SI JOSE SA ARIMATEA Nagmaisogon

WALA maghunahuna si Jose sa Arimatea nga makabaton siyag kaisog sa pag-atubang sa Romanong gobernador. Si Poncio Pilato nailhan ingong gahian. Apan aron mahatagan si Jesus ug desenteng lubong, kinahanglang dunay moatubang kang Pilato aron makuha ang patayng lawas. Hinunoa, dihang miatubang na si Jose kang Pilato, wala ra siya maglisod. Dihang naseguro ni Pilato gikan sa opisyal sa kasundalohan nga patay na si Jesus, iyang giaprobahan ang hangyo ni Jose. Busa, bisag guol pa kaayo si Jose, siya nagdalig adto sa dapit diin gipatay si Jesus.​—Mar. 15:42-45.

• Kinsa si Jose sa Arimatea?

• Unsay iyang koneksiyon kang Jesus?

• Nganong angay kang mainteres sa iyang sugilanon?

Ang inspiradong Ebanghelyo ni Marcos nagtawag kang Jose ingong “tinamod nga membro sa Konseho.” Niini nga kahimtang, ang Konseho seguradong nagtumong sa Sanhedrin, ang korte suprema sa mga Hudiyo nga may gahom ibabaw sa komunidad, gobyerno, ug relihiyon. (Mar. 15:1, 43) Busa, usa si Jose sa mga lider sa iyang katawhan, nga maoy hinungdan nga nahikay dayon niya nga makigkita sa Romanong gobernador. Seguradong dato usab si Jose.​—Mat. 27:57.

Ingong grupo, ang Sanhedrin supak kang Jesus. Ang mga membro niini nagkunsabo aron ipapatay siya. Apan si Jose gitawag nga “maayo ug matarong.” (Luc. 23:50) Dili sama sa kadaghanan sa iyang kaubanan sa Sanhedrin, siya matinud-anon, may prinsipyo, ug naningkamot sa pagtuman sa mga sugo sa Diyos. Siya “nagpaabot usab sa gingharian sa Diyos,” nga tingali maoy hinungdan nga nahimo siyang tinun-an ni Jesus. (Mar. 15:43; Mat. 27:57) Lagmit, nadani siya sa mensahe ni Jesus tungod kay importante kaniya ang kamatuoran ug hustisya.

Ang Juan 19:38 nag-ingon nga si Jose “usa ka tinun-an ni Jesus apan sa tago tungod sa iyang kahadlok sa mga Hudiyo.” Unsa may iyang gikahadlokan? Nahibalo siya nga gitamay sa mga Hudiyo si Jesus ug palagpoton nila sa sinagoga ang si bisan kinsa nga magpailang nagtuo kang Jesus. (Juan 7:45-49; 9:22) Kon ang usa palagpoton gikan sa sinagoga, siya tamayon ug isalikway sa mga isigka-Hudiyo. Busa si Jose nagduhaduha sa pagpaila sa publiko nga siya nagtuo kang Jesus. Kon buhaton niya kana, mahimong mawala ang iyang posisyon ug pagkainila.

Dili lang si Jose ang mibatig ingon niana. Sumala sa Juan 12:42, “daghan bisan gani sa mga magmamando ang nagbutang usab ug pagtuo [kang Jesus], apan tungod sa mga Pariseo wala nila ipahayag siya, aron sila dili mapalagpot gikan sa sinagoga.” Ingon niana ang kahimtang ni Nicodemo, nga membro usab sa Sanhedrin.​—Juan 3:1-10; 7:50-52.

Hinunoa, si Jose usa ka tinun-an, pero wala lang siyay kaisog sa pagpahayag niana. Seryoso kanang butanga, ilabina maylabot sa giingon ni Jesus: “Ang matag usa nga magasugid . . . kanako atubangan sa mga tawo, ako usab magasugid nga nahiusa kaniya atubangan sa akong Amahan nga anaa sa mga langit; apan si bisan kinsa nga dili moangkon kanako atubangan sa mga tawo, ako usab dili moangkon kaniya atubangan sa akong Amahan nga anaa sa mga langit.” (Mat. 10:32, 33) Aw, wala man ilimod ni Jose si Jesus, pero wala pod siyay kaisog sa pagpahayag sa iyang pagtuo kang Jesus. Ingon ka ba usab niana?

Apan may maayong nahimo si Jose. Ang Bibliya nag-ingon nga wala niya paluyohi ang plano sa Sanhedrin sa pagpapatay kang Jesus. (Luc. 23:51) Tingali, sumala sa giingon sa pipila, si Jose wala motambong sa husay ni Jesus. Bisan unsa pa man, wala gayod malipay si Jose nianang grabeng inhustisya. Galing lang, wala siyay mahimo!

