Gilutos Apan Malipayon
“Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako.”—MATEO 5:11.
1. Unsay gipasalig ni Jesus sa iyang mga sumusunod mahitungod sa kalipay ug paglutos?
SA DIHANG gipadala ni Jesus ang iyang mga tinun-an sa unang higayon aron sa pagsangyaw sa Gingharian, gipasidan-an niya sila nga sila masugamak sa mga pagsupak. Giingnan niya sila: “Kamo pagadumtan sa tanang katawhan tungod sa akong ngalan.” (Mateo 10:5-18, 22) Apan, una pa niana, sa iyang Wali sa Bukid, gipasaligan niya ang iyang mga apostoles ug ang uban nga ang maong pagsupak dili awtomatikong magpameligro sa ilang dulot nga kalipay. Gani, gilangkit pa ni Jesus ang pagkamalipayon sa pagkaginalutos ingong mga Kristohanon! Sa unsang paagi ang paglutos makahatag ug kalipay?
Nag-antos Tungod sa Pagkamatarong
2. Sumala kang Jesus ug kang apostol Pedro, unsang matanga sa pag-antos ang makahatag ug kalipay?
2 Ang ikawalong kalipay nga gihisgotan ni Jesus mao: “Malipayon kadtong ginalutos tungod sa pagkamatarong, sanglit ila ang gingharian sa mga langit.” (Mateo 5:10) Ang pag-antos mismo dili dalayegon. Si apostol Pedro misulat: “Unsay dalayegon niini kon, sa dihang kamo nagpakasala ug gisagpa, kamo nagaagwanta niini? Apan kon, sa dihang kamo nagbuhat ug maayo ug kamo nagaantos, kamo nagaagwanta niini, butang kini nga kahimut-anan sa Diyos.” Mipadayon siya sa pag-ingon: “Bisan pa niana, ayaw tugoti nga aduna kaninyoy mag-antos ingong usa ka mamumuno o usa ka kawatan o usa ka mamumuhat ug daotan o usa ka hilabtanon sa mga butang sa uban. Apan kon siya nag-antos ingong usa ka Kristohanon, ayaw siya pabatia ug kaulaw, hinunoa kinahanglang magpadayon siya sa paghimaya sa Diyos niining ngalana.” (1 Pedro 2:20; 4:15, 16) Sumala sa gipamulong ni Jesus, ang pag-antos makahatag ug kalipay sa dihang kini giantos tungod sa pagkamatarong.
3. (a) Unsay kahulogan sa pagkaginalutos tungod sa pagkamatarong? (b) Unsay epekto sa paglutos nganha sa unang mga Kristohanon?
3 Ang matuod nga pagkamatarong gisukod pinaagi sa pagtuman sa kabubut-on sa Diyos ug sa iyang mga sugo. Busa, ang pag-antos tungod sa pagkamatarong nagkahulogan ug pag-antos tungod kay ang usa wala magpadala sa pagpit-os nga lapason ang mga sukdanan o mga kinahanglanon sa Diyos. Ang mga apostoles gilutos sa Hudiyong mga lider tungod kay sila wala mohunong sa pagsangyaw sa ngalan ni Jesus. (Buhat 4:18-20; 5:27-29, 40) Nakaiban ba kini sa ilang kalipay o nakapahunong sa ilang pagsangyaw? Wala gayod! “Sila milakaw gikan sa atubangan sa Sanhedrin, nga nagmaya tungod kay giisip sila nga takos pakaulawan tungod sa iyang ngalan. Ug matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.” (Buhat 5:41, 42) Kining maong paglutos nakahatag kanila ug kalipay ug nakapabag-o sa ilang kasibot diha sa buluhatong pagsangyaw. Sa ulahi, ang unang mga Kristohanon gilutos sa mga Romano tungod sa pagdumili sa pagsimba sa emperador.
4. Unsa ang pipila ka hinungdan kon nganong ginalutos ang mga Kristohanon?
4 Sa modernong mga panahon, ang mga Saksi ni Jehova ginalutos tungod kay sila dili mohunong sa pagsangyaw ‘niining maayong balita sa gingharian.’ (Mateo 24:14) Sa dihang gidili ang ilang Kristohanong mga tigom, sila andam nga mag-antos inay kay mohunong sa pagtigom sumala sa gisugo sa Bibliya. (Hebreohanon 10:24, 25) Sila gilutos tungod sa ilang Kristohanong neyutralidad o sa ilang pagdumili sa paggamit sa dugo sa sayop nga paagi. (Juan 17:14; Buhat 15:28, 29) Bisan pa niana, kining maong pagbarog dapig sa pagkamatarong makahatag sa katawhan sa Diyos karon ug dakong kalinaw ug kalipay sa kahiladman.—1 Pedro 3:14.
