Siya Gipaboran Kaayo ni Jehova

“MAAYONG ADLAW, usa nga pinaboran kaayo, si Jehova anaa uban kanimo.” Pagkamaayong pangomosta! Ang mamumulong walay lain kondili ang manulonda nga si Gabriel. Siya nakigsulti sa usa ka batan-ong babaye nga may mapaubsanong kasingkasing​—si Maria, ang anak nga babaye sa usa ka tawong ginganlan ug Heli. Ang tuig maoy 3 W.K.P., ug ang dapit mao ang siyudad sa Nasaret.​—Lucas 1:26-28.

Si Maria gisaad sa kaminyoon ngadto kang Jose nga panday. Sumala sa kasugoan ug batasan sa mga Hudiyo, siya gilantaw ingong iyang asawa. (Mateo 1:18) Sama kaniya, siya ordinaryo lamang ug kahimtang sa kinabuhi. Nan, nganong ang manulonda nangomosta kaniya ingong usa nga pinaboran kaayo?

Iyang Talagsaong Pribilehiyo

Si Gabriel midugang: “Ayawg kahadlok, Maria, kay ikaw nakakaplag ug pabor sa Diyos; ug, tan-awa! ikaw magasamkon sulod sa imong tagoangkan ug magpahimugsog anak nga lalaki, ug imong pagatawgon ang iyang ngalan nga Jesus. Kini siya mahimong bantogan ug pagatawgong Anak sa Labing Hataas; ug ihatag ni Jehova nga Diyos kaniya ang trono ni David nga iyang amahan, ug siya magamando ingong hari ibabaw sa balay ni Jacob hangtod sa hangtod, ug walay pagkatapos ang iyang gingharian.”​—Lucas 1:29-33.

Nahibulong ug naglibog, si Maria nangutana: “Unsaon pagkahimo kini, nga wala man ako makigsiping sa usa ka lalaki?” Si Gabriel mitubag: “Kunsaran ka sa balaang espiritu, ug pagalandongan ikaw sa gahom sa Labing Hataas. Tungod nianang katarongana usab ang matawo pagatawgong balaan, Anak sa Diyos.” Aron mawala ang bisan unsang pagduhaduha, ang manulonda midugang: “Tan-awa! si Elisabet nga imong paryente, sa iyang katigulangon, nagsamkon usab mismo ug usa ka anak nga lalaki, ug mao karon ang ika-unom nga bulan alang kaniya, ang gitawag babayeng apuli; tungod kay sa Diyos walay kapahayagan nga maimposible.”​—Lucas 1:34-37.

Gidawat dihadiha ni Maria kining talagsaong pribilehiyo sa pag-alagad. Sa kaandam, apan sa kamapaubsanon, siya mitubag: “Tan-awa! Ang ulipong babaye ni Jehova! Matuman unta kanako kana sumala sa imong pagpahayag.” Niana, si Gabriel mibiya. Si Maria midalidali sa pag-adto sa siyudad sa bukirong rehiyon sa Juda. Sa pag-abot sa balay sa saserdote nga si Zacarias ug sa iyang asawa, si Elisabet, iyang nakita ang mga kahimtang nga ingon gayod sa gihubit sa manulonda kanila. Pagkadako sa kalipay ang gibati ni Maria! Ang iyang mga ngabil nagpatugob sa mga pulong sa pagdayeg kang Jehova.​—Lucas 1:38-55.

Siya Nahimong Asawa ni Jose

Usa ka ulay maoy magtagana sa tawhanong lawas ni Jesus, kay ang maong pagkahimugso gitagna. (Isaias 7:14; Mateo 1:22, 23) Apan nganong ang usa ka sinayoran nga ulay ang gikinahanglan? Aron adunay amaama nga makapasa ngadto sa bata sa legal nga katungod sa trono ni Haring David. Sakop si Jose ug Maria sa tribo ni Juda ug mga kaliwat ni Haring David. Busa ang mga katungod sa pagkamanunonod ni Jesus dugang nga nalig-on. (Mateo 1:2-16; Lucas 3:23-33) Tungod niini ang manulonda sa ulahi nagpasalig kang Jose nga dili siya angay magpanuko sa pagkuha kang Maria ingong iyang legal nga asawa, bisan pag siya mabdos.​—Mateo 1:19-25.a

Ang balaod sa pagpamuhis nga gipagawas ni Agusto Cesar nag-obligar kang Jose ug Maria sa pagparehistro sa Betlehem. Samtang atua didto, siya nanganak sa iyang panganay nga anak nga lalaki. Ang mga magbalantay sa hayop miadto sa pagtan-aw sa bata, ug sila naghatag ug pagdayeg ngadto sa iyang Amahan, si Jehova. Human sa 40 ka adlaw nga pagpaputli sumala sa Kasugoan ni Moises, si Maria miadto sa templo sa Jerusalem sa paghimog halad sa pagtabon sa iyang mga sala. (Levitico 12:1-8; Lucas 2:22-24) Oo, sanglit siya gipanamkon nga makasasala, ug busa wala mapahigawas gikan sa tunglo sa sala, ang iyang napanunod nga pagkadili-hingpit kinahanglang tabonan sa mga halad nga nagatabon sa sala.​—Salmo 51:5.

