Mga Batan-on nga Nagalipay sa Kasingkasing ni Jehova
“Lipaya ang akong kasingkasing, aron matubag ko siya nga nagatamay kanako.”—PROVERBIO 27:11.
KON nakaamgo ka o wala, ang imong paagi sa kinabuhi makahatag ug kalainan. Pananglitan, kini makahatag ug kalainan alang sa imong mga ginikanan. “Ang usa ka anak nga manggialamon mao ang mohimo sa usa ka amahan nga malipayon,” ang Bibliya nagasaysay, “ug ang anak nga buangbuang mao ang kasubo sa iyang inahan.” (Proverbio 10:1; 23:24, 25) Apan labi pang hinungdanon, ang imong paagi sa kinabuhi makahimo sa atong Maglalalang, si Jehova nga Diyos, nga malipayon kaha o masulob-on. “Magmaalamon ka, anak ko,” si Jehova nagaawhag, “ug lipaya ang akong kasingkasing, aron akong matubag ang nagatamay kanako.”—Proverbio 27:11.
2. Unsang hinungdanong isyu ang gipatungha ni Satanas, ug sa unsang paagi kita nalangkit?
2 Siyempre, ang nagatamay kang Jehova mao si Satanas nga Yawa. Sa tanaman sa Eden, gipatungha ni Satanas ang usa ka hinungdanong isyu nga kinahanglang tubagon sa Diyos. Dihang, uban sa dayag nga kasayon, ang Yawa nakapahinabo nga si Eva, ug dayon si Adan, molapas sa kasugoan sa Diyos, adunay ebidensiya nga iyang gihagit si Jehova. Sa pagkamatuod, si Satanas nagpatuo: ‘Hatagi lamang akog higayon ug akong mapatalikod ang tanan sa pag-alagad kanimo.’ (Job 1:6-12) Busa, gihimo ni Jehova ang madasigong hangyo nga nahitala sa ibabaw, nga ihatag Kaniya sa iyang anak ang “usa ka tubag” aron Siya makatubag sa hagit ni Satanas.
3 Apan kang kinsa, sa linain, gitumong ni Jehova ang maong hangyo, nga nagtawag kaniyang “anak ko”? Si Jesu-Kristo sa talagsaong paagi anak sa Diyos, nga mao ang iyang bugtong Anak. (Juan 1:14) Dugang pa, gawas kang Adan, kinsa nagpakyas sa iyang Maglalalang, si Jesus mao ang bugtong hingpit nga tawo nga nakalakaw sa yuta, busa ang bugtong tawong arang makapamatuod sa hingpit nga diwa sa pagpabiling matinumanon ngadto sa Diyos. (1 Corinto 15:45) Sa ingon ang hangyo ni Jehova mapadapat ilabina kang Jesus. Ug wala pakyasa ni Jesus ang iyang Amahan. Pinaagi sa matinumanon niyang dalan, gihatag ni Jesus sa Diyos ang tubag sa mapasigarbohong hagit ni Satanas nga ang mga tawo dili mag-alagad Kaniya nga matinumanon dihang pagasulayon. (Hebreohanon 2:14; 12:2) Dugang pa, ang tanang maghari uban ni Kristo sa langit makalipay usab sa kasingkasing ni Jehova pinaagi sa ilang pagkamatinumanon ngadto sa Diyos bisan hangtod sa kamatayon.—Pinadayag 2:10.
