Iisa ang Maunongong mga Kamot Diha sa Pag-ampo

“Gitinguha ko nga sa matag dapit ang mga lalaki magpadayon sa pag-ampo, nga magaisa sa maunongong mga kamot, nga walay kapungot ug mga debate.”​—1 TIMOTEO 2:8.

1, 2. (a) Sa unsang paagi ang 1 Timoteo 2:8 ikapadapat sa pag-ampo nga naglangkit sa katawhan ni Jehova? (b) Unsay atong konsiderahon karon?

GIDAHOM ni Jehova nga ang iyang katawhan magmaunongon kaniya ug sa usag usa. Gilangkit ni apostol Pablo ang pagkamaunongon sa pag-ampo sa dihang misulat siya: “Gitinguha ko nga sa matag dapit ang mga lalaki magpadayon sa pag-ampo, nga magaisa sa maunongong mga kamot, nga walay kapungot ug mga debate.” (1 Timoteo 2:8) Dayag, gitumong ni Pablo ang publikong pag-ampo ‘sa tanang dapit’ diin magtigom ang mga Kristohanon. Kinsay magahawas sa katawhan sa Diyos diha sa pag-ampo panahon sa mga tigom sa kongregasyon? Kadto lamang balaan, matarong, matinahurong mga lalaki nga mainampingong nagtuman sa tanang Kasulatanhong mga katungdanan ngadto sa Diyos. (Ecclesiastes 12:13, 14) Kinahanglang hinlo sila sa espirituwal ug moral ug sa walay duhaduha debotado kang Jehova nga Diyos.

² Ilabina nga ang mga ansiyano sa kongregasyon ‘moisa sa maunongong mga kamot diha sa pag-ampo.’ Ang ilang kinasingkasing nga mga pag-ampo pinaagi ni Jesu-Kristo nagpakita ug pagkamaunongon ngadto sa Diyos ug motabang kanila sa paglikay sa mga debate ug mga pagsilaob sa kasuko. Sa pagkatinuod, si bisan kinsang tawo nga nakapribilehiyo sa paghawas sa Kristohanong kongregasyon diha sa publikong pag-ampo kinahanglang nahigawas sa kayugot, dili-maayong buot, ug pagkadili-maunongon ngadto kang Jehova ug sa iyang organisasyon. (Santiago 1:19, 20) Unsang dugang mga lagda sa Bibliya ang anaa alang niadtong nakapribilehiyo sa paghawas sa uban diha sa publikong pag-ampo? Ug unsa ang pipila ka prinsipyo sa Kasulatan nga angay natong ipadapat diha sa atong pribado ug pamilyahanong mga pag-ampo?

Hunahunaa Daan ang Pag-ampo

3, 4. (a) Nganong mapuslanon nga hunahunaon daan ang publikong pag-ampo? (b) Unsay gipakita sa Kasulatan mahitungod sa gitas-on sa mga pag-ampo?

³ Kon gihangyo kita nga moampo sa publiko, lagmit labing menos makahimo kita sa paghunahuna daan sa atong pag-ampo. Ang paghimo niini mahimong magpaarang kanato sa pagkobre sa haom hinungdanong mga butang nga dili na mosulti ug taas, walay tumong nga pag-ampo. Siyempre, ang atong pribadong mga pag-ampo mahimo usab nga litokon. Kini mahimong bisan unsay gitas-on. Si Jesus migugol ug tibuok gabii nga nag-ampo una pilia ang iyang 12 ka apostol. Apan, sa dihang gisugdan niya ang Memoryal sa iyang kamatayon ang iyang mga pag-ampo alang sa tinapay ug bino dayag nga medyo mubo. (Marcos 14:22-24; Lucas 6:12-16) Ug nahibalo kita nga bisan ang mubo nga mga pag-ampo ni Jesus bug-os nga dalawaton sa Diyos.

