“Pangitaa ang Pakigdait ug Tinguhaa Kana”

“Padakoa si Jehova, nga nagakalipay sa pakigdait sa iyang alagad.”​—SALMO 35:27.

 1. Unsang pakigdait ang atong gipahimuslan karong adlawa?

PAGKAMAKALIPAY nga may panagdait niining nabahing kalibotan! Pagkamakalipay ang pagsimba kang Jehova, “ang Diyos mismo sa pakigdait,” ug pag-ambit sa mga panalangin sa iyang “tugon sa pakigdait”! Pagkamakapahayahay, taliwala sa mga kalisdanan sa kinabuhi, nga masayod sa “pakigdait sa Diyos nga lapaw sa tanang hunahuna” ug makasinati sa ‘bugkos sa pakigdait’ nga magpahiusa sa katawhan sa Diyos bisan kon unsa ang ilang nasyonalidad, pinulongan, rasa, o sosyal nga kagikan!​—1 Tesalonica 5:23; Ezekiel 37:26; Filipos 4:7; Efeso 4:3.

 2, 3. (a) Bisan tuod ang katawhan sa Diyos sa katibuk-an makalahutay, unsay mahimong mahitabo sa indibiduwal nga mga Kristohanon? (b) Unsay giawhag sa Bibliya nga atong buhaton?

² Ingong mga Saksi ni Jehova, gimahal nato ang maong pakigdait. Bisan pa niana, dili nato kini pakasayonon. Ang pakigdait dili awtomatikong mahuptan nga padayon tungod lang kay kita nakig-uban sa usa ka Kristohanong kongregasyon o nahitabong bahin sa usa ka Kristohanong pamilya. Bisan tuod ang dinihogang nahibilin ug ilang mga kauban sa “ubang mga karnero” molahutay ingong usa ka panon hangtod sa kataposan, ang mga indibiduwal tingali mawad-an sa ilang pakigdait ug mahulog.​—Juan 10:16; Mateo 24:13; Roma 11:22; 1 Corinto 10:12.

³ Gipasidan-an ni apostol Pablo ang dinihogang mga Kristohanon sa iyang adlaw: “Pagbantay, mga igsoon, kay basin maugmad diha kang bisan kinsa kaninyo ang usa ka daotang kasingkasing nga walay pagtuo pinaagi sa pagpahilayo sa Diyos nga buhi.” (Hebreohanon 3:12) Kining pasidaana mapadapat usab sa dakong panon. Busa ang Bibliya nagaagda sa mga Kristohanon: “Pangitaa ang pakigdait ug tinguhaa kana. Kay ang mga mata ni Jehova anaa sa mga matarong, ug ang iyang mga igdulongog gipaabong sa ilang pangaliya; apan ang nawong ni Jehova maoy supak niadtong nagabuhat sa daotang mga butang.”​—1 Pedro 3:10-12; Salmo 34:14, 15.

“Ang Paghunahuna sa Unod”

 4. Unsay makabungkag sa atong pakigdait uban sa Diyos?

⁴ Unsay makabalda sa atong pagtinguha sa pakigdait? Gihisgotan ni Pablo ang usa ka butang sa nag-ingon siya: “Ang paghunahuna sa unod nagkahulogan sa kamatayon, apan ang paghunahuna sa espiritu nagkahulogan sa kinabuhi ug pakigdait; tungod kay ang paghunahuna sa unod nagkahulogan sa pagpakig-away batok sa Diyos.” (Roma 8:6, 7) Sa “unod,” gitumong ni Pablo ang atong makasasalang kahimtang ingong mga tawong dili hingpit nga may napanunod makasasalang mga hilig. Ang pagpadaog sa mga hilig sa makasasalang unod mogun-ob sa atong pakigdait. Kon ang usa ka Kristohanon sa kadili-mahinulsolon makahimog imoralidad, mamakak, mangawat, motomar sa mga droga, o sa ubang laing paagi maglapas sa balaang kasugoan, mabungkag niya ang pakigdait uban kang Jehova nga sa nangagi iyang gipahimuslan. (Proverbio 15:8, 29; 1 Corinto 6:9, 10; Pinadayag 21:8) Dugang pa, kon itugot niya nga ang materyal nga mga butang mahimong mas importante kaniya kay sa espirituwal nga mga butang, mameligro pag-ayo ang iyang pakigdait uban sa Diyos.​—Mateo 6:24; 1 Juan 2:15-17.

