Ang Pulong ba ni Jesus Nag-impluwensiya sa Imong Pag-ampo?
“Sa dihang nahuman na si Jesus pagsulti niining mga pulonga, ang epekto mao nga ang mga panon sa katawhan nahingangha sa iyang paagi sa pagpanudlo.”—Mat. 7:28.
1, 2. Nganong nahingangha ang mga tawo sa paagi sa pagpanudlo ni Jesus?
KINAHANGLAN nga atong dawaton ang pulong sa bugtong Anak sa Diyos, si Jesu-Kristo, ug ipadapat kana sa atong kinabuhi. Walay tawo nga sama kaniyag paagi sa pagsulti. Gani, ang mga tawo nahingangha sa iyang paagi sa pagtudlo diha sa Wali sa Bukid!—Basaha ang Mateo 7:28, 29.
2 Ang paagi sa pagtudlo sa Anak ni Jehova dili sama nianang sa mga eskriba, nga nagpasukad sa ilang tag-as nga mga wali sa mga pagtulon-an sa dili-hingpit nga mga tawo. Si Kristo nagtudlo ingon sa “usa ka tawo nga may awtoridad” tungod kay ang tanan nga iyang gipamulong gikan man sa Diyos. (Juan 12:50) Busa atong tan-awon kon sa unsang paagi ang dugang gipamulong ni Jesus sa Wali sa Bukid makaimpluwensiya ug angayng mag-impluwensiya sa atong mga pag-ampo.
Ayaw Gayod Pag-ampo Sama Nianang sa mga Salingkapaw
3. Ihatag ang diwa sa gipamulong ni Jesus sa Mateo 6:5.
3 Ang pag-ampo maoy hinungdanong bahin sa matuod nga pagsimba, ug kinahanglang regular kitang moampo kang Jehova. Apan ang atong pag-ampo kinahanglang maimpluwensiyahan sa gipamulong ni Jesus diha sa Wali sa Bukid. Siya miingon: “Sa dihang kamo mag-ampo, ayaw gayod kamo panig-ingon sa mga salingkapaw; tungod kay sila gustong mag-ampo nga nagabarog diha sa mga sinagoga ug sa mga eskina sa halapad nga kadalanan aron makita sa mga tawo. Sa pagkatinuod ako magaingon kaninyo, Sila nakabaton na sa ilang bug-os nga ganti.”—Mat. 6:5.
4-6. (a) Nganong gusto sa mga Pariseo nga mag-ampo nga “nagabarog diha sa mga sinagoga ug sa mga eskina sa halapad nga kadalanan”? (b) Sa unsang paagi ang maong mga salingkapaw “nakabaton na sa ilang bug-os nga ganti”?
4 Sa dihang mag-ampo, angayng likayan sa mga tinun-an ni Jesus ang pagsundog sa “mga salingkapaw” sama sa nagpakamatarong-sa-kaugalingon nga mga Pariseo, nga nagpakaaron-ingnong balaan atubangan sa daghang tawo. (Mat. 23:13-32) Gusto nilang mag-ampo nga “nagabarog diha sa mga sinagoga ug sa mga eskina sa halapad nga kadalanan.” Ngano? Aron “makita sa mga tawo.” Ang mga Hudiyo sa unang siglo sagad mag-ampo ingong usa ka kongregasyon sa dihang magtanyag ug halad nga sinunog sa templo (mga alas nuybe sa buntag ug alas tres sa hapon). Daghang molupyo sa Jerusalem ang mag-ampo uban sa panon sa mga magsisimba diha sa hawanan sa templo. Sa gawas nianang siyudara, ang debotadong mga Hudiyo sagad mag-ampo kaduha sa usa ka adlaw samtang “nagabarog diha sa mga sinagoga.”—Itandi ang Lucas 18:11, 13.
5 Sanglit ang kadaghanan sa mga tawo layo man sa templo o sa sinagoga aron himoon kana nga pag-ampo, sila lagmit mag-ampo na lang kon asa sila maabtan nianang mga taknaa. Ang uban gustong maabtan diha “sa mga eskina sa halapad nga kadalanan.” Buot nila nga ‘makita sila sa mga tawo’ nga manglabay sa maong mga krosing. Ang debotadong mga salingkapaw “sa pagpakaaron-ingnon nagahimog tag-as nga mga pag-ampo” aron dayegon sila sa mga tawo. (Luc. 20:47) Likayan nato kanang matanga sa tinamdan.
