Kinsay Nagasunod sa Kahayag sa Kalibotan?
“Kamo nagasidlak ingong mga kahayag diha sa kalibotan.”—FILIPOS 2:15.
1. Unsay giingon sa Bibliya mahitungod sa mini relihiyosong mga kahayag?
ANG Bibliya tin-awng nagpaila kang Jesus ingong “usa ka dakong kahayag,” “ang kahayag sa kalibotan.” (Isaias 9:2; Juan 8:12) Apan, diyutay ray misunod kaniya sa dinhi siya sa yuta. Gipalabi sa kadaghanan ang pagsunod sa mini nga mga kahayag nga, sa pagkamatuod, maoy mga tigdala sa kangitngit. Mahitungod kanila ang Pulong sa Diyos nag-ingon: “Ang maong mga tawo maoy mga apostoles nga mini, mga magbubuhat nga malimbongon, nga nagatakoban sa ilang kaugalingon nga mga apostoles ni Kristo. Ug dili katingalahan, kay si Satanas mismo nagatakoban nga usa ka manulonda sa kahayag. Busa dili talagsaon kon ang iyang mga ministro nagatakoban usab nga mga ministro sa pagkamatarong. Apan ang ilang dangatan maoy sibo unya sa ilang mga binuhatan.”—2 Corinto 11:13-15.
2. Unsay giingon ni Jesus nga mahimong pasikaranan sa paghukom sa katawhan?
2 Busa, dili ang tanang tawo buot ug kahayag, bisan pag kahibulongan kini. Si Jesus miingon: “Kini mao ang pasikaranan sa paghukom, nga ang kahayag miabot sa kalibotan apan ang mga tawo nahigugma sa kangitngit inay sa kahayag, kay daotan ang ilang mga binuhatan. Kay siya nga nagabatasan sa daotang mga butang nagdumot sa kahayag ug dili moduol sa kahayag, aron ang iyang mga binuhatan dili mabadlong.”—Juan 3:19, 20.
Mga Nahigugma sa Kangitngit
3, 4. Giunsa pagpakita sa relihiyosong mga pangulo sa adlaw ni Jesus nga dili nila buot mosunod sa kahayag?
3 Tagda kon sa unsang paagi tinuod kana sa dinhi si Jesus sa yuta. Ang Diyos mihatag ug gahom kang Jesus sa paghimog makapaukyab nga mga milagro ingong usa ka paagi sa pagpamatuod nga siya mao ang Mesiyas. Pananglitan, sa usa ka adlawng Igpapahulay, gipasig-uli niya ang panan-aw sa usa ka lalaki nga natawong buta. Pagkakahibulongan nga buhat sa kaluoy! Pagkamapasalamaton gayod sa lalaki! Siya nakakita sa unang panahon! Apan, unsa bay sanong sa mga relihiyosong pangulo? Ang Juan 9:16 miasoy: “Ang pipila sa mga Pariseo miingon [mahitungod kang Jesus]: ‘Kini siya dili usa ka tawong gikan sa Diyos, tungod kay siya wala magbantay sa Igpapahulay.’” Pagkadaotan ang ilang mga kasingkasing! Nahitabo ang usa ka kahibulongang pagpang-ayo, apan inay mopahayag ug kalipay alang sa kanhi buta nga lalaki ug magpasalamat sa tig-ayo, ila hinuong gitunglo si Jesus! Sa pagbuhat sa ingon, sa walay duhaduha sila nakasala batok sa pagpadayag sa balaang espiritu sa Diyos, nga maoy usa ka dili-mapasaylong sala.—Mateo 12:31, 32.
