Unsa ka Malangkobon ang Imong Gugma?

“Higugmaon mo gayod ang imong silingan sama sa imong kaugalingon.”—MATEO 22:39.

 1.Kon atong gihigugma si Jehova, nganong kinahanglan usab natong higugmaon ang atong silingan?

SA DIHANG gipangutana si Jesus kon unsa ang labing dako sa kasugoan, siya mitubag: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” Dayon, iyang gikutlo ang ikaduhang sugo nga sama sa unang sugo: “Higugmaon mo gayod ang imong silingan sama sa imong kaugalingon.” (Mateo 22:37, 39) Oo, ang paghigugma sa silingan maoy usa ka timaan sa Kristohanon. Sa pagkatinuod, kon atong gihigugma si Jehova, atong higugmaon gayod ang atong silingan. Ngano? Tungod kay atong ipasundayag ang atong gugma sa Diyos pinaagi sa pagtuman sa iyang Pulong, ug ang iyang Pulong nagsugo kanato sa paghigugma sa atong silingan. Busa, kon kita wala mahigugma sa atong mga igsoong lalaki ug mga igsoong babaye, ang atong gugma sa Diyos dili tinuod.—Roma 13:8; 1 Juan 2:5; 4:20, 21.

 2. Unsang matanga sa gugma ang angay natong bation sa atong silingan?

² Sa dihang si Jesus miingon nga atong higugmaon gayod ang atong silingan, siya naghisgot ug labaw pa kay sa panaghigalaay. Ug siya nagpunting sa usa ka gugma nga lahi nianang natural nga bation sa mga pamilya o tali sa usa ka lalaki ug usa ka babaye. Siya naghisgot bahin sa matang sa gugma nga gibati ni Jehova alang sa iyang dedikadong mga alagad ug nianang ilang gibati alang kaniya. (Juan 17:26; 1 Juan 4:11, 19) Usa ka Hudiyohanong eskriba—kinsa, sumala sa nasabtan ni Jesus, maalamong namulong—miuyon kang Jesus nga ang gugma sa Diyos kinahanglang uban “sa tibuok kasingkasing ug sa tibuok pagpanabot ug sa tibuok kusog.” (Marcos 12:28-34) Husto siya. Ang gugma nga ugmaron sa Kristohanon alang sa Diyos ug sa silingan naglangkit sa atong mga pagbati ug sa atong pagpanabot. Kini bation sa kasingkasing ug giniyahan sa kaisipan.

 3.(a) Sa unsang paagi gitudloan ni Jesus ang usa ka “tawo nga batid sa Balaod” nga siya angayng magbaton ug malukpanong hunahuna kon kinsa ang iyang silingan? (b) Sa unsang paagi ang ilustrasyon ni Jesus aplikado sa mga Kristohanon karong adlawa?

³ Sumala sa gitaho ni Lucas, sa dihang miingon si Jesus nga atong higugmaon gayod ang atong silingan, “usa ka tawo nga batid sa Balaod” nangutana: “Kinsa ba gayod ang akong silingan?” Si Jesus mitubag pinaagig usa ka sambingay. Usa ka tawo ang gikulata, gikawatan, ug gibiyaan nga himalatyon diha sa daplin sa dalan. Una usa ka saserdote ug unya usa ka Levihanon ang miagi. Silang duha wala magtagad kaniya. Sa kataposan, usa ka Samarianhon miagi, nakakita sa tawong nasamdan, ug milihok nga maluloton kaayo kaniya. Hain sa tulo ang silingan sa tawong nasamdan? Dayag ang tubag. (Lucas 10:25-37) Ang tawo nga batid sa Balaod tingali nakurat sa nakadungog kang Jesus nga miingon nga ang Samarianhon mas maayong silingan kay sa saserdote ug sa Levihanon. Tin-aw, gitabangan ni Jesus kadtong tawhana sa paghigugma sa iyang silingan sa mas malangkobon nga paagi. Ang mga Kristohanon usab nahigugma sa samang paagi. Palandonga ang tanan niadtong nalakip sa ilang gugma.