 5. Unsay nalangkit sa pagtinguha sa pakigdait?

⁵ Sa laing bahin, si Pablo miingon: “Ang paghunahuna sa espiritu nagkahulogan sa kinabuhi ug pakigdait.” Ang pakigdait maoy bahin sa mga bunga sa espiritu, ug kon bansayon nato ang atong kasingkasing sa pagpabili sa espirituwal nga mga butang, nga mag-ampo alang sa espiritu sa Diyos sa pagtabang kanato niini, nan malikayan nato “ang paghunahuna sa unod.” (Galacia 5:22-24) Sa 1 Pedro 3:10-12, ang pakigdait gilangkit sa pagkamatarong. (Roma 5:1) Si Pedro nag-ingon nga ang pagtinguha sa pakigdait nagaapil sa ‘pagtalikod sa daotan ug pagbuhat sa maayo.’ Ang espiritu sa Diyos makatabang nato sa “pagtinguha sa pagkamatarong” ug niana mahuptang padayon ang atong pakigdait uban sa Diyos.​—1 Timoteo 6:11, 12.

 6. Unsa ang usa sa mga responsabilidad sa mga ansiano kon bahin sa pakigdait sa kongregasyon?

⁶ Ang pagtinguha sa pakigdait mao ang pangunang kabalaka sa mga ansiano sa kongregasyon. Pananglitan, kon may mosulay sa pagpasulod sa makapahugawng mga buhat, ang mga ansiano may katungdanan sa pagpanalipod sa kongregasyon pinaagi sa pagsulay sa pagbadlong sa nakasala. Kon dawaton niya ang pagbadlong, maangkon niya pag-usab ang iyang pakigdait. (Hebreohanon 12:11) Kon dili, basin kinahanglang siya ipalagpot aron mahuptang padayon ang makigdaitong relasyon sa kongregasyon uban kang Jehova.​—1 Corinto 5:1-5.

Pakigdait Uban sa Atong mga Igsoon

 7. Unsang pagpadayag sa ‘paghunahuna sa unod’ ang gipasidaan ni Pablo sa mga taga-Corinto?

⁷ Ang ‘paghunahuna sa unod’ makagun-ob dili lang sa atong pakigdait uban sa Diyos apan sa atong maayong relasyon usab uban sa ubang mga Kristohanon. Si Pablo misulat ngadto sa mga taga-Corinto: “Kamo mga unodnon pa. Kay samtang adunay pangabugho ug panag-away sa inyong taliwala, dili ba kamo unodnon ug dili ba kamo nagagawi sumala sa paggawi sa mga tawo?” (1 Corinto 3:3) Ang pangabugho ug panag-away mao ang kaatbang gayod sa pakigdait.

 8. (a) Unsay mahimong mahitabo sa usa nga magpahinabo sa pangabugho ug away diha sa kongregasyon? (b) Sa unsa nagaagad ang atong pakigdait uban sa Diyos?

⁸ Ang pagtugaw sa pakigdait sa kongregasyon pinaagi sa pagpahinabo sa pangabugho ug panag-away maoy seryoso kaayo. Sa paghisgot sa usa ka hiyas nga nalangkit sa pakigdait ingong usa ka bunga sa espiritu, si apostol Juan mipasidaan: “Kon may magaingon: ‘Gihigugma ko ang Diyos,’ apan nagadumot sa iyang igsoon, siya usa ka bakakon. Kay siya nga wala mahigugma sa iyang igsoon, si kinsa iyang nakita, dili makahigugma sa Diyos, si kinsa wala niya makita.” (1 Juan 4:20) Sa susamang paagi, kon ipahinabo sa usa ka tawo ang pangabugho o panag-away taliwala sa mga igsoon, tinuod ba nga siya may pakigdait uban sa Diyos? Tinong wala! Kita giawhag: “Magpadayon kamo sa pagkalipay, nga mapasibo, nga mahupay, sa paghiusa sa hunahuna, sa pagkinabuhing malinawon; ug ang Diyos sa gugma ug sa pakigdait magauban kaninyo.” (2 Corinto 13:11) Oo, kon mopadayon kita sa pagkinabuhing may pakigdait sa usag usa, nan ang Diyos sa gugma ug pakigdait magauban kanato.

