Malipayon ang Nag-alagad sa “Malipayong Diyos”

 1. Nganong malipayon ang mga magsisimba ni Jehova? (Tan-awa ang hulagway sa sinugdan sa artikulo.)

MALIPAYON gyod nga katawhan ang mga Saksi ni Jehova. Diha sa ilang mga tigom, asembliya, ug tapoktapok, madungog nimo ang ilang malipayong panag-estoryahanay ug kataw-anay. Nganong malipayon kaayo sila? Ang pangunang rason mao nga sila nakaila, nag-alagad, ug naningkamot sa pagsundog kang Jehova, ang “malipayong Diyos.” (1 Tim. 1:11; Sal. 16:11) Ang Diyos mao ang Tuboran sa kalipay, busa gusto niyang magmalipayon ta, ug gihatagan ta niyag daghang rason nga magmalipayon.​—Deut. 12:7; Eccl. 3:12, 13.

2, 3. (a) Unsa ang kalipay? (b) Nganong lisod nga magmalipayon?

² Komosta sa imong bahin? Malipayon ka ba? Puwede ka bang mahimong mas malipayon? Ang kalipay mahimong magkahulogan ug maayong pagbati nga medyo permanente. Apil niini ang lainlaing emosyon gikan sa simpleng katagbawan ngadto sa hilabihang kasadya ug ang natural nga tinguha nga magpadayon kini. Gipakita sa Bibliya nga kadto lang gipanalanginan ni Jehova ang tinuod nga malipayon. Pero karon, lisod tingaling magmalipayon. Ngano?

³ Makapawala sa kalipay ang makapaguol nga mga hitabo, sama nianang ang minahal mamatay o ma-disfellowship o dihang magdiborsiyo o mawad-ag trabaho. Ang problema sa pamilya ug dili pagsinabtanay makapawala sab sa kalipay. Ang pagbugalbugal sa mga katrabaho o klasmet, paglutos, o pagkapriso makapawala pod sa kalipay​—ingon man ang nagkaluyang panglawas, grabeng sakit, o depresyon. Bisan pa niana, si Jesu-Kristo, ang “malipayon ug bugtong Magmamando,” gustong mohatag ug paghupay ug kalipay sa mga tawo. (1 Tim. 6:15; Mat. 11:28-30) Sa iyang Wali sa Bukid, gihisgotan ni Jesus ang pipila ka hiyas nga makatabang nato nga magmalipayon bisan sa mga problema sa kalibotan ni Satanas.

4, 5. Sa unsang paagi magmalipayon ta?

⁴ Ilabinang importante ang unang gihisgotan ni Jesus: “Malipayon kadtong mahunahunaon sa ilang espirituwal nga panginahanglan, sanglit ila ang gingharian sa mga langit.” (Mat. 5:3) Unsaon nato pagpakita nga mahunahunaon ta niana nga panginahanglan? Mahimo nato nâ pinaagi sa pagkuhag espirituwal nga pagkaon, pagpabili sa espirituwal nga mga butang, ug pag-una sa pagsimba sa malipayong Diyos. Kon buhaton nato nâ, mahimo tang mas malipayon. Mas molig-on ang atong pagtuo nga matuman ang mga saad sa Diyos. Ug madasig ta sa “makalilipay nga paglaom” nga gihatag sa Diyos sa iyang tinuod nga mga magsisimba pinaagi sa Bibliya.​—Tito 2:13.

⁵ Importante ang pagpakigsuod kang Jehova aron tinuod nga magmalipayon. Si apostol Pablo gigiyahan sa Diyos sa pagsulat: “Pagmaya kanunay diha sa Ginoo [si Jehova]. Sa makausa pa ako magaingon, Pagmaya!” (Filip. 4:4) Aron masuod sa Diyos, gikinahanglan nato ang iyang kaalam. Ang Pulong sa Diyos nag-ingon: “Malipayon ang tawo nga nakakaplag ug kaalam, ug ang tawo nga nakabaton ug katakos sa pag-ila, kini maoy kahoy sa kinabuhi niadtong mga nagakupot niini, ug kadtong mga nagahawid niini pagatawgong malipayon.”​—Prov. 3:13, 18.

