Hupti ang “Kaputli sa Kasingkasing” Niining Makuyaw nga Panahon

“DILI ikalimod nga problema sa Simbahan karon ang kaputli.” Mao kanay komento sa Katolikong magsusulat nga si Vittorio Messori tungod sa mga eskandalo sa sekso nga dili pa dugayng naglangkit sa Simbahan sa Italya. “Ug dili kini masulbad pinaagi sa pagtugot sa mga klero nga magminyo tungod kay 80 porsiyento sa mga kaso naglangkit sa mga bayot—mga kaso sa abnormal nga seksuwal nga panggawi sa mga pari nga nag-among-among ug mga lalaki ug mga batang lalaki.”—La Stampa.

Sa walay duhaduha, ang kaylap nga pagkadaotan maoy ilhanan niining “kataposang mga adlaw” sa presenteng sistema sa mga butang. (2 Tim. 3:1-5) Ingon sa gipakita sa mga balita, ang pagkadaot sa moral adunay negatibong epekto dili lamang sa katawhan sa katibuk-an kondili usab niadtong nag-angkon nga mga tawo sa Diyos. Ang ilang mahugaw ug dili-putli nga kasingkasing nagtukmod kanila sa pagbuhat ug kahilayan. (Efe. 2:2) Nan haom gayod ang pasidaan ni Jesus nga “nagagula gikan sa kasingkasing ang daotang mga pangatarongan, mga pagbuno, mga pagpanapaw, mga pakighilawas, mga pagpangawat, bakak nga mga pagpamatuod, mga pasipala.” (Mat. 15:19) Apan, si Jehova nga Diyos nagtinguha nga higugmaon sa iyang mga alagad ang “kaputli sa kasingkasing.” (Prov. 22:11) Busa sa unsang paagi mahuptan sa usa ka Kristohanon ang putli nga kasingkasing niining makuyaw nga panahon?

Kon Unsay Kahulogan sa Pagkahimong “Putli sa Kasingkasing”

Sa Bibliya, ang pulong “kasingkasing” sagad gigamit sa simbolikong diwa. Sumala sa usa ka reperensiya, ang termino nga gigamit sa Bibliya alang sa kasingkasing nagtumong sa “kinasulorang bahin sa tawo” ug kana “ang bahin sa tawo nga hinungdanon sa Diyos, diin maugmad niya ang iyang relasyon sa Diyos, ug maoy mohukom maylabot sa moral nga panggawi.” Ang kasingkasing naghawas sa kon unsay atong tinuod nga pagkatawo. Ingon sa gipasiugda sa gikutlong reperensiya, ang kasingkasing mao ang ginasusi ni Jehova ug ang iyang gipabilhan diha sa iyang mga alagad.—1 Ped. 3:4.

Sa Bibliya, ang pulong “putli” ug “mahinlo” mahimong magtumong sa kon unsay mahinlo sa pisikal nga diwa. Apan mapadapat usab kana sa kon unsay wala mahugawi—wala masambogi o mabulingi—sa moral ug espirituwal nga diwa. Sa Wali sa Bukid, si Jesus miingon: “Malipayon ang mga putli sa kasingkasing.” Siya nagtumong niadtong mahinlo ang kinasulorang pagkatawo. (Mat. 5:8) Ang ilang pagbati, tinguha, ug motibo maoy putli. Kay gipalihok sa gugma ug pagkamapasalamaton, ilang gihigugma si Jehova sa tibuok nilang kasingkasing, nga walay pagkasalingkapaw. (Luc. 10:27) Dili ba nga gusto nimong mahimong putli niana nga diwa?

Ang Hagit sa Pagpabiling “Putli sa Kasingkasing”

Ang usa ka alagad ni Jehova kinahanglan nga dili lamang “inosente sa iyang mga kamot” kondili “mahinlo [usab] sa kasingkasing.” (Sal. 24:3, 4) Apan karong adlawa, nag-anam kalisod alang sa mga alagad sa Diyos nga magpabiling “mahinlo sa kasingkasing.” Si Satanas ug ang kalibotan nga ilalom sa iyang pagmando, maingon man ang atong dili-hingpit nga unod, nagpit-os pag-ayo kanato aron ipahilayo kita kang Jehova. Aron makasukol sa maong mga pagpit-os, hinungdanon kaayo nga atong higugmaon ang “kaputli sa kasingkasing” ug huptan kana pag-ayo. Kini manalipod kanato ug motabang kanato nga magpabiling mga higala sa Diyos. Sa unsang paagi nato mahuptan ang putli nga kasingkasing?

