“Magpadayon sa Pagbantay”—Ang Takna sa Paghukom Miabot Na!
Ang impormasyon niining tun-anang artikulo gibase sa brosyur nga Padayon sa Pagbantay! nga giluwatan sa distritong mga kombensiyon nga gipahigayon sa tibuok kalibotan sa 2004/05.
“Magpadayon sa pagbantay tungod kay kamo wala mahibalo kon unsang adlawa moabot ang inyong Ginoo.”—MATEO 24:42.
1, 2. Sa unsa haom nga gipakasama ni Jesus ang iyang pag-abot?
UNSAY imong buhaton kon imong mahibaloan nga dunay kawatan nga nagsuroysuroy, nga nanglungkab sa mga balay sa imong silinganan? Aron mapanalipdan ang imong mga minahal ug ang imong mahalong mga butang, ikaw magmabinantayon. Buhaton nimo kana tungod kay ang kawatan dili magpadalag sulat nga magpahibalo nga siya moabotay. Sa kasukwahi, siya moabot nga dili mamatikdan ug wala damha.
2 Sa ubay-ubayng mga higayon, si Jesus migamit sa mga paagi sa usa ka kawatan ingong ilustrasyon. (Lucas 10:30; Juan 10:10) Mahitungod sa mga hitabo nga mahitabo sa panahon sa kataposan ug motultol ngadto sa iyang pag-abot aron sa pagpahamtang ug paghukom, si Jesus naghatag niining maong pasidaan: “Busa, magpadayon sa pagbantay tungod kay kamo wala mahibalo kon unsang adlawa moabot ang inyong Ginoo. Apan hibaloi ang usa ka butang, nga kon nahibaloan pa sa tagbalay kon unsang yugtoa sa pagbantay moabot ang kawatan, magpabilin unta siyang nagmata ug dili motugot nga lungkabon ang iyang balay.” (Mateo 24:42, 43) Busa gipakasama ni Jesus ang iyang pag-abot sa usa ka kawatan—wala damha.
3, 4. (a) Unsay nalangkit sa pagpatalinghog sa pasidaan ni Jesus bahin sa iyang pag-abot? (b) Unsang mga pangutana ang motungha?
3 Haom ang ilustrasyon, tungod kay dili mahibaloan ang eksaktong petsa sa pag-abot ni Jesus. Una pa niana, sa mao gihapong tagna, si Jesus miingon: “Mahitungod nianang adlawa ug taknaa walay nahibalo, ni ang mga manulonda sa mga langit ni ang Anak, kondili ang Amahan lamang.” (Mateo 24:36) Busa giawhag ni Jesus ang iyang mga mamiminaw: ‘Pamatud-i ninyo nga kamo andam.’ (Mateo 24:44) Kadtong nagpatalinghog sa pasidaan ni Jesus magmaandam, nga magagawi sa hustong paagi, bisan kanus-a siya moabot sa pagpahamtang sa paghukom ni Jehova.
4 Ang pipila ka hinungdanong mga pangutana motungha: Ang pasidaan ba ni Jesus alang lamang sa mga tawo sa kalibotan, o ang matuod nga mga Kristohanon kinahanglan usab nga “magpadayon sa pagbantay”? Nganong dinalian nga “magpadayon sa pagbantay,” ug unsay nalangkit niini?
Usa ka Pasidaan Alang Kang Kinsa?
5. Giunsa nato pagkahibalo nga ang pasidaan nga “magpadayon sa pagbantay” mapadapat sa matuod nga mga Kristohanon?
5 Tinuod gayod nga ang pag-abot sa Ginoo sama sa kawatan para sa mga tawo sa kalibotan, kinsa wala magpatalinghog sa pasidaan bahin sa nagsingabot nga kalamidad. (2 Pedro 3:3-7) Apan, komosta ang matuod nga mga Kristohanon? Si apostol Pablo misulat ngadto sa mga isigkamagtutuo: “Kamo nahibalo pag-ayo nga ang adlaw ni Jehova moabot sama sa kawatan sa kagabhion.” (1 Tesalonica 5:2) Wala kita magduhaduha nga “ang adlaw ni Jehova moabot.” Apan makapamenos ba kana sa panginahanglan nga kita magpadayon sa pagbantay? Matikdi nga ngadto sa iyang mga tinun-an nga si Jesus miingon: “Sa takna nga wala ninyo hunahunaa, ang Anak sa tawo moabot.” (Mateo 24:44) Una pa niana, sa dihang nag-awhag sa iyang mga tinun-an sa pagpadayon sa pagpangita sa Gingharian, si Jesus nagpasidaan: “Mangandam kanunay, tungod kay sa takna nga wala ninyo hunahunaa, ang Anak sa tawo moabot.” (Lucas 12:31, 40) Dili ba tin-aw nga diha sa hunahuna ni Jesus ang iyang mga sumusunod sa dihang siya nagpasidaan: “Magpadayon sa pagbantay”?