⁴ Ibutang ta nga nakapribilehiyo kita sa paghawas sa usa ka pamilya diha sa pag-ampo una pa mangaon. Ang maong pag-ampo mahimong medyo mubo​—apan bisan unsay gisulti kinahanglang maglakip ug pagpahayag sa pasalamat alang sa pagkaon. Kon kita nagaampo sa publiko una pa o human sa Kristohanong tigom, dili kinahanglang motanyag kita ug taas nga pag-ampo nga mokobre ug daghang punto. Gisaway ni Jesus ang mga eskriba kinsa ‘mihimog tag-as nga mga pag-ampo ingong pagpakaaron-ingnon.’ (Lucas 20:46, 47) Dili gayod kana buhaton sa usa ka tawong diyosnon. Apan, usahay ang medyo taastaas nga publikong pag-ampo haom tingali. Pananglitan, ang usa ka ansiyano nga napili sa paglitok sa kataposang pag-ampo diha sa usa ka asembliya kinahanglang maghunahuna daan niana ug buot tingaling maghisgot ug daghang punto. Apan, bisan ang maong pag-ampo dili kinahanglang hilabihan ka taas.

Duola ang Diyos Uban ang Pagkamatinahuron

 5. (a) Unsay atong angayng hinumdoman sa dihang mag-ampo sa publiko? (b) Nganong mag-ampo diha sa may-dignidad ug matinahurong paagi?

⁵ Sa dihang nag-ampo sa publiko angay natong hinumdoman nga dili mga tawo ang atong kaestorya. Hinunoa, kita maoy makasasalang mga linalang nga nangaliya sa Soberanong Ginoong Jehova. (Salmo 8:3-5, 9; 73:28) Busa kinahanglang magpasundayag kita ug matinahurong kahadlok nga dili-makapahimuot kaniya pinaagi sa atong gisulti ug sa paagi nga gipahayag kini. (Proverbio 1:7) Ang salmistang si David miawit: “Alang kanako, sa kadagaya sa imong mahigugmaong-kalulot moanhi ako sa imong balay, moyukbo ako ngadto sa imong balaang templo sa kahadlok kanimo.” (Salmo 5:7) Kon nabatonan nato kanang maong tinamdan, unsaon nato pagpahayag ang atong kaugalingon sa dihang gihangyo kita nga moampo sa publiko panahon sa tigom sa mga Saksi ni Jehova? Aw, kon kita nakigsulti sa usa ka tawhanong hari, buhaton nato kana nga matinahuron ug uban sa dignidad. Dili ba angayan nga ang atong mga pag-ampo mas may-dignidad ug mas matinahuron, sanglit nagaampo kita kang Jehova, ang “Hari sa kadayonan”? (Pinadayag 15:3) Busa sa dihang mag-ampo likayan nato ang mga pamulong sama sa, “Maayong buntag, Jehova,” “Nagpadala kami kanimo sa among gugma,” o, “Pag-ayo-ayo.” Ang Kasulatan nagpakita nga ang bugtong Anak sa Diyos, si Jesus-Kristo, wala gayod mosulti sa iyang langitnong Amahan nianang paagiha.

 6. Unsay angay natong hinumdoman sa dihang kita ‘moduol sa trono sa dili-takos nga kalulot’?

⁶ Si Pablo miingon: “Manuol kita uban ang kagawasnon sa pagsulti ngadto sa trono sa dili-takos nga kalulot.” (Hebreohanon 4:16) Makaduol kita kang Jehova uban ang “kagawasnon sa pagsulti” bisan pa sa atong makasasalang kahimtang tungod sa atong pagtuo diha sa halad lukat ni Jesu-Kristo. (Buhat 10:42, 43; 20:20, 21) Bisan pa niana, ang maong “kagawasnon sa pagsulti” wala magpasabot nga kita nakighinabi sa Diyos; ni mosulti kita ug dili-matinahurong mga butang ngadto kaniya. Aron makapahimuot kang Jehova ang atong publikong mga pag-ampo, kinahanglang itanyag kini uban ang angayang pagtahod ug dignidad, ug dili-haom nga gamiton kana sa pagpahibalo, pagtambag sa mga tawo, o pagbadlong sa mamiminaw.

Pag-ampo Uban ang Mapainubsanong Espiritu

 7. Giunsa ni Solomon pagpasundayag ug pagkamapainubsanon sa dihang nag-ampo panahon sa pagpahinungod sa templo ni Jehova?

⁷ Kita man nag-ampo sa publiko o sa pribado, ang hinungdanong Kasulatanhong prinsipyo nga hinumdoman mao nga kinahanglang ipasundayag nato ang mapainubsanong tinamdan diha sa atong mga pag-ampo. (2 Cronicas 7:13, 14) Si Haring Solomon nagpasundayag ug pagkamapainubsanon diha sa iyang publikong pag-ampo panahon sa pagpahinungod sa templo ni Jehova sa Jerusalem. Bag-o pang nakompleto ni Solomon ang usa sa labing halangdong mga tinukod nga natukod sukad sa yuta. Bisan pa niana, siya mapainubsanong nag-ampo: “Tinuod ba gayod nga ang Diyos mopuyo dinhi sa yuta? Tan-awa! Ang mga langit, oo, ang langit sa mga langit, mismo dili makaigo kanimo; nan, unsa pa kaha ka labing ubos kining balay nga akong gitukod!”​—1 Hari 8:27.