Gugma Sulod sa Pamilya

 4. Una sa tanan, asa ipasundayag sa Kristohanon ang gugma?

⁴ Ang mga Kristohanon nahigugma sa ilang mga membro sa pamilya—mga asawa nahigugma sa mga bana, mga bana nahigugma sa mga asawa, mga ginikanan nahigugma sa mga anak. (Ecclesiastes 9:9; Efeso 5:33; Tito 2:4) Tinuod, ang mga bugkos sa kinaiyanhong gugma bation sa kadaghanang mga pamilya. Apan, ang mga taho bahin sa nabungkag nga mga kaminyoon, pag-abuso sa kapikas, ug pagpasagad o pag-abuso sa mga anak nagpakita nga ang pamilya napit-os karong panahona, ug ang kinaiyanhong pagbati sa pamilya basin kulang aron kini makapabiling nahiusa. (2 Timoteo 3:1-3) Aron mahimong malamposon ang ilang pamilyahanong kinabuhi, gikinahanglan sa mga Kristohanon nga ipasundayag ang matang sa gugma nga gibati ni Jehova ug Jesus.—Efeso 5:21-27.

 5. Ngadto kang kinsa makapangayo ug tabang ang mga ginikanan sa pagmatuto sa ilang mga anak, ug unsay gisangpotan sa kadaghanan?

⁵ Ang Kristohanong mga ginikanan nag-isip sa ilang mga anak ingong sinalig ni Jehova kanila, ug siya ang ilang kapangayoan ug tabang sa pagmatuto kanila. (Salmo 127:3-5; Proverbio 22:6) Niining paagiha ilang giugmad ang Kristohanong gugma, nga makatabang kanila sa pagpanalipod sa ilang mga anak batok sa makadaot nga mga impluwensiya nga niini mabiktima ang mga batan-on. Tungod niini, daghang Kristohanong mga ginikanan nakasinati sa kalipay nga sama nianang sa usa ka inahan sa Netherlands. Human makakita sa pagbawtismo sa iyang anak nga lalaki—usa sa 575 ka tawo nga nabawtismohan sa Netherlands sa miaging tuig—siya misulat sa mosunod: “Niining higayona, nabaslan ra ang akong gihagoan sulod sa 20 ka tuig. Ang tanang panahon ug kusog—maingon man ang kasakit, paningkamot, ug kaguol—karon nakalimtan na.” Pagkadako sa iyang kalipay nga ang iyang anak mipili sa pag-alagad kang Jehova sa iyang kaugalingong pagbuot. Ang kinatas-ang ihap nga 31,089 ka magmamantala nga nagtaho sa Netherlands sa miaging tuig naglakip ug daghan niadtong nakakat-on gikan sa ilang mga ginikanan sa paghigugma kang Jehova.

 6. Sa unsang paagi ang Kristohanong gugma makatabang sa pagpalig-on sa bugkos sa kaminyoon?

⁶ Gitawag ni Pablo ang gugma nga “usa ka hingpit nga bugkos sa panaghiusa,” ug kini makatipig sa panaghiusa sa kaminyoon bisan latas sa unoson nga mga panahon. (Colosas 3:14, 18, 19; 1 Pedro 3:1-7) Sa dihang ang usa ka tawo sa Rurutu, usa ka gamayng isla nga mga 700 kilometros gikan sa Tahiti, nagsugod sa pagtuon sa Bibliya uban sa mga Saksi ni Jehova, ang iyang asawa supak kaayo. Sa ngadtongadto, gidala sa asawa ang mga bata, ug gibiyaan siya, ug mipuyo sa Tahiti. Bisan pa niana, gipasundayag sa bana ang iyang gugma pinaagi sa pagpadala kaniya ug kuwarta nga regular ug sa pagtawag pinaagi sa telepono sa pagtino kon siya o ang iyang mga anak duna pa bay gikinahanglan. Busa iyang gihimo ang iyang labing maayo sa pagtuman sa iyang Kristohanong mga obligasyon. (1 Timoteo 5:8) Siya nag-ampo kanunay nga magkausa pag-usab ang iyang pamilya, ug sa ulahi ang iyang asawa mibalik. Sa dihang nakabalik na siya, iyang gitratar siya uban sa “gugma, pagkamainantoson, kalumo sa buot.” (1 Timoteo 6:11) Sa 1998, siya nabawtismohan ug sa ulahi nalipay kaayo sa dihang misugot ang iyang asawa sa pagtuon sa Bibliya. Kana nga pagtuon maoy usa sa 1,351 nga gidumala sa teritoryo ilalom sa sanga sa Tahiti sa miaging tuig.

