‘Adtoa ang mga Tawo ug Tudloi Sila Aron Mahimong Akong mga Tinun-an’

1-3. (a) Unsay buhaton sa usa ka mag-uuma sa dihang daghan kaayo ang abot nga dili niya kana maani nga mag-inusara? (b) Unsang suliran ang giatubang ni Jesus sa tingpamulak sa 33 C.E., ug giunsa niya pagsulbad kana?

ANG usa ka mag-uuma nag-atubang ug dakong suliran. Pipila ka bulang miagi, iyang gidaro ang iyang uma ug kana iyang gipugsan ug mga binhi. Gibantayan niya pag-ayo ang pagtungha sa unang mga dahon, ug nalipay siya sa kusog nga pagtubo sa mga tanom. Niadtong panahona ang tanan niyang paghago gibaslan na, kay midangat na ang panahon sa pag-ani. Kini ang iyang suliran: Daghan kaayo ang abot nga dili niya kana maani nga mag-inusara. Aron masulbad ang maong suliran, siya maalamong midesisyon sa pagsuhol ug pipila ka mangangani ug paadtoon sila sa iyang uma. Sa pagkatinuod, limitado ra ang panahon sa pag-ani sa iyang bililhong abot.

² Sa tingpamulak sa 33 C.E., ang nabanhaw nang si Jesus miatubang ug susamang suliran. Panahon sa iyang pagministeryo sa yuta, nagpugas siyag mga binhi sa kamatuoran. Niadtong panahona may anihon na, ug ang abot daghan. Kinahanglang tigomon ang daghan nga misanong ingong mga tinun-an. (Juan 4:35-38) Giunsa pagsulbad ni Jesus kadtong sulirana? Sa usa ka bukid sa Galilea, una pa siya mosaka sa langit, iyang gihatag sa iyang mga tinun-an ang usa ka sugo sa pagpangitag mas daghang magbubuhat, nga nag-ingon: “Busa adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila . . . . Tudloi ninyo sila sa pagtuman sa tanan nakong gisugo kaninyo.”—Mateo 28:19, 20.

³ Ang maong sugo mao ang pangunang bahin sa pagkahimong matuod nga sumusunod sa Kristo. Nan, atong susihon ang tulo ka pangutana. Nganong gihatag ni Jesus ang sugo sa pagpangitag mas daghang magbubuhat? Sa unsang paagi iyang gibansay ang iyang mga tinun-an sa pagbuhat niana? Sa unsang paagi nalangkit kita sa maong sugo?

4, 5. Nganong dili mahuman ni Jesus ang buluhaton nga iyang gisugdan, ug kinsay magpadayon sa buluhaton sa iyang pagbalik sa langit?

⁴ Sa gisugdan ni Jesus ang iyang ministeryo niadtong 29 C.E., siya nahibalo nga iyang gisugdan ang usa ka buluhaton nga dili niya mahuman sa iyang kaugalingon. Sa iyang nahibilin nga mubong panahon sa yuta, gamay rang dapit ang iyang nakobrehan ug diyutay rang mga tawo ang iyang nasangyawan sa mensahe sa Gingharian. Tinuod, ang iya lang gisangyawan mao ang mga Hudiyo ug mga kinabig, ang “nawalang mga karnero sa nasod sa Israel.” (Mateo 15:24) Bisan pa niana, kadtong “nawalang mga karnero” natibulaag sa tibuok nasod sa Israel, usa ka teritoryo nga mikabat ug libolibong kilometro kuwadrado. Gawas pa, ang nahibiling bahin sa yuta kinahanglan gayong masangyawan sa maayong balita.—Mateo 13:38; 24:14.

