Mga Milagro nga Nakita Nimo!

ANG pulong “milagro” nagkahulogan usab ug “usa ka kahibulongan o talagsaon kaayo nga hitabo, butang, o buhat.” Kitang tanan nakakita nag sama niini nga milagro diin ang Diyos wala mangilabot.

Samtang nagkadaghan ang kahibalo sa tawo bahin sa pisikal nga mga balaod sa kinaiyahan, napalampos nila ang mga butang nga gihunahuna kaniadto nga imposible. Pananglitan, ang mga butang nga ordinaryo lang karong himoon sa mga kompiyuter, telebisyon, teknolohiya sa wanang, ug ubang modernong mga kaugmaran lagmit nga giisip nga imposible sa kadaghanang tawo usa ka gatos ka tuig kanhi.

Sanglit nakaamgo nga wala silay bug-os nga kasayoran bahin sa kahibulongang mga butang sa siyensiya nga makaplagan diha sa kalalangan sa Diyos, giangkon sa pipila ka siyentipiko nga dili na sila tinong makaingon nga imposibleng mahitabo ang usa ka butang. Mahimo lang nilang ingnon nga kini dili lagmit nga mahitabo. Busa, gidahom nila nga mahimo ra unyang posible ang mga butang nga daw imposible karon.

Bisag gamiton nato ang pangunang kahulogan sa pulong “milagro,” nga mao ang mga butang nga “gipahinabo sa labaw-tawhanong puwersa,” makaingon gihapon kita nga ang matag usa kanato nakakita nag mga milagro. Pananglitan, makita nato ang adlaw, bulan, ug mga bituon—nga tanan mga buhat sa usa ka “labaw-tawhanong puwersa,” ang Maglalalang mismo. Kon buot hunahunaon, kinsay bug-os makapatin-aw kon sa unsang paagi nagalihok ang tawhanong lawas? kon sa unsang paagi nagaobra ang utok? o kon sa unsang paagi nagatubo ang bata sulod sa tagoangkan? Ang librong The Body Machine nag-ingon: “Ang mga sangkap sa lawas sa tawo, nga hiniusang gipalihok sa sentral nga sistema sa nerbiyos, nahisamag usa ka komplikado, sensitibo nga himan, usa ka makina nga makalihok ug makakontrolar sa kalihokan niini, usa ka kompiyuter nga arang makahinumdom sa mga butang—usa ka kahibulongan ug sa daghang paagi lisod-sabton nga linalang.” Ang Diyos nga naglalang sa “mga sangkap sa lawas sa tawo” naghimo gayod ug milagro, usa nga padayong nakapahingangha kanato. Aduna pay lainlaing matang sa milagro nga nakita nimo, bisan tuod wala nimo kini isipa nga ingon niana.

Ang Usa ka Libro Mahimo Bang Usa ka Buhat sa Milagro?

Walay laing libro ang kaylap kaayong napanagtag kay sa Bibliya. Gilantaw ba nimo ang Bibliya ingong usa ka buhat sa milagro? Makaingon ba kita nga kini milungtad tungod sa “labaw-tawhanong puwersa”? Tinuod nga ang Bibliya maoy usa ka libro nga gisulat sa mga tawo, apan giangkon sa mga nagsulat niini nga ang ilang gisulat maoy mga hunahuna sa Diyos, dili ilaha. (2 Samuel 23:1, 2; 2 Pedro 1:20, 21) Hunahunaa kini. Mga 40 ka tawo ang nagsulat niini, nga nabuhi sulod sa yugto nga 1,600 ka tuig. Nagkadaiya ang ilang mga kasinatian sa kinabuhi—ang uban maoy mga magbalantay sa karnero, sundalo, mangingisda, trabahante sa gobyerno, doktor, saserdote, ug mga hari. Bisan pa niana, nakasulat silag hiniusang mensahe sa paglaom nga tinuod ug tukma.