 7. Sumala sa usa ka tawo sa Alemanya, unsay nakapalig-on sa iyang kaminyoon?

⁷ Sa Alemanya supak ang usa ka tawo sa kaikag sa iyang asawa sa kamatuoran sa Bibliya ug nagtuo gayod nga nagtinguha ang mga Saksi ni Jehova sa paglimbong sa iyang asawa. Apan, sa ulahi, iyang gisulatan ang Saksi nga unang nakahimamat sa iyang asawa: “Salamat sa imong pagpailaila sa akong asawa sa mga Saksi ni Jehova. Sa sinugdan, nabalaka ako tungod kay daghan kaayo ako ug nadunggang dili maayo bahin kanila. Apan karon, kay nakatambong sa mga tigom uban sa akong asawa, akong naamgohan nga sayop gayod ako. Nahibalo ako nga kamatuoran ang akong nadunggan, ug kini mas nakapalig-on sa among kaminyoon.” Ang 162,932 ka Saksi ni Jehova sa Alemanya—ug ang 1,773 diha sa mga isla nga ilalom sa sanga sa Tahiti—naglakip ug daghang pamilya nga gihiusa sa diyosnong gugma.

Gugma Alang sa Atong Kristohanong mga Igsoon

8, 9. (a) Kinsay nagtudlo kanato sa paghigugma sa atong mga igsoon, ug ang gugma nagpalihok kanato sa pagbuhat ug unsa? (b) Paghatag ug pananglitan kon sa unsang paagi ang gugma makatabang sa mga igsoon sa pagkahimong matinabangon sa usag usa.

⁸ Giingnan ni Pablo ang mga Kristohanon sa Tesalonica: “Kamo gitudloan sa Diyos sa paghigugma sa usag usa.” (1 Tesalonica 4:9) Oo, kadtong “gitudloan ni Jehova” naghigugmaay sa usag usa. (Isaias 54:13) Ang ilang gugma gipasundayag pinaagi sa lihok, sumala sa gipakita ni Pablo sa dihang siya miingon: “Pinaagi sa gugma magpaulipon sa usag usa.” (Galacia 5:13; 1 Juan 3:18) Ilang ginahimo kini, pananglitan, sa dihang duawon nila ang masakitong mga igsoong lalaki ug mga igsoong babaye, dasigon ang nagmagul-anon, ug palig-onon ang mahuyang. (1 Tesalonica 5:14) Ang atong tinuod nga Kristohanong gugma nakatabang sa pagpalambo sa atong espirituwal nga paraiso.

⁹ Diha sa Kongregasyon sa Ancón—usa sa 544 ka kongregasyon sa Ecuador—gipasundayag sa mga igsoon ang ilang gugma sa praktikal nga paagi. Tungod sa krisis sa panalapi sila nawad-an ug trabaho o kita, busa ang mga igsoon nakahukom sa pagpangitag panginabuhian pinaagi sa pagpamaligyag pagkaon ngadto sa lokal nga mga mangingisda sa dihang sila mamauli human sa tibuok gabii nga pagpangisda. Ang tanan mitabang, apil ang kabataan. Sila kinahanglang magsugod sa ala 1:00 s.b. aron maandam na ang pagkaon sa pagka-alas 4:00 s.b. sa dihang mamauli na ang mga mangingisda. Ang kita nga natigom sa mga igsoon gibahinbahin taliwala kanila sumala sa ilang panginahanglan. Kining pagtinabangay sa usag usa nagpasundayag sa tinuod nga Kristohanong gugma.

