Ang Labaw nga Himaya sa Balay ni Jehova

“‘Akong pun-on kining balaya sa himaya,’ nag-ingon si Jehova sa mga panon.”​—HAGGEO 2:7.

 1. Sa unsang paagi ang balaang espiritu nalangkit sa pagtuo ug sa buhat?

SAMTANG nagsangyaw sa balay-balay, usa sa mga Saksi ni Jehova nakahibalag ug usa ka babayeng Pentekostal nga mikomento, ‘Kaming mga Pentekostal ang dunay balaang espiritu, apan kamo ang nagbuhat sa buluhaton.’ Sa mataktikanhong paagi, gisaysay kaniya nga ang usang adunay balaang espiritu kinaiyanhon lamang nga madasig sa pagbuhat sa buluhaton sa Diyos. Ang Santiago 2:17 nag-ingon: “Ang pagtuo, kon kini walay mga buhat, patay sa kaugalingon niini.” Tungod sa tabang sa espiritu ni Jehova, ang iyang mga Saksi nakaugmad ug lig-ong pagtuo, ug siya ‘nagpuno sa iyang balay sa himaya’ pinaagi sa paghikay nga sila magbuhat ug matarong nga mga buhat​—ilabina ang ‘pagwali niining maayong balita sa Gingharian sa tibuok gipuy-ang yuta ingong usa ka pagsaksi ngadto sa tanang kanasoran.’ Sa dihang kining buluhatona matuman sa katagbawan ni Jehova, “unya moabot ang kataposan.”​—Mateo 24:14.

 2. (a) Ang atong pagkugi sa buluhaton ni Jehova magdala sa unsang panalangin? (b) Nganong kita angay nga malipay bahin sa bisan unsang maorag ‘pagkalangan’?

² Gikan niining maong mga pulong ni Jesus, kita mohinapos nga ang atong buluhaton karong adlawa kinahanglang mapunting sa pagwali sa uban sa “mahimayaong maayong balita sa malipayon nga Diyos,” nga maoy nagsalig niana kanato. (1 Timoteo 1:11) Kon kita mas magkugi nga malipayon diha sa pag-alagad ni Jehova, ang kataposan mopatim-awng mas dali nga moabot. Sa Habacuc 2:2, 3, atong mabasa ang mga pulong ni Jehova: “Isulat ang panan-awon, ug ihan-ay kining tin-aw sa mga papan, aron ang usang magabasag kusog gikan niini makahimo niana sa larinong paagi. Kay ang panan-awon maoy alang pa sa tinudlong panahon, ug kini nagadali sa kataposan, ug kini dili gayod magbakak. Bisan pag kini malangan, padayon sa pagpaabot niini; kay kini matuman sa walay pakyas. Kini dili maulahi.” Oo, “ang panan-awon” matuman “bisan pag kini malangan.” Sanglit kita anaa na sa ika-83 nga tuig sa kang Jesus nga pagmando sa Gingharian, ang pipila mahimong mobati nga kita sa pagkakaron anaa sa usa ka yugto nga nalangan. Apan, dili ba angay nga kita malipay nga ang kataposan wala pa moabot? Sulod niining dekada sa katuigang 1990, ang mga restriksiyon sa pagwali sa maayong balita giwagtang na, nga morag sa milagrosong paagi, sa Silangang Uropa, sa mga bahin sa Aprika, ug sa ubang kayutaan. Ang morag ‘pagkalangan’ nagtugot ug panahon aron ang daghan pang “mga karnero” matigom gikan niining maong mga teritoryo nga bag-o pang naablihan.​—Juan 10:16.

 3. Nganong ang atong nunot-sa-panahong pagsabot bahin sa “kining kaliwatana” magpalihok kanato nga magbuhat nga dinalian sa buluhaton sa Diyos?