4 Sa ulahi, sa dihang gisukitsukit niadtong mga salingkapaw ang kanhing buta nga lalaki mahitungod kang Jesus, ang lalaki miingon: “Kahibulongan gayod kaayo kini, nga kamo wala masayod kon diin siya [Jesus] gikan, ug ngani gipabuka niya ang akong mga mata. Nahibalo kita nga ang Diyos dili mamati sa mga makasasala, apan kon ang usa ka tawo may kahadlok sa Diyos ug nagatuman sa iyang kabubut-on, siya magapamati kaniya. Sukad sa kakaraanan wala pa gayod igdungog nga may nakapabuka sa mga mata sa usang natawo nga buta. Kon kining tawhana [Jesus] dili gikan sa Diyos, wala gayod siyay arang mahimo.” Unsay tubag sa mga relihiyosong pangulo? “Ingong tubag sila miingon kaniya: ‘Ikaw sa tuman natawo sa mga sala, ug unya ikaw magatudlo kanamo?’ Ug siya ilang gipalagpot sa gawas!” Pagkakulang ug kaluoy! Matig-a ang ilang mga kasingkasing. Busa giingnan sila ni Jesus nga bisan tuod sila nakakita pinaagi sa ilang pisikal nga mga mata, sila buta sa espirituwal.—Juan 9:30-41.
5, 6. Unsay gibuhat sa relihiyosong mga pangulo sa unang siglo nga nagpakita nga sila nahigugma sa kangitngit?
5 Nga kadtong relihiyosong mga salingkapaw nagpakasala batok sa espiritu sa Diyos masabtan dayon sa laing higayon, sa dihang gibanhaw ni Jesus si Lasaro gikan sa mga patay. Tungod niadtong milagroha, daghan sa mga tawong ordinaryo mituo kang Jesus. Ugaling, matikdi kon unsay gibuhat sa relihiyosong mga pangulo. “Ang pangulong mga saserdote ug ang mga Pariseo mitigom sa Sanhedrin ug miingon: ‘Unsay atong buhaton, kay kining tawhana nagahimog daghang milagro? Kon atong pasagdan siya niining paagiha, silang tanan motuo kaniya, ug ang mga Romano manganhi ug kuhaon ang atong dapit ug ang atong nasod.’” (Juan 11:47, 48) Sila nabalaka mahitungod sa ilang mga katungdanan ug pagkainila. Bisan unsay mosangpot buot nilang pahimut-an ang mga Romano, dili ang Diyos. Busa, unsay ilang gibuhat? “Sukad niadtong adlawa sila nagsabotsabot sa pagpatay kang [Jesus].”—Juan 11:53.
6 Mao ba lang kadto? Dili. Ang sunod nilang gibuhat nagpakita kon unsa ka dako sa ilang paghigugma sa kangitngit: “Ang pangulong mga saserdote nagsabotsabot sa pagpatay kang Lasaro usab, kay tungod kaniya daghan sa mga Hudiyo nangadto didto ug mituo kang Jesus.” (Juan 12:10, 11) Pagkadili-katuohan nga pagkadaotan! Bisan tuod gibuhat nila kadtong tanan aron sa pagpanalipod sa ilang mga katungdanan, unsay nahitabo? Niadtong kaliwatana mismo, sila mialsa batok sa mga Romano, kinsa misulong kanila niadtong 70 K.P. ug nag-agaw sa ilang dapit, sa ilang nasod, ug ingon man sa ilang mga kinabuhi!—Isaias 5:20; Lucas 19:41-44.
Ang Kaluoy ni Jesus
7. Nganong ang mga nahigugma sa kamatuoran midugok kang Jesus?
7 Mao man usab sa atong panahon, dili tanan buot ug espirituwal nga kalamdagan. Apan kadtong nahigugma sa kamatuoran buot nga moduol sa kahayag. Buot nila nga ang Diyos mao ang ilang Soberano, ug sila maikagong midangop kang Jesus, kinsa gipadala sa Diyos aron sa pagpatin-aw kon unsa ang kahayag, ug sundon siya. Kana ang gibuhat sa mga tawong mapaubsanon sa dinhi si Jesus sa yuta. Sila midugok kaniya. Bisan ang mga Pariseo miadmitir niana. Sila mibagulbol: “Ang kalibotan nagasunod kaniya.” (Juan 12:19) Ang mga tawong karnerohon nahigugma kang Jesus tungod kay siya mao ang kaatbang sa hakog, hambogiro, gutom-sa-gahom relihiyosong mga pangulo nga bahin kanila si Jesus miingon: “Nagabugkos silag mabug-at nga mga lulan ug nagabutang niana sa mga abaga sa mga tawo, apan sila mismo dili buot molihok niana pinaagi sa ilang tudlo. Nagahimo sila sa tanang buhat aron sa pagpakita sa mga tawo.”—Mateo 23:4, 5.