 9. Giunsa nato pagkahibalo nga ang mga Kristohanon usahay may mga dipagsinabtanay ug mga dipanag-uyon?

⁹ Kini wala magkahulogang wala na gayoy mga di-panag-uyon sa mga Kristohanon. Sa mga semana tapos sa Pentekostes, may di-panag-uyon diha sa bag-ong Kristohanong kongregasyon bahin sa matag-adlawng pag-apod-apod sa pagkaon. (Buhat 6:1) Sa usa ka okasyon ang di-panag-uyon tali kang Pablo ug Bernabe misangpot sa “pagsilaob sa kasuko.” (Buhat 15:39) Kinahanglang tambagan ni Pablo si Euodia ug Syntyche, pihong maayo, madasigong mga igsoong babaye, “nga magbaton sa samang hunahuna diha sa Ginoo.” (Filipos 4:2) Dili katingad-ang si Jesus mihatag ug detalyadong tambag bahin sa kon unsaon pagsulbad ang mga pagkatugaw sa pakigdait tali sa mga Kristohanon ug gipasiugda ang kahinungdanon sa pagsulbad dayon sa maong mga problema! (Mateo 5:23-25; 18:15-17) Dili unta niya ihatag ang maong tambag kon wala pa siya magdahom ug mga kabingkilan taliwala sa iyang mga sumusunod.

10. Unsang mga kahimtang ang motungha usahay diha sa kongregasyon, ug unsang responsabilidad ang gibutang niini diha sa tanan nga nalangkit?

¹⁰ Nan, posible gayod karong adlawa nga may masilo sa dimataktikanhong pulong o sa gisabot nga di-pagtagad sa usa ka kaubang Kristohanon. Ang usa ka kinaiya sa usa ka tawo basin makalagot kaayo sa lain. Ang mga personalidad basin magkasumpaki. Ang usa tingali mosupak kaayo sa usa ka desisyon sa mga ansiano. Sa lawas sa mga ansiano mismo, ang usa ka ansiano basin may hunahunang dili matarog ug mosulay sa pagpatigbabaw sa ubang mga ansiano. Bisan pag kanang mga butanga mahitabo, kinahanglan gihapon nga atong pangitaon ang pakigdait ug tinguhaon kana. Ang hagit mao ang pagsulbad niining mga sulirana sa Kristohanong paagi aron matipigan “ang makapahiusang bugkos sa pakigdait.”​—Efeso 4:3.

11. Unsang mga tagana ang gihimo ni Jehova sa pagtabang nato sa pagtinguha sa pakigdait uban sa usag usa?

¹¹ Ang Bibliya nag-ingon: “Padakoa si Jehova, nga nagakalipay sa pakigdait sa iyang alagad.” (Salmo 35:27) Oo, buot ni Jehova nga kita magmadaiton. Busa, gihimo niya ang duha ka talagsaong tagana sa pagtabang nato sa pagtipig sa panagdait sa atong taliwala ug uban kaniya. Ang usa mao ang balaang espiritu, nga niana ang pakigdait maoy usa ka bunga, uban ang may-kalangkitang madaitong mga hiyas, sama sa hataas-nga-pailob, kalulot, kalumo, ug pagpugong-sa-kaugalingon. (Galacia 5:22, 23) Ang lain mao ang balaang kaalam, nga bahin niana atong mabasa: “Ang kaalam gikan sa itaas maoy una sa tanan maputli, unya madaiton, makataronganon, andam sa pagsugot, puno sa kaluoy ug maayong mga bunga.”​—Santiago 3:17, 18.

12. Unsay atong pagabuhaton kon ang atong pakigdait uban sa atong mga igsoon natugaw?

¹² Busa, sa dihang matugaw ang atong panagdait uban sa ubang tawo, angay moampo kita alang sa kaalam gikan sa itaas sa pagpakita kanato kon unsaon sa paglihok, ug angay nga pangayoon nato ang balaang espiritu sa paglig-on kanato sa pagbuhat kon unsay matarong. (Lucas 11:13; Santiago 1:5; 1 Juan 3:22) Nahiuyon sa atong pag-ampo, kita unya makasalig sa tinubdan sa balaang kaalam, ang Bibliya, alang sa giya, ingon man makasusi sa literatura sa Bibliya nga anaa alang sa tambag bahin sa kon unsaon pagpadapat ang Kasulatan. (2 Timoteo 3:16) Basin buot usab natong mangitag tambag gikan sa mga ansiano sa kongregasyon. Ang kataposang lakang mao ang pagsunod sa giya nga gihatag. Ang Isaias 54:13 nag-ingon: “Ang tanan nimong mga anak mao unyay mga tawo nga tinudloan ni Jehova, ug ang pakigdait sa imong mga anak magmadagayaon.” Kini magpasabot nga ang atong pakigdait magdepende sa atong pagpadapat sa mga butang gitudlo kanato ni Jehova.

