ‘Anak, umadto ka sa pagtrabaho sa parasan karong adlawa.’ Sa pagtubag kini siya miingon, ‘Moadto ako, senyor,’ apan wala moadto. Miduol sa ikaduha, gisulti niya ang sama. Sa pagtubag kini siya miingon, ‘Dili ko.’ Human niini siya nagbasol ug miadto. Asa sa duha ang mihimo sa kabubut-on sa iyang amahan?”​—Mateo 21:28-31.

Tataw ang tubag. Sama sa panon nga nakadungog kang Jesus, kita motubag, “Ang naulahi.” Apan saylo pa sa makita, pinaagi nianang ilustrasyona, si Jesus nagpahinumdom kanato nga ang pagbuhat sa kon unsay gusto sa amahan maoy bililhon. Bisan tuod ang ikaduhang anak lalaki nag-ingon nga dili siya moadto, siya miadto ug gidayeg tungod niana. Ang pagbuhat sa hustong matang sa buluhaton samang hinungdanon. Ang ikaduhang anak lalaki milihok pinaagi sa pagtrabaho sa parasan sa amahan; wala siya molakaw ug motrabaho sa iyang kaugalingong parasan.

Unsay gipakita niining tanan kanato? Unsay gikinahanglan sa Diyos sa mga magsisimba karong adlawa? Unsay atong makat-onan gikan sa kinabuhi ni Jesus nga motabang kanato sa pagbuhat sa kabubut-on sa iyang Amahan? Kini maoy hinungdanong mga pangutana, ug ang atong pagkaplag sa hustong mga tubag magkahulogan sa atong walay-kataposang kaayohan, sanglit “siya nga nagabuhat sa kabubut-on sa Diyos magpabilin sa walay kataposan.”​—1 Juan 2:17; Efeso 5:17.

Unsa ang “Kabubut-on sa Diyos”?

Ang nombreng “will” o “kabubut-on” gilista ug kapin sa 80 ka beses diha sa Comprehensive Concordance of the New World Translaton of the Holy Scriptures. Sa mga 60 niining higayona (o mga 75 porsiento) ang pagtumong maoy sa kabubut-on sa Diyos. Ang mga pahayag sama sa “kabubut-on sa Diyos,” “kabubut-on sa akong Amahan,” ug “iya sa Diyos nga kabubut-on” makita kapin sa 20 ka beses. Gikan niini makita nato nga ang balaang kabubut-on kinahanglang mao ang labing hinungdanon kanato. Ang pagbuhat sa kabubut-on sa Diyos kinahanglang mao ang pangunang buluhaton sa atong kinabuhi.

Sa Ingles ang nombreng “will” o “kabubut-on” nagkahulogang ‘tinguha, pangandoy, determinasyon, usa ka butang nga gitinguha, ilabinang usa ka pagpili o determinasyon sa usa nga adunay awtoridad o gahom.’ Busa, si Jehova, ang Supremong Awtoridad, adunay kabubut-on, usa ka tinguha o determinasyon. Unsa kana? Ang Kasulatan nagtug-an kanato nga sa bahin “ang kabubut-on [sa Diyos] mao nga ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:4) Si Jesu-Kristo ug ang unang mga Kristohanon nagbuhat nga bug-os kalag aron sa pagdala niining tukmang kahibalo ngadto sa uban.​—Mateo 9:35; Buhat 5:42; Filipos 2:19, 22.

Kinsay nagabuhat sa kabubut-on sa Diyos karong adlawa? Taliwala sa halos duha ka bilyong tawo nga nag-angkong sumusunod ni Jesu-Kristo, pila ang sama sa batan-ong anak lalaki sa ilustrasyon ni Jesus, kinsa milakaw ug mibuhat sa kabubut-on sa iyang amahan? Ang tubag dili lisod nga pangitaon. Ang tinuod nga mga sumusunod sa lakang ni Jesu-Kristo magabuhat sa buluhaton nga iyang giingon nga ilang buhaton: “Sa tanang kanasoran ang maayong balita kinahanglan nga mawali una.” (Marcos 13:10) Ang mga Saksi ni Jehova, nga ang gidaghanon maoy kapin sa upat ka milyon ug tunga sa tibuok kalibotan, aktibong nagasangyaw sa maayong balita sa Gingharian sa Diyos ug nagatudlo sa uban, nga nagapunting sa Gingharian ingong bugtong paglaom sa katawhan alang sa kalinaw ug kasegurohan. Ikaw ba nakig-ambit nga bug-os sa pagbuhat sa kabubut-on sa Diyos? Ikaw ba nagasangyaw sa maayong balita sa Gingharian sama sa gibuhat ni Jesus?​—Buhat 10:42; Hebreohanon 10:7.

