Sa Kataposan Kalinaw!—Sa Dihang Mosulti ang Diyos
“Sa kadagaya sa iyang pagmando ug sa pakigdait walay kataposan.”—Isaias 9:7.
ANG mga lider sa kalibotan padayong nagahisgot mahitungod sa kalinaw, ug ang mga tawo bisan diin nagahisgot sa ilang tinguha niana. Apan, ang kahimtang karon nagapahinumdom kanato sa giingon ni propetang Jeremias: “Dihay paghandom sa kalinaw, apan walay kaayohan nga miabot; ug sa usa ka panahon sa pag-aayo, apan, tan-awa! ang kalisang!” (Jeremias 8:15) Sa pagkatinuod, sukad nga gipatay ni Cain si Abel, ang kalibotan wala na gayod makatagamtam ug tinuod nga kalinaw apan gihampak sa kabangisan. Ug ang atong ika-20ng siglo mao ang labing mabangis sa tanang panahon, nga may mga gubat nga nakapatay ug duolan sa usa ka gatos ka milyong mga tawo. Sa atong panahon, 97 porsiento sa populasyon sa kalibotan sa labing menos nalangkit sa usa ka gubat. Busa samtang ang mga lider sa kalibotan nagapahayag ug kalinaw, ilang giagak ang ilang katawhan sa sunodsunod nga katalagman.
2. Unsa kadaghana sa naangin sa dugang kabangisan ang namatikdan sa tanang kanasoran?
2 Kinahanglang idugang sa maong kabangis ang adlaw-adlaw nga nangaangin tungod sa mabangis nga krimen. Pananglitan, sa Tinipong Bansa, kada tuig mga 20,000 ka tawo ang gipamatay. Kapin sa 80,000 ka babaye ang gipanglugos, nga daghan pang panglugos nga wala mataho. Duolan sa duha ka milyong mga kababayen-an ang mapintas nga gidagmalan sa lalaki nga ilang gikapuyo. Ug mga ikaupat ka bahin sa tanang panimalay ang nabiktima sa usa ka matang sa krimen. Ang usa ka taho nag-ingon: “Kita nahimong katilingbang hilabihan kabangis.” Ang kahimtang sama ra usab sa ubang mga kayutaan.
3 Apan, kining tanan wala ra sa kumingking kon itandi sa kapintasan nga mahimo karon sa nukleyar nga mga hinagiban. Adunay igoigo kanila sa pagpatay sa tanang mga molupyo sa yuta nga 12 ka pilo! Ang usa ka doktor miingon: “Ang modernong medisina walay mahimo sa mga biktima sa nukleyar nga sangka.” Ngano? May mitubag: “Ang kadaghanang mga doktor, mga nars ug mga teknisyan mangamatay . . . Mangalumpag ang mga ospital. Busa diyutay na lamay mahibilin nga may igong kahibalo ug kasangkapan sa pagluwas sa tanan.”
4, 5. (a) Unsay komento sa usa ka publikasyon mahitungod sa pagkawalay kalinaw sa atong panahon? (b) Sa unsang paagi samag komento ang opisyal sa kagamhanan kanhi?
4 Mahitungod sa pagkawalay kalinaw sa atong panahon, ang pangunang artikulo sa bag-ong yearbook sa Encyclopædia Britannica nag-ulohan: “Atong Nagakabungkag nga Kalibotan—Ang Hulga sa Globonhong Anarkiya.” Kini nag-ingon: “Human sa 1945 gikaingon nga ang ‘kauswagan’ dili kalikayan ug nga ang kaugmaon sa modernong kalibotan magmaayo.” Apan kadtong mga hunahunaa, kini nag-ingon, “napamatud-ang sayop,” ug midugang: “Ang nahitabo hinunoa . . . mao nga ang kalibotan sa hilom anam-anam nga nagakabungkag. Daghang mga kanasoran kansang pundasyon ug espirituwal nga kalig-on gibali-wala nagkabahinbahin . . . [ngadto] sa mga tribo, kabanayan, relihiyosong [mga sekta], . . . mga gang sa siyudad, mga grupo sa pagpamatay, kalihokang terorista, kalihokang gerilya, ug mga grupong hiktin ug pangisip nga interesado lamang sa kaugalingon.”