10, 11. Sa unsang paagi atong ikapasundayag ang atong gugma alang sa mga igsoon nga dili nato mismong nailhan?

¹⁰ Apan, ang atong gugma dili igapasundayag ngadto lamang sa mga Kristohanon nga ato mismong nailhan. Si apostol Pedro miingon: “Pagbaton ug gugma alang sa tibuok kapunongan sa mga igsoon.” (1 Pedro 2:17) Atong gihigugma ang atong tanang igsoong lalaki ug mga igsoong babaye tungod kay sila atong kaubang mga magsisimba ni Jehova nga Diyos. Ang panahon sa krisis maoy mga higayon nga mapasundayag kining gugmaha. Pananglitan, panahon sa 2000 nga tuig sa pag-alagad, gidaot sa grabeng mga baha ang Mozambique, ug tungod sa sibil nga gubat nga padayon nga gisangka karon sa Angola daghan ang nagkalisodlisod sa panginabuhi. Ang ubay-ubayng gidaghanon nga 31,725 ka igsoon sa Mozambique ug 41,222 sa Angola naapektohan niining mga hitaboa. Busa, ang mga Saksi sa kasikbit nga Habagatang Aprika nagpadala ug daghan kaayong tagana aron maalibyohan ang kalisod sa ilang mga igsoon niadtong mga nasora. Ang ilang pagkaandam sa pag-amot sa ilang “sobra” ngadto sa ilang nanginahanglang mga igsoon nagpasundayag sa ilang gugma.—2 Corinto 8:8, 13-15, 24.

¹¹ Ang gugma makita, usab, sa dihang ang mga igsoon sa daghang nasod moamot sa pagtukod ug mga Kingdom Hall ug mga Assembly Hall sa kayutaan nga dili kaayo mauswagon. Usa ka pananglitan nahitabo sa Solomon Islands. Bisan pa sa dakong kagubot, ang Solomon Islands nakabaton ug 6-porsiyento nga pag-uswag sa mga magmamantala sa miaging tuig, nga may kinatas-ang ihap nga 1,697. Sila nagplano sa pagtukod ug Assembly Hall. Bisan pag daghang islahanon ang nangalagiw gikan sa nasod, ang mga boluntaryo miabot gikan sa Australia aron sa pagtabang sa pagtukod. Sa ngadtongadto, ang mga boluntaryo kinahanglang mopauli, apan gibansay una nila ang lokal nga mga igsoon aron mahuman ang pag-ugbok sa haligi. Ang ginama nang daan nga gambalay sa tigomanan nga gama sa puthaw gipadala gikan sa Australia, ug inigkahuman niining maanindot nga tinukod alang sa pagsimba—sa panahon nga daghang lugar nga gitukoran ang gipamiyaan—kini maoy maayong pagpamatuod sa ngalan ni Jehova ug sa gugma sa mga igsoon.

Sama sa Diyos, Atong Gihigugma ang Kalibotan

12. Sa unsang paagi masundog nato si Jehova sa atong tinamdan ngadto sa mga tawo nga dili sama nato ug pagtuo?

¹² Ang ato bang gugma igapasundayag diha lamang sa atong pamilya ug sa atong panag-igsoonay? Dili, dili kon kita mga “tigsundog sa Diyos.” Si Jesus miingon: “Kay gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Efeso 5:1; Juan 3:16) Sama kang Jehova nga Diyos, kita molihok nga mahigugmaon ngadto sa tanan—apil na niadtong dili sama nato ug pagtuo. (Lucas 6:35, 36; Galacia 6:10) Ilabina niining bahina, atong isangyaw ang maayong balita sa Gingharian ug isulti sa uban ang dakong buhat sa gugma sa Diyos alang kanila. Kini makahatag ug kaluwasan ngadto kang bisan kinsa nga mamati.—Marcos 13:10; 1 Timoteo 4:16.