 6. Unsa pay atong buhaton aron magmalipayon?

⁶ Pero, aron magpabiling malipayon, dili igo ang pagbasa sa Pulong sa Diyos. Kinahanglan pod nato ning ipadapat. Aron ipakita ang kaimportante sa pagpadapat sa atong nakat-onan, si Jesus miingon: “Kon nahibalo kamo niining mga butanga, malipayon kamo kon inyo kining buhaton.” (Juan 13:17; basaha ang Santiago 1:25.) Importante kini aron matagbaw ang atong espirituwal nga panginahanglan ug magpabiling malipayon. Pero sa unsang paagi magmalipayon ta bisag daghan kaayo ang makapawala sa atong kalipay? Atong hisgotan ang sunod nga giingon ni Jesus sa Wali sa Bukid.

 7. Sa unsang paagi magmalipayon ang mga nagbangotan?

⁷ “Malipayon kadtong nagbangotan, sanglit sila pagahupayon.” (Mat. 5:4) Makapangutana tingali ang pipila: ‘Sa unsang paagi magmalipayon ang mga nagbangotan?’ Si Jesus wala magtumong sa tanang nagbangotan. Bisan ang mga daotan nagbangotan, o naguol, tungod sa daghang problema niining “makuyaw nga mga panahong lisod sagubangon.” (2 Tim. 3:1) Pero ang ilang pagbangotan dili makapasuod nila kang Jehova kay kaugalingon ray ilang gihunahuna. Busa, dili nâ makahatag nilag kalipay. Ang gitumong ni Jesus mao kadtong mahunahunaon sa ilang espirituwal nga panginahanglan ug nagbangotan tungod sa makapaguol nga espirituwal nga kahimtang sa ilang palibot. Sila nahibalo sa ilang makasasalang kahimtang ug sa makapaguol nga mga resulta tungod sa pagpakasala sa tawo. Nakita ni Jehova ang maong sinserong nagbangotan, ug iya silang dasigon ug panalanginag espirituwal nga paghupay, kalipay, ug kinabuhing walay kataposan.​—Basaha ang Ezequiel 5:11; 9:4.

 8. Isaysay kon nganong malipayon ang mga malumo.

⁸ “Malipayon ang mga malumog-buot, sanglit sila magapanunod sa yuta.” (Mat. 5:5) Sa unsang paagi makapalipay ang pagkamalumo? Mausab ang mga tawo human makakat-on sa tukmang kahibalo sa kamatuoran. Sa una, sila tingali isog, palaaway, ug agresibo. Pero karon, sila nagsul-ob sa “bag-ong pagkatawo” ug nagpakitag “malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.” (Col. 3:9-12) Ingong resulta, sila nagkinabuhi karon nga malinawon, mahigugmaon, ug mas malipayon. Dugang pa, ang Pulong sa Diyos nagsaad nga sila “magapanag-iya sa yuta.”​—Sal. 37:8-10, 29.

 9. (a) Sa unsang paagi ang mga malumo “magapanunod sa yuta”? (b) Nganong magmalipayon ang “gigutom ug giuhaw sa pagkamatarong”?

⁹ Sa unsang paagi ang mga malumo “magapanunod sa yuta”? Ang dinihogan sa espiritu nga mga tinun-an ni Jesus magapanunod sa yuta dihang mandoan nila kini ingong mga hari ug saserdote. (Pin. 20:6) Pero minilyon nga dili langitnon ug paglaom ang makapanunod sa yuta. Sa unsang paagi? Tugotan silang mopuyo niini sa walay kataposan nga hingpit, malinawon, ug malipayon. Apil sila sa giingong malipayon kay “gigutom ug giuhaw sa pagkamatarong.” (Mat. 5:6) Ang ilang kagutom ug kauhaw sa pagkamatarong matagbaw sa bag-ong kalibotan. (2 Ped. 3:13) Dihang wad-on na sa Diyos ang tanang pagkadaotan, ang mga matarong magmalipayon ug dili na gyod magbangotan.​—Sal. 37:17.

10. Unsay ipasabot sa pagkamaluluy-on?

¹⁰ “Malipayon ang mga maluluy-on, sanglit sila pakitaan ug kaluoy.” (Mat. 5:7) Ang Hebreohanong pulong nga konektado sa kaluoy nagkahulogan ug “pagdasig, pagbati nga mainiton uban sa malumong emosyon; . . . nga magmabination.” Sa susama, ang Gregong pulong niini nag-apil sa pagsimpatiya sa uban. Pero ang kaluoy dili lang pagbati. Sa Bibliya, nag-apil kini sa pagpakita ug kaluoy pinaagig buhat.