8. Kaatbang sa relihiyosong mga salingkapaw, unsang tinamdan ang nabatonan ni Jesus?
8 Sa kaatbang, matikdi ang maluluy-ong tinamdan ni Jesus: “Sa pagkakita sa mga panon giabot siya ug kaluoy kanila, tungod kay sila pinanitan ug nahisalaag samag mga karnero nga walay magbalantay.” (Mateo 9:36) Ug unsay iyang gibuhat bahin niana? Siya miingon ngadto niadtong gipahimudsan sa sistema ni Satanas: “Umari kamo kanako, kamong tanan nga nagabudlay ug nabug-atan, ug papahulayon ko kamo. Isangon ang akong yugo ug makakat-on gikan kanako, kay ako malumo ug mapaubsanon sa kasingkasing, ug kamo makakaplag ug kapahulayan alang sa inyong mga kalag. Kay ang akong yugo maayo ug ang akong lulan magaan.” (Mateo 11:28-30) Gihimo ni Jesus kon unsay gitagna mahitungod kaniya sa Isaias 61:1, 2, nga mabasa: “Si Jehova nagdihog kanako sa pagpahayag sa maayong balita ngadto sa mga maaghop. Siya nagpadala kanako sa pagbugkos sa mga dugmok ug kasingkasing, sa pagmantala sa kagawasan niadtong binihag ug sa pagpabuka sa mga mata bisan alang sa mga binilanggo; sa pagmantala sa tuig sa maayong kabubut-on sa bahin ni Jehova ug sa adlaw sa panimalos sa bahin sa atong Diyos; sa paglipay sa tanang nagbalata.”
Pagtigom sa mga Tigdala sa Kahayag
9. Unsang halandumong mga hitabo ang nahitabo sa 1914?
9 Human sa iyang pagkayab ngadto sa langit, si Jesus nagpaabot hangtod miabot ang panahon nga ihatag sa Diyos kaniya ang gahom sa Gingharian. Unya iyang pagalainon ang “mga karnero” gikan sa “mga kanding.” (Mateo 25:31-33; Salmo 110:1, 2) Kanang panahona miabot sa dihang “ang kataposang mga adlaw” nagsugod sa 1914. (2 Timoteo 3:1-5) Si Jesus, kay gihatagag gahom ingong Hari sa langitnong Gingharian sa Diyos, misugod sa pagtigom sa iyang tuong kamot nga may pag-uyon sa mga buot mosunod sa kahayag. Human sa Gubat sa Kalibotan I, kanang buluhaton sa pagtigom nagpadayon uban sa mauswagong kusog.
10. Unsang pangutana ang ikasukna mahitungod niadtong ginagamit ni Jesus sa buluhatong pagpanigom?
10 Ubos sa pagpangulo ni Kristo Jesus, ang buluhaton sa pagpanigom gigantihan ug dakong kalamposan. Wala pa sukad sa kasaysayan nga may daghan kaayong tawo gikan sa tanang nasod nga nagkatigom diha sa nalamdagang matuod nga pagsimba. Ug kinsa karong adlawa ang nagasunod sa kahayag nga nagagikan sa Diyos ug ni Kristo? Kinsay nagabuhat kon unsay ginaingon sa Filipos 2:15, “nagasidlak ingong mga kahayag diha sa kalibotan,” nga nagadapit sa uban nga ‘umari kamo ug inom sa tubig sa kinabuhi nga walay bayad’?—Pinadayag 22:17.