³ “Kini dili maulahi,” matod sa propeta. Si Jesus miingon nga ang presenteng tuman-kadaotang kaliwatan dili moagi hangtod nga “mahitabo kining tanang butanga.” (Mateo 24:34) Ang ato bang nunot-sa-panahong pagsabot sa iyang mga pulong nagkahulogang ang atong buluhatong pagwali dili na kaayo dinalian?a Ang mga panghitabo nagpakita nga ang kaatbang hinuon ang matuod! Ang atong kaliwatan karon kusog nga nagkaunlod ngadto sa kahimtang sa tuman-kadaotan ug kahiwian nga walay ingon sa tibuok miagi nga kasaysayan. (Itandi ang Buhat 2:40.) Kinahanglang kita magbuhat nga dinalian sa atong buluhaton. (2 Timoteo 4:2) Ang tanang tagna bahin sa paniempo sa dakong kasakitan nagpadayag nga kini moabot nga kalit, dihadiha, mapanup-on​—samag kawatan. (1 Tesalonica 5:1-4; Pinadayag 3:3; 16:15) “Tungod niini kamo usab pamatud-i ang inyong kaugalingon nga andam, tungod kay sa takna nga wala ninyo hunahunaa nga kini mao, ang Anak sa tawo moabot.” (Mateo 24:44) Samtang kining dili-diyosnong kaliwatan sa katawhan nagsingabot sa ganghaan sa kalaglagan, tinong dili nato gustong ilabay ang atong bililhong paglaom sa kinabuhing dayon pinaagi sa pagbalik ngadto sa “pagligid sa lapok” sa kalibotanong mga kalingahan!​—2 Pedro 2:22; 3:10; Lucas 21:32-36.

 4. Unsang kahimtang ang nagkinahanglag gipadak-an nga taganang “pagkaon sa hustong panahon,” ug sa unsang paagi gitagana ang maong panginahanglan?

⁴ Ingong katumanan sa tagna ni Jesus, sa 1914 dihay “sinugdanan sa mga kasakit” samtang ang katawhan misulod sa panahon sa “katiklopan sa sistema sa mga butang.” Ang mga kasub-anan, malaglagong mga panghitabo, ug pagkamalapason nagkadaghan hangtod niining adlawa. (Mateo 24:3-8, 12) Sa samang panahon, gisugo ni Jehova ang dinihogang matinumanon ug maalamong ulipon nga matang nga itagana ang espirituwal nga “pagkaon sa hustong panahon” alang sa panimalay sa ilang Agalon, si Kristo. (Mateo 24:45-47) Gikan sa iyang trono sa mga langit, kining maong Mesiyasnong Hari karon nagtultol sa kahibulongang programa sa espirituwal nga pagpakaon sa tibuok yuta.

Daghang “Taganang Pagkaon”

 5. Ang pangunang bahin sa “pagkaon” ginahatagan ug unsang pagtagad?

⁵ Tagda ang pagpangandam sa “taganang pagkaon.” (Lucas 12:42) Ang pangunang bahin sa Kristohanong pagkaon mao ang Pulong sa Diyos, ang Bibliya. Aron epektibong itudlo ang Bibliya, ang mabasa, tukmang hubad maoy pangunang panginahanglan. Latas sa katuigan ang maong panginahanglan mausbawong gituman, ilabina sugod sa 1950 sa dihang ang New World Translation of the Christian Greek Scriptures giluwatan sa Iningles. Pagka-1961 ang New World Translation sa enterong Bibliya natapos na, ug sa wala madugay ang mga edisyon mipatim-aw diha sa ubang pangunang mga pinulongan. Ang 3 ka tomo nga giluwatan sa 1996 tuig sa pag-alagad nagpatungha sa katibuk-ang gidaghanon nga 27, nga niana 14 maoy kompletong Bibliya. Aron mahimo kining buluhaton sa Bibliya, ingon man sa mga tabang sa Bibliya, mga 1,174 ka dedikadong mga Kristohanon ang nagbuhat karon nga bug-os panahon sa paghubad diha sa 77 ka nasod.

 6. Sa unsang paagi natagan-an sa Sosyedad ang panginahanglan sa mga basahon sa Bibliya?

⁶ Sa pagpaluyo sa buluhaton niining daghang maghuhubad, ang 24 ka nag-imprentang mga sangang buhatan sa Watch Tower Society nagagamag mga basahon sa sigeng nag-uswag nga gidaghanon. Sa maong katuyoan, ang dugang high-speed nga mga rotary press padayong giinstalar sa pangunang mga sangang buhatan. Ang produksiyon sa mga magasing Bantayanang Torre ug Pagmata! nagmausbawon bulanbulan, nga miabot sa gitingob nga gidaghanon nga 943,892,500 ka kopya, nga 13.4-porsiyentong pag-uswag niining tuiga. Ang katibuk-ang produksiyon sa mga Bibliya ug gahig-hapin nga mga libro sa Tinipong Bansa, Brazil, Pinlandia, Alemanya, Italya, Hapon, Korea, ug Mexico lamang miuswag ug 40 porsiyento gikan sa 1995 ngadto sa 76,760,098 ka kopya sa 1996. Ang ubang mga sangang buhatan nakaamot usab ug dako sa katibuk-ang pag-uswag sa produksiyon sa literatura.