6. Nganong kita kinahanglan nga “magpadayon sa pagbantay”?
6 Nganong kita kinahanglan nga “magpadayon sa pagbantay” ug “mangandam kanunay”? Si Jesus misaysay: “Duha ka tawo ang anaa sa uma: ang usa pagadad-on ug ang usa pagabiyaan; duha ka babaye magagaling sa galingang demano: ang usa pagadad-on ug ang usa pagabiyaan.” (Mateo 24:40, 41) Kadtong nagpamatuod nga sila andam “pagadad-on,” o maluwas, sa dihang laglagon ang dili-diyosnong kalibotan. Ang uban “pagabiyaan” nga malaglag tungod kay sila mahakogon nga nangagpas sa ilang kaugalingong interes. Lagmit maglakip kini sa mga tawo nga kanhi nalamdagan na apan wala magpadayon sa pagbantay.
7. Tungod kay kita wala mahibalo kon kanus-a moabot ang kataposan, unsay atong mahimo?
7 Tungod kay kita wala mahibalo sa eksaktong adlaw sa kataposan niining daang sistema, kita adunay kahigayonan sa pagpasundayag nga kita nag-alagad sa Diyos tungod sa putling motibo. Sa unsang paagi? Tingali ang kataposan morag dugay pang moabot. Ikasubo nga gitugotan sa ubang mga Kristohanon nga mibatig sama niini nga mobugnaw ang ilang kadasig sa pag-alagad kang Jehova. Apan, pinaagi sa atong pagpahinungod, kita kinabubut-on nga nagtanyag sa atong kaugalingon sa pag-alagad kang Jehova. Kadtong nakaila kang Jehova nahibalo nga ang dinalidali nga pagpasundayag ug kadasig dili makapahimuot kaniya. Siya nagatan-aw kon unsay anaa sa kasingkasing.—1 Samuel 16:7.
8. Sa unsang paagi ang gugma alang kang Jehova magtukmod kanato sa pagpadayon sa pagbantay?
8 Sanglit kita nahigugma man gayod kang Jehova, kita malipay kaayo sa pagtuman sa iyang kabubut-on. (Salmo 40:8; Mateo 26:39) Ug gusto nato nga moalagad kang Jehova hangtod sa hangtod. Dili momenos ang kabililhon sa maong palaaboton tungod lang kay kita kinahanglang maghulat ug dugaydugay kay sa ato tingaling gidahom. Labaw sa tanan, kita magpadayon sa pagbantay tungod kay kita mahinamong nagpaabot kon unsa unyay kahulogan sa adlaw ni Jehova diha sa katumanan sa iyang katuyoan. Ang atong kinasingkasing nga tinguha sa pagpahimuot sa Diyos magtukmod kanato sa pagpadapat sa tambag sa iyang Pulong ug sa pag-una sa iyang Gingharian diha sa atong kinabuhi. (Mateo 6:33; 1 Juan 5:3) Hisgotan nato kon sa unsang paagi ang pagpadayon sa pagbantay angayng mag-impluwensiya sa mga desisyon nga atong himoon ug sa paagi nga kita magkinabuhi sa adlaw-adlaw.
Asa Nagpadulong ang Imong Kinabuhi?
9. Nganong dinalian kaayo nga ang mga tawo sa kalibotan makaamgo sa kahulogan sa atong panahon?
9 Daghang tawo karon ang miila nga ang grabeng mga problema ug makapakurat nga mga hitabo komon na kaayo, ug sila tingali wala malipay sa dagan sa ilang kinabuhi. Apan, nahibalo ba sila sa tinuod nga kahulogan sa mga kahimtang sa kalibotan? Naila ba nila nga kita nagkinabuhi na sa “kataposan sa sistema sa mga butang”? (Mateo 24:3) Naila ba nila nga ang pagkaylap sa hakog, mapintas, bisan sa dili-diyosnon nga mga tinamdan nagtimaan niining panahona ingong “kataposang mga adlaw”? (2 Timoteo 3:1-5) Adunay dinaliang panginahanglan nga sila makaamgo sa kahulogan niining tanan ug mamalandong kon asa nagpadulong ang ilang kinabuhi.