6 Si Jesus nag-ingon nga ang maong mga salingkapaw “nakabaton na sa ilang bug-os nga ganti.” Gusto gayod nilang tahoron ug dayegon sa ilang isigkatawo—ug mao lamang kanay ilang madawat. Mao kanay ilang bug-os nga ganti, tungod kay dili tubagon ni Jehova ang ilang sinalingkapaw nga pag-ampo. Sa laing bahin, tubagon sa Diyos ang pag-ampo sa tinuod nga mga sumusunod ni Kristo, ingon sa gipakita sa dugang gipamulong ni Jesus bahin niini.
7. Unsay gipasabot sa tambag nga mag-ampo diha sa atong “kaugalingong lawak”?
7 “Apan ikaw, sa dihang ikaw mag-ampo, sulod sa imong kaugalingong lawak ug, human masirhi ang imong pultahan, pag-ampo sa imong Amahan nga anaa sa tago; unya ang imong Amahan nga nagatan-aw sa tago magabalos kanimo.” (Mat. 6:6) Ang tambag ni Jesus nga mag-ampo sulod sa kaugalingong lawak human masirhi ang pultahan wala magpasabot nga ang usa dili na makahawas sa pag-ampo diha sa kongregasyon. Gihatag kining tambaga aron likayan sa usa ang paghimog publikong pag-ampo aron lang siya makita ug dayegon sa uban. Hinumdoman gayod nato kini kon makapribilehiyo kita sa paghawas sa katawhan sa Diyos sa pag-ampo diha sa publiko. Atong sundon usab ang dugang pang tambag ni Jesus bahin sa pag-ampo.
8. Sumala sa Mateo 6:7, unsang sayop nga paagi sa pag-ampo ang angay natong likayan?
8 “Sa dihang mag-ampo, ayaw balikbalika pagsulti ang samang mga butang, ingon sa ginahimo sa katawhan sa mga nasod, kay sila naghunahuna nga sila pagadunggon tungod sa ilang paggamit sa daghang pulong.” (Mat. 6:7) Busa si Jesus naghisgot ug laing sayop nga paagi sa pag-ampo—ang pagsumaysumay. Wala siya mag-ingon nga dili na nato pwedeng sublion ang atong kinasingkasing nga mga hangyo ug mga pasalamat diha sa pag-ampo. Sa tanaman sa Getsemane sa gabii una siya mamatay, balikbalik nga gigamit ni Jesus ang “mao gihapong pulong” diha sa pag-ampo.—Mar. 14:32-39.
9, 10. Sa unsang diwa nga dili kita molitok ug balikbalik nga mga pag-ampo?
9 Sayop kon atong sundogon ang gisumaysumay nga mga pag-ampo sa “katawhan sa mga nasod.” ‘Balikbalik’ nilang litokon ang gisag-ulong mga pulong nga daghan niana ang wala na kinahanglana. Wala makatabang sa mga magsisimba ni Baal ang pagtawag sa ngalan nianang bakak nga diyos “gikan sa buntag hangtod sa udto, nga nag-ingon: ‘Oh Baal, tubaga kami!’” (1 Hari 18:26) Minilyon karon ang nagtanyag ug tag-as, balikbalik nga mga pag-ampo, kay abi nilag “pagadunggon” sila. Apan gitabangan kita ni Jesus sa pagkaamgo nga ang “paggamit sa daghang pulong” diha sa tag-as ug balikbalik nga mga pag-ampo walay bili sa panglantaw ni Jehova. Si Jesus dugang nag-ingon:
10 “Busa, ayaw kamo panig-ingon kanila, kay ang Diyos nga inyong Amahan nahibalo sa mga butang nga inyong gikinahanglan sa wala pa gani kamo mangayo kaniya.” (Mat. 6:8) Tungod sa paggamit ug daghan kaayong pulong diha sa pag-ampo, daghan sa Hudiyong mga lider sa relihiyon ang nahisama sa mga Hentil. Ang kinasingkasing nga pag-ampo nga naglakip sa pagdayeg, pagpasalamat, ug pangaliya maoy hinungdanong bahin sa matuod nga pagsimba. (Filip. 4:6) Apan, sayop kon ato na lang balikbalikon ang mao rang mga pulong diha sa pag-ampo ug maghunahuna nga kana hinungdanon sa dihang atong ipahayag sa Diyos ang atong mga panginahanglan. Sa dihang kita mag-ampo, angay natong hinumdoman nga kita nag-ampo sa Usa nga ‘nahibalo sa atong gikinahanglan sa wala pa kita mangayo kaniya.’