Samtang si Maria ug Jose didto sa templo, ang tigulang nga si Simeon ug ang tigulang nga manalagnang si Ana nakabatog pribilehiyo sa pagkakita sa Anak sa Diyos. Si Maria dili mao ang sentro sa pagtagad. (Lucas 2:25-38) Sa ulahi, ang mga Mago miyukbo dili ngadto kaniya kondili ngadto kang Jesus.​—Mateo 2:1-12.

Human nga mikalagiw ngadto sa Ehipto ug nagpabilin didto hangtod namatay ang daotang Herodes, ang mga ginikanan ni Jesus namauli ug mipuyo sa gamayng balangay sa Nasaret. (Mateo 2:13-23; Lucas 2:39) Didto gipadako ni Jose ug Maria si Jesus ubos sa diyosnong mga kahimtang sa pamilya.

Si Maria Adunay Ubang mga Anak

Sa paglabay sa panahon, gihatagan ni Maria ug Jose si Jesus ug igsoong mga lalaki ug mga babaye sa unod. Sa dihang ang ministeryo ni Jesus nagdala kaniya ngadto sa iyang pinuy-anang lungsod sa Nasaret, ang iyang mga kaila sa bata pa nakaila kaniya. “Dili ba mao man kini ang anak sa panday?” sila nangutana. “Dili ba ang iyang inahan ginganlag Maria, ug ang iyang mga igsoong lalaki si Santiago ug Jose ug Simon ug Judas? Ug ang iyang mga igsoong babaye, dili ba silang tanan uban man kanato?” (Mateo 13:55, 56) Ang mga taga-Nasaret nagpunting sa pisikal nga banay ni Jose ug Maria, lakip sa iyang mga anak nga lalaki ug babaye nga nakaila nila ingong mga igsoong lalaki ug babaye ni Jesus sa unod.

Kini nga mga igsoong lalaki ug babaye dili mga ig-agaw ni Jesus. Ni iya silang mga tinun-an, o espirituwal nga mga igsoong lalaki ug babaye, kay ang Juan 2:12 naghimog tin-aw nga kalainan tali sa duha ka grupo pinaagi sa pag-ingon: “Siya [Jesus] ug ang iyang inahan ug mga igsoon ug ang iyang mga tinun-an nanglugsong ngadto sa Capernaum.” Sa milabay ang daghang tuig sa Jerusalem, nakita ni apostol Pablo si Cephas, o Pedro, ug midugang: “Ako walay nakitang ubang mga apostol; ang nakita ko lang mao si Santiago, ang igsoong lalaki sa Ginoo.” (Galacia 1:19, The Jerusalem Bible) Dugang pa, ang pamulong nga si Jose “wala makigsiping [kang Maria] hangtod nga napahimugso niya ang usa ka anak nga lalaki” nagpaila nga ang amaama ni Jesus nakigrelasyon kaniya human niana ug nahimong amahan sa iyang ubang mga anak. (Mateo 1:25) Busa, ang Lucas 2:7 nagtawag kang Jesus nga iyang “panganay” nga anak nga lalaki.

Usa ka Mahinadlokon-sa-Diyos nga Inahan

Ingong usa ka mahinadlokon-sa-Diyos nga inahan, si Maria nakigkooperar kang Jose sa pagtudlo sa iyang mga anak sa pagkamatarong. (Proverbio 22:6) Nga siya usa ka masibotong estudyante sa Kasulatan makita gikan sa iyang tugob sa espirituwal nga ekspresyon sa dihang nangomosta kang Elisabet. Niadtong panahona gisubli sa inahan ni Jesus ang mga hunahuna sa awit ni Ana ug nagpakita sa kahibalo sa mga salmo, sa makasaysayanhon ug matagnaong mga sinulat, ug sa mga basahon ni Moises. (Genesis 30:13; 1 Samuel 2:1-10; Proverbio 31:28; Malakias 3:12; Lucas 1:46-55) Gisag-ulo ni Maria ang matagnaong mga hitabo ug mga panultihon, nagtipig niini diha sa iyang kasingkasing, ug namalandong niini diha sa iyang hunahuna. Busa siya nasangkapan ug maayo sa pagpaambit sa paghatag ug instruksiyon isip ginikanan ngadto sa bayong nga si Jesus.​—Lucas 2:19, 33.