11. Unsa ang kahimtang sa Kakristiyanohan maylabot sa espirituwal nga kahayag?
11 Ginahimo ba kana sa Kakristiyanohan? Ang Kakristiyanohan, uban sa iyang makapabahing mga relihiyon, tinong wala magsidlak ingong kahayag. Sa pagkatinuod, ang klero nahisama sa relihiyosong mga pangulo sa adlaw ni Jesus. Sila wala magpadan-ag sa tinuod nga kahayag gikan sa Diyos ug ni Kristo. Katloag-tulo ka tuig kanhi, ang magasing Theology Today miingon: “Ikasubo nga kinahanglang angkonon nga kining kahayaga wala magsidlak diha sa Simbahan uban sa kusog nga kasanag. . . . Ang Simbahan dugang ug dugang nakiling nga mahisama sa mga komunidad nga alirong niini. Kini dili gayod mao ang kahayag sa kalibotan apan hinuon usa ka tigpadan-ag sa mga kahayag nga nagasidlak diha sa kalibotan mismo.” Ug ang kahimtang sa Kakristiyanohan grabe pa karong adlawa. Ang giingong kahayag nga iyang gipadan-ag gikan sa kalibotan sa pagkatinuod kangitngit kay kana lamang ang ginatanyag ni Satanas ug sa iyang kalibotan. Wala, walay kahayag sa kamatuoran nga nagagikan sa nagkabangi ug kalibotanon kaayong mga relihiyon sa Kakristiyanohan.
12. Kinsay naglangkob sa tinuod tigdala-sa-kahayag nga organisasyon karong adlawa?
12 Masaligong ikasulti nga ang bag-ong kalibotang kapunongan sa mga Saksi ni Jehova mao ang tinuod, tigdala-sa-kahayag nga organisasyon karong adlawa. Nga nagkahiusa, ang tanan niining mga membro—mga lalaki, mga babaye, ug mga batan-on nga managsama—nagapasidlak sa ilang kahayag gikan ni Jehova ug ni Kristo sa atubangan sa tanang tawo. Sa miaging tuig, diha sa duolag 70,000 ka kongregasyon sa mga Saksi ni Jehova sa tibuok kalibotan, kapig upat ka milyong tigdala sa kahayag ang aktibong nagsulti sa uban mahitungod sa Diyos ug sa iyang mga katuyoan. Ug kada tuig karon, atong makita ang nagpadayong dako kaayong pagtigom sa katawhan nga buot usab nga malamdagan sa espirituwal. Ginatos ka libo ang ginabawtismohan human sa pagtuon sa Bibliya ug pagkadangat sa tukmang kahibalo sa kamatuoran. Sa pagkatinuod, maoy iya sa Diyos nga “kabubut-on nga ang tanang matang sa mga tawo mamaluwas ug mahidangat sa tukmang kahibalo sa kamatuoran.”—1 Timoteo 2:4.
13. Sa unsa ikatandi ang kahayag nga gikan kang Jehova?
13 Ikatandi nato ang kalamdagan nga karon nagagikan ni Jehova ngadto sa nahitabo sa dihang ang katawhan sa Diyos sa karaang mga panahon mibiya sa Ehipto: “Si Jehova nag-una kanila sa maadlaw diha sa usa ka haligi sa panganod aron sa pagtultol kanila sa dalan, ug sa magabii diha sa usa ka haligi sa kalayo sa paghatag kanilag kahayag aron sa paglakaw sa maadlaw ug sa magabii.” (Exodo 13:21, 22) Ang panganod sa maadlaw ug ang kalayo sa magabii nga gikan sa Diyos maoy kasaligang mga giya. Sila maoy kasaligan sama sa adlaw nga gilalang sa Diyos sa paghatag kanatog hayag nga mga oras sa adlaw. Mao, usab, kita makasalig kang Jehova sa pagpadayon sa paglamdag sa dalan sa espirituwal nga paagi alang sa mga nangita sa kamatuoran niining daotang kataposang mga adlaw. Ang Proverbio 4:18 nagpasalig kanato: “Ang alagianan sa mga matarong maoy ingon sa sanag nga kahayag nga nagakasanag ug nagakasanag hangtod sa pagkahingpit sa adlaw.”