 8. Unsa ang pipila ka paagi nga ang pagkamapainubsanon ikapakita diha sa publikong pag-ampo?

⁸ Sama kang Solomon, kinahanglang magmapainubsanon kita sa dihang nagahawas sa uban diha sa publikong pag-ampo. Bisan tuod kinahanglan natong likayan nga magpakaaron-ingnong balaan, ang pagkamapainubsanon ikapakita pinaagi sa tono sa atong tingog. Ang mapainubsanong mga pag-ampo dili mapahitas-on o tigpakaaron-ingnon. Kini nagdani sa pagtagad, dili sa tawo nga nag-ampo, kondili ngadto sa Usa nga giampoan. (Mateo 6:5) Ang pagkamapainubsanon ikapakita usab pinaagi sa atong giingon diha sa pag-ampo. Kon kita mapainubsanong mag-ampo, dili kita morag nangayo nga buhaton sa Diyos ang pipila ka butang sa atong paagi. Hinunoa, mangaliya kita nga si Jehova molihok sa paagi nga kaharmonya sa iyang balaang kabubut-on. Ang salmista naghatag ug panig-ingnan sa hustong tinamdan sa dihang nangamuyo siya: “Ah, karon, Jehova, luwasa, palihog! Ah, karon, Jehova, ihatag ang kalamposan, palihog!”​—Salmo 118:25; Lucas 18:9-14.

Pag-ampo Gikan sa Kasingkasing

 9. Unsang maayong tambag nga gihatag ni Jesus ang makaplagan sa Mateo 6:7, ug sa unsang paagi kini ikapadapat?

⁹ Aron makapahimuot kang Jehova ang atong publiko o pribadong mga pag-ampo, kinahanglang naggikan kini sa kasingkasing. Busa, dili yanong sublisublion nato ang usa ka pormula sa pag-ampo nga wala maghunahuna kon unsay atong ginasulti. Sa iyang Wali sa Bukid, si Jesus nagtambag: “Sa dihang mag-ampo, ayawg isulti ang samang mga butang nga pabalikbalik, maingon sa ginahimo sa katawhan sa kanasoran, kay sila [sayop nga] nagahanduraw nga dunggon sila tungod sa paggamit nila ug daghang pulong.” Sa laing pagkasulti, si Jesus miingon: “Ayaw pagyamyam ug mga pulong; ayaw pagsulti ug walay pulos nga pagsumaysumay.”​—Mateo 6:7; potnot.

10. Nganong angayan nga moampo mahitungod sa mao gihapong butang nga sublisubli?

¹⁰ Siyempre, kinahanglan tingali natong mag-ampo nga sublisubli mahitungod sa mao gihapong butang. Dili kana sayop tungod kay si Jesus nag-awhag: “Padayon sa pagpangayo, ug igahatag kini kaninyo; padayon sa pagpangita, ug kamo makakaplag; padayon sa pagpanuktok, ug pagabuksan kini kaninyo.” (Mateo 7:7) Hayan dunay panginahanglan alang sa usa ka bag-ong Kingdom Hall tungod kay si Jehova nagpauswag sa lokal nga buluhatong pagsangyaw. (Isaias 60:22) Angayan nga padayong hisgotan kining maong panginahanglan sa dihang nag-ampo nga pribado o sa dihang nagtanyag ug publikong mga pag-ampo panahon sa mga tigom sa katawhan ni Jehova. Ang pagbuhat niana wala magpasabot nga kita ‘nagasulti ug walay-pulos nga mga pagsumaysumay.’