13, 14. Unsa ang pipila ka eksperyensiya sa mga igsoon nga nagpasundayag ug gugma ngadto sa mga dili-Saksi, bisan sa dakong kahasol?

¹³ Tagda ang upat ka espesyal payunir nga mga ministro sa Nepal. Sila giasayn ngadto sa usa ka siyudad sa habagatan-kasadpan sa nasod, ug sa miaging lima ka tuig, ilang gipasundayag ang ilang gugma pinaagi sa mapailobong pagsangyaw sa siyudad ug sa mga baryo sa layo. Aron makobrehan ang ilang teritoryo, sila kasagarang mobiyahe ug daghang oras nga magbisikleta sa temperatura nga kapin sa 40 grado Sentigrado. Ang ilang gugma ug “paglahutay diha sa buhat nga maayo” mibunga ug maayo sa dihang ang usa ka grupo sa pagtuon sa libro natukod diha sa usa sa mga baryo. (Roma 2:7) Sa Marso 2000, 32 ka tawo ang mitambong sa pagpamati sa pakigpulong publiko sa miduaw nga magtatan-aw sa sirkito. Ang Nepal dunay kinatas-ang ihap nga 430 ka magmamantala sa miaging tuig—9-porsiyento nga pag-uswag. Dayag nga gipanalanginan ni Jehova ang kadasig ug gugma sa mga igsoon nianang yutaa.

¹⁴ Sa Colombia gisangyawan sa temporaryo nga mga espesyal payunir ang mga Indian nga Wayuu. Aron sila makasangyaw, kinahanglang magtuon sila ug bag-ong pinulongan, apan ang ilang mahigugmaong kaikag nabaslan kay bisan pag mibunok ang ulan, 27 ang mitambong sa pakigpulong publiko. Ang mahigugmaong kadasig nga sama nianang gipasundayag niining maong mga payunir nakaamot sa 5-porsiyentong pag-uswag sa Colombia ug sa kinatas-ang ihap nga 107,613 ka magmamantala. Sa Denmark usa ka tigulang nga sister gustong magpaambit sa maayong balita ngadto sa uban, apan siya baldado. Tungod kay determinado, siya nakigkomunikar sa mga tawong interesado pinaagi sa pagpadalag mga sulat. Sa pagkakaron, siya nakigsinulatay sa 42 ka tawo ug nagdumalag 11 ka pagtuon sa Bibliya. Usa siya sa kinatas-ang ihap nga 14,885 ka magmamantala nga nagtaho sa Denmark sa miaging tuig.

Higugmaa ang Imong mga Kaaway

15, 16. (a) Angayng unsa ka malangkobon ang atong gugma sumala sa giingon ni Jesus? (b) Sa unsang paagi gipakiglabotan nga mahigugmaon sa may kaakohang mga igsoon ang usa ka tawo nga nagbutangbutang batok sa mga Saksi ni Jehova?

¹⁵ Gisultihan ni Jesus ang tawo nga batid sa Balaod nga maisip ang Samarianhon ingong silingan. Diha sa iyang Wali sa Bukid, si Jesus mipadayon pinaagi sa pag-ingon: “Inyong nadungog nga gikaingon, ‘Higugmaon mo gayod ang imong silingan ug dumtan ang imong kaaway.’ Apan, ako magaingon kaninyo: Padayon sa paghigugma sa inyong mga kaaway ug sa pag-ampo alang sa mga nagalutos kaninyo; aron inyong mapamatud-an ang inyong kaugalingon nga mga anak sa inyong Amahan nga anaa sa mga langit.” (Mateo 5:43-45) Bisan pag dunay mosupak kanato, atong paningkamotan nga “padayong dag-on ang daotan pinaagi sa maayo.” (Roma 12:19-21) Kon mahimo, atong ipaambit kaniya ang atong labing bililhong kabtangan, ang kamatuoran.