10. Unsay angay natong buhaton aron makaseguro nga kita nagpadayon sa pagbantay?
10 Komosta na man sa atong bahin? Sa adlaw-adlaw kita nag-atubang ug mga desisyon nga naglangkit sa atong panarbaho, panglawas, pamilya, ug atong pagsimba. Kita nahibalo kon unsay giingon sa Bibliya, ug kita naningkamot sa pagpadapat niana. Busa, angay natong pangutan-on ang atong kaugalingon: ‘Gitugotan ba nako ang mga kabalaka sa kinabuhi nga mopatipas kanako gikan sa akong espirituwal nga mga tumong? Gitugotan ba nako ang mga pilosopiya sa kalibotan, ang panghunahuna niini, nga magtino sa mga pagpili nga akong himoon?’ (Lucas 21:34-36; Colosas 2:8) Kita kinahanglang magpadayon sa pagpasundayag nga kita nagasalig kang Jehova sa tibuok natong kasingkasing ug dili mosalig sa atong kaugalingong pagsabot. (Proverbio 3:5) Nianang paagiha, kita “makapangupot pag-ayo sa tinuod nga kinabuhi”—ang kinabuhing dayon sa bag-ong kalibotan sa Diyos.—1 Timoteo 6:12, 19.
11-13. Unsay atong makat-onan gikan sa mga panig-ingnan sa nahitabo (a) sa mga adlaw ni Noe? (b) sa mga adlaw ni Lot?
11 Ang Bibliya adunay daghang pasidaang mga panig-ingnan nga makatabang kanato sa pagpadayon sa pagbantay. Tagda kon unsay nahitabo sa adlaw ni Noe. Dugay na una pa molihok ang Diyos, gitino niya nga mahatag ang pasidaan. Apan gawas kang Noe ug sa iyang panimalay, ang mga tawo wala magtagad. (2 Pedro 2:5) Mahitungod niini, si Jesus miingon: “Maingon kaniadto sa mga adlaw ni Noe, mao man usab unya ang presensiya sa Anak sa tawo. Kay ingon nga sila niadtong mga adlawa sa wala pa ang baha, ang mga lalaki nangaon ug nanginom, nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan, mao man usab unya ang presensiya sa Anak sa tawo.” (Mateo 24:37-39) Unsay atong makat-onan gikan niana? Kon atong unahon ang adlaw-adlawng mga buluhaton—bisan ang naandang mga kalihokan sa kinabuhi—inay ang espirituwal nga mga kalihokan nga maoy giawhag sa Diyos nga atong unahon, kinahanglang palandongon nato ang atong situwasyon.—Roma 14:17.
12 Hunahunaa usab ang mga adlaw ni Lot. Ang siyudad sa Sodoma, diin nagpuyo si Lot ug ang iyang pamilya, abunda sa materyal apan imoral kaayo. Si Jehova nagpadala sa iyang mga manulonda aron sa paglaglag sa maong dapit. Ang mga manulonda nag-awhag kang Lot ug sa iyang pamilya sa pagkalagiw sa Sodoma ug sa dili paglingi. Kay giaghat sa mga manulonda, sila mibiya sa siyudad. Apan, ang asawa ni Lot dayag nga nagsigeg hunahuna sa iyang balay sa Sodoma. Sa pagkamasinupakon, siya milingi, ug tungod niini siya nawad-an sa iyang kinabuhi. (Genesis 19:15-26) Sa matagnaong paagi, si Jesus nagpasidaan: “Hinumdomi ang asawa ni Lot.” Misanong ba kita sa maong pasidaan?—Lucas 17:32.
13 Kadtong nagpatalinghog sa mga pasidaan sa Diyos naluwas. Mao kana ang kahimtang ni Noe ug sa iyang pamilya ug kang Lot ug sa iyang mga anak nga babaye. (2 Pedro 2:9) Samtang atong palandongon ang pasidaan niining maong mga panig-ingnan, kita madasig usab sa mensahe sa kaluwasan nga gihisgotan niini alang sa mga tawong mahigugmaon sa pagkamatarong. Pinaagi niana ang atong kasingkasing matugob sa masaligong pagpaabot sa katumanan sa saad sa Diyos nga “bag-ong mga langit ug usa ka bag-ong yuta” diin “magpuyo ang pagkamatarong.”—2 Pedro 3:13.
‘Ang Takna sa Paghukom Miabot Na’!
14, 15. (a) Unsay nalakip sa “takna” sa paghukom? (b) Unsay nalangkit sa ‘pagkahadlok sa Diyos ug paghatag kaniya sa himaya’?