4. Kon magahukom kon unsay buhaton sa imong kinabuhi, unsang hinungdanong butang ang angay nimong tagdon?
4 Apan komosta kita karong adlawa, apil kamong mga batan-on? Nalangkit ba kamo niining isyu kon kaha ang mga tawo magmatinumanon sa Diyos o dili? May lain pa! (Salmo 147:11; 148:12, 13) Tingali kamo wala makaamgo niana, apan ang inyong ginabuhat sa inyong kinabuhi mahimong nagapaluyo sa kiliran sa Diyos o sa kiliran ni Satanas. Kini mahimong nagalipay kang Jehova o kang Satanas. Sa pagkamatuod, ang pagdapit o hangyo ni Jehova maisip nga gitumong kaninyo sa personal: “Magmaalamon ka, anak ko [o anak babaye], ug lipaya ang akong kasingkasing, aron ako makatubag kaniya nga nagatamay kanako.” (Proverbio 27:11) Dili ba ang paglipay sa kasingkasing sa inyong Maglalalang usa ka makapatagbawng tumong nga inyong batonan?
Kon Nganong Kini Maalamon
5. Nganong maalamon nga lipayon ang kasingkasing ni Jehova?
5 Matikding si Jehova nagadasig, “Magmaalamon.” Nganong kita maalamon kon kita nagalipay sa kasingkasing ni Jehova? Tungod kay si Jehova usa ka mahigugmaong Amahan nga nagatinguha sa labing maayo alang kanato, ug ang bisan unsang iyang ginapabuhat kanato maoy alang sa atong kaayohan. Sumala sa ginaingon sa Isaias 48:17, ug 18: “Ako, si Jehova, mao ang imong Diyos, ang Usa nga nagatudlo kanimo sa pagpahimulos, ang Usa nga nagapasubay kanimo sa dalan nga imong pagalaktan. Oh kon unta ikaw magapatalinghog sa akong mga sugo! Unya ang imong pakigdait mahisama sa usa ka suba, ug ang imong pagkamatarong sama sa mga balod sa dagat.”
6. (a) Unsay nagapakitang buot ni Jehova nga ikaw magkalipay sa kinabuhi? (b) Unsang mga sangpotanan ang dili nimo kalikayan?
6 Ingong mahigugmaong ginikanan, buot ni Jehova nga kamo bug-os magpahimulos sa iyang bililhong gasa sa kinabuhi. Busa siya nagaingon: “Magkalipay ka, batan-ong lalaki, sa imong pagkabatan-on, ug ipabuhat sa imong kasingkasing ang maayo nganha kanimo sa mga adlaw sa imong pagkabatan-on, ug lakaw sa mga dalan sa imong kasingkasing ug sa mga butang nakita sa imong mga mata.” Karon kini, hinuon, dili pagdapit sa pagbuhat sa bisan unsang butang makalingaw nga buot nimo. Kini gipakita sa mosunod nga pahimatngon: “Apan hibaloi nga tungod niining tanan ang matuod nga Diyos magahukom kanimo.” (Ecclesiastes 11:9) Oo, dili ka makalikay sa mga resulta sa imong mga lihok; singlon ka sa Diyos sa imong ginabuhat. Ang lagda tino: “Bisan unsa ang ginapugas sa usa ka tawo, kini iya usab nga pagaanihon.”—Galacia 6:7.
7, 8. (a) Sa unsang paagi imong makuha ang kaguol ug ikapahilayo ang kadaotan? (b) Kanus-a ang pagkabatan-on ug banagbanag sa kinabuhi kakawangan?
7 Tungod niini, si Jehova nagadugang: “Busa kuhaa ang kaguol [o hinungdan sa kabalaka] gikan sa imong kasingkasing, ug ipahilayo ang kadaotan gikan sa imong unod; kay ang pagkabatan-on ug ang banagbanag sa kinabuhi kakawangan man.” (Ecclesiastes 11:10) Tinong maalamon ang paglikay sa mga kalihokang makapahinabog makaguol nga mga suliran sa ulahi. Aw, anaa kadtong magaingong ikaw maalkansi—nga ikaw wala ‘tinuod magkinabuhi’ gawas ikaw maghuboghubog, magbatog imoral nga sekso, o magbuhat sa ubang “mahagitong” buhat. Apan pagkahungog nila! “Dili gayod kadto takos,” ang naghilak nga batan-ong estudyante nagmahay tapos makahimog pakighilawas. “Ako mabalak-on sukad niadto.”