“Malipayon ang mga Madaiton”

13, 14. (a) Unsay gipasabot sa pamulong ni Jesus nga “madaiton”? (b) Sa unsang paagi kita mahimong mga magdadait?

¹³ Si Jesus, diha sa iyang Wali sa Bukid, miingon: “Malipayon ang mga madaiton, sanglit sila pagatawgon nga ‘mga anak sa Diyos.’” (Mateo 5:9) Ang “madaiton” dinhi wala magtumong sa usa nga sa yano malinawon ug kinaiya. Ang orihinal nga Gregong pulong nagkahulogang “mga magdadait.” Ang usa ka magdadait maoy hanas sa pagpasig-uli sa panagdait sa dihang kini matugaw. Labi pang hinungdanon, hinunoa, ang usa ka magdadait maningkamot sa paglikay sa pagtugaw sa panagdait sa unang bahin. ‘Ang pakigdait magagahom sa iyang kasingkasing.’ (Colosas 3:15) Kon ang mga alagad sa Diyos maningkamot nga mahimong mga magdadait, nan ang mga suliran sa ilang taliwala mahimong labing diyutay.

¹⁴ Ang pagkahimong magdadait naglangkit sa pag-ila sa atong mga kahuyangan mismo. Pananglitan, ang usa ka Kristohanon tingali daling masuko o tandogon ug daling masilo. Sa dihang mapit-osan, ang iyang mga emosyon basin makapahikalimot niya sa mga prinsipyo sa Bibliya. Kini madahom diha sa dili-hingpit nga mga tawo. (Roma 7:21-23) Bisan pa niana, ang mga pagkontrahanay, away, ug mga pagsilaob sa kasuko gilista ingong mga buhat sa unod. (Galacia 5:19-21) Kon atong makaplagan ang maong mga kiling diha sa atong kaugalingon​—o kon kana dad-on sa atong pagtagad sa uban—​angay nga kita moampo nga mainiton ug padayon alang sa espiritu ni Jehova aron maugmad diha kanato ang pagpugong-sa-kaugalingon ug kalumo. Sa pagkamatuod, ang matag usa angay maningkamot sa pag-ugmad sa maong mga hiyas ingong bahin sa iyang bag-ong personalidad.​—Efeso 4:23, 24; Colosas 3:10, 15.

15. Sa unsang paagi ang kaalam gikan sa itaas supak sa dili-makataronganong pagkagahian?

¹⁵ Usahay, ang usa ka kongregasyon o lawas sa mga ansiano matugaw sa usa nga gahig-ulo, nga kanunay mopatuman sa iyang gusto. Tinuod, kon bahin sa balaang kasugoan, ang usa ka Kristohanon angay nga may hunahunang dili matarog, nga dili mapauyonon pa. Ug kon gibati nato nga kita may maayong ideya nga makahatag kaayohan sa uban, walay daotan ang pagpahayag sa atong kaugalingon sa prangka, basta atong ipatin-aw ang atong mga katarongan. Apan dili nato gustong mahisama niadtong diha sa kalibotan nga “dili ikasabot.” (2 Timoteo 3:1-4) Ang kaalam gikan sa itaas maoy madaiton, makataronganon. Kadtong mga tawo kansang mga aksiyon nahimong sumbanan sa magahiong pagkadili-mauyonon angay mamati sa tambag ni Pablo ngadto sa mga taga-Filipos nga ‘dili mobuhat sa bisan unsa tungod sa pagpagarbo sa kaugalingon.’​—Filipos 2:3.

16. Sa unsang paagi ang tambag ni Pablo diha sa basahon sa mga taga-Filipos makatabang nato sa pagbuntog sa pagpagarbo sa kaugalingon?