 7. Nganong ang Isaias 54:2 pagatumanon nga mas dinalian karon?

⁷ Ang dakong pag-uswag gikinahanglan sulod sa katuigang 1990 tungod sa pagwagtang sa mga restriksiyon diha sa mga Saksi ni Jehova sa Silangang Uropa ug sa Aprika. Dako kaayo ang kagutmanan alang sa espirituwal nga pagkaon niining mga dapita. Busa ang awhag migula nga labi pang dinalian: “Padakoa ang dapit sa imong balongbalong. Ug ipabuklad nila ang mga panapton sa balongbalong sa imong dakong tabernakulo. Ayaw pagpugong. Lugwayi ang mga pisi sa imong balongbalong, ug lig-ona ang imong mga lagdok.”​—Isaias 54:2.

 8. Unsang mahinatagon nga sanong ang nakatabang sa pagtaganag pinansiyal nga suportar?

⁸ Sa ingon, gikinahanglan nga padak-an ang mga pasilidad sa kadaghanan sa 104 ka sangang buhatan sa Sosyedad. Tungod sa lisod nga mga kahimtang sa ekonomiya sa daghang bag-ong naablihang mga teritoryo, ang dakong bahin sa gastos alang sa maong pagpadako gihulipan sa mga amot alang sa tibuok-kalibotang buluhaton diha sa mas datong kanasoran. Ikalipay, ang mga kongregasyon ug mga indibiduwal bug-os kalag nga misanong, sa espiritu sa Exodo 35:21: “Unya sila nangabot, ang tagsatagsa kansang kasingkasing nag-agda kaniya, ug sila nagdala, ang tagsatagsa kansang espiritu nagdasig kaniya, sa amot alang sa buluhaton ni Jehova.” Gipahimuslan namo kining higayona sa pagpasalamat sa tanan nga nakigbahin niining dagayang pagpanghatag.​—2 Corinto 9:11.

 9. Sa unsang paagi ang Roma 10:13, 18 ginatuman karong adlawa?

⁹ Sulod sa 1996 ang mga basahon sa Watch Tower Society naghimaya gayod sa ngalan ug mga katuyoan ni Jehova hangtod sa mga kinatumyan sa yuta. Kini nahitabo sumala sa gitagna ni apostol Pablo. Sa pagkutlo sa tagna ni Joel ug sa ika-19ng Salmo, siya misulat: “‘Ang tanang nanagtawag sa ngalan ni Jehova mamaluwas.’ Bisan pa ako mangutana, Sila wala mapakyas pagdungog, dili ba? Tan-awa, sa pagkatinuod, ‘ang ilang tingog nahingadto sa tibuok nga yuta, ug ang ilang mga pamulong ngadto sa kinatumyan sa gipuy-ang yuta.’” (Roma 10:13, 18) Pinaagi sa maong pagdayeg sa bililhong ngalan nga Jehova, ang iyang katawhan nakahimog dakong bahin sa pagpuno ug himaya sa iyang balay sa pagsimba. Apan sa unsang paagi ang maong pagmantala miuswag ilabina panahon sa 1996? Palihog susiha ang tsart nga mosunod sa mga panid 18 hangtod 21.

Tibuok-Kalibotan nga Pagpangani

10. Unsang talagsaong mga bahin ang imong namatikdan sa kalihokan sa katawhan ni Jehova, ingong gisumada sa tsart sa mga panid 18 ngadto sa 21?

¹⁰ Wala pa sukad masukad makabaton ug mas dakong puwersa kay sa karon ang mga pulong ni Jesus nga makaplagan sa Lucas 10:2: “Ang anihon, sa pagkatinuod, dako, apan ang mga mamumuo diyutay. Busa pangamuyo kamo sa Agalon sa pag-ani nga magpadalag mga mamumuo ngadto sa iyang anihon.” Misanong ka ba sa maong awhag? Milyonmilyon sa tibuok yuta ang misanong. Gipamatud-an kini sa bag-ong kinatas-ang ihap nga 5,413,769 ka magmamantala sa Gingharian nga mitahog pag-alagad sa kanataran sulod sa 1996. Dugang pa, 366,579 ka bag-ong mga igsoong lalaki ug babaye ang nabawtismohan. Pagkadako sa atong pagmahal niining “tilinguhaong mga butang sa tanang nasod,” kinsa karon nagpakig-ambit sa ‘pagpuno ug himaya sa balay sa pagsimba ni Jehova’!​—Haggeo 2:7.