8 Busa kamong mga batan-on, maalamong magpatalinghog sa tambag sa Diyos sa pagkuha gikan sa inyong kasingkasing sa bisan unsang hinungdan sa kabalaka o pagbasol, sama sa nasinati sa mga batan-ong nagasunod sa dinanghag o mahakogong pagkinabuhi. Ang usa ka ika-17ng-siglong magsusulat miingon: “Ang kinabag-ang katawhan nagagamit sa una nilang katuigan aron himoon ang kataposan nilang katuigan nga timawa.” Tinuod, apan pagkamakapasubo! Dihang ang usa ka batan-on mag-usik-usik sa iyang lawasnong mga kusog ug mga katakos sa paaging ang iyang katuigan sa pagkahamtong sa ulahi mahimong lisod, ang iyang pagkabatan-on ug banagbanag sa kinabuhi tinuod nga kakawangan! (Proverbio 22:3) Busa magmaalamon! Sunda ang dugang tambag: “Hinumdomi, karon, ang inyong Dakong Maglalalang sa mga adlaw sa inyong pagkabatan-on.”—Ecclesiastes 12:1.
9. Unsang mga kaayohan ang imong mapahimuslan pinaagi sa paghinumdom kang Jehova sa imong pagkabatan-on?
9 Pinaagi sa paghinumdom kang Jehova sa imong pagkabatan-on, ikaw makahatag gayod ug kaayohan sa imong kaugalingon. Dili lamang imong malikayan ang kaguol ug makadaot nga mga suliran apan imong mapahimuslan karon mismo ang malipayon, magantihong kinabuhi sa pag-alagad sa imong Dakong Maglalalang. Dugang pa, maalamon kang magatigom ug bahandi sa langit nga makahatag nimog kaayohan hangtod sa kahangtoran. (Mateo 6:19-21) Kon imong hinumdoman karon si Jehova pinaagi sa pagbuhat sa iyang kabubut-on, iya kang hinumdoman ug gantihan ka sa “mga hangyo sa imong kasingkasing,” oo, usa ka malipayon, tugob nga kinabuhi sa Paraiso sa walay kataposan!—Salmo 37:4; 133:3; Lucas 23:43; Pinadayag 21:3, 4.
Unsay Imong Pagbati Bahin Kang Jehova?
10. (a) Nganong ang imong desisyon sa pag-alagad sa Diyos dili mahimong mabugnawong pagtulotimbang kon unsay maalamon? (b) Unsa pa ang gipangayo ni Jehova?
10 Apan ang imong desisyon sa pag-alagad kang Jehova dili mahimong mabugnawong pagtulotimbang lamang kon unsay maalamon. Si Satanas maoy malalangon kaayong kaaway nga kon ang imong gihunahuna mao lamang ang imong kaugalingong kaayohan, sa kataposan siya makapahimulos sa hakog nga hilig aron ikaw mahilayo sa pag-alagad kang Jehova. Busa si Jehova dili lamang magdapit kanimo nga magmaalamon. Dili, apan siya nagapangayo usab sa personal nga pagpahinungod ngadto kaniya. Matud ni Jesus: “Higugmaon mo si Jehova nga imong Diyos sa bug-os mong kasingkasing.” (Mateo 22:37) Nasayod ka ba kon unsay kahulogan sa paghigugma kang Jehova sa tibuok kasingkasing?
11. (a) Unsay ipasabot sa paghatag sa imong kasingkasing kang Jehova? (b) Sa unsang paagi ang kasinatian ni Jose nagailustrar sa unsang paagi ang tukmang panukmod sa kasingkasing makatukmod kanato sa pagbuhat sa kabubut-on sa Diyos?