¹⁶ Sa mao mismong sulat, miawhag si Pablo nga kita angay, ‘uban sa pagpaubos sa hunahuna,’ tim-os ‘magaisip nga ang uban labaw kanato.’ Kini ang kaatbang gayod sa pagpagarbo sa kaugalingon. Ang usa ka hamtong nga Kristohanon dili maghunahuna una sa pagpugos sa iyang kaugalingong mga ideya, pagluwas sa dungog, o pagpanalipod sa iyang kaugalingong posisyon ug awtoridad. Kana mahimong supak sa tambag ni Pablo nga ‘magbantay, dili sa kaugalingong kaayohan lamang, kondili sa kaayohan usab sa uban.’​—Filipos 2:4; 1 Pedro 5:2, 3, 6.

Madaitong mga Pulong

17. Unsang sayop nga paggamit sa dila ang makatugaw sa pakigdait sa kongregasyon?

¹⁷ Ang usang matinguhaon sa panagdait mag-amping ilabina sa iyang paggamit sa dila. Si Santiago nagpasidaan: “Ang dila usa ka gamay nga sangkap ug bisan pa niana nagahimog dagkong mga pagpanghambog. Tan-awa! Pagkagamay sa kalayo nga gikinahanglan sa pagsunog sa dako kaayong lasang!” (Santiago 3:5) Ang madinaotong tabi, paglibak sa uban, dili-maluluton ug hait nga mga pulong, pagbagutbot ug pagreklamo, ingon man ang pag-ulog-ulog alang sa personal nga kaayohan​—kining tanan maoy mga buhat sa unod nga magtugaw sa panagdait sa katawhan sa Diyos.​—1 Corinto 10:10; 2 Corinto 12:20; 1 Timoteo 5:13; Judas 16.

18. (a) Sa kaso sa dinangag nga sayop nga paggamit sa dila, unsa ang tukmang pagabuhaton sa tanang nalangkit? (b) Sa dihang ang kasuko makapahinabo sa usa sa paglitok sa mahait nga mga pulong, unsay pagsanong sa hamtong nga mga Kristohanon?

¹⁸ Tinuod, si Santiago miingon: “Ang dila, walay mausa sa katawhan ang makapaaghop niini.” (Santiago 3:8) Bisan ang hamtong nga mga Kristohanon usahay mosultig mga butang nga ilang sinserong basolan sa ulahi. Kitang tanan naglaom nga pasayloon kita sa uban sa maong mga sayop sama sa atong pagpasaylo kanila. (Mateo 6:12) Usahay ang kalit nga pagsilaob sa kasuko makapatunghag mahait nga mga pulong. Dayon, ang usa ka magdadait mahinumdom nga “ang usa ka tubag, kon malumo, makahupay sa kasuko, apan ang usa ka pulong nga mahait makapapukaw sa kasuko.” (Proverbio 15:1) Kasagaran, kinahanglan lang niya nga moginhawag lalom ug dili baslan ug dugang sukong mga pulong ang sukong mga pulong. Sa ulahi, sa dihang bugnaw na ang ulo, ang haluag-ug-kasingkasing nga magdadait nahibalo kon unsaon pagkalimot sa mga butang napamulong sa kainit sa ulo. Ug ang mapaubsanong Kristohanon mahibalong mangayog pasaylo ug mosulay sa pagpaalim sa mga samad nga iyang gipahinabo. Usa ka ilhanan sa moral nga kalig-on ang pagkaarang sa pag-ingon nga matinud-anon, “Gikasubo ko.”

19. Unsay atong makat-onan gikan kang Pablo ug Jesus bahin sa kon unsaon paghatag ug tambag?

¹⁹ Ang dila magamit sa pagtambag sa uban. Si Pablo dayag nagbadlong kang Pedro sa dihang siya milihok sa dili-tukmang paagi sa Antio­quia. Ug gihatag ni Jesus ang kusganong tambag diha sa iyang mga mensahe ngadto sa pito ka kongregasyon. (Galacia 2:11-14; Pinadayag, mga kapitulo 2, 3) Kon tun-an nato ang maong mga panig-ingnan, atong masayran nga ang tambag angay nga dili kaayo lumo nga mawala ang punto niana. Bisan pa niana, si Jesus ug si Pablo dili mapig-oton o mapintason. Ang ilang tambag dili kay pagpahungaw sa ilang kaugalingong mga kapakyasan. Sila tiunay nga naninguha sa pagtabang sa ilang mga igsoon. Kon ang usang naghatag ug tambag makamatikod nga siya dili bug-os makapugong sa iyang dila, basin palabihon niya ang paghunong ug pagpabugnaw ug diyutay una mosulti. Kay kon dili, basin siya makasultig hait nga mga pulong ug makapahinabog grabe pang suliran kay sa iyang gisulayan sa pagsulbad.​—Proverbio 12:18.