Gipakaulawan Tungod Kang Kristo
5. Tungod sa unsang pangunang rason nga ang katawhan ni Jehova ginalutos karon?
5 Ang ikasiyam nga kalipay nga gikonsiderar ni Jesus diha sa iyang Wali sa Bukid naghisgot usab sa paglutos. Siya miingon: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako.” (Mateo 5:11) Ang pangunang rason kon nganong ang katawhan ni Jehova ginalutos mao nga sila dili bahin sa presenteng daotang sistema sa mga butang. Giingnan ni Jesus ang iyang mga tinun-an: “Kon kamo bahin pa sa kalibotan, higugmaon sa kalibotan ang mga iyaha. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo.” (Juan 15:19) Sa susama, si apostol Pedro miingon: “Tungod kay kamo wala magpadayon sa pagpakig-uban kanila niining samang paglunang sa unodnong pagpatuyang, sila nahibulong ug nagpadayon sa pagsulti nga mapasipalahon kaninyo.”—1 Pedro 4:4.
6. (a) Nganong ang mga nahibilin ug ang ilang mga kauban gipakaulawan ug ginalutos? (b) Ang mao bang pagpakaulaw makaiban sa atong kalipay?
6 Nahibaloan na nato nga ang unang mga Kristohanon gilutos tungod kay sila wala mohunong sa pagsangyaw sa ngalan ni Jesus. Gisugo ni Kristo ang iyang mga sumusunod: “Kamo mahimong akong mga saksi . . . hangtod sa kinalay-ang dapit sa yuta.” (Buhat 1:8) Ang matinumanong nahibilin sa dinihogang mga igsoon ni Kristo, nga giabagan sa ilang maunongong mga kauban sa “dakong panon,” masibotong nagtuman nianang sugoa. (Pinadayag 7:9) Busa, si Satanas nakiggubat “sa nahibilin sa iyang binhi [ang binhi sa “babaye,” ang langitnong bahin sa organisasyon sa Diyos], kinsa nagabantay sa mga sugo sa Diyos ug may buluhaton sa pagpamatuod bahin kang Jesus.” (Pinadayag 12:9, 17) Ingong mga Saksi ni Jehova, kita nagapamatuod bahin kang Jesus, ang nagamando-karon nga Hari sa Ginghariang kagamhanan, nga magalaglag sa tawhanong mga kagamhanan nga mobabag sa matarong nga bag-ong kalibotan sa Diyos. (Daniel 2:44; 2 Pedro 3:13) Tungod niini kita gipakaulawan ug ginalutos, apan kita malipayon nga mag-antos tungod sa ngalan ni Kristo.—1 Pedro 4:14.
7, 8. Unsay bakak nga gisulti sa mga magsusupak batok sa unang mga Kristohanon?
7 Si Jesus nag-ingon nga ang iyang mga sumusunod angayng magmalipayon bisan pag ang mga tawo ‘binakak nga magsulti ug tanang matang sa kadaotan’ batok kanila tungod kaniya. (Mateo 5:11) Nahitabo gayod kini sa unang mga Kristohanon. Sa dihang si apostol Pablo gibilanggo didto sa Roma, sa mga 59-61 K.P., ang Hudiyong mga lider didto miingon bahin sa mga Kristohanon: “Sa pagkatinuod mahitungod niining sektaha nahibaloan namo nga kini ginasupak bisan diin.” (Buhat 28:22) Si Pablo ug Silas giakusar nga “nagpagubot sa gipuy-ang yuta,” nga misupak sa mga mando ni Cesar.—Buhat 17:6, 7.
8 Nagsulat bahin sa mga Kristohanon sa panahon sa Romanong Imperyo, ang historyanong si K. S. Latourette miingon: “Ang mga akusasyon nagkalainlain. Tungod kay sila midumili sa pagpakigbahin sa paganong mga seremonyas, ang mga Kristohanon gitawag nga mga ateyista. Pinaagi sa ilang paglikay sa kadaghanan sa kalihokan sa katilingban—sa paganong mga pista, publikong mga kalingawan . . .—sila mayubitong gitawag ingong mga magdudumot sa tawhanong rasa. . . . Giingon nga ang mga lalaki ug babaye magkita inigkagabii . . . ug ang mahilayong pakighilawas mahitabo. . . . Tungod kay [ang Memoryal sa kamatayon ni Kristo] gisaulog lamang kauban sa mga magtutuo mitungha ang mga hulungihong nga ang mga Kristohanon kanunayng maghalad ug masuso ug magakaon sa dugo ug unod niini.” Gawas pa, tungod kay ang unang mga Kristohanon wala mosimba sa emperador, sila giakusar ingong mga kaaway sa Estado.