⁵ Nahibalo si Jesus nga dako pa kaayong buluhaton ang mahibilin sa pagkamatay niya. Sa iyang 11 ka matinumanong mga apostoles, siya miingon: “Sa pagkatinuod sultihan ko kamo, siya nga magpakitag pagtuo kanako maghimo usab sa mga buhat nga akong ginahimo; ug himoon niya ang mga buhat nga labaw pa niini kay moadto na ko sa akong Amahan.” (Juan 14:12) Sanglit ang Anak mibalik man sa langit, ang iyang mga sumusunod—dili lang ang mga apostoles kondili ang tanang umaabot nga mga tinun-an usab—kinahanglang magpadayon sa buluhatong pagwali ug pagpanudlo. (Juan 17:20) Mapainubsanong giila ni Jesus nga ang ilang mga buhat mahimong “labaw pa” kay sa iyaha. Sa unsang paagi? Sa tulo ka paagi.

6, 7. (a) Sa unsang mga paagi ang mga buluhaton nga himoon sa mga sumusunod ni Jesus labaw pa kay sa iyaha? (b) Sa unsang paagi ikapakita nato nga si Jesus wala masayop sa pagsalig sa iyang mga sumusunod?

⁶ Una, ang mga sumusunod ni Jesus makakobreg mas dakong teritoryo. Ang ilang pagsangyaw karon nakaabot na sa kinatumyan sa yuta, nga lapas kaayo sa mga utlanan sa yuta diin nagwali si Jesus. Ikaduha, ilang masangyawan ang mas daghang tawo. Ang gamayng pundok sa mga tinun-an nga gibiyaan ni Jesus daling miuswag hangtod mikabat kanag libolibo. (Buhat 2:41; 4:4) Milyonmilyon na ang ilang gidaghanon karon, ug ginatos ka libong bag-ohan ang ginabawtismohan kada tuig. Ikatulo, sila magsangyaw sa mas taas nga yugto sa panahon—hangtod gayod karon, duolag 2,000 ka tuig pagkatapos sa ministeryo ni Jesus nga tulo ka tuig ug tunga.

⁷ Nagpahayag si Jesus ug pagsalig sa iyang mga sumusunod sa dihang miingon siya nga ilang pagahimoon ang “mga buhat nga labaw pa niini.” Iyang gitugyan sa ilang mga kamot ang buluhaton nga labing hinungdanon alang kaniya, nga mao ang pagsangyaw ug pagtudlo bahin sa “maayong balita sa Gingharian sa Diyos.” (Lucas 4:43) Kombinsido siya nga matinumanon nilang tumanon ang asaynment. Unsay kahulogan niini alang kanato karon? Sa dihang atong buhaton ang ministeryo nga masiboton ug uban ang tibuok nga kasingkasing, atong gipakita nga si Jesus wala masayop sa pagsalig sa iyang mga sumusunod. Dili ba kini talagsaong pribilehiyo?—Lucas 13:24.

8, 9. Unsang panig-ingnan sa ministeryo ang gihatag ni Jesus, ug sa unsang paagi makasunod kita sa iyang panig-ingnan diha sa atong ministeryo?

⁸ Gihatag ni Jesus sa iyang mga tinun-an ang labing maayong pagbansay sa ministeryo. Labaw sa tanan, iyang gihatag kanila ang usa ka hingpit nga panig-ingnan. (Lucas 6:40) Sa miaging kapitulo, atong gihisgotan ang iyang tinamdan bahin sa ministeryo. Tagda makadiyot ang mga tinun-an nga miuban kang Jesus sa iyang mga panaw aron sa pagwali. Ilang napanid-an nga siya miwali bisan diin makaplagan ang mga tawo—sa daplin sa mga lanaw ug mga bakilid, sa mga siyudad ug mga merkado, ug sa pribadong mga balay. (Mateo 5:1, 2; Lucas 5:1-3; 8:1; 19:5, 6) Ilang nakita nga siya makugihon, nga misayo pagbangon ug nagwali hangtod sa gabii. Alang kaniya ang ministeryo dili lang pasatiempo! (Lucas 21:37, 38; Juan 5:17) Walay duhaduha nga ilang nasabtan nga siya gitukmod sa lalom nga gugma alang sa katawhan. Mahimong nakita nila sa iyang nawong ang banaag sa kahangawa nga iyang gibati sa iyang kasingkasing. (Marcos 6:34) Sa imong hunahuna, unsay epekto sa panig-ingnan ni Jesus sa iyang mga tinun-an? Sa unsang paagi ikaw maapektohan?