Pagkaplag ug Kalipay Diha sa Pagbuhat sa Kabubut-on sa Diyos

Bisag adunay kalipay diha sa pagkat-on kon unsay kabubut-on sa Amahan, adunay dakong kalipay diha sa pagtudlo sa uban bahin sa kabubut-on sa Diyos. Si Jesus nakakaplag ug kalipay diha sa pagtudlo sa katawhan mahitungod sa iyang Amahan. Sama kana sa pagkaon alang kaniya. (Juan 4:34) Kita usab makapahimulos ug tinuod nga kalipay kon buhaton nato ang gihimo ni Jesus, nga mao, pagsangyaw ug pagtudlo sa mga butang nga iyang gitudlo, sa mga butang nga nadawat niya gikan sa iyang Amahan. (Mateo 28:19, 20) Sumala sa gisugo ni Jesus, “kon kamo nahibalo niining mga butanga, malipayon kamo kon ginabuhat ninyo kini sila.”​—Juan 13:17.

Sa pag-ilustrar: Usa ka inahan nga bag-o pang misulod pag-usab sa bug-os panahong ministeryo nag-ingon: “Makapahinam ang pagkakita sa nawong sa estudyante sa Bibliya nga mosanag sa dihang ang lainlaing mga kamatuoran sa Bibliya motandog sa kasingkasing! Nalipay kaayo ako nga nakita ang usa ka estudyanteng nagsulat nga pinakatay sa tanang kasulatan sa dili pa magtuon ug magnota panahon sa pagtuon aron nga siya makatubag sa bisan unsang repasong mga pangutana sa ulahi.” Ang lain pang estudyante niya sa Bibliya nakakontak sa kamatuoran sa batan-on pa kaayo siya. Karon nga naminyo na ug nabalaka bahin sa pila ka personal nga mga suliran, nangandoy siya nga makakaplag sa mga Saksi. Pagkamalipayon niya sa dihang ang payunir nga igsoong babaye nakakaplag kaniya! Ang batan-ong babaye nalipay sa pagtuon pag-usab sa Bibliya.

Paghupot ug Kalipay Diha sa Pagbuhat sa Kabubut-on sa Diyos

Si Haring David sa karaang Israel maoy usa nga naningkamot sa pagbuhat sa kabubut-on sa Diyos sa tibuok niyang kinabuhi. Bisan pa sa daghang kalisdanan ug mga pagpit-os nga gipahinabo batok kaniya, siya nadasig sa pag-ingon: “Sa pagbuhat sa imong kabubut-on, Oh Diyos ko, ako nalipay, ug ang imong balaod anaa sa sulod nako.” (Salmo 40:8) Ang pagbuhat sa kabubut-on ni Jehova anaa sa kalag ni David, sa iyang pagkatawo. Mao kana ang sekreto sa iyang dili molubad nga kalipay diha sa pag-alagad kang Jehova. Ang pagbuhat sa kabubut-on sa Diyos dili malisod alang kang David. Hinunoa, kadto maoy kalipay, usa ka butang nga naggikan sa iyang kasingkasing. Sa tibuok niyang kinabuhi, siya nakigbisog sa pagbuhat sa iyang kinamaayohan diha sa pag-alagad sa iyang Diyos, si Jehova, bisan tuod nga usahay siya nakasala ug nasayop.

