Kon Unsaon sa mga Kristohanon Pagsagubang ang Publikong Pakaulaw

UNSAY bation nimo kon may magpakaulaw kanimo o magsabwag ug kabakakan bahin kanimo? Natural nga mobati ka ug grabeng kasakit. Ang mga Saksi ni Jehova makasinati sa susamang butang sa diha nga sila mahimong tumong sa dili-husto o tinuis nga impormasyon diha sa media. Apan sumala sa giingon ni Jesus sa Mateo 5:11, 12, sila may katarongan gihapon nga magmangayaon.

Pananglitan, usa ka Katolikong basahon sa Alemanya miangkon nga “ang matag Saksi obligadong modonar tali sa 17 ug 28 porsiento sa iyang kinitaan ngadto sa hedkuwarter sa sekta.” Apan, ang mga Saksi ni Jehova dili usa ka sekta, ug ang ilang buluhaton bug-os nga suportado sa kinabubut-ong mga amot. Daghang magbabasa ang nalimbongan niining bakak nga impormasyon, nga gikasubo sa mga Saksi ni Jehova. Apan sa unsang paagi mosanong ang matuod nga mga Kristohanon sa pakaulaw diha sa media?

Usa ka Panig-ingnan nga Pagasundon sa mga Kristohanon

Ang Mateo kapitulo 23 tin-awng nagbatbat kon giunsa ni Jesus pagsaway ang iyang relihiyosong mga magsusupak tungod sa ilang kasalingkapaw ug panlimbong. Kini ba nagtaganag usa ka sumbanan alang sa mga Kristohanon karong adlawa kon unsaon pagsagubang ang mga kritiko? Dili gayod. Ang Anak sa Diyos nagsaway sa iyang relihiyosong mga magsusupak pinasukad sa linaing awtoridad ug pagsabot nga iyang naangkon, nga nagbuhat niana sa kaayohan sa mga panon nga nagpatalinghog.

Ang Mateo 15:1-11 nag-asoy nga si Jesus gisaway tungod kay ang iyang mga tinun-an giingong naglapas sa Hudiyohanong tradisyon. Unsay sanong ni Jesus? Siya nagpabiling lig-on, nga wala matarog. Usahay, si Jesus prangkang nakiglalis sa iyang mga kritiko, nga nagpanghimakak sa ilang sayop nga mga hunahuna. Sa malangkobong pagkasulti, ang mga Kristohanon karong adlawa dili sayop sa pagsulay sa pagtul-id sa mga pagdaot sa ilang buluhaton o mga pagtulon-an, nga maninguha sa pagtin-aw sa kahimtang sa matuod ug makataronganong paagi. Gibuhat nila kini sa pagtabang sa sinserong mga tawo sa pag-ila nga ang pagsaway sa mga Saksi ni Jehova dili angay ug makapakaulaw.

Apan matikdi kon unsay sanong ni Jesus sa wala madugay sa ulahi sa dihang gipunting sa iyang mga tinun-an: “Nahibalo ka ba nga nangapandol ang mga Fariseo sa pagkadungog sa imong giingon?” Kadtong mga Pariseo “nangapandol”​—sila wala lamang mapikal kondili nahimong dili-matul-id nga mga magsusupak nga gisalikway ni Jesus. Busa mitubag siya: “Pasagdi nga maingon sila. Maoy mga buta nga manggigiya sila.” Ang dugang nga pagpakighisgot sa maong masupakong mga kabatok walay kapuslanan, nga dili makaayo kang bisan kinsa, ug mahimong mosangpot lamang sa dili-mabungahong panaglalis. (Mateo 7:6; 15:12-14; itandi ang 27:11-14.) Ang mga tubag nga gihatag ni Jesus nagpakitang adunay “usa ka panahon sa paghilom ug usa ka panahon sa pagsulti.”​—Ecclesiastes 3:7.

Ang mga Saksi ni Jehova wala magdahom nga ang tanan mosulting mauyonon kanila. Sila nahinumdom sa mga pulong ni Jesus: “Alaot, sa dihang ang tanang tawo mamulong ug maayo bahin kaninyo, kay ang mga butang nga ingon niini mao ang gibuhat sa ilang mga katigulangan ngadto sa bakak nga mga propeta.” (Lucas 6:26) Si C. T. Russell, unang presidente sa Watch Tower Society, kas-a gisukna kon nganong wala niya depensahi ang iyang kaugalingon batok sa mga tigpasipala. Mitubag siya: “Kon mohunong ka aron patiran ang matag iro nga mopaghot kanimo, dili ka gayod makaabot sa layo.”