⁹ Ingong mga sumusunod sa Kristo, atong gisunod ang iyang panig-ingnan diha sa atong ministeryo. Busa, buhaton nato ang atong maarangan aron pahimuslan ang tanang higayon nga kita makahatag ug “bug-os nga pamatuod.” (Buhat 10:42) Sama kang Jesus, moduaw kita sa mga tawo diha sa ilang mga balay. (Buhat 5:42) Atong ipasibo ang atong eskedyul, kon gikinahanglan, aron makaduaw kita sa panahon nga sila lagmit anaa ra sa balay. Atong pangitaon usab ug sangyawan sa maalamong paagi ang mga tawo sa publikong mga dapit—sa kadalanan, mga parke, mga tindahan, ug sa dapit-trabahoan. Kita magpadayon sa ‘paghago ug pagpaningkamot pag-ayo’ diha sa ministeryo, kay giisip nato ang ministeryo ingon nga hinungdanong buluhaton. (1 Timoteo 4:10) Ang lalom, kinasingkasing nga gugma alang sa uban motukmod kanato sa pagpadayon pagpangitag mga kahigayonan sa pagwali bisan diin ug bisan kanus-a makaplagan ang mga tawo.—1 Tesalonica 2:8.

10-12. Unsang hinungdanong mga pagtulon-an ang gitudlo ni Jesus sa iyang mga tinun-an una sila sugoa sa pagwali?

¹⁰ Ang laing paagi sa pagbansay ni Jesus sa iyang mga tinun-an mao ang paghatag kanilag detalyadong mga instruksiyon. Una sugoa ang 12 ka apostoles ug dayon ang 70 ka tinun-an sa pagwali, gihimo ni Jesus ang samag mga sesyon sa pagbansay. (Mateo 10:1-15; Lucas 10:1-12) Maayog mga resulta ang maong pagbansay, kay ang Lucas 10:17 nagtaho: “Ang 70 malipayong namauli.” Atong hisgotan ang duha sa hinungdanong mga pagtulon-an nga gitudlo ni Jesus, nga hinumdoman nga ang iyang mga pulong angayng sabton sumala sa Hudiyohanong mga kostumbre sa kapanahonan sa Bibliya.

¹¹ Gitudloan ni Jesus ang iyang mga tinun-an nga mosalig kang Jehova. Iyang giingnan sila: “Ayaw pagdala ug bulawan o plata o tumbaga diha sa inyong mga bakos, o puntil sa pagkaon alang sa panaw, o duha ka besti, o mga sandalyas, o sungkod, kay ang mamumuo takos hatagag pagkaon.” (Mateo 10:9, 10) Batasan sa mga magpapanaw ang pagsul-ob ug bakos nga may bulsa alang sa kuwarta, pagdalag puntil sa pagkaon, ug ekstrang parisang sandalyas.a Pinaagi sa pagpahimangno sa iyang mga tinun-an nga dili mabalaka nianang mga butanga, si Jesus, sa pagkatinuod, nag-ingon: “Salig kamo sa bug-os kang Jehova, kay itagana niya ang inyong mga panginahanglan.” Motagana si Jehova kanila pinaagi sa pagdasig niadtong modawat sa maayong balita nga magmaabiabihon, nga maoy batasan kaniadto sa Israel.—Lucas 22:35.