5 Sa susama, ang dakog katungdanan niadto nga opisyal sa kagamhanan sa Tinipong Bansa miingon: “Ang mga butang nga maoy hinungdan sa internasyonal nga kahuyang mao ang nangibabaw kay sa mga puwersa nga nagapaningkamot alang sa labi pang organisadong kooperasyon. Ang dili-malikayang konklusyon sa tanang walay gidapigang pagtuki sa kiling sa kalibotan mao nga ang kagubot sa katilingban, kasamok sa politika, krisis sa ekonomiya, ug internasyonal nga kabingkilan malagmit labi pang mokaylap sa nanghibilin niining sigloha.” Siya mitapos: “Ang hulga nga giatubang sa katawhan, sa laktod, mao . . . globonhong anarkiya.”
‘Mga Bisita Gikan sa Wanang’
6. Sa unsang paagi gibatbat sa editor sa mantalaan ang obserbasyon sa mga bisita gikan sa wanang mahitungod sa atong kalibotan karon?
6 Tungod niining tanan, ang usa ka editor sa mantalaan sa Cleveland misulat: “Kon ang mga bisita moabot sunod semana gikan sa halayong galaksiya, ato bang ikaingon kanila nga nagpinatyanay kami dinhi aron ituboy ang pagkalabaw sa komunismo o kapitalismo? Ato bang ikapatin-aw nga kita maoy mga matang nga nabahin ngadto sa mga nasod, ug ang maong mga nasod nanumpa nga magpinatyanay aron sa pagtagbaw sa kauhaw sa dugo? Unsaon man nato sa pagpatin-aw nga atong gipasagdan ang atong matang nga magutman, ug ang uban nagalunang sa pagkadaotan ug pagkawalay hibangkaagan tungod kay ang imbensiyon sa langkob nga pagpamatay ang atong ginauna? Ang mga bisita sa maong halayong galaksiya maghulagway gayod kanato didto ingong mga luog. . . Hayan moprotesta kita nga moingon nga miuswag kita sa natad sa arte ug nagtuo sa hustisya. Apan tingali masulob-ong mopahiyom ug mobiya sila sa dili pa moabot ang mga pag-ulbo.”
7, 8. (a) Unsang gamhanang mga bisita ang nagasusi karon sa katawhan? (b) Nganong ania sila dinhi?
7 ‘Apan,’ ang uban moingon tingali, ‘walay mga “bisita gikan sa wanang” nga mosusi.’ Dili, dili gikan sa pisikal nga wanang. Apan sa dugay nang katuigan karon, adunay gamhanan kaayo, intelihente kaayong mga bisita nga nagahimog bug-os nga pagsusi sa ginabuhat sa katawhan sa iyang kaugalingon ug sa yuta. Dugang pa, ilang gitino nga ang matin-aw nga mensahe ikapahayag “sa dili pa moabot ang mga pag-ulbo.”
8 Kinsa kining gamhanang mga bisita nga nagasusi sa katawhan? Ang Pulong sa Diyos nagsulti kanato nga sila mao ang mga hawas sa Diyos diha sa espiritu nga gingharian, ang matinumanong mga manulonda, nga iyang gisugo dinhi sa yuta sa pagsusi niana. Mahitungod niining espiritu nga mga linalang, ang Salmo 103:20 nag-ingon: “Dayega si Jehova, Oh kamo nga mga manulonda niya, nga mga gamhanan sa kalig-on, nga nanagtuman sa iyang pulong, pinaagi sa pagpatalinghog sa tingog sa iyang pulong.” Kining gamhanang mga manulonda kanunayng gihisgotan sa Bibliya. Pananglitan, diha sa Mateo kapitulo 25 ang tagna mahitungod sa atong panahon nag-ingon diha sa bersikulo 31 ug 32: “Ug inig-abot na sa Anak sa tawo diha sa iyang himaya, ug ang tanang mga manulonda uban kaniya, siya molingkod diha sa iyang mahimayaong trono. Ug sa iyang atubangan pagatapokon ang tanang kanasoran, ug iyang pagalainon ang mga katawhan gikan sa usa ug usa, sama sa magbalantay sa hayop nga magalain sa karnero gikan sa mga kanding.”
9. Unsang papel ang gidula ni Kristo Jesus sa panahon sa iyang pagsusi sa katawhan?
9 Kining “Anak sa tawo” mao ang pangulong hawas sa Diyos, si Jesu-Kristo. Human sa iyang pagkabanhaw ngadto sa langit, siya naghulat kang Jehova nga hatagan siya niining linain nga buluhaton. Sumala sa gibatbat sa Salmo 110:1, si Jehova miingon kaniya: “Lumingkod ka sa akong tuong kamot hangtod nga ibutang ko ang imong mga kaaway nga tumbanan sa imong mga tiil.” Ang katumanan sa tagna sa Bibliya nagpakita nga ang panahon sa pagpadala sa Diyos ning maong gamhanang espiritung linalang nahitabo sa tuig 1914.