Busa dili nato tugotang ang mga komento sa hugot nga mga magsusupak magpalinga kanato gikan sa atong pag-alagad sa Diyos. (Salmo 119:69) Atong ihatag ang bug-os nga pagtagad sa buluhaton sa matuod nga mga Kristohanon, nga mao, ang pagwali sa maayong balita. Ingong kinaiyanhong sangpotanan, kita makabatog mga higayon sa pagtubag sa mga pangutana ug sa pagsaysay sa kahulogan sa atong buluhaton, ingong makapauswag sa kagawian sa usa ka tawo ug magtudlo kaniya diha sa Pulong sa Diyos.​—Mateo 24:14; 28:19, 20.

Angay ba nga Motubag sa Pagsaway?

Si Jesus miingon bahin sa iyang mga sumusunod: “Kamo dili man bahin sa kalibotan . . . Gumikan niini ang kalibotan nagadumot kaninyo.” (Juan 15:19) Daghang taho sa media nga naghatag ug pakaulaw sa mga Saksi ni Jehova maoy usa ka pagpahayag sa maong pagdumot, ug ang maong mga taho angay nga dili tagdon. Ugaling, ang media may panahon nga tingali mopahayag ug impormasyon nga nagpaila sa kakulang sa kahibalo bahin sa mga Saksi o nga nagtuis ug naghubad nga sayop sa pila ka kasayoran. Ang pila ka magsusulat tingali nagkuhag impormasyon gikan sa mapihigong mga tinubdan. Kon kaha dili nato tagdon ang bakak nga impormasyon diha sa media o depensahan ang kamatuoran sa angay nga paagi magdepende sa mga kahimtang, sa tigsiba sa pagsaway, ug sa iyang tumong.

Usahay ang mga kasayoran matul-id pinaagi sa hustong pagkasulat nga sulat ngadto sa editor kon ang sulat ipatik sa bug-os. Apan ang maong sulat mahimong makakab-ot sa eksaktong kaatbang sa butang gituyo. Sa unsang paagi? Ang orihinal nga bakak sa ingon mahimong mabaniog sa dugang, o ang mga magsusupak basin kahatagag dugang higayon sa pagpapatik sa kabakakan o panaway. Sa kadaghanang kaso labing maayo nga ang mga ansiano ang pahukmon kon kaha mosulat ngadto sa editor. Kon ang usa ka negatibong taho sa media mopukaw sa pagkamapihigon, ang sangang buhatan sa Watch Tower Society makapahibalo sa mga kongregasyon nianang nasora sa mga kasayoran bahin sa kahimtang, sa ingon makapaarang sa tanang magmamantala sa paghatag ug makapatagbawng katin-awan ngadto sa mga magpakisusi.

Kinahanglan ba nga ikaw sa tinagsa makiglangkit nianang tinuis nga mga pangangkon? Ang tambag ni Jesus nga “pasagdi sila sa ingon,” nga dili sila tagdon, tin-awng mapadapat ngadto niining maong grupo sa mga kaaway. Ang maunongong mga Kristohanon adunay Biblikanhong mga katarongan nga isalikway ang mga apostata ug ang ilang mga panglantaw. (1 Corinto 5:11-13; Tito 3:10, 11; 1 Juan 2:19; 2 Juan 10, 11) Kon ang usa ka tawo tinuod nga interesado kon kaha ang pagsaway sa mga Saksi tinuod o bakak, ang imong kaugalingong maayog-patukoranang kahibalo kasagaran igo na sa pagtubag.​—Tan-awa Ang Bantayanang Torre sa Marso 15, 1986, mga panid 13 ug 14.

Kon ikaw giatubang sa tinuis nga impormasyon diha sa media, sunda ang tambag sa Proverbio 14:15: “Si bisan kinsa nga walay kasinatian motuo sa tanang pulong, apan ang maalamong tawo magapalandong sa iyang mga lakang.” Sa Switzerland daghang tawo ang nasuko sa dihang ang usa ka taho sa media nga makatandog sa pagbati nag-ingon nga ang usa ka batan-ong babaye nga Saksi namatay tungod kay ang iyang mga paryente midumili sa pagtugot sa medikal nga kawani sa pag-abuno ug dugo. Mao ba gayod kana ang tinuod nga nahitabo? Dili. Ang pasyente midumili sa pag-abuno ug dugo tungod sa relihiyosong mga katarongan, apan miuyon siya nga modawat ug walay-dugo nga medikal nga pagtambal. Masugdan unta kini nga walay daghang kuti ug lagmit makaluwas unta sa iyang kinabuhi. Apan, sa wala-kinahanglana gilangan sa ospital ang pagtambal hangtod nga namatay ang pasyente. Ang taho sa media wala maghisgot niining mga kamatuorana.

Busa, timbangtimbanga pag-ayo kon tinuod ba ang maong mga taho. Ikasaysay nato sa mga tawong nangutana nga ang lokal nga mga ansiano nagadumala sa maong mga kahimtang sa mahigugmaong paagi ug sumala sa mga giya sa Bibliya. Ang pagbarog dapig sa mga prinsipyo sa dihang nagatubag magpugong kanato nga mohimo dayon ug mga konklusyon nga walay kasayoran sa mga kamatuoran maylabot niana.​—Proverbio 18:13.