¹² Gitudloan usab ni Jesus ang iyang mga tinun-an nga likayan ang di kinahanglanong mga kabaldahan. Siya miingon: “Ayaw mog hunong aron timbayaon si bisan kinsa nga inyong matagboan sa dalan.” (Lucas 10:4) Nagsulti ba si Jesus nga sila dili magmahigalaon ug dili magmatinagdanon? Wala gayod. Sa kapanahonan sa Bibliya, subsob nga ang pagtimbaya dili lang pagsultig yanong komosta ka. Ang batasan sa pagtimbaya naglakip sa nagkalainlaing mga pormalidad ug tagdugay nga pag-estoryahay. Usa ka eskolar sa Bibliya nag-ingon: “Ang pagtimbaya sa mga taga-Sidlakan dili sama sa atoa nga moduko o molamano, kondili sila kadaghan mogakos, moyukbo, ug mohapa pa gani. Kining tanan nagkinahanglag dakong panahon.” Sa pagpahimangno sa iyang mga tinun-an nga dili himoon ang nabatasang mga pagtimbaya, si Jesus, sa diwa nag-ingon: “Kinahanglang pahimuslan ninyo pag-ayo ang inyong panahon, kay dinalian ang mensahe nga inyong gidala.”b

13. Sa unsang mga paagi makapasundayag kita nga atong giisip nga seryoso ang mga instruksiyon nga gihatag ni Jesus sa iyang mga tinun-an sa unang siglo?

¹³ Angay natong isipong seryoso ang mga instruksiyon nga gihatag ni Jesus sa iyang mga tinun-an sa unang siglo. Sa pagtuman sa atong ministeryo, angay kitang mosalig sa bug-os kang Jehova. (Proverbio 3:5, 6) Nahibalo kita nga dili gayod kita makulangan sa mga kinahanglanon sa kinabuhi kon atong ‘unahon kanunay ang pagpangita sa Gingharian.’ (Mateo 6:33) Ang bug-os panahong mga magwawali sa Gingharian sa tibuok kalibotan makapamatuod nga bisan sa lisod nga kapanahonan, ang kamot ni Jehova dili gayod mubo. (Salmo 37:25) Nasabtan usab nato nga kinahanglang likayan ang mga kabaldahan. Kon dili kita magmabinantayon, kini nga sistema sa mga butang daling makapatipas kanato. (Lucas 21:34-36) Apan, karon dili maoy panahon nga kita malinga. Tungod kay nameligro ang mga kinabuhi, ang atong mensahe dinalian. (Roma 10:13-15) Kon atong isipon kanunay nga dinalian ang mensahe, dili nato itugot nga ang makapalinga nga mga butang niining kalibotana makahurot sa panahon ug kusog nga mas maayong gugolon unta sa ministeryo. Hinumdomi, mubo na ang nahibiling panahon ug daghan pa ang anihonon.—Mateo 9:37, 38.

14. Unsay nagpaila nga ang sugo nga natala sa Mateo 28:18-20 angayng tumanon sa tanang sumusunod sa Kristo? (Tan-awa usab ang footnote.)

¹⁴ Pinaagi sa mga pulong nga “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an,” ang nabanhaw nga si Jesus nagbutang ug bug-at nga responsibilidad sa iyang mga sumusunod. Ang mga tinun-an nga presente niadtong adlawa sa bukid sa Galilea dili lang mao ang iyang gihunahuna.c Ang buluhaton nga gisugo niyang ipabuhat naglangkit sa pag-abot sa “mga tawo sa tanang kanasoran,” ug kini nagpadayon “hangtod sa hinapos sa sistema sa mga butang.” Tin-aw, ang maong buluhaton angayng tumanon sa tanang sumusunod sa Kristo, lakip kanato karong adlawa. Atong susihon pag dugang ang mga pulong ni Jesus nga natala sa Mateo 28:18-20.