Pinaagig maampingong pagtuon, gidawat sa mga Saksi ni Jehova ang Bibliya, “dili ingong pulong sa mga tawo, kondili, ingon sa kon unsa kini sa pagkatinuod, ingong pulong sa Diyos,” sumala sa gisulat ni apostol Pablo. (1 Tesalonica 2:13) Sa daghan nang katuigan, gipatin-aw sa ilang mga publikasyon kon sa unsang paagi ang gikaingong mga panagsumpaki sa Bibliya nahiuyon ra gayod diay sa kinatibuk-ang mensahe niini. Kining panag-uyon sa mga sinulat nagpamatuod mismo nga ang Diyos mao ang awtor niini.a

Walay laing libro ang gipaningkamotan pag-ayo nga daoton kay sa Bibliya. Bisan pa niana, padayon kining naglungtad ug ang pipila ka bahin niini mabatonan pa gani sa kapig 2,000 ka pinulongan. Ang pagkapreserbar mismo niini nga libro ug ang pagkawala-mausab sa mga teksto niini nagpamatuod sa pagpanalipod sa Diyos. Ang Bibliya maoy usa gayod ka buhat sa milagro!

Usa ka Milagro nga “Buhi ug Gamhanan”

Ang mga milagro sa karaang panahon—milagrosong pagpang-ayo ug pagpamanhaw—wala na mahitabo karon. Apan kita adunay katarongan nga magmasaligon nga sa umaabot nga bag-ong kalibotan sa Diyos, ang mga milagro nga sama niana mahitabo pag-usab sa tibuok yuta. Mohatag kinig dumalayong kahupayan ug molabaw pa sa atong presenteng katakos sa pagsabot.

Bisan karon, ang Bibliya, nga usa ka buhat sa milagro, makahimo ug mga butang nga ikaingon nato nga milagroso tungod kay mapalihok niini ang mga tawo sa pagbag-o sa ilang mga personalidad alang sa ikaayo. (Tan-awa ang usa ka pananglitan sa kahon nga “Ang Gahom sa Pulong sa Diyos,” sa panid 8.) Ang Hebreohanon 4:12 nag-ingon: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” Oo, ang Bibliya nakatabang sa pagpabag-o sa kinabuhi sa kapig unom ka milyong tawo nga nagpuyo sa tibuok yuta, nga naghatag ug katuyoan sa ilang kinabuhi ug nagtanyag kanilag kahibulongang paglaom alang sa umaabot.

Nganong dili nimo tugotan ang Bibliya nga mohimog milagro sa imong kinabuhi?

[Footnote]

[Kahon/Hulagway sa panid 7]

PATAY NA O BUHI PA?

Sumala sa Juan 19:33, 34, si Jesus patay na sa dihang “usa sa mga sundalo miduslak ug bangkaw sa iyang kilid, ug dihadiha migula ang dugo ug tubig.” Apan, gipakita sa Mateo 27:49, 50 nga si Jesus buhi pa sa dihang nahitabo kini. Nganong magkalahi man kini?

Gidili sa Moisesnong Balaod ang pagbiya sa usa ka kriminal nga nagbitay sa tibuok gabii diha sa sakitanang estaka. (Deuteronomio 21:22, 23) Busa, sa panahon ni Jesus, kon ang usa ka gilansang nga kriminal buhi pa sa hapit nang mokilumkilom, naandan na ang pagbali sa iyang mga bitiis aron siya daling mamatay. Dili na niya matul-id ang iyang lawas mao nga maglisod na siya pagginhawa ug maayo. Sanglit gibali man sa mga sundalo ang mga bitiis sa duha ka kriminal nga gilansang tapad ni Jesus apan wala balia ang mga bitiis ni Jesus, masabot nga nagtuo sila nga siya patay na. Lagmit nga gidughang sa sundalo ang kilid ni Jesus aron lang mawala ang tanang pagduhaduha ug malikayan ang bisan unsang pagtungha niya pag-usab sa ulahi nga basin bakak nga iproklamar ingong pagkabanhaw.

