7 Dunggon ba sa Diyos ang Atong mga Pag-ampo?

ANG mga tawo interesado kaayo sa tubag niini nga pangutana. Gipakita sa Bibliya nga dunggon sa Diyos ang mga pag-ampo karon. Kon dunggon niya o dili ang atong mga pag-ampo, kana magdepende gayod kanato.

Gisaway ni Jesus ang mga lider sa relihiyon sa iyang adlaw nga nag-ampo aron ipakita konohay nga sila diyosnon. Siya miingon nga ang maong mga tawo “nakabaton na sa ilang bug-os nga ganti.” Sa ato pa, nadawat na nila ang ilang gitinguha, ang pagdayeg sa mga tawo, apan wala dungga sa Diyos ang ilang pag-ampo. (Mateo 6:5) Sa atong panahon, daghan usab ang nag-ampo sumala sa kon unsay ilang gusto, ug dili sumala sa kabubut-on sa Diyos. Wala dungga sa Diyos ang ilang pag-ampo kay ilang gibalewala ang mga prinsipyo sa Bibliya nga atong nahisgotan.

Komosta sa imong bahin? Dunggon ba sa Diyos ang imong mga pag-ampo? Kana wala magdepende sa imong rasa, nasyonalidad, o kahimtang sa kinabuhi. Kita gipasaligan sa Bibliya: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Ikaw ba mahinadlokon sa Diyos? Kon mao, ikaw nagtahod gayod kaniya, ug di ka gustong masuko siya. Ikaw ba usab nagbuhat ug pagkamatarong? Nan, naningkamot ka sa pagtuman sa sugo sa Diyos inay buhaton ang imong gusto o nianang sa uban. Gusto ba gayod nimo nga dunggon sa Diyos ang imong mga pag-ampo? Ang Bibliya makatabang kanimo.a

Gusto sa uban nga tubagon ang ilang pag-ampo pinaagig milagro. Apan, bisan sa kapanahonan sa Bibliya, talagsa ra kanang himoon sa Diyos. Usahay, dangtan pag gatosan ka tuig una mahitabo ang laing milagro. Dugang pa, gipakita sa Bibliya nga ang paghimog mga milagro natapos sa panahon sa mga apostoles. (1 Corinto 13:8-10) Nagpasabot ba kini nga dili na dunggon sa Diyos ang mga pag-ampo karon? Wala gayod! Matikdi kining pipila ka pag-ampo nga iyang dunggon.

Ang Diyos mohatag ug kaalam. Si Jehova ang Tuboran sa tinuod nga kaalam. Siya dagayang naghatag niini sa mga tawong gustong magpagiya kaniya ug magkinabuhi subay niana.—Santiago 1:5.

Ang Diyos mohatag sa iyang balaang espiritu. Ang balaang espiritu mao ang aktibong puwersa sa Diyos. Wala nay laing puwersa nga mas gamhanan pa kay niini. Ang balaang espiritu makatabang kanato sa pagsagubang sa mga pagsulay. Kini mohatag kanatog kalinaw sa hunahuna sa dihang kita mabalaka. Kini motabang kanato sa pag-ugmad sa uban pang dalayegong mga hiyas. (Galacia 5:22, 23) Gipasaligan ni Jesus ang iyang mga tinun-an nga ang Diyos dagayang maghatag niini nga gasa.—Lucas 11:13.

Ang Diyos mohatag ug kahibalo sa sinserong mangita kaniya. (Buhat 17:26, 27) Sa lainlaing bahin sa kalibotan, daghang tawo ang sinserong nangita sa kamatuoran. Gusto silang makakat-on bahin sa ngalan sa Diyos, sa iyang katuyoan alang sa yuta ug sa tawo, ug kon sa unsang paagi sila masuod kaniya. (Santiago 4:8) Ang mga Saksi ni Jehova sagad makahimamat kanila ug malipay sa pagtubag sa maong mga pangutana gamit ang Bibliya.

Kana bay hinungdan nga imong gidawat kini nga magasin? Nangita ka ba sa Diyos? Lagmit mao kini ang iyang tubag sa imong pag-ampo.

[Footnote]