Direktang Impormasyon Hinungdanon

Sa unang siglo, ang mga tawo nagpakaylap ug mga bakak bahin kang Jesu-Kristo aron madaot ang iyang dungog, ang uban nagpahayag gani kaniya nga maluibon. (Lucas 7:34; 23:2; itandi ang Mateo 22:21.) Sa ulahi, ang bag-ong natukod nga Kristohanong kongregasyon nasugamak sa kaylap nga pagsupak gikan sa relihiyoso ug kalibotanong mga elemento. Sanglit “gipili sa Diyos ang mga binuang nga butang sa kalibotan,” daghan ang nagtamay sa iyang mga alagad. (1 Corinto 1:22-29) Ang tinuod nga mga Kristohanon karong adlawa kinahanglang magkonsiderar sa kaulawan, nga maoy usa ka matang sa paglutos.​—Juan 15:20.

Hinunoa, ang mga Saksi ni Jehova mopabili sa dihang ang usa ka tawo nga ilang kaestorya dili-mapihigon ug nagpasundayag ug samang tinamdan sa pipila sa mga bisita ni Pablo sa Roma, kinsa mipahayag: “Among gihunahuna nga husto nga maminaw gikan kanimo kon unsay imong mga hunahuna, kay sa pagkamatuod mahitungod niini nga sekta nahibaloan namo nga sa bisan diin kini ginasultihan ug pagbatok.”​—Buhat 28:22.

Saysayi ang mga tawo nga nakadawat ug sayop nga impormasyon, nga magabuhat niana uban ang kalumo. (Roma 12:14; itandi ang 2 Timoteo 2:25.) Dapita sila sa pagkuha ug direktang impormasyon bahin sa mga Saksi ni Jehova, aron dili sila malimbongan sa bakak nga mga sumbong. Magamit usab nimo ang mga katin-awan nga gipatik sa Watch Tower Society nga naghatag ug mga detalye bahin sa organisasyon, kasaysayan niini, ug mga pagtulon-an niini.a Kas-a si Felipe mitubag kang Natanael pinaagi sa pag-ingon lamang: “Ari ug tan-awa.” (Juan 1:46) Makahimo kita sa susama. Si bisan kinsa nga buot niana mainitong gidapit sa pagduaw sa lokal nga Kingdom Hall aron direktang makapaniid kon unsang matanga sa mga tawo ang mga Saksi ni Jehova ug unsay ilang gituohan.

Ayaw Kahadlok sa mga Magsusupak

Pagkamakapadasig ang pagkahibalo nga ang pakaulaw dili magpugong sa mga tawo nga mahimong mga Saksi! Panahon sa usa ka talk show sa TV sa Alemanya, ang mga apostata nagpahayag ug daghang bakak bahin sa mga Saksi. Ang usa ka tumatan-aw nakaila nga hinanduraw lamang ang apostatang mga pagpangdani ug napalihok sa pagtuon pag-usab sa Bibliya uban sa mga Saksi. Oo, ang publikong pakaulaw usahay motultol sa positibong mga resulta!​—Itandi ang Filipos 1:12, 13.

Si apostol Pablo nasayod nga ang pipila mas maminaw sa “bakak nga mga sugilanon” kay sa kamatuoran. Busa siya misulat: “Hupti ang imong panimuot sa tanang butang, antosa ang daotan, himoa ang buluhaton sa usa ka tig-ebanghelyo, buhata sa bug-os ang imong ministeryo.” (2 Timoteo 4:3-5) Busa ayaw itugot nga malinga ka, ug ‘dili sa bisan unsang paagi malisang’ sa imong mga kaaway. (Filipos 1:28) Magpabiling kalmado ug timbang ug isangyaw ang maayong balita nga mangayaon, ug ikaw matinumanong makasagubang sa pakaulaw sa mga tawo. Oo, hinumdomi ang saad ni Jesus: “Malipayon kamo sa dihang ang mga tawo magpakaulaw kaninyo ug maglutos kaninyo ug sa binakak magsulti sa tanang matang sa tuman-kadaotang butang batok kaninyo tungod ug alang kanako. Pagmaya ug lukso sa kangaya, sanglit dako ang inyong ganti sa mga langit; kay nianang paagiha ilang gilutos ang mga propetang nauna kaninyo.”​—Mateo 5:11, 12.

[Footnote]

[Blurb sa panid 27]

Sa dihang giatubang sa mga magsusupak, giingnan ni Jesus ang iyang mga tinun-an: “Pasagdi nga maingon sila.” Unsay iyang gipasabot?

[Blurb sa panid 29]

“Malipayon kamo sa dihang ang mga tawo magpakaulaw kaninyo ug maglutos kaninyo ug sa binakak magsulti sa tanang matang sa tuman-kadaotang butang batok kaninyo tungod ug alang kanako.”​—Mateo 5:11