Sa Hebreohanon 3:12, atong mabasa ang pasidaan: “Pagbantay, mga igsoon, kay basin maugmad diha kang bisan kinsa kaninyo ang daotang kasingkasing nga walay pagtuo pinaagi sa pagpahilayo sa buhi nga Diyos.” Dili nato mahuptan ang “putli nga kasingkasing” kon atong maugmad ang kasingkasing nga “walay pagtuo.” Unsang mga ideya ang gipakaylap ni Satanas nga Yawa aron pahuyangon ang atong pagtuo sa Diyos? Kini naglakip sa teoriya sa ebolusyon, moral ug relihiyosong relatibismo (walay tinuod nga sukdanan labot sa moralidad ug relihiyon), ug pagduhaduha sa pagkainspirado sa Balaang Kasulatan. Dili gayod kita magpaimpluwensiya nianang peligrosong mga ideolohiya. (Col. 2:8) Ang pagbasa sa Bibliya sa adlaw-adlaw ug pagpamalandong niini maoy pangunang depensa batok sa maong mga impluwensiya. Ang tukmang kahibalo sa Pulong sa Diyos magpalig-on sa atong gugma kang Jehova ug sa atong pagpabili sa iyang pagpakiglabot sa mga tawo. Ang maong gugma ug pagpabili makatabang kanato sa pagsalikway sa sayop nga mga pangatarongan ug sa pagpalig-on sa atong pagtuo kang Jehova aron atong mahuptan ang putli nga kasingkasing.—1 Tim. 1:3-5.

Sa Dihang Mag-atubang ug Unodnong mga Tinguha

Ang laing daotang impluwensiya nga mahimo natong atubangon samtang naningkamot sa paghupot ug “putli nga kasingkasing” naglangkit sa unodnon ug materyalistikong mga tinguha. (1 Juan 2:15, 16) Ang gugma sa salapi o ang tinguha nga makatigom ug mga bahandi ug makabatog materyal nga mga butang makadaot sa kasingkasing, nga magtukmod sa usa ka Kristohanon sa pagbuhat ug mga butang nga supak sa kabubut-on sa Diyos. Ang pipila nahimong dili matinud-anon sa ilang trabahoan, nanglimbong sa uban, o nangawat pa ganig salapi o mga butang.—1 Tim. 6:9, 10.

Sa laing bahin, pinaagi sa pag-ugmad sa maayong matang sa kahadlok nga dili mapahimut-an si Jehova, paghigugma sa hustisya, ug sa pagpaningkamot nga mahuptan ang maayong konsensiya, atong gipakita nga atong gihigugma ang “kaputli sa kasingkasing.” Ang maong gugma magpalihok kanato nga “magmaminatud-on sa tanang butang.” (Heb. 13:18) Kon kita mobuhat ug matarong, ang atong pagkamatinud-anon mahimong mosangpot sa paghatag ug maayong pamatuod. Si Emilio, usa ka Italyanong Saksi nga drayber sa bus, nakakitag pitaka nga dunay sulod nga 470 euro ($680, U.S.). Sa katingala sa iyang mga kauban sa trabaho, iyang gientrigo ang pitaka ngadto sa iyang superbisor, kinsa sa ulahi nag-uli niana sa tag-iya. Ang pipila sa mga kauban ni Emilio nakadayeg pag-ayo sa iyang gibuhat mao nga sila nainteres sa Bibliya ug misugod pagtuon niana. Ingong resulta, pito ka tawo gikan sa duha ka pamilya ang midawat sa kamatuoran. Oo, ang paggawi nga maminatud-on tungod sa putli nga kasingkasing makaaghat gayod sa uban sa paghimaya sa Diyos.—Tito 2:10.

Ang lain pang makahatag ug negatibong impluwensiya sa kaputli sa kasingkasing sa usa ka Kristohanon mao ang hiwi, imoral nga panglantaw sa sekso. Ang pagpakigsekso nga dili pa minyo, pagpanapaw, ug homoseksuwalidad nga giisip sa kadaghanan nga normal lang mahimong makadaot sa kasingkasing sa usa ka Kristohanon. Ang tawo nga magpahaylo sa seksuwal nga imoralidad mahimong magkinabuhi ug dobleng kinabuhi, nga magtago sa iyang sala. Wala gayod kana magpakitag “kaputli sa kasingkasing.”