Pagpadan-ag sa Kahayag sa Gingharian
14. Kinahanglan unsa ang pangunang katuyoan sa mga tigdala sa kahayag?
14 Samtang si Jehova mao ang Tinubdan sa kalamdagan, ug si Kristo ang Pangulong Tigpadan-ag sa maong kahayag, ang mga sumusunod ni Jesus kinahanglang magpadan-ag niana usab. Siya miingon mahitungod kanila: “Kamo mao ang kahayag sa kalibotan. . . . Ipasidlak ang inyong kahayag sa atubangan sa mga tawo, aron sila makakita sa inyong maayong mga binuhatan ug mohatag ug himaya ngadto sa inyong Amahan nga anaa sa mga langit.” (Mateo 5:14, 16) Ug unsa ba ang pangunang tema niining kahayaga nga ipasidlak sa iyang mga sumusunod atubangan sa katawhan? Unsay ilang igatudlo niining tayuktok nga bahin sa kasaysayan sa kalibotan? Wala mag-ingon si Jesus nga ang iyang mga sumusunod magwali sa demokrasya, pagmandong diktador, panaghiusa sa Iglesya ug Estado, o ubang kalibotanong ideolohiya. Sa kapulihay, diha sa Mateo 24:14 gitagna niya nga bisan pa sa tibuok-kalibotang pagsupak, “kining maayong balita sa gingharian igawali sa tibuok gipuy-ang yuta alang sa usa ka pamatuod ngadto sa tanang nasod, ug unya ang kataposan moabot.” Busa, ang mga tigdala sa kahayag karong adlawa nagsulti sa uban mahitungod sa Gingharian sa Diyos, nga maoy magdala sa kalibotan ni Satanas ngadto sa kalaglagan niini ug magpasulod sa matarong bag-ong kalibotan.—1 Pedro 2:9.
15. Asa modangop ang buot sa kahayag?
15 Kadtong nahigugma sa kahayag dili mapasimang tungod sa mga pangangkon ug mga tumong niining kalibotana. Kanang tanang pangangkon ug mga tumong mangahanaw sa dili na madugay, sanglit kining kalibotana nagakahiduol na sa iyang kataposan. Inay hinuon, ang mga nahigugma sa pagkamatarong buot modangop sa maayong balita nga gimantala niadtong nagapasidlak sa kahayag sa Gingharian sa Diyos ngadto sa lagyong mga suok sa yuta. Kini sila mao ang gitagna sa Pinadayag 7:9, 10, nga nagaingon: “Nakita ko, ug, tan-awa! usa ka dakong panon, nga walay tawong makaihap, gikan sa tanang nasod ug mga tribo ug mga katawhan ug mga pinulongan, nga nagatindog atubangan sa trono [sa Diyos] ug atubangan sa Kordero [Kristo] . . . Ug sila nagapadayon sa pagsinggit sa makusog nga tingog, nga nagaingon: ‘Ang kaluwasan nautang namo sa among Diyos, kinsa naglingkod sa trono, ug sa Kordero.’” Ang bersikulo 14 nagaingon: “Kini sila mao ang nanggula sa dakong kasakitan.” Oo, sila makalabang-buhi sa kataposan niining kalibotana ngadto sa walay-pagkatapos nga bag-ong kalibotan ubos sa Gingharian sa Diyos.
Ang Nalamdagang Bag-ong Kalibotan
16. Unsay mahitabo sa kalibotan ni Satanas sa dakong kasakitan?
16 Ang bag-ong kalibotan digoon sa masanag nga kahayag sa kamatuoran. Sa pagkatinuod, tagda kon unsa ang kahimtang unya sa adlaw human nga laglagon sa Diyos kining sistema sa mga butang. Si Satanas, iyang mga demonyo, ug iyang politikanhon, komersiyal, ug relihiyosong mga sistema mahanaw na—matag usa kanila! Ang enterong kahimanan sa propaganda ni Satanas mahanaw na usab. Busa, human sa dakong kasakitan, wala na gayoy mapatik nga usa ka mantalaan, magasin, libro, pulyeto, o gamayng pulyeto nga nagsuportar niining daotang kalibotan. Wala na unyay makapadaot nga mga impluwensiya nga isibya gikan sa kalibotanong telebisyon o mga estasyon sa radyo. Ang enterong makahilong palibot sa kalibotan ni Satanas pagawagtangon sa usa ka kusog nga hapak!—Mateo 24:21; Pinadayag 7:14; 16:14-16; 19:11-21.
17, 18. Unsaon nimo pagbatbat ang espirituwal nga palibot human sa pagkalaglag sa kalibotan ni Satanas?