Ang maayong-pagkatudlong 12-anyos nga si Jesus nagpakitag kahibalo sa Kasulatan nga nakapahingangha sa makinaadmanong mga tawo sa templo. Tungod kay siya nabulag gikan sa iyang mga ginikanan sa maong panahon sa Paskuwa, ang iyang inahan miingon: “Anak, nganong giingon mo man kami niini? Ania ang imong amahan ug ako nabalisa sa pagpangita kanimo.” Si Jesus mitubag: “Nganong gipangita pa man ninyo ako? Wala ba kamo mahibalo nga ako kinahanglang maania sa balay sa akong Amahan?” Sanglit wala makasabot sa kahulogan niini nga tubag, gitipigan kini ni Maria diha sa iyang kasingkasing. Sa pagpauli sa Nasaret, si Jesus “padayong nagauswag sa kaalam ug sa lawasnong pagtubo ug sa pabor sa Diyos ug sa mga tawo.”​—Lucas 2:42-52.

Si Maria Ingong Tinun-an ni Jesus

Pagkahaom gayod nga si Maria angay mahimong debotadong tinun-an ni Jesus sa ulahi! Siya maaghop ug walay ambisyon nga mahimong prominente bisan pa sa iyang talagsaong hinatag-sa-Diyos nga buluhaton. Si Maria nahibalo sa mga Kasulatan. Kon susihon nimo kini sa imong kaugalingon, dili ka makakaplag kaniya nga gihubit nga may korona, nga naglingkod diha sa trono ingong “inahan-nga-hara” ug puno sa nabanaag nga himaya ni Kristo. Hinunoa, imong makita siya nga nagpaluyo lamang, wala sa sentro.​—Mateo 13:53-56; Juan 2:12.

Gisanta ni Jesus ang mga butang sama sa pagsimba kang Maria taliwala sa iyang mga tinun-an. Samtang siya namulong diha sa usa ka okasyon, “usa ka babaye taliwala sa panon mipatugbaw, ‘Bulahan ang tagoangkan nga nagdala kanimo ug ang mga suso nga imong gisusohan!’ ‘Hinunoa,’ siya mitubag, ‘bulahan kadtong nagapatalinghog sa pulong sa Diyos ug nagasunod niini.’” (Lucas 11:27, 28, The New American Bible, gihubad sa mga membro sa Catholic Biblical Association of America) Diha sa usa ka salosalo sa kasal, gisultihan ni Jesus si Maria: “Unsay labot ko kanimo, babaye? Wala pa moabot ang akong takna.” (Juan 2:4) Ang ubang hubad mabasa: “Itugyan ang butang sa akong mga kamot.” (Weymouth) “Ayaw ako ug tudloi.” (An American Translation) Oo, gitahod ni Jesus ang iyang inahan, apan wala niya bayawa siya.

Dumalayong mga Pribilehiyo

Pagkadako sa pribilehiyo ang gitagamtam ni Maria! Siya nanganak kang Jesus. Unya gimatuto niya isip inahan ug gibansay ang bata. Sa kataposan, siya nagpakita ug pagtuo, nahimong tinun-an ni Kristo ug espirituwal nga igsoong babaye. Sa atong kataposang pagtan-aw kang Maria diha sa Kasulatan, makita nato siya sa itaas nga lawak sa Jerusalem. Atua siya didto uban sa mga apostol ni Jesus, sa iyang ubang mga anak nga lalaki, ug pipila ka matinumanong mga babaye​—ang tanan mga magsisimba ni Jehova.​—Buhat 1:13, 14.

Sa ulahi, si Maria namatay ug ang iyang lawas mibalik sa abog. Sama sa ubang unang dinihogang mga sumusunod sa iyang minahal nga anak, siya natulog diha sa kamatayon hangtod sa gitakda nga panahon sa Diyos sa pagbanhaw kaniya ingong espirituhanong linalang nga may dili-mamatay nga kinabuhi sa langit. (1 Corinto 15:44, 50; 2 Timoteo 4:8) Pagkadako gayod sa kalipay karon niining “usa nga pinaboran kaayo” diha sa presensiya ni Jehova nga Diyos ug ni Jesu-Kristo!

[Footnote]

[Hulagway sa panid 31]

Si Maria pinaboran kaayo ingong inahan ni Jesus