Hinumdomi ang Pasalamat ug Pagdayeg

11. Sa unsang paagi ang Filipos 4:6, 7 ikapadapat sa pribado ug publikong pag-ampo?

¹¹ Daghang tawo ang moampo lamang kon dunay pangayoon, apan ang atong gugma alang kang Jehova nga Diyos kinahanglang magpalihok kanato sa paghatag kaniya ug mga pasalamat ug pagdayeg diha sa pribado ug publikong pag-ampo. “Ayaw pagkabalaka sa bisan unsang butang,” misulat si Pablo, “apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Oo, dugang pa sa mga pangamuyo ug mga pangaliya, kinahanglang magpahayag kita ug pasalamat kang Jehova alang sa espirituwal ug materyal nga mga panalangin. (Proverbio 10:22) Ang salmista miawit: “Itanyag ang mga pasalamat ingong imong halad ngadto sa Diyos, ug bayri ngadto sa Labing Hataas ang imong mga panaad.” (Salmo 50:14) Ug ang mainampoong awit ni David nag-apil niining makapatandog nga mga pulong: “Pagadayegon ko ang ngalan sa Diyos uban ang awit, ug bayawon ko siya uban ang pasalamat.” (Salmo 69:30) Dili ba angayng buhaton nato ang ingon diha sa publiko ug pribadong pag-ampo?

12. Sa unsang paagi ang Salmo 100:4, 5 nagakatuman karon, ug busa sa unsa kita makapasalamat ug makadayeg sa Diyos?

¹² Mahitungod sa Diyos, ang salmista miawit: “Sulod kamo ngadto sa iyang mga ganghaan uban ang pasalamat, ngadto sa iyang mga sawang uban ang pagdayeg. Ihatag ang mga pasalamat kaniya, dayega ninyo ang iyang ngalan. Kay si Jehova maayo; ang iyang mahigugmaong-kalulot maoy hangtod sa panahong walay tino, ug ang iyang pagkamatinumanon ngadto sa tanang kaliwatan.” (Salmo 100:4, 5) Karon, ang mga tawo sa tanang nasod nagapanulod sa mga sawang sa santuwaryo ni Jehova, ug tungod niini kita makahatag kaniya ug pagdayeg ug mga pasalamat. Nagpahayag ka ba ug pasalamat ngadto sa Diyos tungod sa lokal nga Kingdom Hall ug nagpasundayag sa imong pagpabili pinaagi sa pagtigom didto nga regular uban niadtong nahigugma kaniya? Samtang atua didto, kinasingkasing mo bang gipatugbaw ang imong tingog diha sa mga awit sa pagdayeg ug pasalamat ngadto sa atong mahigugmaong langitnong Amahan?

Ayaw Gayod Batia ang Kaulaw nga Moampo

13. Unsang Kasulatanhong pananglitan ang nagpakita nga kinahanglan kitang mangamuyo kang Jehova bisan pag mobati kita nga dili-takos tungod sa sala?

¹³ Bisan pag mobati kitang dili-takos tungod sa sala, kinahanglang modangop kita sa Diyos sa mainitong pangamuyo. Sa dihang nakasala ang mga Hudiyo pinaagi sa pagkuhag mga asawang langyaw, si Esdras miluhod, nagbuklad sa iyang maunongong mga kamot ngadto sa Diyos, ug mapainubsanong miampo: “Oh Diyos ko, naulaw ako ug nanlipaghong sa pagyahat sa akong nawong kanimo, Oh akong Diyos, kay ang among kasal-anan nagadugang ibabaw sa among ulo ug ang among pagkamakasasala misangko bisan ngadto sa kalangitan. Sukad sa mga adlaw sa among mga amahan hilabihan ang among pagkamakasasala hangtod niining adlawa . . . Ug tapos niining tanan nga nahitabo kanamo tungod sa among daotang mga buhat ug sa among hilabihang pagkamakasasala​—sanglit ikaw mismo, Oh among Diyos, nagasilot kanamo sa diyutay ra sa angay sa among kasal-anan, ug ikaw naghatag kanamo niadtong nakaikyas sama niini—​magalapas pa ba kami pag-usab sa imong mga sugo ug makigminyo sa mga tawo niining dulumtanang mga butang? Dili ba ikaw maligutgot kanamo hangtod nga walay magpabilin ug walay makaikyas? Oh Jehova ang Diyos sa Israel, ikaw matarong, kay kami nahibilin ingong nakaikyas nga mga tawo sama niining adlawa. Ania kami sa imong atubangan sa among pagkamakasasala, kay walay makatindog sa imong atubangan tungod niini.”​—Esdras 9:1-15; Deuteronomio 7:3, 4.