9. Unsay reaksiyon sa unang-siglong mga Kristohanon sa sayop nga mga akusasyon nga gihimo batok kanila, ug unsay situwasyon karon?
9 Kadtong bakak nga mga akusasyon wala makapugong sa unang mga Kristohanon sa pagtuman sa gisugo kanila nga pagsangyaw sa maayong balita sa Gingharian. Sa 60-61 K.P., si Pablo nakaingon nga ang “maayong balita” “nagapamunga ug nagalambo sa tibuok kalibotan” ug kana “giwali sa tibuok kalalangan ilalom sa langit.” (Colosas 1:5, 6, 23) Nahitabo ang susama niana karon. Ang mga Saksi ni Jehova sayop nga giakusar, sama sa unang-siglong mga Kristohanon. Bisan pa niana, ang buluhaton nga pagsangyaw sa mensahe sa Gingharian nagalambo ug nakahatag ug dakong kalipay niadtong nakigbahin niana.
Malipayon nga Gilutos Sama sa mga Manalagna
10, 11. (a) Sa unsang paagi gitapos ni Jesus ang iyang pagkonsiderar sa ikasiyam ka kalipay, ug ngano? (b) Nganong gilutos ang mga manalagna? Paghatag ug mga pananglitan.
10 Gitapos ni Jesus ang iyang pagkonsiderar sa ikasiyam nga kalipay pinaagi sa pag-ingon: “Pagmaya . . . , kay nianang paagiha sila naglutos sa mga manalagna nga nauna kaninyo.” (Mateo 5:12) Ang mga manalagna nga gipadala ni Jehova aron sa pagpasidaan sa dili-matinumanong Israel wala dawata ug subsob nga gilutos. (Jeremias 7:25, 26) Si apostol Pablo nagpamatuod niining kamatuorana, nga misulat: “Unsa pay akong isulti? Kay kulangon ako sa panahon kon mopadayon ako sa pag-asoy bahin . . . sa ubang mga manalagna, nga tungod sa pagtuo . . . nakaagom sa ilang pagsulay pinaagig mga pagyagayaga ug mga paglapdos, sa pagkatinuod, labaw pa niana, pinaagig mga talikala ug mga bilanggoan.”—Hebreohanon 11:32-38.
11 Panahon sa pagmando sa daotan nga Haring Ahab ug sa iyang asawa, si Jezebel, daghang manalagna ni Jehova ang gipamatay pinaagi sa espada. (1 Hari 18:4, 13; 19:10) Ang manalagnang si Jeremias gibutang sa sepohan ug sa ulahi gihulog sa atabay nga lapokon. (Jeremias 20:1, 2; 38:6) Ang manalagnang si Daniel gilabay ngadto sa langob sa mga leyon. (Daniel 6:16, 17) Kining tanang manalagna una pa ang Kristohanong panahon gilutos tungod kay ilang gidepensahan ang putli nga pagsimba kang Jehova. Daghang manalagna ang gilutos sa Hudiyong relihiyosong mga lider. Gitawag ni Jesus ang mga eskriba ug mga Pariseo ingong ‘mga anak niadtong nagbuno sa mga manalagna.’—Mateo 23:31.
12. Nganong kitang mga Saksi ni Jehova nag-isip nga usa ka pribilehiyo nga lutoson sama sa mga manalagna sa kakaraanan?
12 Karon, kitang mga Saksi ni Jehova subsob nga gilutos tungod kay kita masiboton sa pagsangyaw sa maayong balita sa Gingharian. Ang atong mga kaaway nag-akusar kanato nga kita “agresibong nangabig,” apan kita nahibalo nga ang matinumanong mga magsisimba ni Jehova una kanato nag-atubang ug susamang pagsaway. (Jeremias 11:21; 20:8, 11) Giisip natong pribilehiyo nga mag-antos sa samang hinungdan nga ang matinumanong mga manalagna sa kakaraanan nag-antos. Ang disipulong si Santiago misulat: “Mga igsoon, himoa ninyong sumbanan sa pag-antos sa daotan ug sa pagkamapailobon ang mga manalagna, nga nagsulti sa ngalan ni Jehova. Tan-awa! Gipahayag namo nga malipayon kadtong nakaantos.”—Santiago 5:10, 11.