11 Ang imong kasingkasing nagpasabot sa imong pagkamao sa kahiladman, imong mga motibo, imong mga tinamdan, ug imong halalom nga mga emosyon uban sa imong mga katakos sa panghunahuna. Busa ang paghigugma kang Jehova uban sa bug-os mong kasingkasing nagkahulogan nga imo siyang higugmaon sa halalom ug labaw sa tanang butang sa kinabuhi imong palabihon ang paglipay sa iyang kasingkasing pinaagi sa pagtagana kaniyag tubag sa pagtamay ni Satanas. Ang maong pagsabot sa kahiladman ug lalom nga mga pagbati sa gugma ug kabalaka sa Diyos motagana kanimo sa labing kusganong panukmod sa pagbuhat sa iyang kabubut-on, bisan pag morag makapadani ang pagbuhat sa lahi niana. Ang batan-ong si Jose dulot nahigugma kang Jehova, busa sa midapit ang usa ka babayeng ilado: “Higda uban kanako,” si Jose mitubag: “Sa unsang paagi ako makabuhat niining dakong pagkadaotan ug makasala batok sa Diyos?”—Genesis 39:7-9.
12. (a) Sa unsang paagi imong ginapakita nga imong gihatag ang imong kasingkasing kang Jehova? (b) Kon wala pa nimo ikahatag ang imong kasingkasing kang Jehova, unsang mga pangutana ang angay nimong tagdon?
12 Imong ipakita nga imong gihigugma si Jehova sa bug-os mong kasingkasing dihang modangop ka kaniya diha sa pag-ampo ug sultihan mo siyang buot nimong mahimong iyang sakop, nga buot nimo siyang alagaron sa walay kataposan. Sa maong paagi imong ipahinungod ang imong kaugalingon kang Jehova. Nahimo na ba nimo kini? Kon wala, nganong wala man? Unsay nagapugong kanimo? Ikaw anaa ba sa igong pangedaron sa pagsabot ug pag-ila sa dakong isyu tali ni Jehova ug ni Satanas? Ug buot ba nimong lipayon ang kasingkasing ni Jehova? Tinong dili buot ni Satanas nga imong higugmaon si Jehova sa bug-os mong kasingkasing. Buot niyang sa kamahakogon imong “buhaton kon unsay imong gusto,” sa pagpahimuot sa imong kaugalingon. Kinsay imong lipayon, si Jehova o si Satanas? Hatagi kinig ugdang nga pamalandong.
13. Kon ikaw dedikado ug bawtismado, unsang mga pangutana ang imong ipangutana sa imong kaugalingon?
13 Kon nakapahinungod ka sa imong kaugalingon sa Diyos ug nagpasimbolo niana pinaagi sa bawtismo sa tubig, ang imong paagi sa kinabuhi nagapasundayag ba nga ang imong kasingkasing iya gayod sa Diyos? Diin ba nasentro ang imong mga interes, imong mga pagbati? sa pagbatog bag-ong kotse? sa pagpanapi aron ipalit ug mga sinina o ubang personal nga butang? Kansang mga interes ang mauna—ang imoha o kang Jehova? Tinuod bang misanong ka sa hangyo ni Jehova nga ihatag mo ang imong kasingkasing kaniya?
14. (a) Unsang bililhong hiyas ang nabatonan sa mga batan-on? (b) Nganong makapasubo kon ang usa ka batan-on dili maghinumdom sa iyang Maglalalang?