17 Pagkadako kaayo unya kana nga kahupayan! Sukad nianang adlawa, ang makapaayo, makapauswag lamang nga espirituwal nga kahayag nga gikan kang Jehova ug sa iyang Gingharian ang mag-impluwensiya sa katawhan. Ang Isaias 54:13 nagtagna: “Ang tanan nimong mga anak mao unyay mga tawo nga gitudloan ni Jehova, ug ang kalinaw sa imong mga anak magmadagayaon.” Tungod sa pagmando sa Diyos nga maoy mogahom sa tibuok yuta, ang iyang saad mao nga, sumala sa giingon sa Isaias 26:9, “ang pagkamatarong mao gayod ang makat-onan sa mga molupyo sa mabungahong yuta.”
18 Sa madali, ang enterong mental ug espirituwal nga palibot mausab ngadto sa pagkamaayo. Ang mga butang makapalig-on mao unyay kinaiyanhon inay sa makapaguol, imoral nga mga butang nga karon kaylap kaayo. Ang tanang buhi unya pagatudloan sa kamatuoran mahitungod sa Diyos ug sa iyang mga katuyoan. Sa labing hingpit nga diwa, ang tagna sa Isaias 11:9 mamatuman, nga nagaingon: “Ang yuta mapuno gayod sa kahibalo kang Jehova sama sa katubigan nga nagatabon sa dagat mismo.”
Dinalian ang Pagsunod sa Kahayag
19, 20. Nganong kadtong buot mosunod sa kahayag kinahanglang magpabiling mabinantayon?
19 Karon, sa kataposang mga tuig niining daotang sistema, dinalian ang pagsunod sa kahayag sa kalibotan. Ug kinahanglang kita magmabinantayon, kay adunay mainit nga gubat nga gibugno sa pagpugong kanato sa paglakaw diha sa kahayag. Ang maong pagsupak nagagikan sa mga gahom sa kangitngit—gikan kang Satanas, iyang mga demonyo, ug iyang yutan-ong organisasyon. Kana ang hinungdang si apostol Pedro nagpasidaan: “Batoni nga padayon ang maayong hunahuna, magmabinantayon. Ang inyong kaaway, ang Yawa, nagasuroysuroy nga samag usa ka leyon nga nagangulob, nga nangitag matukob.”—1 Pedro 5:8.
20 Ibutang ni Satanas ang tanang babag sa alagianan niadtong nakaduol na sa kahayag, tungod kay gusto niya nga papadayonon sila sa paglakaw diha sa kangitngit. Kini tingali pagpit-os gikan sa mga paryente o kanhing mga higala nga supak sa kamatuoran. Kini mahimong mga pagduhaduha bahin sa Bibliya tungod sa pagkanabutaan sa usa tungod sa mga pagtulon-an sa bakak nga relihiyon o sa propaganda sa walay-pagtuong mga ateyista ug mga agnostiko. Kini mahimong kaugalingong makasasalang mga hilig nga makapalisod sa pagsunod sa balaang mga kinahanglanon.
21. Unsay angay pagabuhaton sa tanan nga buot mopuyo sa bag-ong kalibotan sa Diyos?
21 Bisan unsa tingali ang mga babag nga anaa, buot ba nimong magkalipay sa kinabuhi diha sa usa ka bag-ong kalibotan nga walay kakabos, krimen, inhustisya, ug gubat? Buot ba nimong tagamtamon ang hingpit nga kahimsog ug kinabuhi sa usa ka paraisong yuta? Nan dawata ug sunda si Jesus ingong ang kahayag sa kalibotan ug pamatia ang mensahe niadtong hugot nga nagapangupot sa “pulong sa kinabuhi” ug “nagasidlak ingong mga kahayag sa kalibotan.”—Filipos 2:15, 16.
Unsay Imong Tubag?
◻ Sa unsang paagi gipakita sa relihiyosong mga pangulo nga sila mga nahigugma sa kangitngit?
◻ Unsang tinamdan ang nabatonan ni Jesus bahin sa katawhan?
◻ Sa unsang paagi nagpadayon ang pagtigom sa mga tigdala sa kahayag?
◻ Unsang halandumong mga kausaban ang mahitabo sa dili madugay?
◻ Nganong dinalian ang pagsunod sa kahayag sa kalibotan karong adlawa?
[Hulagway sa panid 14, 15]
Ang matig-ag-kasingkasing nga mga Pariseo nagpalagpot sa tawo kansang mga mata gipabuka ni Jesus