11. Unsay atong makat-onan bahin sa kaluoy diha sa ilustrasyon sa buotang Samarianhon?

¹¹ Basaha ang Lucas 10:30-37. Ang ilustrasyon ni Jesus bahin sa buotang Samarianhon klarong nagpakita kon unsay ipasabot sa pagkamaluluy-on. Kay napalihok sa pagkamabination ug kaluoy, ang Samarianhon mihimog maayong buhat aron tabangan ang tawong nag-antos. Human isulti ang ilustrasyon, si Jesus miingon: “Lakaw ug buhata ang ingon.” Busa, mahimong pangutan-on nato ang kaugalingon: ‘Gibuhat ba sab nako nâ? Gisundog ba nako ang maluluy-ong Samarianhon? Mas makapakita ba kog kaluoy ug makahimog maayong mga buhat para niadtong nag-antos? Pananglitan, makatabang ba ko sa mga igsoong tigulang, biyuda, ug niadtong dili Saksi ang ginikanan? Puwede ba nakong hupayon ang nagmagul-anon?’​—1 Tes. 5:14; Sant. 1:27.

12. Sa unsang paagi makapalipay ang pagkamaluluy-on?

¹² Pero, sa unsang paagi makapalipay ang pagkamaluluy-on? Kon maluluy-on ta sa uban, matagamtam nato ang kalipay sa paghatag. Dugang pa, kabalo ta nga makapalipay ta kang Jehova. (Buh. 20:35; basaha ang Hebreohanon 13:16.) Bahin sa usa nga maluluy-on, si Haring David miingon: “Si Jehova magabantay kaniya ug magatipig kaniya nga buhi. Siya ipahayag nga malipayon dinhi sa yuta.” (Sal. 41:1, 2) Kon magmaluluy-on ta, kaluy-an pod ta ni Jehova, nga moresultag walay kataposang kalipay.​—Sant. 2:13.

13, 14. Unsay koneksiyon sa putli nga kasingkasing ug sa kalipay?

¹³ “Malipayon ang mga putli sa kasingkasing,” matod ni Jesus, “sanglit sila makakita sa Diyos.” (Mat. 5:8) Aron magpabiling putli ang atong kasingkasing, kinahanglang hinlo ang atong hunahuna ug mga tinguha. Kinahanglang pirmeng hinlo ang atong hunahuna aron dili mahugawan ang atong debosyon kang Jehova.​—Basaha ang 2 Corinto 4:2; 1 Tim. 1:5.

¹⁴ Ang mga putli ug kasingkasing mahimong hinlo ug malipayon atubangan ni Jehova, kinsa miingon: “Malipayon kadtong naglaba sa ilang tag-as nga mga besti.” (Pin. 22:14) Sa unsang paagi sila “naglaba sa ilang tag-as nga mga besti”? Ang dinihogang mga Kristohanon “naglaba sa ilang tag-as nga mga besti” sa pagkaagi nga hinlo sila sa panan-aw ni Jehova ug hatagan silag imortal nga kinabuhi ug makatagamtam ug walay kataposang kalipay sa ilang posisyon sa langit. Ang dakong panon kinsa naglaom nga mabuhi sa yuta makatagamtam pod ug matarong nga baroganan ingong mga higala sa Diyos. Gani, sila karon ‘naglaba sa ilang tag-as nga mga besti ug nagpaputi niini sa dugo sa Kordero.’​—Pin. 7:9, 13, 14.

15, 16. Sa unsang paagi “makakita sa Diyos” ang mga putli sa kasingkasing?

¹⁵ Pero, sa unsang paagi “makakita sa Diyos” ang mga putli sa kasingkasing nga ‘wala may tawong makakita sa Diyos ug mabuhi pa’? (Ex. 33:20) Ang Gregong pulong nga gihubad ug “makakita” mahimong magpasabot ug “pagkakita pinaagi sa hunahuna, pagsabot, pagkahibalo.” Ang makakita sa Diyos pinaagi sa “mga mata sa . . . kasingkasing” mao kadtong nakaila niya, nga nakaapresyar sa iyang mga hiyas. (Efe. 1:18) Hingpit nga gipakita ni Jesus ang personalidad sa Diyos, maong siya nakaingon: “Siya nga nakakita kanako nakakita usab sa Amahan.”​—Juan 14:7-9.