15. Nganong maalamon nga atong sugton ang sugo ni Jesus sa paghimog mga tinun-an?

¹⁵ Sa wala pa ihatag ang sugo, si Jesus nag-ingon: “Ang tanang awtoridad sa langit ug sa yuta gihatag na kanako.” (Bersikulo 18) Tinuod bang nabatonan ni Jesus ang maong dako kaayong awtoridad? Tinuod gayod! Siya mao ang arkanghel, nga nagmando sa napulo ka libo ka napulo ka libong anghel. (1 Tesalonica 4:16; Pinadayag 12:7) Ingong “ulo sa kongregasyon,” siya adunay awtoridad ibabaw sa iyang mga sumusunod sa yuta. (Efeso 5:23) Sukad sa 1914, siya nagmando na ingong Mesiyanikong Hari sa langit. (Pinadayag 11:15) Ang iyang awtoridad makaabot pa gani sa lubnganan, kay siya adunay gahom sa pagbanhaw sa mga patay. (Juan 5:26-28) Pinaagi sa pagpahayag una sa iyang dakong awtoridad, gipasabot ni Jesus nga ang mga pulong sa sunod nga mga bersikulo dili sugyot kondili sugo. Mahimo kitang maalamon kon atong sugton siya, kay ang iyang awtoridad dili kay pangangkon lang kondili hinatag sa Diyos.—1 Corinto 15:27.

16. Sa pagsulti kanato nga “adtoa ninyo,” unsay giawhag ni Jesus nga atong buhaton, ug sa unsang paagi tumanon nato kining bahina sa sugo?

¹⁶ Nianang higayona gilatid ni Jesus ang sugo, sa dihang siya miingon: “Adtoa ninyo.” (Bersikulo 19) Siya nag-awhag kanato nga maoy manguna aron ipaabot sa uban ang mensahe sa Gingharian. Sa pagtuman niining bahina sa sugo, makagamit kitag nagkadaiyang mga paagi. Ang pagsangyaw sa balay ug balay mao ang labing epektibong paagi aron makahimamat ug mga tawo. (Buhat 20:20) Makapangita usab kitag mga kahigayonan sa pagsangyaw sa impormal nga paagi; maikagon kitang mosugod ug kabildohay bahin sa maayong balita sa bisan diin kon nahiangay sa atong matag adlaw nga pagkinabuhi. Mahimong magkalain ang atong tinong mga paagi sa pagsangyaw, nga ipahiuyon sa mga panginahanglan ug mga kahimtang sa usa ka dapit. Hinuon, usa ka butang ang nagpabiling sama: Kita ‘mangadto’ ug mangitag mga tawong takos.—Mateo 10:11.

17. Sa unsang paagi kita ‘maghimog mga tinun-an’?

¹⁷ Dayon gipatin-aw ni Jesus ang tumong sa sugo, nga mao ang ‘paghimog tinun-an’ sa tanang kanasoran. (Bersikulo 19) Sa unsang paagi kita ‘maghimog mga tinun-an’? Sa panguna, ang usa ka tinun-an maoy tigkat-on, usa nga tinudloan. Apan, ang paghimog tinun-an dili lang pagpasag kahibalo ngadto sa uban. Sa dihang magtuon kita sa Bibliya uban sa mga interesado, ang atong tumong mao ang pagtabang kanila nga mahimong mga sumusunod sa Kristo. Kon mahimo, atong ipasiugda ang panig-ingnan ni Jesus aron ang atong gitun-an makakat-on sa pagsalig kaniya ingon nga ilang Magtutudlo ug Sulondan, nga magkinabuhi sama sa iyang pagkinabuhi ug magbuhat sa buluhaton nga iyang gibuhat.—Juan 13:15.