10. Pila ka manulonda ang nagauban kang Kristo samtang nagatabang sila sa buluhatong paglain?
10 Apan dili siya mag-inusara sa iyang pag-abot, kay ang Mateo 25:31 nag-ingon nga, ang “tanang manulonda” uban kaniya. Sa unsang paagi mahimo kana? Ang Pinadayag 5:11 nag-ingon: “Nakita ko, ug akong nadungog ang tingog sa daghang manulonda nga nagalibot sa trono [sa Diyos] . . . ug ang ilang gidaghanon maoy kapid-an ka mga kapid-an ug libo ka mga linibo.” Ang usa ka kapid-an maoy 10,000. Ang usa ka kapid-an piloon ug sa usa ka kapid-an kini maoy 10,000 nga piloon ug 10,000, nga may total nga 100 ka milyong mga manulonda! Apan, naghisgot ang Pinadayag sa dinaghan, sa “kapid-an ka mga kapid-an” sa manulonda nga nag-alagad sa Diyos. Kana maoy ginatos ka minilyon, tingali bilyonbilyon pa. Ubos sa pagtultol ni Kristo, kining espiritung mga linalang nagatabang sa mga hawas sa Diyos sa yuta sa paglain sa katawhan sa duha ka grupo, ang usa alang sa “walay kataposang kalaglagan,” ug ang usa alang sa “kinabuhing dayon.”—Mateo 25:46; tan-awa usab ang Mateo 13:41, 42.
“Walay Kataposang Maayong Balita”
11. Unsa ang “walay kataposang maayong balita” nga gipaluyohan sa mga panon sa mga manulonda niining panahona?
11 Unsa ang dugokang balita nga gipaluyohan niining mga bisitang mga manulonda dinhi sa yuta niining panahona? Ang Pinadayag 14:6 nagpahibalo kanato: “Nakita ko ang laing manulonda nga naglupad sa taliwala sa kalangitan, ug siya may dalang walay kataposang maayong balita nga imantala ngadto sa nagapuyo sa yuta, ug sa tanang kanasoran ug kabanayan ug katawhan.” Unsa kining “walay kataposang maayong balita”? May kalabotan kini sa gipamulong ni Jesus nga mao ang usa sa daghang mga pamatuod nga kita nagpuyo na sa kataposang mga adlaw. Diha sa Mateo 24:14 siya mipahayag: “Ug kining maayong balita sa gingharian igawali sa tibuok pinuy-anang yuta alang sa pagpamatuod ngadto sa tanang kanasoran; ug unya moabot ang kataposan.”
12, 13. (a) Unsa ang pagmando sa Gingharian? (b) Nganong ang mensahe sa Gingharian mao ang labing maayo sa mga balita?
12 Ang Gingharian sa Diyos mao ang langitnong kagamhanan nga maoy momando ibabaw sa yuta human nga mahanaw ang presenteng pagmando sa tawo. (Daniel 2:44; Mateo 6:9, 10) Ang Hari niana mao si Jesu-Kristo, ug siya may kaubang mga magmamando. (Pinadayag 14:1-4; 20:4) Kanang Ginghariana mao ang gihisgotan sa Daniel 7:14 niining mga pulonga: “Ngadto kaniya gihatag ang pagmando ug kadungganan ug gingharian, aron ang katawhan, nasodnong mga grupo ug mga pinulongan magaalagad kaniya. Ang iyang pagmando maoy pagmando sa panahong walay kataposan nga dili umalagi, ug ang iyang gingharian dili mabungkag.”
13 Nganong ang mensahe mahitungod sa Gingharian maoy maayong balita, ang labing maayo sa mga balita? Tungod kay kini mopatunghag bag-ong kalibotan, usa ka bag-ong kahikayan sa tawhanong katilingban. Ilalom sa Gingharian sa Diyos ang katawhan makadawat ug mga panalangin nga katingalahan kaayo nga ang Salmo 37:11 nag-ingon bahin niadtong magpuyo unya didto: “Ang mga maaghop makapanunod sa yuta, ug sila makakaplag ug tumang kalipay diha sa kadagaya sa pakigdait.” Oo, “panalanginan ni Jehova ang iyang katawhan ug pakigdait.” (Salmo 29:11) Karon, sa dili pa bug-os momando ang Gingharian sa tanang mga kalihokan sa yuta, ang maayong balita sa dumalayon, malinawong pagmando niini diha sa mga kamot sa “Prinsipe sa Pakigdait” ginasangyaw sa tanang kanasoran. Gihimo kini sa mga alagad sa Diyos sa yuta ilalom sa pagtultol ni Kristo ug sa mga manulonda.—Isaias 9:6, 7.