¹⁶ Sa Ukraine usa ka artikulo diha sa mantalaang Kremenchuk Herald naghisgot mahitungod sa mga Saksi ni Jehova ingong usa ka makuyaw nga sekta. Dili kini maayo tungod kay kini ang gipanulti sa uban sa Uropa bahin sa mga Saksi ni Jehova aron motuo ang mga tawo nga ang mga kalihokan sa mga Saksi kinahanglang pig-otan o idili. Busa, ang editor giduol ug gihangyo sa pagpatik ug artikulo sa mantalaan nga magtul-id sa artikulo. Siya misugot, apan duyog sa artikulo, iyang gipatik ang usa ka pamulong nga ang unang artikulo gipasukad sa mga tinuod nga hitabo. Busa giduol na usab siya sa mga igsoong may kaakohan uban sa dugang impormasyon. Sa kataposan, naamgohan sa editor nga ang unang artikulo dili tinuod, ug nagpatik siya ug artikulo nga nagbakwi sa iyang gipamulong. Ang madayganon ug malulotong pagpakig-atubang kaniya mao ang mahigugmaong paagi sa pagdumala niining kahimtanga, ug kini maayo ug resulta.

Unsaon Nato Pag-ugmad ang Gugma?

17. Unsay nagpakita nga dili gayod sayon ang pagpakitag gugma ngadto sa uban?

¹⁷ Inigkatawo sa bata, ang mga ginikanan mahigugma dayon niini. Ang mahigugmaong pagpakiglabot ngadto sa mga hamtong dili sa tanang panahon nga kinaiyanhong bation. Tingali mao kanay hinungdan kon nganong ang Bibliya masubsob nga nagsugo kanato sa paghigugma sa usag usa—usa ka hiyas nga angay natong ugmaron. (1 Pedro 1:22; 4:8; 1 Juan 3:11) Si Jesus nahibalo nga ang atong gugma masulayan sa dihang siya miingon nga angay natong pasayloon ang atong igsoon “kutob sa kapitoag-pito ka higayon.” (Mateo 18:21, 22) Si Pablo usab nag-awhag kanato nga “magpadayon sa pag-inantosay sa usag usa.” (Colosas 3:12, 13) Dili ikahibulong nga kita gisugo: “Pangagpasa ang gugma”! (1 Corinto 14:1) Sa unsang paagi atong mahimo kini?

18. Unsay makatabang kanato sa pag-ugmad sa gugma ngadto sa uban?

¹⁸ Una, atong isilsil kanunay sa hunahuna ang gugma nga atong nahuptan alang kang Jehova nga Diyos. Kini nga gugma maoy usa ka dakong panukmod sa paghigugma sa atong silingan. Ngano? Tungod kay kon buhaton nato kana, kini mopabanaag ug maayo diha sa atong langitnong Amahan ug mohatag ug kahimayaan ug kadungganan kaniya. (Juan 15:8-10; Filipos 1:9-11) Ikaduha, kita makatan-aw sa mga butang ingon sa pagtan-aw ni Jehova niini. Sa matag higayong kita makasala, kita nakasala kang Jehova; bisan pa, matag karon ug unya siya nagpasaylo kanato ug nagpadayon sa paghigugma kanato. (Salmo 86:5; 103:2, 3; 1 Juan 1:9; 4:18) Kon atong ugmaron ang hunahuna ni Jehova, kita makiling sa paghigugma sa uban ug sa pagpasaylo sa ilang mga sala batok kanato. (Mateo 6:12) Ikatulo, kita makahimo sa pagpakiglabot sa uban ingon sa paagi nga buot natong makiglabot sila kanato. (Mateo 7:12) Kay kita dili-hingpit, kita kanunayng nagkinahanglan ug pasaylo. Pananglitan, kon kita mosulti ug mga butang nga makapasakit sa uban, kita manghinaot nga sila mahinumdom nga ang tanan makasala sa pulong matag karon ug unya. (Santiago 3:2) Kon buot nato nga mahigugmaong makiglabot kanato ang uban, angay nga kita makiglabot kanila nga mahigugmaon.