11. Nganong kitang tanan adunay katarongan nga magsugwak sa kalipay?

¹¹ Ang mga taho bahin sa pagpadako diha sa bag-ong naablihang mga kanataran maoy talagsaon kaayo. Ang uban ba kanato nasina niadtong kinsa nagpahimulos karon sa maong pag-uswag? Sa katugbang, kita nagmaya duyog kanila. Ang tanang nasod may gagmayng mga sinugdanan. Ang kadungan nga propeta ni Haggeo, si Zacarias, misulat: “Kinsa ang nagtamay sa adlaw sa gagmayng mga butang?” (Zacarias 4:10) Nagsugwak ang atong kalipay nga sa mga nasod diin ang buluhatong pagsangyaw establisado na kaayo, karon adunay minilyong magmamantala sa Gingharian, ug ang teritoryo kanunayng makobrehan, kada semana pa gani sa daghang dagkong mga siyudad. May katarongan ba nga kita maghinayhinay samtang gipaabot karon ni Jehova ang kahigayonan alang sa kaluwasan ngadto sa mga dapit nga kanhi gipig-otan? Dili gayod! “Ang uma mao ang kalibotan,” matod ni Jesus. (Mateo 13:38) Ang bug-os nga pagpamatuod kinahanglan nga padayong igapahayag, maingon nga gipahayag sa unang mga tinun-an ang bug-os nga pagpamatuod panahon sa katiklopan sa Hudiyohanong sistema sa mga butang.​—Buhat 2:40; 10:42; 20:24; 28:23.

Kanunayng Nagapadayon sa Unahan

12. Unsang panukmod ang atong nabatonan aron magpadayong “deretso sa unahan”? (Tan-awa usab ang kahon, “Pagpangani ‘Gikan sa Kinatumyan sa Yuta.’”)

¹² Oo, kinahanglang kita kanunayng mosagnunot, nga magpadayong “deretso sa unahan” kauban sa manulondaanong langitnong karo ni Jehova. (Ezequiel 1:12) Atong hinumdoman ang mga pulong ni Pedro: “Si Jehova dili hinayan labot sa iyang saad, ingon sa pagkahinayan nga giisip sa pipila ka tawo, kondili mapailobon siya kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Itugot nga ang talagsaong kasibot sa atong mga igsoon diha sa mga nasod nga lisod ang pangabuhi magdasig kanato sa pagpadayon. Ang bisan unsang morag pagkalangan sa pagsilaob sa Armagedon nagtugot sa ginatos ka libo nga matigom pa niining mga nasora ingon man ang daghan usab diha sa nakobrehan-pag-ayong mga teritoryo. Ayaw pagkasayop: “Ang dakong adlaw ni Jehova haduol na. Kini haduol na, ug kini nagdali pag-ayo.” (Sofonias 1:14) Kinahanglang adunay pagdali sa atong bahin usab sa pagpahayag sa bug-os nga kataposang pagpamatuod!

13, 14. (a) Unsay ikaingon bahin sa pagpanagtag sa mga basahon sulod sa 1996? (b) Unsang espesyal nga mga plano ang mahimong himoon sa mga kongregasyon kada tuig, ug kamo ba nagplano nga makaambit niana?

¹³ Bisan pag ang mga detalye dili makita diha sa tsart bahin sa pag-alagad, may talagsaong pag-uswag sa pagpanagtag sa mga Bibliya, mga libro, ug mga magasin sulod sa miaging tuig. Pananglitan, ang napahilunang mga magasin sa tibuok kalibotan nagpakitag 19-porsiyentong pag-uswag, nga ang katibuk-ang gidaghanon nga 543,667,923 ka kopya ang napahiluna. Ang atong mga magasin makatabang sa pagpadali sa mahanasong pagwali​—diha sa kadalanan, sa mga parke, sa mga hunonganan ug bus, sa komersiyal nga mga dapit. Gipaila sa mga taho nga sa pipila ka teritoryo nga kanunayng gisangyawan bahin sa Gingharian, ang mga tawong propesyonal nakadayeg sa kalidad sa atong mga magasin ug midawat sa mga pagtuon sa Bibliya.