14. (a) Unsa ang usa ka paagi nga positibo natong mailhan ang mga alagad sa Diyos sa yuta? (b) Sa unsang paagi makita ang panalangin sa Diyos kanila?
14 Kinsa kining mga alagad sa Diyos sa yuta? Buweno, kinsa lamang ang makanunayong nagaduaw sa mga katawhan nga dala ang maayong balita sa Gingharian? Bisan ang mga magsusupak nakaila kanila nga mga Saksi ni Jehova. Karon may kapin sa tres milyones kanila, ang gidaghanon niining mga magmamantala sa Gingharian kusog nga nagauswag. Sa miaging tuig, 225,868 ka bag-ong mga ministro sa maayong balita ang naordenahan. Ug nianang usa ka tuig, 2,461 ka bag-ong kongregasyon sa mga Saksi ni Jehova ang natukod sa tibuok yuta, nga may aberids nga kapin sa 6 sa usa ka adlaw, nga may total nga 52,177 ka kongregasyon sa 208 ka kayutaan. Sa tinuod, ang tagna sa Isaias 60:22 natuman: Gipatulin ni Jehova ang iyang buluhaton sa pagsangyaw ug sa pagtigom “sa iyang panahon.” Ug kanang panahona mao na karon!
15. Unsay basehanan sa paghukom sa mga tawo karon?
15 Ang paagi sa pagsanong sa mga tawo sa balita sa pagmando sa Gingharian maoy motino kon sila ba lainon alang sa “walay kataposang kalaglagan” o alang sa “kinabuhing dayon” diha sa bag-ong kalibotan. Daghan ang misanong sama niadtong gihubit diha sa 2 Cronicas 36:15, 16: “Si Jehova . . . padayong nagpadala kanila pinaagi sa iyang mga mensahero, nga pabalikbalik, tungod kay siya may kaluoy . . . Apan ilang padayong gibiaybiay ang mga mensahero sa matuod nga Diyos ug nagtamay sa iyang mga pulong ug nagpanamastamas sa iyang mga manalagna, hangtod ang kaligotgot ni Jehova misilaob.” Apan maayo ang pagsanong sa uban ug nailalom sa panalipod ni Jehova. “Apan siya nga mamati kanako [tinuod nga kaalam], siya magapuyo sa kasegurohan ug magmalinawon nga walay kahadlok sa kadaotan.”—Proverbio 1:20, 33; Mateo 25:34-46.
Langitnong mga Kasundalohan Molihok
16. Sa unsang paagi mosulti ang Diyos ngadto sa masukihong katawhan?
16 Sa dili madugay, ang buluhatong pagsangyaw sa mga Saksi ni Jehova matapos na sa sukod nga buot niya. Ang pailob sa Diyos sa masukihong katawhan modangat na sa iyang kataposan. Ang makigdaitong balita nga iyang gipahayag sa katawhan niining kaliwatana bag-ohon. Hinunoa, “nianang panahona siya magasulti kanila diha sa iyang kaligotgot ug diha sa iyang kapungot siya magagubot kanila.” (Salmo 2:5) Sumala sa gipamulong mismo ni Jehova: “Sa akong pangabugho, ug sa kalayo sa akong kasuko, ako mosulti.” (Ezekiel 38:19) Dayon siya mosignal kang Jesu-Kristo sa pagpalihok sa iyang langitnong kasundalohan batok niining rebelyoso ug daotang kalibotan.
17. Sa unsang paagi gipasundayag ang gahom sa usa lang ka manulonda?
17 Ang mahimo niadtong mga kasundalohan nakita sa nahitabo sa Asirya dihang miabot ang panahon sa Diyos sa paglihok batok niana. Ang Ikaduhang Hari 19:35 nag-ingon: “Ug nahitabo niadtong gabhiona nga ang manulonda ni Jehova migula ug gipamatay sa kampo sa mga Asiryanhon ang usa ka gatos ug kawaloan ug lima ka libo . . . Silang tanan mga minatay.” Usa lang ka manulonda ang mihimo niana! Makalilisang unya kaayo ang mahimo sa kapid-an ka mga kapid-an kanila sa dili madugay.
