ASIN
Ang puting kristal nga kombinasyon sa duha ka elemento nga gitawag ug sodium chloride (NaCl), nga nailhan ingong komon nga asin. Adunay daghan kaayong deposito sa batong asin sa ilalom sa yuta, mga ginatos ka metro ang gibag-on. Ang kadagatan sa kalibotan adunay mga 3.5 porsiyento nga asin, nga ang kadaghanan maoy sodium chloride. Kini daw gamay ra kaayo, apan ang usa ka kilometro kubiko nga dagat adunay duolan sa 27 milyones ka metriko tonelada nga asin. Ang Patayng Dagat (Dagat sa Asin) sa Palestina maoy mga siyam ka pilo ang kaparat. (Gen 14:3) Ang asin dali rang mabatonan sa mga Israelinhon. Ang pagpauga ug dagat gikan sa katubigan sa Patayng Dagat naghatag ug daghang suplay, apan dili-maayog kalidad. Adunay mga kabungtoran nga may mga asin duol sa habagatang tumoy sa Patayng Dagat, dili layo sa dapit diin ang asawa ni Lot nahimong haliging asin. (Gen 19:26; Sof 2:9) Sa usa ka bahin, ang mga suplay sa amihanang Palestina lagmit naggikan sa mga Fenicianhon, kinsa gikaingon nga nakabaton niini pinaagi sa pagpauga ug tubig sa dagat gikan sa Mediteranyo.
Bisan tuod halos dili mahurot ang suplay niini, ang asin dili kanunayng daling mabatonan sa tawo. Ang mga gubat ug mga rebolusyon gisangka tungod niini. Sa karaang Tsina ang bili sa asin maoy ikaduha sa bulawan. Ang mga asawa ug mga anak gibaligya sa pagkaulipon tungod lang sa asin. Ang mga sundalo ni Cesar nakadawat ug salapi aron ipalit ug asin, ang katibuk-ang kantidad niini gitawag ug salarium, nga niini naggikan ang Iningles nga pulong nga “salary” (“suweldo” sa Cebuano).—Itandi ang Esd 4:14.
Gihisgotan sa Bibliya ang asin ingong hinungdanong bahin sa pagkaon sa tawo, ingong panimpla alang sa pagkaon. (Job 6:6) Ilalom sa Moisesnong Balaod ang bisan unsang butang nga ihalad sa ibabaw sa halaran ngadto kang Jehova kinahanglang timplahan ug asin, dili tungod sa lami, apan tungod gayod kay ang asin naghawas sa pagkadili-madunot o pagkadili-madaot. (Lev 2:11, 13; Eze 43:24) Ang daghang asin dayag nga gipondo sa mga tugkaran sa templo alang niini nga katuyoan. Gitino ni Esdras nga kinahanglang adunay daghang asin nga magamit alang sa mga halad. (Esd 6:9; 7:21, 22) Gikataho nga si Antiochus III (mga 198 W.K.P.) naghatag ug 375 ka medimni (mga 20 kl) nga asin aron magamit alang sa templo.
Ang asin nailhan nga makaayo, tambal, ug pangontra sa kagaw o antiseptiko. Ang bag-ong natawo nga mga bata usahay hilogan ug asin sa dihang mahimugso. (Eze 16:4) Sa limitadong gidaghanon, ang asin mapuslanon sa pipila ka yuta nga may asido o kon kini isagol sa abono, apan kon tugotan nga magpondo diha sa yuta, patyon niini ang mga pananom ug ang yuta mahimong umaw ug dili mabungahon, sama sa kanhi tabunok nga Walog sa Euprates. Ang usa ka siyudad nga gihukman sa bug-os nga kalaglagan usahay pagasabwagan ug asin, ug kini nga buhat nagpakita sa tinguha nga ang dapit mahimong umaw ug dili mabungahon hangtod sa hangtod.—Deu 29:22, 23; Huk 9:45; Job 39:5, 6; Jer 17:6.