¹⁴ Kada tuig sulod sa bulan sa Abril, ang mga kongregasyon kasagarang mag-organisar ug espesyal nga kalihokan sa magasin, nga maglakip sa tibuok-adlaw nga kampanya sa balay-balay ug sa publikong mga dapit. Ang inyo bang kongregasyon moapil niini sulod sa Abril 1997? Ang talagsaong mga isyu sa Abril sa Ang Bantayanang Torre ug Pagmata! giandam, ug ang dungan nga pagtanyag niini sa tibuok kalibotan tinong mahimong dalayegon! Sa isla sa Cipro, ang mga kongregasyon, nga nagagamit sa ilang panultihong “abota ang tanan nga posible sa mensahe sa Gingharian,” nagtuman gani niana kada bulan pinaagi sa naeskedyul nga kalihokan sa magasin, nga miabot sa bag-ong kinatas-ang ihap nga 275,359 ang napahiluna alang sa maong tuig, nga 54-porsiyentong pag-uswag.

Kataposang mga Mensahe ni Haggeo

15. (a) Nganong si Jehova nagpadalag dugang nga mga mensahe pinaagi kang Haggeo? (b) Unsang pagtulon-an ang angayng ipasa kanato sa ikatulong mensahe ni Haggeo?

¹⁵ Si Jehova nagpadala kang Haggeo, 63 ka adlaw human niya ihatag ang iyang ikaduhang mensahe, uban ang ikatulong proklamasyon nga atong ikabutang sa kasingkasing karong adlawa. Si Haggeo nagpahayag nga samag ang mga Hudiyo nagpahiluna niadtong panahona sa patukoranan sa templo, nga aktuwal nilang gipahiluna 17 ka tuig kanhi. Sa makausa pa gihukom ni Jehova nga manghinlo. Ang mga saserdote ug mga tawo nagtinapolan ug busa mahugaw sa panan-aw ni Jehova. Mahimo ba kaha nga ang pipila sa katawhan ni Jehova nagtinapolan karong adlawa, nga nalambigit pa sa ilang kaugalingon sa matinugoton ug materyalistikanhong mga paagi sa kalibotan? Dinalian nga kitang tanan magtumong sa atong mga kasingkasing “sukad niining adlawa ug padayon” sa paghimaya sa ngalan ni Jehova, nga masaligon sa iyang saad: “Sukad niining adlawa igahatag ko ang panalangin.”​—Haggeo 2:10-19; Hebreohanon 6:11, 12.

16. Unsang “pag-uyog” ang haduol na, ug unsay mosangpot?

¹⁶ Niadtong adlawa mismo, ang pulong “ni Jehova sa mga panon” miabot kang Haggeo sa ikaupat ug kataposang higayon. Siya nagpahibalo kon unsay nalangkit sa Iyang “pag-uyog sa mga langit ug sa yuta,” nga nag-ingon: “Ako gayong pagapukanon ang trono sa mga gingharian ug pagalaglagon ang kusog sa mga gingharian sa mga nasod; ug akong pagapukanon ang karo ug mga mangangabayo niini, ug ang mga kabayo ug ang ilang mga mangangabayo tinong mahulog, ang matag usa pinaagi sa espada sa iyang igsoon.” (Haggeo 2:6, 21, 22) Ang “pag-uyog” sa ingon moabot sa tayuktok niini sa dihang sa hingpit si Jehova maghinlo sa yuta sa Armagedon. Sa maong panahon “ang tilinguhaong mga butang sa tanang nasod” nakasulod na, aron mahimong uyok sa tawhanong katilingban alang sa bag-ong kalibotan. Pagkatalagsaong mga katarongan sa pagkalipay ug paghatag ug pagdayeg kang Jehova!​—Haggeo 2:7; Pinadayag 19:6, 7; 21:1-4.