19. Sa unsang paagi kita makapangayog tabang sa balaang espiritu sa pag-ugmad sa gugma?

¹⁹ Ikaupat, kita makapangayog tabang sa balaang espiritu tungod kay ang gugma maoy bahin sa bunga sa espiritu. (Galacia 5:22, 23) Ang mga panaghigalaay, mga pagbati sa pamilya, ug romantikong gugma kasagaran nga kinaiyanhong bation. Apan atong gikinahanglan ang tabang sa espiritu ni Jehova aron maugmad ang gugma nga nahuptan ni Jehova, ang gugma nga maoy usa ka hingpit nga bugkos sa panaghiusa. Kita makapangayog tabang sa balaang espiritu pinaagi sa pagbasa sa dinasig nga Bibliya. Pananglitan, kon atong tun-an ang kinabuhi ni Jesus, atong makita kon sa unsang paagi nakiglabot siya sa mga tawo, ug kita makakat-on sa pagsundog kaniya. (Juan 13:34, 35; 15:12) Dugang pa, kita makapangayo sa balaang espiritu ni Jehova, ilabina sa mga situwasyon nga magpalisod kanato sa paglihok nga mahigugmaon. (Lucas 11:13) Sa kataposan, mahimong tinguhaon nato ang gugma pinaagi sa pagpabiling suod sa Kristohanong kongregasyon. Ang pagpakig-uban sa mga igsoong lalaki ug mga igsoong babaye makatabang kanato sa pag-ugmad sa gugma.—Proverbio 13:20.

20, 21. Unsang talagsaong pasundayag sa gugma ang nahimo sa mga Saksi ni Jehova sulod sa 2000 nga tuig sa pag-alagad?

²⁰ Sa miaging tuig, nakab-ot ang kinatas-ang ihap nga 6,035,564 ka magmamantala sa maayong balita sa tibuok kalibotan. Ang mga Saksi ni Jehova nakagugol ug total nga 1,171,270,425 ka oras sa pagpangitag mga tawo aron sultihan sila bahin sa maayong balita. Ang gugma maoy nagtukmod kanila sa pag-antos sa kainit, sa ulan, ug sa katugnaw samtang ginahimo nila kining buluhatona. Ang gugma maoy nagpalihok kanila sa pagpakigsulti ngadto sa mga kauban sa eskuylahan ug mga kauban sa trabaho ug sa pagduol sa dili kaila diha sa kadalanan ug sa ubang mga lugar. Daghan niadtong giduaw sa mga Saksi dili mamati, ang pipila supak. Apan, ang uban nagpakitag kaikag, mao nga 433,454,049 ka pagbalikduaw ang nahimo ug 4,766,631 ka pagtuon sa Bibliya ang nadumala.a

²¹ Pagkatalagsaong pasundayag kining tanan sa gugma sa mga Saksi ni Jehova alang sa ilang Diyos ug alang sa ilang mga silingan! Kana nga gugma dili gayod mobugnaw. Kita masaligon nga sa 2001 nga tuig sa pag-alagad mas dakong pagpamatuod ang mahatag ngadto sa katawhan. Hinaot ang mga panalangin ni Jehova magpadayon diha sa iyang maunongon ug madasigong mga magsisimba samtang ilang ‘gihimo ang tanan nilang mga kalihokan uban ang gugma’!—1 Corinto 16:14.

[Footnote]

Makapatin-aw Ka Ba?

• Kinsay atong gisundog sa dihang higugmaon nato ang atong silingan?

• Unsa ka malangkobon ang atong gugma?

• Unsa ang pipila ka eksperyensiya nga nagpasundayag sa Kristohanong gugma?

• Sa unsang paagi maugmad nato ang Kristohanong gugma?

[Chart sa panid 18-21]

2000 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang bound volume)

[Mga hulagway sa panid 15]

Ang Kristohanong gugma makapahiusa sa pamilya

[Mga hulagway sa panid 17]

Ang gugma mopalihok kanato sa pagpaambit sa atong paglaom ngadto sa uban