Dagkong Hinungdan nga Magmalipayon
13. (a) Nganong dili kita maluya tungod sa paglutos? (b) Unsay makapaarang kanato sa pagbarog nga malig-on, ug unsay gipamatud-an niini?
13 Inay maluya tungod sa paglutos, kita nahupayan sa hunahuna nga kita nagasunod sa mga tunob sa mga manalagna, sa unang mga Kristohanon, ug kang Kristo Jesus mismo. (1 Pedro 2:21) Makabaton kita ug dulot nga katagbawan gikan sa Kasulatan, sama sa mosunod nga mga pulong ni apostol Pedro: “Mga hinigugma, ayaw kamo kahibulong sa pagdilaab taliwala kaninyo, nga nagakahitabo kaninyo ingon nga pagsulay, nga daw usa ka katingad-ang butang ang midangat kaninyo. Kon kamo gipakaulawan tungod sa ngalan ni Kristo, kamo malipayon, tungod kay ang espiritu sa himaya, bisan ang espiritu sa Diyos, anaa kaninyo.” (1 Pedro 4:12, 14) Atong naeksperyensiyahan nga kita makabarog nga malig-on ilalom sa paglutos tungod lamang kay ang espiritu ni Jehova anaa kanato ug nagpalig-on kanato. Ang pagpaluyo sa balaang espiritu maoy pamatuod nga ang panalangin ni Jehova anaa kanato, ug kini makahatag kanato ug dakong kalipay.—Salmo 5:12; Filipos 1:27-29.
14. Unsay mga hinungdan nga kita magmaya sa dihang lutoson tungod sa pagkamatarong?
14 Ang laing hinungdan kon nganong ang pagsupak ug paglutos tungod sa pagkamatarong makapalipay kanato mao nga kini nagpamatuod nga kita nagkinabuhi ingong matuod nga mga Kristohanon uban ang diyosnong pagkamahinalaron. Si apostol Pablo misulat: “Ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:12) Kita malipayon kaayo sa hunahuna nga ang atong paghupot ug integridad ilalom sa pagsulay maghatag ug dugang tubag sa hagit ni Satanas nga ang tanang linalang ni Jehova nag-alagad Kaniya tungod sa hakog nga tinguha. (Job 1:9-11; 2:3, 4) Kita magmaya nga kita adunay bahin, bisan gamay ra kaayo, sa pagbindikar sa matarong nga pagkasoberano ni Jehova.—Proverbio 27:11.
Lukso sa Kalipay Tungod sa Ganti
15, 16. (a) Unsang hinungdan ang gihatag ni Jesus nga kita ‘magmaya ug molukso sa kalipay’? (b) Unsang ganti ang giandam didto sa mga langit alang sa dinihogang mga Kristohanon, ug sa unsang paagi ang ilang mga kauban nga “ubang mga karnero” pagagantihan usab?
15 Si Jesus naghatag ug laing hinungdan sa kalipay bisan pag gipasipalahan ug ginalutos sama sa mga manalagna sa kakaraanan. Sa hinapos nga bahin sa ikasiyam nga kalipay, siya miingon: “Pagmaya ug lukso sa kalipay, sanglit dako ang inyong ganti sa mga langit.” (Mateo 5:12) Si apostol Pablo misulat: “Ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” (Roma 6:23) Oo, ang ‘dako nga ganti’ mao ang kinabuhi, ug dili kini suhol nga mahimo natong hagoan aron maangkon. Kini usa ka libreng gasa. Si Jesus miingon nga ang ganti atua “sa mga langit” tungod kay kini naggikan kang Jehova.
16 Ang mga dinihogan makadawat sa “purongpurong sa kinabuhi,” sa ato pa, sa ilang kaso, imortal nga kinabuhi uban kang Kristo sa langit. (Santiago 1:12, 17) Kadtong adunay yutan-ong paglaom, ang “ubang mga karnero,” nagpaabot nga makapanunod ug walay-kataposang kinabuhi sa usa ka yutan-ong paraiso. (Juan 10:16; Pinadayag 21:3-5) Alang sa duha ka matang, ang “ganti” dili usa ka butang nga ilang hagoan aron maangkon. Ang mga dinihogan ug ang “ubang mga karnero” makadawat sa ilang ganti tungod sa “labawng dili-takos nga kalulot” ni Jehova, nga nagtukmod kang apostol Pablo sa pag-ingon: “Salamat sa Diyos tungod sa iyang dili-mahubit nga walay bayad nga gasa.”—2 Corinto 9:14, 15.