14 Samtang kita magpadayon sa pagbantay, unsay atong madahom? Ang basahon sa Pinadayag naglatid kon sa unsang paagi ang katuyoan sa Diyos anam-anam nga matuman. Ang pagsunod sa gisulti niana hinungdanon aron atong mapamatud-an nga kita andam. Ang tagna tataw nga naghubit sa mga hitabo nga mahitabo sa “adlaw sa Ginoo,” nga nagsugod sa dihang si Kristo naentrono sa langit niadtong 1914. (Pinadayag 1:10) Ang Pinadayag nagdani sa atong pagtagad ngadto sa usa ka manulonda nga gipiyalan sa ‘pagpahayag sa walay kataposang maayong balita.’ Iyang gimantala sa makusog nga tingog: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na.” (Pinadayag 14:6, 7) Kanang maong “takna” sa paghukom maoy mubo nga yugto; kini naglakip sa pagpahayag ug pagpahamtang sa mga paghukom nga gihulagway nianang tagnaa. Kita nagkinabuhi karon nianang yugtoa.
15 Karon, sa dili pa matapos ang takna sa paghukom, kita giawhag: “Kahadloki ninyo ang Diyos ug ihatag kaniya ang himaya.” Unsay nalangkit niini? Ang hustong matang sa pagkahadlok sa Diyos angayng magpatalikod kanato gikan sa pagkadaotan. (Proverbio 8:13) Aron atong mapasidunggan ang Diyos, kita mamati kaniya uban ang halalom nga pagtahod. Kita dili puliki kaayo nga kita wala nay panahon sa pagbasa kanunay sa iyang Pulong, ang Bibliya. Dili nato pakamenoson ang iyang tambag nga motambong sa Kristohanong mga tigom. (Hebreohanon 10:24, 25) Atong pabilhan ang pribilehiyo sa pagmantala sa maayong balita sa Mesiyanikong Gingharian sa Diyos ug buhaton kana nga masiboton. Kita mosalig kang Jehova sa tanang panahon ug sa tibuok natong kasingkasing. (Salmo 62:8) Tungod kay atong giila nga si Jehova mao ang Unibersohanong Soberano, kita nagpasidungog kaniya pinaagi sa kinabubut-ong pagpasakop kaniya ingong Soberano sa atong kinabuhi. Nahadlok ka ba gayod sa Diyos ug naghatag kaniya sa himaya nianang mga paagiha?
16. Nganong makaingon kita nga ang paghukom batok sa Dakong Babilonya nga giingon sa Pinadayag 14:8 natuman na?
16 Ang Pinadayag kapitulo 14 nagpadayon sa paghubit sa uban pang mga hitabo nga mahitabo sa takna sa paghukom. Ang Dakong Babilonya, ang tibuok-kalibotang imperyo sa bakak nga relihiyon, maoy unang gihisgotan: “Misunod ang ikaduhang manulonda, nga nag-ingon: ‘Siya napukan na! Ang Dakong Babilonya napukan na, siya nga mao ang nagpainom sa tanang kanasoran sa bino sa kasuko sa iyang pagpakighilawas!’” (Pinadayag 14:8) Oo, sa panglantaw sa Diyos, ang Dakong Babilonya napukan na. Niadtong 1919 ang dinihogang mga alagad ni Jehova napahigawas sa pagkaulipon sa Babilonyanhong mga doktrina ug mga buhat, nga nagkontrolar sa mga tawo ug mga nasod sulod sa daghang milenyo. (Pinadayag 17:1, 15) Busa sukad niadto sila makadeboto na sa ilang kaugalingon sa pagpalambo sa matuod nga pagsimba. Ang tibuok-yuta nga pagsangyaw sa maayong balita sa Gingharian sa Diyos nahitabo sukad niadto.—Mateo 24:14.
17. Unsay nalangkit sa paggula gikan sa Dakong Babilonya?
17 Dili kay kana ra ang paghukom nga ipahamtang sa Diyos batok sa Dakong Babilonya. Ang iyang kataposang kalaglagan hapit nang moabot. (Pinadayag 18:21) May maayong katarongan nga ang Bibliya nag-awhag sa mga tawo bisan diin: “Gumula kamo kaniya [Dakong Babilonya] . . . kon dili kamo buot makaambit sa iyang mga sala.” (Pinadayag 18:4, 5) Sa unsang paagi kita mogula sa Dakong Babilonya? Kini naglangkit ug labaw pa kay sa paghunong lamang sa pagpakig-uban sa bakak nga relihiyon. Ang Babilonyanhong impluwensiya anaa sa daghang popular nga mga selebrasyon ug mga kostumbre, sa matugoton nga tinamdan sa kalibotan ngadto sa sekso, sa pagpalambo sa kalingawan nga naglangkit sa espiritismo, ug daghan pa kaayo. Aron magpadayon sa pagbantay, hinungdanon nga diha sa atong mga lihok ug sa mga tinguha sa atong kasingkasing, atong gipamatud-an nga kita bulag gayod sa Dakong Babilonya sa tanang paagi.