17. Sa unsang paagi si Jesus gipahimutang ingong “singsing igpapatik”?

¹⁷ Sa pagtiklop sa iyang tagna, si Haggeo misulat: “‘Nianang adlawa,’ mao ang giingon ni Jehova sa mga panon, ‘Dad-on ko ikaw, Oh Zerubabel . . . , ug igabutang ko gayod ikaw ingong usa ka singsing igpapatik, tungod kay ikaw mao ang akong napili,’ mao ang giingon ni Jehova sa mga panon.” (Haggeo 2:23) Si Kristo Jesus mao karon ang antitipikong Mesiyasnong Hari ni Jehova ug Hataas nga Saserdote, nga nagtapo sa mga langit sa mga katungdanan nga giokupar nga separado ni Gobernador Zerubabel ug sa Hataas nga Saserdoteng si Josue sa yutan-ong Jerusalem. Samag opisyal nga singsing igpapatik diha sa tuong kamot ni Jehova, si Jesus mao ang nahimong “Oo” ingong instrumento ni Jehova sa pagtuman sa daghang “mga saad sa Diyos.” (2 Corinto 1:20; Efeso 3:10, 11; Pinadayag 19:10) Ang enterong matagnaong mensahe sa Bibliya natumong sa tagana ni Jehova kang Kristo ingong Hari ug saserdotehanong Manunubos.​—Juan 18:37; 1 Pedro 1:18, 19.

18. Sa unsang paagi ang kataposang “giingon ni Jehova sa mga panon” makabaton ug makaparepreskong katumanan?

¹⁸ Sa pagkatinuod niining atong adlaw, ang kinadak-ang himaya hikaplagan diha sa masilakong espirituwal nga templo ni Jehova! Ug sa dili madugay, human malaglag ni Jehova ang tibuok nga sistema ni Satanas, ang Haggeo 2:9 makabatog dugang nga makalilipayng katumanan: “‘Niining dapita ako magahatag ug pakigdait,’ mao ang giingon ni Jehova sa mga panon.” Sa kataposan pakigdait!​—malungtaron, tibuok-kalibotang pakigdait, nga garantisado sa “singsing igpapatik” ni Jehova, si Kristo Jesus, ang “Prinsipe sa Pakigdait,” nga bahin kaniya kini nahisulat: “Sa kadagaya sa prinsipenhong pagmando ug sa pakigdait walay kataposan . . . Ang kadasig mismo ni Jehova sa mga panon ang magabuhat niini.” (Isaias 9:6, 7) Hangtod sa hangtod ang himaya sa balay sa pagsimba ni Jehova ibanaag sa tibuok malinawong dominyo sa iyang tibuok-kalibotan nga pagmando. Hinaot nga kita magpabilin sa kanunay nianang balaya!​—Salmo 27:4; 65:4; 84:10.

[Mga footnote]

Makapatin-aw Ka Ba?

◻ Sa unsang paagi, karong adlawa, ang balay ni Jehova ‘gipunog himaya’?

◻ Nganong labi pang dinalian kay sukad masukad ang pagwali sa maayong balita?

◻ Unsang panukmod sa pagwali nga dinalian ang ginahatag sa Taho sa Pag-alagad sa Tuig 1996?

◻ Sa unsang paagi si Kristo nag-alagad ingong “singsing igpapatik” ni Jehova?

[Kahon sa panid 15]

Pagpangani “Gikan sa Kinatumyan sa Yuta”

SA Isaias 43:6, atong mabasa ang sugo ni Jehova: “Ayaw pagpugong. Dad-a ang akong mga anak lalaki gikan sa halayo, ug akong mga anak babaye gikan sa kinatumyan sa yuta.” Kining maong kasulatan adunay talagsaong katumanan karong adlawa sa Silangang Uropa. Tagda pananglitan, ang kanhing Komunistang nasod sa Moldova. Adunay mga balangay diin mga katunga sa populasyon maoy mga Saksi karon. Kinahanglang mopanaw silag lagyong mga distansiya aron makakitag teritoryo nga masangyawan, apan sila nagapaningkamot! Daghang magmamantala niining mga kongregasyona mao ang mga anak sa mga ginikanan nga gidestiyero ngadto sa Siberia sa sinugdan sa katuigang 1950. Karon ang ilang mga pamilya maoy nagapanguna sa buluhatong pagpangani. Sa 12,565 ka magmamantala, 1,917 ang nabawtismohan niining miaging tuig. Kap-atag-tulo ka kongregasyon may mga 150 ka magmamantala ang matag usa, ug ang mga sirkito miusbaw gikan sa upat ngadto sa walo sa bag-ong tuig sa pag-alagad.