18. Nganong ang bawtismo mao ang labing hinungdanong hitabo sa kinabuhi sa usa ka tinun-an?

¹⁸ Ang usa ka hinungdanong bahin sa sugo gipahayag sa mga pulong: “Bawtismohi sila sa ngalan sa Amahan ug sa Anak ug sa balaang espiritu.” (Bersikulo 19) Ang bawtismo mao ang labing hinungdanong hitabo sa kinabuhi sa usa ka tinun-an, kay haom kining simbolo sa iyang tibuok kasingkasing nga pagpahinungod sa Diyos. Busa, kini kinahanglanon alang sa kaluwasan. (1 Pedro 3:21) Oo, pinaagi sa padayong paghimo sa iyang kinamaayohan diha sa pag-alagad kang Jehova, ang bawtismadong tinun-an makalaom sa walay kataposang mga panalangin sa umaabot nga bag-ong kalibotan. May natabangan ka na ba nga nahimong bawtismadong tinun-an sa Kristo? Diha sa Kristohanong ministeryo, wala nay laing mas dakong hinungdan sa pagkalipay kay niana.—3 Juan 4.

19. Unsay atong itudlo sa mga bag-ohan, ug nganong ang pagtudlo mahimong ipadayon human sa ilang bawtismo?

¹⁹ Gipatin-aw ni Jesus ang sunod nga bahin sa sugo, nga nag-ingon: “Tudloi ninyo sila sa pagtuman sa tanan nakong gisugo kaninyo.” (Bersikulo 20) Tudloan nato ang mga bag-ohan sa pagtuman sa mga sugo ni Jesus, apil ang mga sugo sa paghigugma sa Diyos, paghigugma sa isigkatawo, ug paghimog mga tinun-an. (Mateo 22:37-39) Atong tudloan sila sa mauswagong paagi sa pagpatin-aw sa mga kamatuoran sa Bibliya ug sa pagdepensa sa ilang nagkadako nga pagtuo. Sa dihang kuwalipikado na sila nga makigbahin sa publikong pagsangyaw, kuyogan nato sila, nga tudloan sila pinaagig pulong ug panig-ingnan kon unsaon pagpakig-ambit nga mapuslanon sa pagsangyaw. Ang pagtudlo sa bag-ong mga tinun-an dili matapos sa dihang sila mabawtismohan na. Ang bag-ong mga bawtismado mahimong nagkinahanglag dugang nga instruksiyon aron tabangan silang makasagubang sa mga suliran may kalangkitan sa pagsunod sa Kristo.—Lucas 9:23, 24.

20, 21. (a) Sa pagtuman sa sugo ni Jesus, nganong walay katarongan nga mahadlok kita? (b) Nganong karon dili panahon sa paghinayhinay, ug mahimong determinado kita sa pagbuhat sa unsang buluhaton?

²⁰ Ang kataposang mga pulong sa sugo ni Jesus mapasaligon kaayo: “Hinumdomi nga ako magauban kaninyo sa tanang adlaw hangtod sa hinapos sa sistema sa mga butang.” (Mateo 28:20) Giila ni Jesus nga kining buluhatona seryoso. Nahibalo usab siya nga ang pagtuman niana mopukaw usahay ug mabatokong mga reaksiyon gikan sa mga magsusupak. (Lucas 21:12) Hinuon, walay katarongan nga mahadlok kita. Ang atong Pangulo dili magdahom nga matuman nato ang maong buluhaton nga walay tabang o nag-inusara. Dili ba makalipay ang pagkahibalo nga ang Usa nga nakabaton sa “tanang awtoridad sa langit ug sa yuta” nagapaluyo kanato sa pagtuman sa maong sugo?

²¹ Gipasaligan ni Jesus ang iyang mga tinun-an nga siya magauban kanila sa ilang ministeryo sa tanang kasiglohan hangtod sa “hinapos sa sistema sa mga butang.” Kinahanglan padayon natong tumanon ang sugo ni Jesus hangtod moabot ang kataposan. Karon dili maoy panahon sa paghinayhinay. Nagpadayon ang dagayang espirituwal nga pagpangani! Ginatigom na ang daghan kaayong masanongong mga tawo. Ingon nga mga sumusunod sa Kristo, mahimong determinado kita sa pagtuman sa seryosong buluhaton nga gisalig kanato. Ihukom nato nga atong gamiton ang atong panahon, kusog, ug kahinguhaan sa pagtuman sa sugo sa Kristo: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an.”