20. Unsay angay magmando sa tanang atong isulti ngadto o mahitungod sa atong mga igsoong lalaki ug mga babaye?

²⁰ Sumala sa nahisgotan na, ang pakigdait ug gugma nalambiggit kaayo ingong mga bunga sa espiritu. Kon ang atong isulti ngadto sa atong mga igsoon​—o mahitungod kanila​—maoy banaag kanunay sa atong gugma kanila, nan kini makaamot sa pakigdait sa kongregasyon. (Juan 15:12, 13) Ang atong sinultihan kinahanglang “magmadanihon, nga tinimplahan ug asin.” (Colosas 4:6) Sila angay nga lamian, ingnon ta, nga madanihon sa kasingkasing. Si Jesus mitambag: “Batoni ang asin diha sa inyong kaugalingon, ug pagdinaitay kamo sa usag usa.”​—Marcos 9:50.

“Buhata ang Inyong Maarangan”

21. Unsay dayag bahin sa katawhan sa Diyos panahon sa ilang senemanang mga tigom ug panahon sa mga asembliya ug mga kombensiyon?

²¹ Ang salmista misulat: “Tan-awa! Pagkamaayo ug pagkamalipayon sa mga magsoon nga magpuyo sa panaghiusa!” (Salmo 133:1) Tinuod, kita malipay nga makauban sa atong mga igsoon, ilabina sa atong senemanang mga tigom ug panahon sa mga asembliya ug mas dagkong mga kombensiyon. Sa maong mga panahon ang atong panagdait dayag bisan sa mga tagagawas.

22. (a) Unsang mini nga pakigdait ang hunahunaon sa dili na madugay sa mga nasod nga ilang nakab-ot, nga mosangpot sa unsa? (b) Sa unsang tinuod nga panagdait mosangpot ang tugon sa pakigdait sa Diyos?

²² Sa dili na madugay ang mga nasod maghunahuna nga ilang nakab-ot ang panagdait nga wala si Jehova. Apan samtang sila magaingon, “Pakigdait ug kasegurohan!” ang kalit nga kalaglagan moabot sa tanan nga walay pakigdait uban sa Diyos. (1 Tesalonica 5:3) Tapos niana, ang dakong Prinsipe sa Pakigdait magpadayon sa pagtambal sa katawhan gikan sa malaglagong mga sangpotanan sa orihinal nga pagkawala sa pakigdait sa tawo uban sa Diyos. (Isaias 9:6, 7; Pinadayag 22:1, 2) Dayon, ang tugon sa pakigdait sa Diyos mosangpot sa tibuok-kalibotang pagkamadaiton. Bisan ang mga mananap sa kapatagan makasinati sa pahulay gikan sa pagdumtanay.​—Salmo 37:10, 11; 72:3-7; Isaias 11:1-9; Pinadayag 21:3, 4.

23. Kon atong gimahal ang paglaom sa usa ka makigdaitong bag-ong kalibotan, unsay angay natong buhaton karon?

²³ Pagkamahimayaon unya kanang panahona! Maikagon ka bang nagapaabot niana? Kon mao, “tinguhaa ang pakigdait uban sa tanang tawo.” Pangitaa ang pakigdait karon uban sa imong mga igsoon, ug ilabina uban kang Jehova. Oo, “sanglit kamo nagapaabot niining mga butanga, buhata ang inyong maarangan nga hikaplagan sa kataposan niya nga walay buling ug walay mantsa ug anaa sa pakigdait.”—Hebreohanon 12:14; 2 Pedro 3:14.

Nahinumdom Ka Ba?

◻ Unsay makabungkag sa atong pakigdait uban kang Jehova?

◻ Unsang matang sa mga dipagsinabtanay ang tingali kinahanglang masulbad diha sa kongregasyon?

◻ Unsang tagana ang gihimo ni Jehova sa pagtabang nato sa pagpangita sa pakigdait ug pagtinguha niana?

◻ Unsang unodnong mga tinamdan ang makatugaw sa pakigdait sa kongregasyon, ug sa unsang paagi atong mabuntog kana?

[Hulagway sa panid 22]

Ang pakigdait dagaya sa taliwala niadtong gitudloan ni Jehova

[Hulagway sa panid 24]

Pagkamaayo ang pakigdait sa mga igsoon nga nagaalagad nga may panaghiusa!