¹⁶ Gawas sa pagkahibalo sa mga hiyas sa Diyos, ang tinuod nga mga magsisimba “makakita sa Diyos” pinaagi sa pagpaniid sa iyang mga nahimo para nila. (Job 42:5) Gipokus sab nila ang ‘ilang mga mata sa kasingkasing’ sa nindot nga mga panalangin nga gisaad sa Diyos niadtong naningkamot sa pagpabiling putli ug maunongon. Siyempre, ang nabanhawng mga dinihogan literal nga makakita kang Jehova dihang moadto na sila sa langit.​—1 Juan 3:2.

17. Nganong malipayon ang mga makigdaiton?

¹⁷ Dayon, si Jesus miingon: “Malipayon ang mga makigdaiton.” (Mat. 5:9) Kadtong mangitag paagi nga makigdait dunay rason nga magmalipayon. Ang tinun-ang si Santiago miingon: “Ang bunga sa pagkamatarong may binhi nga gipugas ubos sa malinawong mga kahimtang alang niadtong nagapakigdait.” (Sant. 3:18) Kon may dili ta ikasinabot diha sa kongregasyon o sa pamilya, makapangayo tag tabang sa Diyos aron makigdait. Ingong resulta, ihatag ni Jehova ang iyang balaang espiritu, makapakita tag maayong panggawi, ug magmalipayon ta. Gipasiugda ni Jesus ang kaimportante sa pagpangitag paagi nga makigdait dihang siya miingon: “Kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon, ug unya, sa makabalik ka na, ihalad ang imong gasa.”​—Mat. 5:23, 24.

18, 19. Nganong malipayon gihapon ang mga Kristohanon bisag gilutos?

¹⁸ “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako.” Unsay gipasabot ni Jesus? Siya nagpadayon: “Pagmaya ug lukso sa kalipay, sanglit dako ang inyong ganti sa mga langit; kay nianang paagiha sila naglutos sa mga manalagna nga nauna kaninyo.” (Mat. 5:11, 12) Dihang ang mga apostoles gibunalan ug gipahunong sa pagsangyaw, “sila milakaw gikan sa atubangan sa Sanhedrin, nga nagmaya.” Siyempre, wala nila ikalipay ang pagbunal kanila. Pero sila nagmalipayon “kay giisip sila nga takos pakaulawan tungod sa . . . ngalan [ni Jesus].”​—Buh. 5:41.

¹⁹ Karon, ang katawhan ni Jehova nakalahutay sab uban ang kalipay dihang sila nag-antos tungod sa ngalan ni Jesus o dihang sila nag-atubag kalisdanan. (Basaha ang Santiago 1:2-4.) Parehas sa mga apostoles, dili nato ikalipay ang bisan unsang pag-antos. Pero kon magmatinumanon ta kang Jehova panahon sa kalisdanan, tabangan ta niya nga makalahutay uban ang kaisog. Pananglitan, niadtong Agosto 1944, ang diktadoryang gobyerno nagpadala kang Henryk Dornik ug sa iyang igsoon ngadto sa kampo konsentrasyon. Pero ang mga oposer nakaingon: “Imposibleng madani nato sila. Makapalipay nila ang pagkahimong martir.” Si Brader Dornik miingon: “Bisag dili nako gustong magmartir, ang pag-antos uban ang kaisog ug dignidad para sa akong pagkamaunongon kang Jehova nakapalipay nako. . . . Ang kinasingkasing nga pag-ampo nakapasuod nako kang Jehova, ug napamatud-an nako nga kasaligan siya nga Magtatabang.”

20. Nganong malipay tang mag-alagad sa “malipayong Diyos”?

²⁰ Kon maangkon nato ang pabor sa “malipayong Diyos,” magmalipayon ta bisan pa sa paglutos, pagsupak sa pamilya, sakit, o pagkatigulang. (1 Tim. 1:11) Magmalipayon sab ta tungod sa nindot nga mga saad sa Diyos, kinsa “dili makabakak.” (Tito 1:2) Nindot kaayo ang katumanan sa mga saad ni Jehova ug tungod niana mahimong balewala ra ang kalisdanan karon. Sa Paraiso, ang mga panalangin ni Jehova molabaw pa sa atong mahunahunaan. Ug seguradong maeksperyensiyahan nato ang dili hitupngang kalipay. Oo, ‘makakaplag gyod tag tumang kalipay sa kadagaya sa pakigdait.’​—Sal. 37:11.