Dihang patay na si Jesus, dayag nga nabuntog ni Jose ang iyang kahadlok, ug nakadesisyon siya nga paluyohan ang mga sumusunod ni Jesus. Gipaila kana sa giingon sa Marcos 15:43: “Siya nagbatog kaisog sa pag-adto sa atubangan ni Pilato ug gipangayo ang lawas ni Jesus.”

Dayag nga presente si Jose dihang namatay si Jesus. Gani, mas una siyang nahibalo sa kamatayon ni Jesus kay kang Pilato. Busa dihang gipangayo ni Jose ang lawas ni Jesus, ang gobernador nagduhaduha kon patay na ba gyod kini. (Mar. 15:44) Kon nakita ni Jose ang pag-antos ni Jesus diha sa estaka, ang mao kahang makapasubong hitabo maoy nakapalihok niya sa pagsusi sa iyang konsensiya ug sa pagdesisyon nga kinahanglan siyang mobarog dapig sa kamatuoran? Posible. Dayag nga napalihok si Jose. Dili na gyod siya tinun-an sa tago.

Sumala sa balaod sa mga Hudiyo, kadtong sentensiyahag kamatayon kinahanglang ilubong sa dili pa mosalop ang adlaw. (Deut. 21:22, 23) Apan sa mga Romano, ang lawas sa gipatayng mga kriminal pasagdan lang nga madugta diha sa estaka o iitsa ngadto sa labayanag patay. Pero, dili nâ maoy gihunahuna ni Jose para kang Jesus. Duol sa dapit diin gipatay si Jesus, si Jose may bag-ong lubnganan nga sinilsil sa bato. Wala pa ni magamit. Busa, nagpakita kana nga si Jose bag-o lang mibalhin sa Jerusalem gikan sa Arimateaa ug plano niyang gamiton unya kini ingong lubnganan sa iyang pamilya. (Luc. 23:53; Juan 19:41) Ang paglubong kang Jesus diha sa lubnganang gipanag-iya ni Jose nagpakita sa pagkamahinatagon ni Jose ug nagtuman sa tagna nga ang Mesiyas ilubong “uban sa mga dato.”​—Isa. 53:5, 8, 9.

Ang upat ka Ebanghelyo parehong nagrekord nga human kuhaa ang lawas ni Jesus gikan sa estaka, kini giliminan o gibugkosan ni Jose ug pino nga lino ug gipahiluna sa iyang lubnganan. (Mat. 27:59-61; Mar. 15:46, 47; Luc. 23:53, 55; Juan 19:38-40) Ang tawong gihisgotan nga mitabang kang Jose mao lang si Nicodemo, kinsa nagdalag humot nga mga yerba para sa paglubong. Kay inila silang duha, lagmit nagsugo silag mga sulugoon sa pag-alsa ug paglubong kang Jesus. Bisan pa niana, dili gamayng butang ang ilang gihimo. Si bisan kinsa nga makahikap ug patayng lawas mahimong hugaw sulod sa pito ka adlaw, hasta ang tanang butang nga ilang mahikapan. (Num. 19:11; Hag. 2:13) Tungod niana, sila kinahanglang magpalayo sa uban panahon sa Paskuwa ug dili makasaulog niana. (Num. 9:6) Posible sab nga tamayon si Jose sa iyang kaubanan. Pero niining tungora, andam siyang modawat sa resulta sa paghatag kang Jesus ug desenteng lubong ug magpaila sa iyang kaugalingon ingong tinun-an ni Kristo.

Human sa asoy sa mga Ebanghelyo bahin sa paglubong kang Jesus, ang Bibliya wala na maghisgot kang Jose sa Arimatea. Busa, motungha ang pangutana: Unsa na may nahitabo kaniya? Ang tinuod, wala ta mahibalo. Apan base sa atong nahisgotan, dako ang posibilidad nga nagpaila siya ingong Kristohanon. Kon buot hunahunaon, niining panahon sa pagsulay ug kalisdanan, mas milig-on ang iyang pagtuo ug nahimo siyang mas maisogon. Maayo nâ nga timailhan.

Maylabot niini nga sugilanon, motungha ang pangutana nga angayng palandongon natong tanan: Duna bay bisan unsa​—posisyon, karera, kabtangan, pamilya, o bisan atong kagawasan—​nga gihatagan natog labawng importansiya kay sa atong relasyon kang Jehova?