11. Unsay angay natong hinumdoman kon makapribilehiyo kita sa pag-ampo diha sa publiko?
11 Ang gipamulong ni Jesus bahin sa dili-dalawaton nga mga pag-ampo angayng magpahinumdom kanato nga ang Diyos wala mahimuot sa mapagawalon ug wala-kinahanglanang mga pulong. Kinahanglan usab natong mahibaloan nga dili nato angayng himoon ang pag-ampo sa publiko sa tuyo nga dayegon sa uban. Dili usab maayo nga sobra ra kini kataas nga maghunahuna na hinuon ang mamiminaw kon kanus-a pa kaha kita molitok ug “Amen.” Dugang pa, wala mahiuyon sa diwa sa gipamulong ni Jesus sa Wali sa Bukid ang paghisgot ug mga pahibalo o ang pagtambag sa mamiminaw panahon sa atong pag-ampo.
Si Jesus Nagtudlo Kanato Kon Unsaon Pag-ampo
12. Unsay kahulogan sa hangyo nga “pagabalaanon unta ang imong ngalan”?
12 Bisan tuod gipasidan-an ni Jesus ang iyang mga tinun-an batok sa sayop nga paggamit niining talagsaong pribilehiyo sa pag-ampo, iya gihapon silang gitudloan kon unsaon pag-ampo. (Basaha ang Mateo 6:9-13.) Dili kinahanglang sag-ulohon ang modelong pag-ampo aron balikbalikon kana paglitok. Hinunoa, kana magsilbing sumbanan sa atong mga pag-ampo. Pananglitan, unang gihisgotan ni Jesus ang Diyos diha sa iyang pangbukas nga mga pulong: “Amahan namo nga anaa sa mga langit, pagabalaanon unta ang imong ngalan.” (Mat. 6:9) Haom nga atong tawgon si Jehova nga “Amahan namo” tungod kay siya ang atong Maglalalang, kinsa nagpuyo “sa mga langit,” nga halayo gayod sa yuta. (Deut. 32:6; 2 Cron. 6:21; Buh. 17:24, 28) Ang paggamit sa plural nga terminong “namo” angayng magpahinumdom kanato nga nabatonan usab sa atong mga isigkamagtutuo ang suod nga relasyon sa Diyos. Ang pamulong nga “pagabalaanon unta ang imong ngalan” maoy hangyo nga si Jehova molihok unta sa pagbalaan sa iyang kaugalingon pinaagi sa pagwagtang sa tanang pasipala nga gihan-ok diha sa iyang ngalan sukad sa rebelyon didto sa Eden. Ingong tubag sa maong pag-ampo, si Jehova magawagtang sa pagkadaotan dinhi sa yuta, sa ingon magbalaan sa iyang kaugalingon.—Ezeq. 36:23.
13. (a) Sa unsang paagi matuman ang hangyo nga “paanhia ang imong gingharian”? (b) Unsay nalangkit sa pagtuman sa kabubut-on sa Diyos dinhi sa yuta?
13 “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mat. 6:10) Maylabot niini nga hangyo diha sa modelong pag-ampo, angay natong hinumdoman nga ang “gingharian” mao ang langitnong Mesiyanikong kagamhanan ilalom sa pagmando ni Kristo ug sa iyang kaubang “mga balaan” nga gibanhaw. (Dan. 7:13, 14, 18; Isa. 9:6, 7) Ang pag-ampo nga kini ‘moanhi’ maoy hangyo nga ang Gingharian sa Diyos moanhi batok sa tanang yutan-ong magsusupak sa pagmando sa Diyos. Hapit na kanang mahitabo, nga mag-andam sa dalan alang sa tibuok-kalibotang paraiso sa pagkamatarong, kalinaw, ug kadagaya. (Sal. 72:1-15; Dan. 2:44; 2 Ped. 3:13) Ang kabubut-on ni Jehova ginatuman na sa langit, ug ang pag-ampo nga kana pagatumanon usab dinhi sa yuta maoy hangyo nga tumanon usab sa Diyos ang iyang katuyoan alang sa atong planeta, lakip ang pagwagtang sa iyang mga magsusupak karong adlawa sama sa iyang gibuhat sa karaang panahon.—Basaha ang Salmo 83:1, 2, 13-18.
