Kinabuhi ug Ministeryo ni Jesus

Gikan Kang Pilato Ngadto Kang Herodes ug Balik Pag-usab

SA dihang gisumbong sa mga Hudiyo si Jesus nga nag-ingong siya usa ka hari, si Pilato misulod pag-usab sa palasyo sa Gobernador aron sa pagpangutana kaniya. Bisag wala ilimod ni Jesus nga siya hari, iyang gipasabot nga ang iyang Gingharian dili usa ka hulga sa Roma.

“Ang akong gingharian dili bahin niining kalibotana,” matud ni Jesus kang Pilato. “Kon ang akong gingharian bahin pa niining kalibotana, ang akong mga sumusunod nakig-away na unta aron dili ako itugyan sa mga Hudiyo. Apan, sa giingon ko, ang akong gingharian dili gikan niini nga tinubdan.” Sa ingon gidawat ni Jesus sa tulo ka beses nga siya adunay Gingharian, bisag kini wala maggikan sa yuta.

Apan, giduot siya pagdugang ni Pilato: “Nan, karon, ikaw ba usa ka hari?” Sa ato pa, ikaw usa ka hari bisag ang imong Gingharian dili bahin niining kalibotana.

Buot ni Jesus nga masayod si Pilato nga husto ang iyang konklusyon, nga mitubag: “Ikaw mismo ang nagaingon nga ako usa ka hari. Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran. Ang tanang dapig sa kamatuoran magapaminaw sa akong tingog.”

Oo, ang mismong paglungtad ni Jesus sa yuta mao ang pagpamatuod sa “kamatuoran,” ilabina ang kamatuoran mahitungod sa iyang Gingharian. Si Jesus andam nga magmatinumanon sa maong kamatuoran bisag kini magkahulogan sa iyang kinabuhi. Bisag si Pilato nangutana: “Unsa ang kamatuoran?” siya wala maghulat sa dugang pagpatin-aw. Igo na ang iyang nadungog aron sa paghukom.

Si Pilato mibalik sa panon nga naghulat gawas sa palasyo. Tin-aw nga si Jesus anaa sa iyang kiliran, siya miingon sa pangulong mga saserdote ug niadtong uban kanila: “Wala akoy nakitang sala niining tawhana.”

Nasuko tungod sa desisyon, ang mga panon miinsistir: “Giukay niya ang mga tawo pinaagi sa pagpanudlo sa tibuok Judea, nagsugod pa gani gikan sa Galilea hangtod dinhi.”

Ang dili makataronganong pagkapanatiko sa mga Hudiyo nakapatingala kang Pilato. Busa, samtang ang pangulong mga saserdote ug mga tigulang nagpadayon sa pagsinggit, si Pilato miatubang kang Jesus ug nangutana: “Nadunggan ba nimo kon unsa ka daghang butang ang ilang gisumbong batok kanimo?” Sa gihapon, si Jesus wala mosulay sa pagtubag. Ang iyang pagkakalma sa grabeng mga sumbong nagpatingala kang Pilato.

Pagkasayod nga si Jesus taga Galilea, nagpahigawas si Pilato sa kaakohan niya. Ang magmamando sa Galilea, si Herodes Antipas (anak ni Herodes nga Bantogan), didto sa Jerusalem alang sa Paskuwa, busa gipadala ni Pilato si Jesus ngadto niya. Sayo niana, gipaputlag ulo si Juan Bawtista ni Herodes Antipas, ug unya si Herodes nahadlok sa dihang nadungog niya ang mga milagrong gibuhat ni Jesus, nahadlok nga si Jesus mao si Juan nga nabanhaw gikan sa mga patay.

Karon, si Herodes nalipay ug dako nga makakita kang Jesus. Kini dili tungod kay siya nabalaka mahitungod sa kaayohan ni Jesus o nga buot gayod niyang tinoon kon kaha ang mga sumbong batok kaniya tinuod o dili. Hinunoa, siya mausisahon lamang ug naglaom nga siya makakita kang Jesus sa paghimog mga milagro.

Si Jesus, hinoon, nagdumili sa pagtagbaw sa pagkamautingkayon ni Herodes. Gani, sa gipangutana siya ni Herodes, wala siya motubag ug usa ka pulong. Napakyas, si Herodes ug ang iyang mga guwardiyang sundalo nagbugalbugal kang Jesus. Ilang gibistihan siyag sigang besti ug nagbiaybiay kaniya. Unya siya ilang gipadalag balik ngadto kang Pilato. Ingong resulta, si Herodes ug Pilato, nga kanhi magkaaway, nahimong maayong managhigala.

Sa nahibalik si Jesus, gitawag ni Pilato ang pangulong mga saserdote, ang hudiyong mga magmamando, ug ang mga tawo ug miingon: “Kamo nagdala niining tawhana kanako nga nagsulsol sa katawhan sa pag-alsa, ug, tan-awa! gisusi ko siya atubangan kaninyo ug nakitang walay angayng isumbong batok kaniya. Gani, bisan si Herodes, kay iyang gibalik siya kanamo; ug, tan-awa! siya dili angayan sa kamatayon. Busa ako magpitol kaniya ug magpagawas kaniya.”

Busa, si Pilato sa makaduha mideklarar kang Jesus nga inosente. Siya buot magpagawas kaniya, kay naamgohan niya nga tungod lang sa kasina nga ang mga saserdote nagdala kaniya. Apan samtang si Pilato padayong misulay sa pagpagawas kang Jesus, siya nakadawat ug laing kusganong panukmod sa pagbuhat niana. Samtang siya diha sa iyang lingkoranang hukmanan, ang iyang asawa nagpadalag usa ka mensahe, nag-agda kaniya: “Ayawg hilabti kanang matarong nga tawo, kay ako natugaw pag-ayo karong adlawa diha sa usa ka damgo [tataw nga gikan sa Diyos] tungod kaniya.”

Apan, sa unsang paagi mapagawas ni Pilato kining inosenteng tawo, sumala gayod sa iyang nahibaloan? Juan 18:36-38; Lucas 23:4-16; Mateo 27:12-14, 18, 19; 14:1, 2; Marcos 15:2-5.

◆ Sa unsang paagi gitubag ni Jesus ang pangutana bahin sa iyang pagkahari?

◆ Mahitungod sa unsang “kamatuoran” nga gigugol ni Jesus ang iyang yutan-ong kinabuhi sa pagpamatuod?

◆ Unsa ang hukom ni Pilato, sa unsang paagi misanong ang mga tawo, ug unsay gihimo ni Pilato kang Jesus?

◆ Kinsa si Herodes Antipas, nganong siya nalipay pag-ayo sa pagkakita kang Jesus, ug unsay iyang gihimo kaniya?

◆ Nganong si Pilato buot magpagawas kang Jesus?