Kinabuhi ug Ministeryo ni Jesus

“Sa Pagkatinuod Kini Siya Anak sa Diyos”

DILI pa dugay si Jesus diha sa estaka sa dihang, sa pagkaudto, usa ka kahibudngang, tulo ka oras nga kangitngit nahitabo. Dili kadto tungod sa eklipse sa adlaw, sanglit kini mahitabo lamang sa panahon sa bag-ong bulan, ug ang bulan takdol sa panahon sa Paskwa. Dugang pa, ang mga eklipse sa adlaw motagal lamang ug pipila ka minuto. Busa ang kangitngit adunay balaanong gigikanan! Kini malagmit nagpahunong niadtong nagbiaybiay kang Jesus, naghanaw pa gani sa ilang mga pagyubit.

Kon ang katingad-ang panghitabo nahitabo una pa gisagda sa usa ka mamumuhat ug daotan ang iyang kauban ug mihangyo kang Jesus sa paghinumdom kaniya, kini unya mahimong hinungdan sa iyang paghinulsol. Tingali niining panahona sa kangitngit nga ang upat ka babaye, sa ato pa, ang inahan ni Jesus ug ang iyang igsoong babaye nga si Salome, Maria Magdalena, ug si Maria ang inahan sa apostol nga si Santiago nga Gamayon, nagpaduol ngadto sa kahoy sa pagsakit. Si Juan, ang hinigugmang apostol ni Jesus, maoy uban kanila didto.

‘Pagkasakit’ sa kasingkasing sa inahan ni Jesus samtang nagsud-ong siya sa anak nga iyang giamoma ug gipadako nga nagbitay didto sa kasakit! Apan, si Jesus naghunahuna, dili sa iyang kaugalingong kasakit, kondili sa iyang kaayohan. Uban sa dakong pangarisgar, siya miyango ngadto kang Juan ug misulti ngadto sa iyang inahan: “Babaye, tan-awa! Ang imong anak!” Unya, miyango ngadto kang Maria, siya miingon kang Juan: “Tan-awa! Ang imong inahan!”

Si Jesus sa ingon nagtugyan sa pag-atiman sa iyang inahan, kinsa dayag niadto nga usa na ka balo, ngadto sa iyang hinigugma pag-ayo nga apostol. Iyang gihimo kini tungod kay ang ubang mga Anak ni Maria wala pa magpakitag pagtuo diha kaniya. Busa iyang gipahimutang ang usa ka maayong panig-ingnan sa pagtagana dili lamang sa iyang pisikal nga panginahanglan kondili usab sa iyang espirituwalidad.

Sa mga alas tres sa hapon, miingon si Jesus: “Ako giuhaw.” Unya, nakamatikod nga ang iyang Amahan, pagaingnon pa, nagkuha sa iyang panalipod kaniya aron ang iyang pagkamaunongon masulayan gayod, siya mitawag uban sa makusog nga tingog: “Diyos ko, Diyos ko, nganong gibiyaan mo ako?” Sa pagkadungog niini, ang pipila nga nagbarog sa duol miingon: “Tan-awa! Gitawag niya si Elias.” Dihadiha usa kanila miduol nga nagdagan ug, ginamit ang espongha nga gipatuhopan ug suka diha sa tumoy sa usa ka bagakay, gitunol kaniya aron iyang imnon. Apan ang uban nanag-ingon: “Pasagdi lang! Atong tan-awon kon moanhi ba gayod si Elias sa pagluwas kaniya.”

Sa dihang nadawat na ni Jesus ang suka, siya misinggit: “Natapos na!” Oo, natapos niya ang tanan nga gipabuhat sa iyang Amahan nga nagpadala kaniya sa yuta. Sa kataposan, siya miingon: “Amahan, sa imong mga kamot gitugyan ko ang akong espiritu.” Sa ingon gitugyan ni Jesus ngadto sa Diyos ang iyang puwersa sa kinabuhi nga nagasalig nga ang Diyos magpasig-uli niini ngadto kaniya pag-usab. Dayon giduko ang iyang ulo ug namatay.

Sa higayong nabugtoan si Jesus sa iyang ginhawa, usa ka mabangis nga linog ang nahitabo, nagpasip-ak sa mga pangpang. Ang linog kusog kaayo nga ang mga lubong gawas sa Jerusalem nangaabli, ug ang mga patay nanglintuwad gikan kanila. Ang mga nanglabay, kinsa nakakita sa mga patayng lawas nga nanggula, misulod sa siyudad ug nagtaho niini.

Dugang pa, sa pagkamatay ni Jesus, ang dakong tabil nga nagbahin sa Balaan ug Labing Balaan nga dapit diha sa templo sa Diyos nagilis ngadto sa duha, gikan sa itaas paubos. Dayag nga kining matahom nga pagkadesinyo nga tabil maoy 18 metros ang gitas-on ug bug-at kaayo! Ang kahibulongang milagro dili lamang nagpadayag sa kapungot sa Diyos sa mga mingpatay sa Iyang Anak kondili nagpakita nga ang pagsulod ngadto sa Labing Balaan, sa langit mismo, mahimo na tungod sa kamatayon ni Jesus.

Bueno, sa dihang nabatyagan sa mga tawo ang linog ug nakita ang mga butang nanghitabo, sila nangahadlok pag-ayo. Ang kapitan nga gitugyanan sa pagsilot naghimaya sa Diyos. “Sa pagkatinuod kini siya Anak sa Diyos,” siya miingon. Malagmit siya diha niadto sa dihang giangkon ang balaanong pagkaanak nga gihisgotan sa paghusay kang Jesus sa atubangan ni Pilato. Ug karon siya kumbinsido nga si Jesus maoy Anak sa Diyos, oo, nga siya sa pagkamatuod ang labing bantog nga tawo nga nabuhi sukad sa yuta.

Ang uban usab nadaog niining milagrosong mga hitabo, ug sila misugod sa pagpamauli nga namukpok sa ilang mga dughan, ingong pamatuod sa ilang tuman nga kaguol ug kaulaw. Nagpaantaw sa pagtan-aw mao ang daghang mga babaye nga mga tinun-an ni Jesus kinsa natandog gayod niining talagsaong mga hitabo. Si apostol Juan usab dinha niadto. Mateo 27:45-56; Marcos 15:33-41; Lucas 23:44-49; 2:34, 35; Juan 19:25-30.

◆ Nganong ang eklipse sa adlaw dili maoy hinungdan sa tulo ka oras nga kangitngit?

◆ Dili pa dugay una pa sa iyang kamatayon, unsa ang maayong panig-ingnan ang gihatag ni Jesus alang niadtong may edarang mga ginikanan?

◆ Unsa ang kataposang upat ka pahayag ni Jesus una pa siya namatay?

◆ Unsay nahimo sa linog, ug unsay gipasabot sa pagkagilis sa tabil sa templo ngadto sa duha?

◆ Sa unsang paagi ang kapitan nga gitugyanan sa pagsilot naapektohan sa mga milagro?