14. Nganong haom nga mangayo kita ug “tinapay alang niining adlawa”?
14 “Ihatag kanamo karong adlawa ang among tinapay alang niining adlawa.” (Mat. 6:11; Luc. 11:3) Sa pag-ampo niini, atong gihangyo ang Diyos nga hatagan kita sa atong gikinahanglan nga pagkaon “alang niining adlawa.” Kini nagpakita nga kita adunay pagsalig sa katakos ni Jehova sa pagtagana sa atong adlaw-adlaw nga panginahanglan. Wala kini magpasabot ug pagpangayog sobra sa atong gikinahanglan. Ang paghangyo alang sa atong adlaw-adlaw nga panginahanglan magpahinumdom kanato nga ang Diyos nagsugo sa matag Israelinhon sa pagpamunit ug mana “sa gidaghanon nga igo kaniya sa matag adlaw.”—Ex. 16:4.
15. Ipatin-aw kon unsay gipasabot sa hangyo nga “pasayloa kami sa among mga utang, ingon nga kami nagapasaylo usab sa mga nakautang kanamo.”
15 Ang sunod nga hangyo diha sa modelong pag-ampo nagpasiugda sa usa ka butang nga kinahanglan natong buhaton. Si Jesus miingon: “Pasayloa kami sa among mga utang, ingon nga kami nagapasaylo usab sa mga nakautang kanamo.” (Mat. 6:12) Gipakita sa Ebanghelyo ni Lucas nga kini nga “mga utang” maoy “mga sala.” (Luc. 11:4) Pasayloon lamang kita ni Jehova kon ato nang ‘napasaylo’ kadtong nakasala kanato. (Basaha ang Mateo 6:14, 15.) Kinahanglang kinabubut-on natong pasayloon ang uban.—Efe. 4:32; Col. 3:13.
16. Sa unsang paagi nato sabton ang mga hangyo bahin sa tentasyon ug kaluwasan gikan sa usa nga daotan?
16 “Ayaw kami dad-a ngadto sa tentasyon, apan luwasa kami gikan sa usa nga daotan.” (Mat. 6:13) Sa unsang paagi nato sabton kining duha ka magkalambigit nga mga hangyo diha sa modelong pag-ampo ni Jesus? Usa ka butang ang segurado: Dili kita tentalon ni Jehova sa pagbuhat ug sala. (Basaha ang Santiago 1:13.) Si Satanas—ang “usa nga daotan”—mao ang tinuod nga “Maninental.” (Mat. 4:3) Apan, may mga higayon nga sa dihang ang Bibliya maghisgot nga ang Diyos nagbuhat sa pipila ka butang, kini nagpasabot nga siya nagtugot lamang nga kana mahitabo. (Ruth 1:20, 21; Eccl. 11:5) Busa, ang pag-ampo nga “ayaw kami dad-a ngadto sa tentasyon” maoy pangaliya nga unta dili tugotan ni Jehova nga madaog kita sa dihang tentalon sa pagsupak kaniya. Sa kataposan, ang pangaliyupo nga “luwasa kami gikan sa usa nga daotan” maoy hangyo nga unta dili tugotan ni Jehova nga madaog kita ni Satanas. Ug makasalig kita nga ‘dili itugot sa Diyos nga tentalon kita nga labaw sa atong maantos.’—Basaha ang 1 Corinto 10:13.
‘Padayon sa Pagpangayo, Pagpangita, Pagpanuktok
17, 18. Unsay gipasabot sa ‘padayong pagpangayo, pagpangita, ug pagpanuktok’?
17 Si apostol Pablo nag-awhag sa iyang mga isigkamagtutuo: “Lahutay sa pag-ampo.” (Roma 12:12) Si Jesus naghatag ug susamang sugo sa dihang siya miingon: “Padayon sa pagpangayo, ug igahatag kini kaninyo; padayon sa pagpangita, ug kamo makakaplag; padayon sa pagpanuktok, ug pagabuksan kini kaninyo. Kay ang matag usa nga nagapangayo magadawat, ug ang matag usa nga nagapangita makakaplag, ug sa matag usa nga nagapanuktok kini pagabuksan.” (Mat. 7:7, 8) Haom nga ‘magpadayon sa pagpangayo’ sa bisan unsa nga nahiuyon sa kabubut-on sa Diyos. Uyon sa mga pulong ni Jesus, si apostol Juan misulat: “Kini ang pagsalig nga atong nabatonan diha [sa Diyos], nga, bisan unsay atong pangayoon sumala sa iyang kabubut-on, siya magpatalinghog kanato.”—1 Juan 5:14.