14 Samtang ang mga gulanggulang may labawng kasinatian ug sa linangkob labaw ug kaalam, ang mga batan-on may bililhong hiyas nga ilang magamit sa pagpahimuot sa Diyos. “Ang katahom sa mga batan-ong lalaki mao ang ilang kusog,” nagaingon ang Bibliya. (Proverbio 20:29) Busa gamita kanang kusoga karon. Hinumdomi ang imong Maglalalang “sa dili pa ang daotang mga adlaw” sa pagkatigulang “moabot,” dihang maluya ang lawas ug madaot ang mga organo ug dili na moobra sa tukma. Pagkamakapasubo nga ang usa ka tawo mapakyas sa paghinumdom sa iyang Maglalalang sa iyang pagkabatan-on ug busa sa pagkatigulang walay ikarekomendar sa iyang kaugalingon ngadto sa Diyos! Kini “ang labing dakong kakawangan!” (Ecclesiastes 12:1-8) Busa, pagkamaalamon ang paghinumdom sa imong Maglalalang samtang ikaw may kusog ug kalagsik. Ugmara ang rekord sa matinumanong pag-alagad sa Diyos, nga maghinumdom kanimo uban ang paborableng hukom, oo, sa kinabuhing walay kataposan.—Hebreohanon 6:10-12; Ecclesiastes 12:13, 14.
Ilang Gilipay ang Kasingkasing sa Diyos
15. Unsa ang mga panig-ingnan sa Bibliya sa mga batan-ong migamit sa ilang kusog sa pag-alagad sa Diyos?
15 Ang Bibliya punog mga panig-ingnan sa mga batan-on nga migamit sa ilang “katahom”—ang ilang kusog—diha sa pag-alagad sa Diyos. Ang “mga batan-ong lalaki” nga maabtik ug mapiskay mao ang nangespiya sa Yutang Saad. (Josue 6:22, 23; 2:15, 16, 23) Si David, samtang bayentehon pa mismo, nagpadala ug “napulo ka batan-ong lalaki” sa usa ka misyon sa paghimo sa usa ka hangyo kang Nabal. (1 Samuel 25:4, 5) Sa gitukod sa mga Hudiyo ilalom sa gobernador nga si Nehemias ang mga paril sa Jerusalem samtang nailalom sa hulga nga atakehon, kinsa ang mihimo sa peligroso, lisod nga trabaho? “Katunga sa akong mga batan-ong lalaki,” misaysay si Nehemias, “aktibo sa buluhaton ug katunga kanila nagkupot sa mga bangkaw, sa mga kalasag ug mga busogan ug mga biste sa gubat.” (Nehemias 4:16) Ug sa gipatay sa Diyos si Ananias ug ang iyang asawa si Sapira tungod kay sila namakak, “mga batan-ong lalaki” ang nagdala kanila sa gawas ug naglubong kanila.—Buhat 5:5, 6, 10.
16. Unsang espirituwal nga buluhaton ang giapilan sa mga batan-on sa nangagi?
16 Dihang ang mga batan-on maghimo sa ilang kaugalingon nga andam alang sa bisan unsang pag-alagad nga gikinahanglan sa usa ka panahon malipay gayod ang kasingkasing ni Jehova. Bisan pa niana ang mga batan-on nalangkit sa espirituwal nga buluhaton nga labaw pa kay sa lawasnong kusog ug lahutay ang gikinahanglan. “Ako batan-on sa mga adlaw,” miangkon si Eliu. Bisan pa niana, gigamit siya ni Jehova sa pagtul-id kang Job. (Job 32:4-6) Si Samuel usa lamang ka “bata” sa misugod siya sa pag-alagad sa tabernakulo ni Jehova sa Shilo. (1 Samuel 2:18) “Usa ka batang babaye” si kinsa, bisan pag usa ka ulipon sa balay ni Naaman, ang maisogong mimantala kon unsay mahimo sa manalagna ni Jehova. (2 Hari 5:2-4) Sa giasayn ni Jehova si Jeremias ingong manalagna, si Jeremias miingon: “Ako usa lamang ka bata.” (Jeremias 1:5, 6) “Ug mahitungod niining mga bataa, nga upat sila”—si Daniel ug ang tulo niya ka Hebreohanong kauban—pagkatalagsaon silang mga alagad ni Jehova nga binihag didto sa Babilonya! (Daniel, kapitulo 1 ug 3) Ang pag-umangkon ni Pablo, usa ka “batan-ong lalaki,” maisogong milihok sa kaayohan sa iyang uyoan. (Buhat 23:16-22) Unya diha ang batan-ong si Timoteo, kinsa sukad sa pagkabata nahibalo sa balaang mga sinulat ug gigamit ang iyang pagkabatan-on sa pag-alagad kang Jehova.—2 Timoteo 3:15; Filipos 2:19-23; 1 Corinto 4:17.
