Kon Unsaon Pag-ampo—Ang Pag-ampo sa Ginoo ba ang Kinamaayohang Paagi?

Ang Pag-ampo sa Ginoo naghatag natog giya kon unsaon pag-ampo ug kon unsay angayng iampo. Kini ang gitudlo ni Jesus dihang mihangyo ang iyang mga tinun-an: “Ginoo, tudloi mi kon unsaon pag-ampo.” (Lucas 11:1) Pero, ang Pag-ampo sa Ginoo, o ang Amahan Namo, dili lang ang pag-ampo nga dawaton sa Diyos.a Gitudlo ni ni Jesus ingong pananglitan sa mga pag-ampo nga dunggon sa Diyos.

Niining artikuloha

• Unsay giingon sa Pag-ampo sa Ginoo?

• Unsay kahulogan sa Pag-ampo sa Ginoo?

• Ang pagsag-ulo ba sa Pag-ampo sa Ginoo mao lang ang paagi sa pag-ampo?

• Sa unsang paagi ta angayng moampo?

• Ubang pag-ampo diha sa Bibliya

Sa lainlaing hubad sa Bibliya, managlahi ang pagkasulti sa Pag-ampo sa Ginoo nga narekord sa Mateo 6:9-13. Niay duha ka pananglitan.

Bag-ong Kalibotang Hubad: “Amahan namo nga anaa sa mga langit, balaanon unta ang imong ngalan. Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta. Hatagi mig pagkaon alang niining adlawa; ug pasayloa mi sa among mga sala, kay gipasaylo namo ang mga nakasala kanamo. Ug ayawg itugot nga madaog mi sa tentasyon, apan luwasa mi gikan sa usa nga daotan.”

Ang Bag-ong Maayong Balita Biblia: “Amahan namo nga anaa sa langit, balaanon ang imong ngalan; maghari ka kanamo ug tumanon ang imong pagbuot dinhi sa yuta sama nga gituman kini didto sa langit. Ihatag kanamo ang pagkaon nga among gikinahanglan karong adlawa; ug pasayloa kami sa among mga sala sama nga kami nagpasaylo sa mga nakasala kanamo. Ayaw kami itugyan sa pagsulay; luwasa hinuon kami gikan sa daotan.”b

Ang gitudlo ni Jesus nahiuyon sa ubang bahin sa Kasulatan, busa makaseguro ta nga ang ubang mga teksto sa Bibliya makatabang nga masabtan ang kahulogan sa Pag-ampo sa Ginoo.

“Amahan namo nga anaa sa mga langit”

Husto lang nga tawgon natong “Amahan” ang Diyos kay siya ang naglalang nato ug naghatag natog kinabuhi.—Isaias 64:8.

“Balaanon unta ang imong ngalan”

Angayng pasidunggan ug isipong balaan o sagrado ang ngalan sa Diyos nga Jehova. Mabalaan sa mga tawo ang ngalan sa Diyos dihang isulti nila sa uban ang iyang mga hiyas ug katuyoan.—Salmo 83:18; Isaias 6:3.

“Paanhia ang imong Gingharian”

Ang Gingharian sa Diyos maoy usa ka langitnong gobyerno ug si Jesus ang Hari niini. Gitudloan ta ni Jesus nga iampo ni nga gobyerno sa pagmando sa tibuok yuta.—Daniel 2:44; Pinadayag 11:15.

“Matuman unta ang imong kabubut-on, maingon sa langit, mao man usab sa yuta”

Walay pagkadaotan o kamatayon sa langit. Busa kabubut-on sa Diyos nga ang mga tawo mabuhi sa walay kataposan sa yuta, nga may kalinaw ug kasegurohan.—Salmo 37:11, 29.

“Hatagi mig pagkaon alang niining adlawa”

Angay natong hinumdoman nga ang atong Maglalalang ang nagahatag natog pagkaon ug ubang panginahanglan aron ta mabuhi.—Buhat 17:24, 25.

“Pasayloa mi sa among mga sala, kay gipasaylo namo ang mga nakasala kanamo”

Ang tanang tawo makasala ug nanginahanglag kapasayloan. Pero kon gusto natong pasayloon ta sa Diyos, kinahanglan natong pasayloon ang uban.—Mateo 6:14, 15.

“Ayawg itugot nga madaog mi sa tentasyon, apan luwasa mi gikan sa usa nga daotan”

Dili gyod ta tentalon ni Jehova nga Diyos sa paghimog daotan. (Santiago 1:13) Pero ginatental ta sa “usa nga daotan,” si Satanas nga Yawa—nga gitawag sab ug “Maninental.” (1 Juan 5:19; Mateo 4:1-4) Ginahangyo nato si Jehova nga tabangan ta nga dili matental sa pagsupak kaniya.

Gitudlo ni Jesus ang Pag-ampo sa Ginoo ingong pananglitan. Dili ni angayng sag-ulohon aron balikbalikon ug ampo. Sa wala pa itudlo ni Jesus ang Pag-ampo sa Ginoo, siya nagpasidaan: “Dihang mag-ampo, ayawg balikbalika ang samang mga pulong.” (Mateo 6:7) Dihang nagtudlo siya kon unsaon pag-ampo sa laing higayon, naggamit siyag lahi nga mga pulong.—Lucas 11:2-4.

Ang kinamaayohang paagi sa pag-ampo mao ang sinserong pagsulti nato sa Diyos kon unsa gyoy atong gihunahuna ug gibati.—Salmo 62:8.

Ang Pag-ampo sa Ginoo nagtudlo nato kon unsa nga pag-ampo ang dunggon sa Diyos. Matikdi nga nahiuyon kini sa ubang mga teksto sa Bibliya bahin sa pag-ampo.

• Pag-ampo ngadto lang sa Diyos

  Ang giingon sa Bibliya: “Sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat.”—Filipos 4:6.

  Kahulogan: Angayng sa Diyos ta moampo—dili kang Jesus, Maria, o sa mga santos. Ang Pag-ampo sa Ginoo nagsugod sa mga pulong nga “Amahan Namo.” Nagtudlo ni nato nga si Jehova nga Diyos lang ang atong ampoan.

• Iampo ang mga butang nga uyon sa kabubut-on sa Diyos

  Ang giingon sa Bibliya: “Bisan unsay atong pangayoon uyon sa iyang kabubut-on, maminaw siya nato.”—1 Juan 5:14.

  Kahulogan: Puwede tang makaampo ug bisan unsa nga uyon sa kabubut-on sa Diyos. Gitudloan ta ni Jesus kon unsa ka importante ang kabubut-on sa Diyos pinaagi sa pag-apil sa mga pulong nga “matuman unta ang imong kabubut-on” diha sa Pag-ampo sa Ginoo. Atong makat-onan ang kabubut-on sa Diyos para sa yuta ug sa mga tawo pinaagi sa pagtuon sa Bibliya.

• Iampo ang personal nga mga butang

  Ang giingon sa Bibliya: “Itugyan ang imong palas-anon kang Jehova, ug siya motabang kanimo.”—Salmo 55:22.

  Kahulogan: Gusto sa Diyos nga isulti nato kaniya ang atong mga panginahanglan. Sama nga giapil ni Jesus ang personal nga mga hangyo diha sa Pag-ampo sa Ginoo, puwede tang makaampo nga tagan-an ta sa atong adlaw-adlaw nga panginahanglan, giyahan ta sa paghimog importanteng mga desisyon, tabangan ta dihang duna tay problema, ug pasayloon ta sa atong mga sala.c