Si Gabriele nabawtismohan sa edad nga 15 anyos ug nagpayunir dayon. Apan sa ulahi, siya nagsugod sa pagpakighugoyhugoy sa dili-maayong mga kauban diha sa mga naytklab. (Sal. 26:4) Mao kadto ang sinugdanan sa usa ka imoral ug sinalingkapawng pagkinabuhi, ug kinahanglan siyang ipalagpot gikan sa kongregasyon. Ang maong disiplina ni Jehova nakapahunahuna gayod kaniya. Si Gabriele nahinumdom: “Ako nang ginahimo ang tanang butang nga wala nako pabilhi kaniadto. Akong gibasa ang Bibliya adlaw-adlaw, nga naningkamot sa pagsabot kon unsa gayoy gisulti ni Jehova, ug gitun-an pag-ayo ang teokratikanhong mga publikasyon. Akong nakita kon unsa diay kamapuslanon ug kamakalilipay ang personal nga pagtuon ug kon unsa kamakapalig-on ang pagbasa sa Bibliya ug ang kinasingkasing nga pag-ampo.” Nakatabang kini kang Gabriele sa pagbiya sa iyang imoral nga panggawi ug sa pag-ugmad pag-usab sa iyang relasyon kang Jehova.

Karon si Gabriele nag-alagad pag-usab ingong payunir, kauban sa iyang asawa. Ang nahitabo kaniya nagpamatuod nga ang pagtuon sa Bibliya ug sa mga publikasyon gikan sa “matinumanon ug maalamong ulipon” makatabang sa usa ka tawo sa paghupot ug putli nga kasingkasing ug sa pagsalikway sa imoralidad.—Mat. 24:45; Sal. 143:10.

“Kaputli sa Kasingkasing” Ilalom sa Pagsulay

Ang pagpit-os gikan sa mga magsusupak, kalisod sa ekonomiya, ug grabeng sakit nakapaluya sa pipila ka alagad sa Diyos. Usahay, ang ilang kasingkasing nabug-atan usab. Bisan si Haring David nakasinati niana: “Ang akong espiritu naluya sa sulod nako; sa sulod nako ang akong kasingkasing naminhod.” (Sal. 143:4) Giunsa niya kadto pagsagubang? Gihinumdoman ni David ang mga pakiglabot ni Jehova sa Iyang mga alagad ug kon giunsa siya pagluwas sa Diyos. Iyang gipamalandong ang gihimo ni Jehova alang sa Iyang bantogang ngalan. Si David kanunayng naghunahuna sa mga buhat sa Diyos. (Sal. 143:5) Sa susama, ang pagpamalandong bahin sa atong Maglalalang ug sa tanan nga iyang nahimo ug padayong ginahimo alang kanato motabang kanato bisan sa panahon nga kita nailalom sa pagsulay.

Kon kita gibuhatag sayop, o mibati nga gibuhatan niana, kita mahimong mayugot. Ang kanunayng paghunahuna niana makapatunghag negatibong pagbati batok sa atong mga igsoon. Tingali kita dili na makig-uban kanila, dili na kaayo magpakitag interes kanila ug mag-inusara na lang. Apan, ang mao bang reaksiyon nahiuyon sa atong tinguha nga makabatog “putli nga kasingkasing”? Tin-aw, ang atong tumong nga makabatog ingon niana nga kasingkasing naglangkit sa atong pagpakiglabot sa atong mga igsoon ug sa atong reaksiyon kon motungha ang dili pagsinabtanay.

Sa kalibotan nga misamot ang pagkadunot ug pag-us-os sa moralidad, kitang matuod nga mga Kristohanon lahi kaayo tungod kay atong gihigugma ang “kaputli sa kasingkasing.” Ang atong kinabuhi nahimong mapuslanon samtang atong nasinati ang kalinaw sa hunahuna tungod sa pagbuhat sa kabubut-on sa Diyos. Labaw sa tanan, atong nabatonan ang suod nga relasyon sa atong Maglalalang, si Jehova nga Diyos, kinsa nahigugma niadtong “hinlo ug kasingkasing.” (Sal. 73:1) Oo, mahimong mahilakip kita niadtong magmalipayon tungod kay, ingon sa gisaad ni Jesus, “sila makakita sa Diyos,” samtang Siya molihok alang niadtong nahigugma sa “kaputli sa kasingkasing.”—Mat. 5:8.