Paglipay sa Kasingkasing sa Diyos Karong Adlawa
17. Nganong dahomon ang pagkakitag mga batan-on karong adlawa nga nagapahimuot kang Jehova, ug kita ba nagahimo niana?
17 Apan dili lamang ang mga batan-on sa nangagi ang naglipay sa kasingkasing sa Diyos pinaagi sa ilang matinumanong pag-alagad. “‘Sa kataposang mga adlaw,’ ang Diyos nag-ingon, ‘akong ibubo ang akong espiritu ibabaw sa tanang matang sa unod, ug ang imong mga anak lalaki ug imong mga anak babaye managna ug ang imong mga batan-ong lalaki makakitag mga panan-awon.’” (Buhat 2:17; Joel 2:28) Busa tukmang atong laomang hikaplagan niining kataposang mga adlaw ang daghang batan-ong Kristohanon nga nagapahimuot kang Jehova. Ug hikaplagan gayod nato! Bisan tuod ang batan-ong mga Saksi dili ingong walay sala, maingon nga walay mausa kanato ang walay sala, daghan ang maayo kaayog kahimtang ingong mga Kristohanon. Sila mabalak-on sa paglipay sa kasingkasing ni Jehova.—Proverbio 27:11; 3:1, 2.
18 Niining kataposang mga adlaw, ang kabubut-on ni Jehova mao nga igahatag ang dakong tibuok-yutang pamatuod mahitungod sa iyang Gingharian, nga naglangkit sa dako kaayong paningkamot. (Mateo 24:14) Ang mga Kingdom Hall alang sa pagsimba kinahanglang tukoron, ingon man ang mas dagkong mga tinukod alang sa sirkitong mga asembliya. Sa daghang nasod, gikinahanglan ang dugang lugar sa pabrika alang sa pagpatik ug basahon sa Bibliya, ingon man dugang puy-anan sa mga balayng Bethel. Sa pagtagana niining bag-ong mga tinukod gikinahanglan ang pakusog nga trabaho sa konstruksiyon, ug sama sa pagtukod sa paril sa adlaw ni Nehemias, ang mga batan-ong may kusog ug lahutay maoy nagabuhat sa kinadak-ang trabaho.
18, 19. Unsang buluhaton ang kinahanglang mabuhat karong adlawa, ug nganong ang mga batan-on nahiangay kaayo niana?
19 Ang maong mga batan-on nagabuhat usab sa kinadak-ang bahin sa bug-at pakusog nga trabaho nga gikinahanglan sa pag-imprenta, pagtahi, ug pagpadala sa barko sa libolibong tonelada nga basahon sa Bibliya kada tuig. Ngani, sa hedkuwarter sa mga Saksi ni Jehova sa New York, apil ang Watchtower nga Umahan, adunay kapin sa 1,400 ka batan-ong 25 anyos sa edad ug bata pa. Ug ang ilang pag-alagad dili limitado sa pakusog nga mga trabaho nga ilang ginabuhat sulod sa semana; sa mga hinapos sa semana sila nagaapil sa balay-balay nga pagsangyaw ug sa Kristohanong mga tigom uban sa lokal nga mga kongregasyon. Ginalipay gayod nilag dako ang kasingkasing ni Jehova!
20. (a) Unsa ang bahin sa mga batan-on sa payunir nga ministeryo? (b) Unsang mga pangutana ang isukna sa ilang kaugalingon sa mga batan-ong wala pa sa bug-os-panahong ministeryo?