18. Tungod sa gihubit sa Pinadayag 14:9, 10, unsay maampingong likayan sa mabinantayong mga Kristohanon?
18 Sa Pinadayag 14:9, 10, ang laing bahin sa ‘takna sa paghukom’ gihubit. Ang laing manulonda miingon: “Kon adunay mosimba sa mapintas nga mananap ug sa larawan niini, ug magpamarka diha sa iyang agtang o diha sa iyang kamot, siya usab magainom sa bino sa kasuko sa Diyos.” Ngano? Ang ‘mapintas nga mananap ug ang larawan niini’ nagsimbolo sa tawhanong pagmando, nga wala moila sa pagkasoberano ni Jehova. Ang mabinantayong mga Kristohanon mag-amping nga sila dili maimpluwensiyahan o mamarkahan, sa tinamdan o kaha sa lihok, ingong nag-alagad niadtong wala moila sa supremong pagkasoberano sa matuod nga Diyos, si Jehova. Ang mga Kristohanon nahibalo nga ang Gingharian sa Diyos natukod na sa langit, nga kini magtapos sa tanang tawhanong mga pagmando, ug nga kini mobarog hangtod sa panahong walay tino.—Daniel 2:44.
Ayaw Wad-a ang Imong Pagbati sa Pagkadinalian!
19, 20. (a) Samtang kita magkaduol sa kinaulahiang bahin sa kataposang mga adlaw, kita makaseguro nga si Satanas maningkamot sa pagbuhat sa unsa? (b) Unsay determinado natong buhaton?
19 Samtang kita magkaduol sa kinaulahiang bahin sa kataposang mga adlaw, ang mga pagpit-os ug mga tentasyon mosamot pa gayod. Samtang kita nagkinabuhi pa niining daang sistema ug ginahasol sa atong kahuyangon, kita maapektahan sa mga butang sama sa dili maayong panglawas, pagkatigulang, pagkamatay sa mga minahal, pagkasilo, kahigawad tungod sa pagkawalay-pagtagad sa mga tawo sa atong mga paningkamot sa pagsangyaw sa Pulong sa Diyos, ug daghan pang mga problema. Ayaw gayod kalimti nga gusto kaayo ni Satanas nga pahimuslan ang mga kapit-os nga atong giatubang aron mahaylo kita sa paglunga—sa pag-undang sa pagsangyaw sa maayong balita o sa paghunong sa pagkinabuhi sumala sa mga sukdanan sa Diyos. (Efeso 6:11-13) Kini dili ang panahon nga mawad-ag pagbati sa pagkadinalian sa panahon nga atong gikinabuhian!
20 Si Jesus nahibalo nga kita makaagom sa dakong pagpit-os nga molunga, busa siya nagtambag kanato: “Magpadayon sa pagbantay tungod kay kamo wala mahibalo kon unsang adlawa moabot ang inyong Ginoo.” (Mateo 24:42) Nan, magpadayon kita sa pagbantay kon hain na kita sa agos sa panahon. Magmabinantayon kita sa mga lit-ag ni Satanas nga makapaluya kanato o makapahunong kanato sa pag-alagad. Magmadeterminado kita sa pagsangyaw sa maayong balita sa Gingharian sa Diyos nga adunay mas dakong kadasig ug determinasyon. Sa pagkatinuod, huptan nato ang atong pagbati sa pagkadinalian samtang patalinghogan nato ang pasidaan ni Jesus: “Magpadayon sa pagbantay.” Sa pagbuhat niana, kita magpasidungog kang Jehova ug mahilakip niadtong makadawat ug walay-kataposang mga panalangin.
Unsaon Nimo Pagtubag?
• Giunsa nato pagkahibalo nga ang pasidaan ni Jesus nga “magpadayon sa pagbantay” mapadapat sa matuod nga mga Kristohanon?
• Unsang pasidaang mga panig-ingnan diha sa Bibliya ang makatabang kanato sa ‘pagpadayon sa pagbantay’?
• Unsa ang takna sa paghukom, ug unsay giawhag kanato nga buhaton sa dili pa kana matapos?
[Hulagway sa panid 23]
Gipakasama ni Jesus ang iyang pag-abot sa usa ka kawatan
[Hulagway sa panid 24]
Ang kalaglagan sa Dakong Babilonya haduol na
[Mga hulagway sa panid 25]
Magmadeterminado kita sa pagsangyaw nga adunay mas dakong kadasig ug determinasyon