Usahay, ang atong kalipay mahanaw. Tingali kita kapoyon o maguol. Tingali ang atong kagahapon magpahinabog suliran kanato, ang atong konsensiya maghasol kanato gumikan sa sayop nga nahimo dugay na kanhi. Kasagaran, mabuntog nato kining mga pagbatia pinaagi sa mas bug-os nga pagtuon sa Pulong sa Diyos. Mahimo natong tumong ang pagsulat sa balaod sa Diyos diha sa atong “kinasulorang bahin,” sama sa gihimo ni David. Kon maningkamot kita sa pagbuhat sa kabubut-on sa Diyos nga bug-os kalag, nga mao, sa kinamaayohan nga atong maarangan, siya magaganti kanato tungod kay siya matinumanon.​—Efeso 6:6; Hebreohanon 6:10-12; 1 Pedro 4:19.

Makaiikag, sa Hebreohanon 10:5-7, si apostol Pablo nagkutlo sa mga pulong ni David sa Salmo 40:6-8 ug nagpadapat niini kang Jesu-Kristo. Sa pagbuhat niana, si Pablo nagpunting kon unsa kasuod si Jesus sa iyang Amahan. Ang Hebreohanong pulong alang sa “kabubut-on” naglangkit sa mga ideya sa ‘kalipay, tinguha, pabor, o kahimuot.’ Busa, ang Salmo 40:8 mahimong mabasa bahin kang Kristo: “Sa paghimo sa imong gikahimut-an, Oh Diyos ko, ako nalipay.”a Si Jesus buot nga mohimo kon unsay makapahimuot sa iyang Amahan. Si Jesus misaylo pa sa pagbuhat kon unsay gipabuhat kaniya. Gibuhat niya kon unsay haduol sa kasingkasing sa iyang Amahan, ug siya nalipay sa pagbuhat niana.

Ang tibuok kinabuhi ni Jesus nagugol diha sa pagsangyaw sa uban kon unsa ang kabubut-on sa Diyos ug kon unsay kinahanglan nilang buhaton aron makabaton sa panalangin sa Diyos. Siya maoy bug-os-panahong magsasangyaw ug magtutudlo ug nakakaplag ug dakong kalipay sa pagbuhat nianang buluhatona. Busa ang makataronganong sangpotanan mao nga kon labi pa natong gibuhat ang buluhaton ni Jehova, labaw pang kalipay ang atong madawat. Ikaw ba usab makaalagad nga bug-os panahon diha sa pagsangyaw nga buluhaton aron nga ang imong kalipay molambo usab?

Ang dugang tabang sa paghupot sa kalipay diha sa pagbuhat sa kabubut-on sa Diyos mao ang pagtutok pag-ayo sa umaabot. Mao kana ang gibuhat ni Jesus. “Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw.” Alang kaniya, ang kalipay mao ang pagpabiling matinumanon sa Diyos hangtod sa kataposan ug unya makaangkon sa ganti nga pagkahari sa tuong kamot sa iyang Amahan.​—Hebreohanon 12:2.

Hunahunaa ang umaabot nga kalipay nga modangat niadtong padayong magahimo sa kabubut-on sa Diyos. Makita nila ang kalaglagan niadtong moinsister sa pagbuhat sa ilang kaugalingong hakog nga kabubut-on bisan pag kini makapahinabog pag-antos niadtong naningkamot sa pagbuhat sa kabubut-on sa Diyos. (2 Tesalonica 1:7, 8) Hunahunaa ang kalipay sa binanhawng mga minahal sa kinabuhi nga makabaton ug kahigayonan sa pagkat-on ug sa pagbuhat sa kabubut-on sa Diyos. O tagda ang katuyoan sa Diyos nga ipasig-uli ang yuta ngadto sa Paraiso. Ug sa kataposan, hunahunaa ang kagawasan nga moresulta gikan sa bug-os nga paglaglag kang Satanas, ang magsusupak sa kabubut-on ni Jehova.

Oo, ang pagbuhat sa kabubut-on sa Diyos karong adlawa makadalag dakong kalipay karon ug walay-kataposang kalipay sa umaabot. Bisan kon unsa man ang sanong nga atong madawat diha sa pagsangyaw nga buluhaton, sundogon nato ang panig-ingnan ni Jesus diha sa pagkalipay sa pagbuhat sa kabubut-on sa iyang Amahan.

[Mga footnote]