17. Nganong magmalipayon kita sa dihang ginalutos ug sa mahulagwayong paagi ‘molukso sa kalipay’?
17 Alang sa mga Kristohanon, nga ang uban kanila hapit nang makaagom sa mapintas nga paglutos nga gipahinabo ni Emperador Nero, si apostol Pablo misulat: “Magsadya kita samtang anaa sa kasakitan, kay kita nahibalo nga ang kasakitan magpatungha ug paglahutay; ang paglahutay, sa baylo, ug usa ka inuyonang kahimtang; ang inuyonang kahimtang, sa baylo, ug paglaom, ug ang paglaom dili motultol sa pagkahigawad.” Miingon usab siya: “Magmaya diha sa paglaom. Mag-antos ilalom sa kasakitan.” (Roma 5:3-5; 12:12) Langitnon o yutan-on man ang atong paglaom, ang atong ganti tungod sa pagkamatinumanon ilalom sa pagsulay mas dako gayod kay sa bisan unsa nga takos nga ihatag kanato. Walay kinutoban ang atong kalipay sa palaaboton nga mabuhi sa walay kataposan sa pag-alagad ug pagdayeg sa atong mahigugmaong Amahan, si Jehova, ilalom sa atong Haring Jesu-Kristo. Sa mahulagwayong pagkasulti kita ‘molukso sa kalipay.’
18. Unsay madahom nga buhaton sa mga nasod samtang magkaduol ang kataposan, ug unsay buhaton ni Jehova?
18 Diha sa pipila ka nasod, ang mga Saksi ni Jehova gilutos ug ginalutos pa gihapon. Sa iyang tagna bahin sa kataposan sa sistema sa mga butang, gipasidan-an ni Jesus ang matuod nga mga Kristohanon: “Kamo pagadumtan sa tanang kanasoran tungod sa akong ngalan.” (Mateo 24:9) Samtang magkaduol kita sa kataposan, palihokon ni Satanas ang mga nasod nga ipadayag ang ilang pagdumot batok sa katawhan ni Jehova. (Ezequiel 38:10-12, 14-16) Mao kiniy timailhan nga panahon na nga molihok si Jehova. “Ako magapadako gayod sa akong kaugalingon ug magabalaan sa akong kaugalingon ug magapaila sa akong kaugalingon atubangan sa mga mata sa daghang kanasoran; ug sila makaila gayod nga ako mao si Jehova.” (Ezequiel 38:23) Sa ingon, balaanon ni Jehova ang iyang bantogang ngalan ug luwason ang iyang katawhan gikan sa paglutos. Busa, “malipayon ang tawo nga nagpadayon sa pag-antos.”—Santiago 1:12.
19. Samtang nagapaabot sa dakong “adlaw ni Jehova,” unsay angay natong buhaton?
19 Samtang ang dakong “adlaw ni Jehova” magkaduol pa, magmaya kita tungod kay kita ‘giisip nga takos pakaulawan’ tungod sa ngalan ni Jesus. (2 Pedro 3:10-13; Buhat 5:41) Sama sa unang mga Kristohanon, hinaot magpadayon kita nga ‘walay hunong sa pagpanudlo ug sa pagpahayag sa maayong balita bahin kang Kristo,’ ug sa iyang Ginghariang kagamhanan samtang nagapaabot sa atong ganti didto sa matarong nga bag-ong kalibotan ni Jehova.—Buhat 5:42; Santiago 5:11.
Agig Pagsubli
• Unsay kahulogan sa pag-antos tungod sa pagkamatarong?
• Unsay epekto sa paglutos diha sa unang mga Kristohanon?
• Nganong ikaingon nga ang mga Saksi ni Jehova ginalutos sama sa mga manalagna sa kakaraanan?
• Nganong kita mahimong ‘magmaya ug molukso sa kalipay’ bisan pag gilutos?
[Mga hulagway sa panid 16, 17]
“Malipayon kamo sa dihang pakaulawan kamo sa mga tawo ug pagalutoson”
[Credit Line]
Group in prison: Chicago Herald-American