18 Ang tambag ni Jesus nga ‘magpadayon sa pagpangayo ug pagpangita’ nagpasabot nga kita kinahanglang tim-os nga mag-ampo ug dili gayod moundang sa paghimo niana. Kita kinahanglan usab nga ‘magpadayon sa pagpanuktok’ aron makasulod kita sa Gingharian ug makatagamtam sa mga panalangin, kaayohan, ug mga ganti niana. Apan makasalig ba kita nga tubagon sa Diyos ang atong pag-ampo? Oo, makasalig kita kon magmatinumanon kita kang Jehova, kay si Kristo miingon: “Ang matag usa nga nagapangayo magadawat, ug ang matag usa nga nagapangita makakaplag, ug sa matag usa nga nagapanuktok kini pagabuksan.” Daghang kasinatian sa mga alagad ni Jehova ang nagpamatuod nga ang Diyos mao gayod ang “Tigpatalinghog sa pag-ampo.”—Sal. 65:2.
19, 20. Sumala sa giingon ni Jesus sa Mateo 7:9-11, sa unsang paagi si Jehova susama sa usa ka mahigugmaong amahan?
19 Gipakasama ni Jesus ang Diyos sa usa ka mahigugmaong amahan nga nagataganag maayong mga butang sa iyang anak. Handurawa nga presente ka sa dihang gipahayag ang Wali sa Bukid ug nakadungog ka kang Jesus nga miingon: “Kinsang tawhana taliwala kaninyo nga pangayoan ug tinapay sa iyang anak—dili siya motunol kaniyag bato, dili ba? O, kaha, mangayo siyag isda—dili siya motunol kaniyag halas, dili ba? Busa, kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan nga anaa sa mga langit mohatag ug maayong mga butang niadtong nagapangayo kaniya!”—Mat. 7:9-11.
20 Ang usa ka tawhanong amahan, bisan tuod “daotan” sa relatibong diwa tungod sa napanunod nga sala, adunay kinaiyanhong pagbati alang sa iyang anak. Dili niya limbongan ang iyang anak kondili maningkamot siya sa paghatag kaniyag “maayong mga gasa.” Sa susama, ang atong mahigugmaong langitnong Amahan nagtaganag “maayong mga butang,” sama sa iyang balaang espiritu. (Luc. 11:13) Kini magdasig kanato nga moalagad sa paagi nga giuyonan ni Jehova, ang Magtatagana sa “matag maayong gasa ug matag hingpit nga regalo.”—Sant. 1:17.
Magpadayon sa Pagkuhag Kaayohan sa Pulong ni Jesus
21, 22. Unsay nakapatalagsaon sa Wali sa Bukid, ug unsay imong gibati bahin niini nga mga pulong ni Jesus?
21 Ang Wali sa Bukid mao gayod ang kinamaayohang wali nga gipahayag dinhi sa yuta. Ang espirituwal nga pagtulon-an ug ang katin-aw niini talagsaon gayod. Ingon sa gipakita sa mga punto niini nga serye sa mga artikulo nga gipasukad sa Wali sa Bukid, makakuha kitag dakong kaayohan kon atong ipadapat ang mga tambag niana. Kini nga mga pulong ni Jesus makapaarang-arang sa atong kinabuhi karon ug makahatag kanatog paglaom sa usa ka malipayong kaugmaon.
22 Niining artikuloha, pipila lamang sa bililhong mga pagtulon-an ni Jesus sa Wali sa Bukid ang atong nahisgotan. Mao diay nga kadtong nakapamati sa iyang wali “nahingangha sa iyang paagi sa pagtudlo.” (Mat. 7:28) Segurado nga mao usab kanay atong bation kon atong pun-on ang atong hunahuna ug kasingkasing niining bililhon nga mga pulong sa Dakong Magtutudlo, si Jesu-Kristo.
Unsay Imong Tubag?
• Unsay giingon ni Jesus bahin sa sinalingkapaw nga pag-ampo?
• Nganong angay natong likayan ang balikbalik nga mga pulong sa dihang mag-ampo?
• Unsang mga hangyo ang anaa sa modelong pag-ampo ni Jesus?
• Sa unsang paagi kita ‘makapadayon sa pagpangayo, pagpangita, ug pagpanuktok’?
[Hulagway sa panid 15]
Gihukman ni Jesus ang mga salingkapaw nga nag-ampo aron lang makita ug madungog sa uban
[Hulagway sa panid 17]
Nahibalo ka ba kon nganong haom ang pag-ampo alang sa atong adlaw-adlaw nga tinapay?