14. Ingon sa gipasundayag sa adlaw ni Esdras, unsay gikinahanglan aron makadawat sa kapasayloan sa Diyos?

¹⁴ Aron pasayloon sa Diyos, ang pagsugid ngadto kaniya kinahanglang inubanan sa pagkamahinulsolon ug sa “mga bunga nga nahiangay sa paghinulsol.” (Lucas 3:8; Job 42:1-6; Isaias 66:2) Sa adlaw ni Esdras, ang mahinulsolong tinamdan giubanan sa paningkamot nga tul-iron ang sayop pinaagi sa pagpapahawa sa langyawng mga asawa. (Esdras 10:44; itandi ang 2 Corinto 7:8-13.) Kon nagtinguha kita sa kapasayloan sa Diyos tungod sa grabeng sala, himoon nato ang pagsugid diha sa mapainubsanong pag-ampo ug magpatunghag mga bunga nga nahiangay sa paghinulsol. Ang mahinulsolong espiritu ug ang tinguha sa pagtul-id sa sayop magtukmod usab kanato sa pagpangayog espirituwal nga tabang sa Kristohanong mga ansiyano.​—Santiago 5:13-15.

Pagkuhag Kahupayan Gikan sa Pag-ampo

15. Sa unsang paagi ang kasinatian ni Ana nagpakita nga makakaplag kitag kahupayan diha sa pag-ampo?

¹⁵ Sa dihang ang atong kasingkasing nasakit tungod sa usa ka hinungdan, makakaplag kitag kahupayan diha sa pag-ampo. (Salmo 51:17; Proverbio 15:13) Mao kanay nahitabo sa maunongong si Ana. Nagkinabuhi siya sa dihang ang dagkong mga pamilya maoy kasagaran sa Israel, apan walay siyay anak. Ang iyang bana, si Elkana, may mga anak nga lalaki ug babaye pinaagi sa iyang laing asawa, si Penina, kinsa nagbiaybiay kang Ana tungod sa pagkaapuli niini. Mainitong nag-ampo si Ana ug misaad nga kon panalanginan siya ug usa ka anak nga lalaki, ‘ihatag niya siya ngadto kang Jehova sa tanang adlaw sa iyang kinabuhi.’ Nahupay sa iyang pag-ampo ug sa mga pulong sa Hataas nga Saserdoteng si Eli, si Ana “wala na magmasulub-on.” Nanganak siya ug usa ka lalaki nga ginganlan niyag Samuel. Sa ulahi, gitugyan niya siya aron mag-alagad sa santuwaryo ni Jehova. (1 Samuel 1:9-28) Mapasalamaton sa kalulot sa Diyos ngadto kaniya, gitanyag niya ang pag-ampo sa pagpasalamat​—usa nga nagbayaw kang Jehova ingong ang usa nga walay kasama. (1 Samuel 2:1-10) Sama kang Ana, makakuha kitag kahupayan gikan sa pag-ampo, masaligon nga ang Diyos magatubag sa tanang hangyo nga kaharmonya sa iyang kabubut-on. Sa dihang ibubo nato ang atong kasingkasing ngadto kaniya, kita ‘dili na magmasulub-on,’ kay siya magakuha sa atong palas-anon o magpaarang kanato nga maantos kana.​—Salmo 55:22.

16. Ingon sa giilustrar sa kaso ni Jacob, nganong angay kitang moampo sa dihang kita nahadlok o nabalaka?

¹⁶ Kon ang usa ka kahimtang magpahinabog kahadlok, kasakit sa kasingkasing, o kabalaka, modangop kita sa Diyos alang sa kahupayan diha sa pag-ampo. (Salmo 55:1-4) Si Jacob nahadlok sa dihang hapit na niyang ikatagbo ang iyang nahimulag nga igsoon, si Esau. Bisan pa niana, si Jacob miampo: “Oh Diyos sa akong amahan nga si Abraham ug Diyos sa akong amahan nga si Isaac, Oh Jehova, ikaw kinsa nagaingon kanako, ‘Balik ngadto sa imong yuta ug sa imong mga paryente ug ako magabuhat ug maayo kanimo,’ ako dili takos sa tanang mahigugmaong-kalulot ug sa tanang pagkamaunongon nga imong gipakita sa imong alagad, kay uban sa akong sungkod ako mitabok niining Jordan ug karon nahimo ako nga duha ka pundok. Luwasa ako, ginaampo ko kanimo, gikan sa kamot sa akong igsoon, gikan sa kamot ni Esau, tungod kay nahadlok ako kaniya nga tingali moanhi siya ug samaran gayod ako, ang inahan uban ang mga anak. Ug ikaw, ikaw miingon, ‘Sa walay duhaduha ako magabuhat ug maayo kanimo ug pagahimoon ko ang imong binhi nga sama sa mga balas sa dagat, nga dili arang maisip tungod sa gidaghanon.’” (Genesis 32:9-12) Wala samari ni Esau si Jacob ug ang iyang kaubanan. Busa si Jehova ‘nagbuhat ug maayo’ kang Jacob sa maong okasyon.