20 Sa Tinipong Bansa, nagabuhat nga abaga por abaga uban niining mga batan-ona mao ang kapin ug 12,700 pang ubang batan-ong samag edad nga nagaalagad nga regular payunir nga mga ministro. Sa ubang bahin sa kalibotan, ang dugang tinagpulo ka libong batan-on nagapayunir usab. Kon ikaw batan-on nga wala pa mosulod sa bug-os-panahong ministeryo, mahimo ba nimong tumong sa imong kaugalingon ang pagbutang kang Jehova nga una sa imong kinabuhi, inay kay yanong magplano sa pagbatog dakog-suweldong sekular nga trabaho, unya maminyo ug magpamilya? Nasabtan ba nimo ang dakong unibersohanong isyu? Gipangandoy mo ba gayod nga makitang ang ngalan sa atong Dakong Maglalalang mahinloan sa tanang pakaulaw? Kon mao, nan dili ba tukmang imong buhaton ang imong maarangan diha sa pag-alagad kang Jehova? Ug dili ba kana mag-apil, sa labing menos daghan pa kaninyo, sa pagboluntaryo sa pag-alagad sa mga balayng Bethel o pagsulod sa payunir nga buluhaton?
21. (a) Sa unsang pagdapit gikan kang Jehova nga angay kang mosanong, ug sa unsang paagi? (b) Nganong kita makasalig nga daghan pang batan-on ang mosanong sa pagdapit ni Jehova sama kang Isaias?
21 Pamati! Si Jehova nagadapit kaninyo, oo, nagahangyo kaninyo, nga itagana ninyo kaniya ang usa ka tubag sa daotang mga pagtamay ni Satanas. Kamo ba, sama kang Isaias, nakadungog nga si Jehova nangutana: “Kinsay akong ipadala, ug kinsa ang moadto alang kanamo?” Nganong dili magmaalamon ug motubag sama sa gitubag ni Isaias: “Ania ako! Ipadala ako.” (Isaias 6:8) Kita masaligong daghan pa kaninyong mga batan-on ang mosanong tungod kay ang Pulong sa Diyos nagasaad: “Ang imong katawhan magatanyag sa ilang kaugalingon nga kinabubut-on sa adlaw sa imong gahom militaryo. . . . Ikaw may kaubang mga batan-on nga mga lalaki [ug mga babaye] samag mga yamog.” (Salmo 110:3; 148:12, 13) Ug kon kamo mosanong, mabatonan ninyo ang kalipay sa pagkahibalo nga si Jehova nakakita ug nagauyon—nga kamo nagalipay sa Iyang kasingkasing!
KAHON SA PAGSUBLI
◻ Nganong ang atong paagi sa pagkinabuhi hinungdanon kang Jehova?
◻ Nganong maalamon ang paglipay sa kasingkasing ni Jehova?
◻ Sa unsang paagi atong ikapakita nga atong gihatag ang atong kasingkasing kang Jehova?
◻ Kinsa sa nangagi ang naglipay sa kasingkasing ni Jehova, ug sa unsang paagi?
◻ Kinsa ang nagalipay sa kasingkasing ni Jehova karong adlawa, ug sa unsang paagi?
1. Sa unsang paagi ang atong mga ginikanan ug atong Maglalalang apektado sa atong paagi sa kinabuhi?
3. Nganong ang hangyo ni Jehova mapadapat ilabina kang Jesus, ug kinsa pa ang nagalipay sa kasingkasing sa Diyos?
[Blurb sa panid 17]
Kon lapason sa mga batan-on ang mga kasugoan sa Diyos, anihon nila ang mapait nga mga bunga sa ulahi
[Hulagway sa panid 18]
Ang mga batan-on naglipay sa kasingkasing sa Diyos pinaagi sa pagtabang pagtukod pag-usab sa mga paril sa Jerusalem