Talagsaon, usab, ang pag-uswag sa Albania. Didto ang maihap-sa-tudlo nga maunongong mga Saksi miantos sa labing pintas nga mga diktador nga pagmando latas sa mga 50 ka tuig. Ubay-ubay kanila ang gipatay. Kini magpahinumdom sa saad ni Jesus: “Ayawg kahadlok sa mga butang nga hapit na nimong antoson. Tan-awa! Ang Yawa padayong magabalhog sa pipila kaninyo sa prisohan aron bug-os kamong mabutang sa pagsulay . . . Pamatud-i ang imong kaugalingon nga kasaligan bisan pa hangtod sa kamatayon, ug igahatag ko kanimo ang purongpurong sa kinabuhi.” (Pinadayag 2:10; tan-awa usab ang Juan 5:28, 29; 11:24, 25.) Unsay atong makita karon sa Albania? Sa pagkatinuod usa ka talagsaong katumanan sa saad ni Jehova nga hikaplagan sa Isaias 60:22: “Ang gamay mahimong usa ka libo”! Niadtong 1990 usa lamang ka magmamantala ang mitahog pagsangyaw sa Albania. Bisan pa niana, ang dugang nga “mga mamumuo” nga taga-Italya ug ubang mga nasod mitubag sa awhag ni Jesus: “Busa panglakaw kamo ug paghimog mga tinun-an sa katawhan . . . , nga magabawtismo kanila.” (Mateo 28:19; Lucas 10:2) Panahon sa Memoryal sa kamatayon ni Jesus sa 1996, 773 ka magmamantala ang aktibo sa kanataran, ug kini sila nakatigom ug 6,523 ka tawo alang sa ilang mga tigom sa Memoryal, kapig walo ka pilo sa gidaghanon sa mga magmamantala! Ang katingalahang mga tumatambong gitaho gikan sa nahilit nga mga dapit. Bisan pag walay lokal nga mga magmamantala, ang mga siyudad sa Kukës ug Divjakë may mga tumatambong nga 192 ug 230 nga tinagsa. Ang Krujë, nga usa lang ug magmamantala, may 212 nga presente. Ang 30 ka magmamantala sa Korçë miabang ug mga pasilidad alang sa kapig 300. Human masulod ang maong gidaghanon sa awditoryum, ang laing 200 gibalibaran tungod kay wala nay lugar. Usa gayod ka umahan nga hinog na aron anihon!

Gikan sa Romania miabot kining tahoa: “Samtang kami namalaybalay, among nahibalag ang usa ka tawo nga miingon nga siya usa sa mga Saksi ni Jehova ug nagpuyo sa usa ka gamayng lungsod diin, sumala sa among nasayran, wala ing mga Saksi. Giingnan niya kami nga gawas pa kaniya may 15 pa ka tawo nga sulod sa daghang tuig naghimog mga tigom sa ma-Huwebes ug ma-Dominggo ug sila nagsugod na sa pagsangyaw sa balay-balay. Sa pagkaugma among giadto ang maong lungsod. Nagpaabot kanamo sulod sa duha ka kuwarto mao ang 15 ka lalaki, mga babaye, ug mga bata nga midawat sa 20 ka libro ug 20 sa kinabag-ohang mga magasin. Gipakitaan namo sila kon unsaon pagdumalag mga pagtuon sa Bibliya. Nag-usa kami sa pagkanta ug gitubag ang ilang labing hinungdanong mga pangutana. Ang usang nanguna sa grupo misugilon: ‘Pila ka adlaw nga miagi, ako miampo uban ang mga luha kang Jehova nga padad-an kamig usa ka magbalantay, ug gitubag ang akong pag-ampo.’ Kami malipayon sa tuman, ug sa pagbiya namo, samag usa ka ilo nga sa kataposan nakakaplag sa usa ka amahan, siya miingon: ‘Ayaw intawon kamig kalimti. Anhi baya ug duawa kamig balik!’ Gihimo namo kana, ug karon pito ka pagtuon sa Bibliya ang ginadumala sa maong lungsod. Sa daghang bag-ong mga teritoryo, ang buluhaton magsugod sa kahibulongang paagi uban ang literatura sa Bibliya, nga gipabilhan pag-ayo, ug kini nagpakitang ang buluhaton adunay balaang tinubdan.”

[Chart sa panid 18-21]

1996 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang tomo)

[Mga hulagway sa panid 16, 17]

“Ang tilinguhaong mga butang sa tanang nasod” ginatigom sa Kaislahan sa Dagat (1), Amerika del Sur (2), Aprika (3), Asia (4), Amerika del Norte (5), ug Uropa (6)