Mahulagwayong Paggamit. Ang asin sagad gigamit sa mahulagwayong paagi diha sa Bibliya. Gisultihan ni Jesus ang iyang mga tinun-an: “Kamo ang asin sa yuta,” usa ka nagapreserbar nga impluwensiya sa uban, nga nagpanalipod sa espirituwal nga pagkatata ug pagkadunot sa moral. Ang maayong balita nga ilang gidala makapreserbar ug kinabuhi. Hinunoa, siya miingon kanila: “Apan kon ang asin mawad-an sa lami niini, unsaon man pagpasig-uli sa kaparat niini? Dili na kini magamit alang sa bisan unsa kondili igasalibay sa gawas nga pagayatakan sa mga tawo.” (Mat 5:13; Mar 9:50; Luc 14:34, 35) Ang usa ka komentarista sa Bibliya nagkomento bahin sa Mateo 5:13: “Ang asin nga gigamit niini nga nasod [Tinipong Bansa] maoy usa ka kemikal nga kombinasyon sa mga elemento—sodium chloride—ug kon ang kaparat mawala, o kon kini mawad-an sa sabor niini, kini dili na mapuslan pa. Kini mahimong kinaiyanhong substansiya na lamang. Apan sa kanasoran sa sidlakan, ang asin nga gigamit dili puro, may sagol nga mga utanon ug ubang mga substansiya gikan sa yuta; busa mahimong mawala ang kaparat niini, ug ang mahibilin mao na lamang ang mga substansiya nga gikan sa yuta. Kini walay kapuslanan gawas kon kini gamiton, sumala sa gituohan, aron ibutang sa mga agianan o mga suroyanan sama sa atong paggamit sa graba. Kini nga matang sa asin komon gihapon nianang yutaa. Lut-odlut-od kini nga makaplagan diha sa yuta, ug kon mainitan ug maulanan, mawad-an sa kaparat niini.”—Barnes’ Notes on the New Testament, 1974.
Tungod kay ang asin pangontra aron dili madunot ang usa ka butang, kini nahimong simbolo sa kalig-on ug kapermanente. Sagad sa dihang ang mga pakigsaad himoon, ang mga hingtungdan magduyog ug pangaon—mag-uban sa pagkaon ug asin—nga nagsimbolo sa dumalayong pagkamaunongon ug pagkamatinumanon sa usag usa diha sa relasyon sa pakigsaad. Busa ang “usa ka pakigsaad sa asin” giisip nga angay gayod nga pagatumanon. (Num 18:19) Sa ingon, ang gipamulong ni Haring Abias sa Juda nga si Jehova naghimo ug “usa ka pakigsaad sa asin” uban kang David ug sa iyang mga anak nagkahulogan nga ang pakigsaad uban sa kaliwatan ni David alang sa pagkahari magpadayon hangtod sa walay kataposan. Si Jesu-Kristo nga “anak ni David” ug “ang gamot ni David” mao ang usa nga nagahupot sa Gingharian ug nagdumala sa mga kalihokan niini hangtod sa walay kataposan.—2Cr 13:4, 5; Sal 18:50; Mat 1:1; Pin 5:5; Isa 9:6, 7.
Si Jesus miingon: “Kay ang matag usa kinahanglang pagaasinan ug kalayo.” Ang konteksto dinhi nagtumong sa usa ka pag-asin pinaagig kalayo sa Gehenna alang niadtong tanang mapandol ngadto sa pagkinabuhi sa kasal-anan o niadtong maoy hinungdan sa pagkapandol sa uban.—Mar 9:42-49.
Migamit sa termino aron sa paghatag ug laing kahulogan, si Jesus miingon: “Pagbaton ug asin sa inyong kaugalingon, ug pagdinaitay kamo sa usag usa.” (Mar 9:50) Si apostol Pablo migamit niini sa susamang paagi, nga nag-ingon: “Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.” (Col 4:6) Ang panggawi ug sinultihan sa usa ka tawo kinahanglang maligdong kanunay, may konsiderasyon, maayo, ug may tinguha sa pagpreserbar sa kinabuhi sa uban.