18. Unsa ka bug-os sa kalaglagan unya niining sistemaha?
18 Ang Jeremias 25:31-33 nagbatbat sa mahitabo niining mga pulonga: “‘Si Jehova adunay pakiglalis batok sa mga nasod. Siya gayod maghukom sa tanang unod. Mahitungod sa mga daotan, iyang itugyan sila ngadto sa espada,’ nagaingon si Jehova. Mao kini ang giingon ni Jehova sa mga panon, ‘Tan-awa! ang kadaot modangat sa nasod ngadto sa nasod, ug ang usa ka dakong bagyo pagpatuyboon gikan sa kinatumyang mga bahin sa yuta. Ug ang mga pinatay ni Jehova niadtong adlawa molukop gikan sa tumoy sa yuta ngadto sa pikas tumoy sa yuta. Sila dili pagahilakan, ni pagahiposon ni igalubong. Sila mahimong kinalibang sa ibabaw sa nawong sa yuta.’”
19. Unsang dugang detalye ang gihatag sa Pinadayag kapitulo 19?
19 Gibatbat sa Pinadayag kapitulo 19 ang paagi ni Jehova sa paghimo niining tanan. Himoon kini pinaagi sa pagpaasdang sa iyang Hari si Jesu-Kristo uban sa, sumala sa giingon sa bersikulo 14, “mga kasundalohan sa langit” nga nagasunod kaniya. Dayon ang bersikulo 17 ug 18 nag-ingon: “Ug nakita ko usab ang usa ka manulonda nga nagtindog diha sa adlaw, ug siya misinggit sa makusog nga tingog ug miingon ngadto sa tanang mga langgam nga nagalupad sa kinatung-an sa kalangitan: ‘Umari kamo, tambong kamong tanan sa pagkaon sa dakong panihapon sa Diyos, aron inyong kan-on ang unod sa mga hari ug ang unod sa mga kapitan ug ang unod sa mga tawong kusgan ug ang unod sa mga kabayo ug sa mga nagakabayo kanila, ug ang unod sa tanang tawo, may kagawasan o mga ulipon, mga timawa ug mga dungganon.’” Ug ang bersikulo 19 ug 21 nagbatbat sa kalaglagan sa tanang tawhanong mga institusyon tungod kay sila midumili sa pagpatalinghog dihang namulong ang Diyos pinaagi sa iyang yutan-ong mga mensahero.
20. Nganong dili mahitabo nga malaglag kining kalibotana sa nukleyar nga katalagman?
20 Busa, haduol na kaayo ang panahon nga taposon sa Diyos kining mabangis, nagakabungkag nga sistema sa kalibotan. Apan kanang maong kataposan dili kalaglagan sa kaugalingon pinaagi sa nukleyar nga gubat taliwala sa mga nasod. Kon kana mahitabo, ang matarong malaglag uban sa mga daotan. Apan, ang “mga pagpabuto” sa Diyos batok niining kalibotana dili sama niana kondili mapilion. Adunay maluwas ngadto sa bag-ong kalibotan. Sumala sa giingon sa Proverbio 2:21, 22: “Ang mga matul-id magapuyo sa yuta, ug ang matarong magapabilin diha niana. Apan ang mga daotan pagaputlon gikan sa yuta; ug ang mga mabudhion pagalukahon gikan niini.”
21. Unsang dugang mga pangutana ang tagdon sa among sunod artikulo?
21 Nganong kining kalibotana midangat niining kahimtanga diin may kalagmitang malaglag ang tibuok-yuta? Dili ba posible nga mamunga ang mga paningkamot karon sa mga lider sa kalibotan alang sa kalinaw, aron maluwas kining sistemaha? Ug kon buot kitang malakip sa “matul-id” ug sa “matarong” nga makalabang-buhi ngadto sa bag-ong kalibotan ug magpadayong buhi, sa unsang paagi managgawi kita niining labing importanteng panahon sa tibuok tawhanong kasaysayan? Tagdon sa among sunod artikulo kining mga pangutanaha.
Unsay Imong Tubag?
◻ Sa unsang paagi nakita ang pagkawalay kalinaw, ilabina sa atong panahon?
◻ Sa unsang paagi nalangkit ang mga panon sa mga manulonda sa paglain sa katawhan karon?
◻ Nganong ang mensahe sa Gingharian maoy “walay kataposang maayong balita”?
◻ Binase sa unsa nga pagahukman ang tawo alang sa kinabuhi ug alang sa kamatayon?
1. Samtang padayong nagahisgot ang mga lider sa kalibotan mahitungod sa kalinaw, unsay nahitabo sa tibuok kasaysayan sa tawo?
3. Unsang dugang kabangisan ang nahimo sa tawhanong pamilya karon?
[Hulagway sa panid 13]
Ang buluhaton sa mga Saksi ni Jehova gipaluyohan sa mga panon sa mga manulonda