17. Sa pagsunod sa Salmo 119:52, sa unsang paagi ang pag-ampo magdala kanato ug kahupayan sa dihang kita grabeng gisulayan?

¹⁷ Panahon sa atong mga pangamuyo, tingali mahupayan kita pinaagi sa paghinumdom sa mga butang nga giingon diha sa Pulong sa Diyos. Diha sa kinatas-ang salmo​—usa ka matahom nga pag-ampo nga giduyogan ug awit—​lagmit si Prinsipe Ezequias ang miawit: “Nahinumdom ako sa imong hudisyal nga mga desisyon gikan sa panahong walay tino, Oh Jehova, ug ako nakakaplag ug kahupayan alang sa akong kaugalingon.” (Salmo 119:52) Sa mapainubsanong pag-ampo sa dihang kita grabeng gilutos, mahinumdoman tingali nato ang usa ka prinsipyo o balaod sa Bibliya nga makatabang kanato sa pagsubay sa dalan nga moresulta sa makapahupayng pasalig nga kita nakapahimuot sa atong langitnong Amahan.

Ang mga Maunongon Molahutay sa Pag-ampo

18. Nganong ikaingon nga ang ‘tagsatagsa nga maunongon moampo sa Diyos’?

¹⁸ Ang tanan nga maunongon kang Jehova nga Diyos ‘molahutay sa pag-ampo.’ (Roma 12:12) Sa ika-32 nga Salmo 32, nga lagmit gisulat human makasala si David uban kang Batseba, iyang gihubit ang iyang hilabihang kasakit tungod sa pagkapakyas sa pagpangayog kapasayloan ug sa kahupayan nga gipahinabo kaniya sa paghinulsol ug pagsugid ngadto sa Diyos. Unya miawit si David: “Tungod niini [tungod kay ang kapasayloan ni Jehova mabatonan sa tinuod nga mga mahinulsolon] ang tagsatagsa nga maunongon magaampo kanimo sa panahon lamang nga ikaw makaplagan.”​—Salmo 32:6.

19. Nganong angay natong iisa ang atong maunongong mga kamot diha sa pag-ampo?

¹⁹ Kon atong gimahal ang atong relasyon uban kang Jehova nga Diyos, kita magaampo alang sa iyang kaluoy pinasikad sa halad lukat ni Jesus. Sa pagtuo, kita makaduol sa trono sa dili-takos nga kalulot uban ang kagawasan sa pagsulti aron makabaton ug kaluoy ug tukma-sa-panahong tabang. (Hebreohanon 4:16) Apan daghan kaayong katarongan nga moampo! Busa ‘mag-ampo kita nga walay hunong’​—kasagaran uban sa mga pulong sa kinasingkasing nga pagdayeg ug pasalamat ngadto sa Diyos. (1 Tesalonica 5:17) Adlaw ug gabii, iisa nato ang atong maunongong mga kamot diha sa pag-ampo.

Unsaon Nimo Pagtubag?

◻ Unsay benepisyo sa paghunahuna daan sa publikong pag-ampo?

◻ Nganong kinahanglan kitang moampo diha sa matinahuron ug may-dignidad nga paagi?

◻ Unsang espiritu ang kinahanglan natong ipasundayag sa dihang nagaampo?

◻ Sa dihang nagaampo, nganong kinahanglan natong hinumdoman ang mga pasalamat ug pagdayeg?

◻ Sa unsang paagi gipakita sa Bibliya nga makakuha kita ug kahupayan gikan sa pag-ampo?

[Hulagway sa panid 17]

Si Haring Solomon nagpasundayag ug pagkamapainubsanon diha sa iyang publikong pag-ampo panahon sa pagpahinungod sa templo ni Jehova

[Mga hulagway sa panid 18]

Sama kang Ana, makakuha kag kahupayan gikan sa pag-ampo