Ang teksto sa Mateo 27:49, 50 nagpresentar ug laing kahan-ayan sa mga hitabo. Kini nag-ingon: “Ang laing tawo mikuhag usa ka bangkaw ug gidughang ang iyang kilid, ug migula ang dugo ug tubig. Si Jesus mituaw pag-usab sa makusog nga tingog, ug mitugyan sa iyang espiritu.” Hinunoa, ang italisadong tudling-pulong dili makita sa tanang karaang mga manuskrito sa Bibliya. Gituohan sa daghang awtoridad nga kini gidugang lang gikan sa Ebanghelyo ni Juan apan sayop ang pagkabutang. Busa, diha sa daghang hubad, kining maong tudling-pulong gipalain pinaagi sa pagbutang niini sulod sa mga braket o parentesis, pagpatin-aw niini pinaagig potnot, o pagtangtang na lang sa maong tudling-pulong.

Ang edisyon sa Gregong teksto sa Bag-ong Testamento ni Westcott ug Hort, nga subsob gigamit ingong basehanan alang sa Bag-ong Kalibotang Hubad, nagbutang niining maong tudling-pulong sulod sa dobleng mga braket. Ang maong edisyon adunay nota nga nag-ingon nga ang maong tudling-pulong “lagmit gayod nga gidugang sa mga eskriba.”

Busa dako ang ebidensiya nga tinuod ang giingon sa Juan 19:33, 34 ug nga si Jesus patay na sa dihang gidughang siya ug bangkaw sa Romanong sundalo.

[Kahon/Hulagway sa panid 8]

ANG GAHOM SA PULONG SA DIYOS

Ingong usa ka tin-edyer nga naggikan sa nabungkag nga pamilya, si Detlef nalangkit sa droga, alkohol, ug musikang heavy metal.b Nahimo siyang membro sa usa ka gang sa mga batan-on nga nailhang skinhead, ug wala madugay gidakop siya sa mga polis tungod sa iyang mapintas nga panggawi.

Niadtong 1992, 60 ka skinhead ang nalangkit sa grabeng sambunot batok sa mga 35 ka punk didto sa usa ka kan-anan ug imnanan sa amihanan-sidlakan nga bahin sa Alemanya. Usa sa mga punk, si Thomas, gikulata pag-ayo mao nga namatay siya tungod sa iyang naangkong mga bun-og sa lawas. Daghang lider sa gang, lakip si Detlef, gisentensiyahan nga mabilanggo human sa usa ka paghusay nga kaylap nga gisibya sa mga tigbalita.

Wala madugay human si Detlef nakagawas sa bilanggoan, nakadawat siyag usa ka pulyeto gikan sa mga Saksi ni Jehova. Ang pulyeto nag-ulohang “Nganong Puno Kaayog Suliran ang Kinabuhi?” Nasabtan dayon ni Detlef nga tinuod ang giingon niini, ug misugod siya pagtuon sa Bibliya uban sa mga Saksi. Kini bug-os nga nakausab sa iyang estilo sa kinabuhi. Sukad sa 1996, siya usa na ka masibotong Saksi ni Jehova.

Si Siegfried, usa ka punk kanhi, maoy suod nga higala ni Thomas, ang batan-ong lalaki nga namatay; siya usab nahimong Saksi sa ulahi ug usa na karon ka ansiyano sa kongregasyon. Sa dihang si Siegfried miadto sa kongregasyon ni Detlef aron sa paghatag ug pakigpulong sa Bibliya (ang inahan usab diay ni Thomas magtambongan usahay sa mga tigom dinhi), gidapit siya ni Detlef alang sa paniudto. Mga napulo ka tuig kanhi, ang ilang pagdumot lisod untang kontrolahon. Karon, dayag kaayo ang ilang inigsoong gugma.

Si Detlef ug Siegfried parehong naglaom sa pag-abiabi kang Thomas inigkabanhaw niya sa usa ka yutan-ong paraiso. Matod ni Detlef: “Makahilak ako kon mahunahunaan nako kini. Nagbasol gayod ako sa akong gihimo kaniadto.” Gusto nilang duha nga tabangan unya si Thomas, maingon nga ilang ginatabangan karon ang uban nga makaila kang Jehova ug magmaya diha sa paglaom nga gihatag sa Bibliya.

Walay duhaduha nga ang Pulong sa Diyos gamhanan gayod!

[Footnote]

[Hulagway sa panid 6]

Kahibulongan ang pagkalalang sa lawas sa tawo

[Credit Line]

Anatomy Improved and Illustrated, London, 1723, Bernardino Genga