Ang Pag-ampo sa Ginoo—Ang Kahulogan Niini Alang Kanimo
ANG Pag-ampo sa Ginoo, sumala sa gipahayag ni Jesu-Kristo diha sa Wali sa Bukid, makaplagan sa Bibliya diha sa Mateo kapitulo 6, mga bersikulo 9 hangtod sa 13. Sa wala pa ipahayag kini nga pag-ampo, si Jesus miingon: “Sa dihang mag-ampo, ayaw balikbalika pagsulti ang samang mga butang, ingon sa ginahimo sa katawhan sa mga nasod, kay sila naghunahuna nga sila pagadunggon tungod sa ilang paggamit sa daghang pulong.”—Mateo 6:7.
Nan, tin-aw nga dili buot ni Jesus nga litokon pulong por pulong ang Pag-ampo sa Ginoo. Tinuod, iyang gisubli sa ulahi kini nga pag-ampo alang sa laing grupo sa mga mamiminaw. (Lucas 11:2-4) Apan ang mga pulong sa maong pag-ampo magkalahi diha sa mga asoy sa Ebanghelyo ni Mateo ug Lucas. Gawas pa, ang ulahing mga pag-ampo ni Jesus ug sa iyang mga tinun-an dili gayod pareho ug mga pulong sa iyang modelong pag-ampo.
Nganong gisulat man ang Pag-ampo sa Ginoo diha sa Bibliya? Pinaagi niining maong modelo, si Jesus nagtudlo kanato kon sa unsang paagi ang atong mga pag-ampo mahimong dalawaton sa Diyos. Niini nga pag-ampo, makakaplag usab kitag mga tubag sa paninugdang mga pangutana bahin sa kinabuhi. Busa atong susihon ang matag bahin sa Pag-ampo sa Ginoo.
Unsay Ngalan sa Diyos?
“Amahan namo nga anaa sa mga langit, pagabalaanon unta ang imong ngalan.” (Mateo 6:9) Kining pasiunang mga pulong sa modelong pag-ampo motabang kanato nga masuod sa Diyos pinaagi sa pagsangpit kaniya ingong ‘atong Amahan.’ Sama sa usa ka bata, nga kinaiyanhong masuod sa usa ka mahigugmaon ug masinaboton nga ginikanan, kita makaduol sa atong langitnong Amahan nga masaligon nga siya buot mamati kanato. “Oh Tigpatalinghog sa pag-ampo,” miawit si Haring David, “nganha kanimo moduol ang tanang matang sa katawhan.”—Salmo 65:2.
Si Jesus nagtudlo kanato sa pag-ampo nga balaanon unta ang ngalan sa Diyos. Apan unsay ngalan sa Diyos? Ang Bibliya nagtubag niining mga pulonga: “Ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” (Salmo 83:18) Nakabasa ka na ba sukad sa ngalang Jehova diha sa Bibliya?
Sa pagkatinuod, ang ngalan sa Diyos nga Jehova makita sa duolag 7,000 ka higayon diha sa karaang mga manuskrito sa Bibliya. Hinunoa, ang ubang mga maghuhubad nagtangtang pa gani niining ngalana gikan sa ilang mga bersiyon sa Bibliya. Busa, haom lamang nga kita moampo nga balaanon sa atong Maglalalang ang iyang ngalan. (Ezequiel 36:23) Ang usa ka paagi aron makalihok nga kaharmonya sa maong pag-ampo mao ang paggamit sa ngalang Jehova sa dihang kita moampo ngadto sa Diyos.
Ang usa ka babaye nga ginganlag Patricia gimatuto nga usa ka Katoliko ug nasinati kaayo sa Pag-ampo sa Ginoo. Unsay iyang reaksiyon sa dihang gipakita kaniya sa usa sa mga Saksi ni Jehova ang ngalan sa Diyos diha sa Bibliya? “Wala ako makatuo sa akong nakita!” siya miingon. “Busa gitan-aw nako kini sa kaugalingon nakong Bibliya, ug atua usab kini didto. Dayon gipakita kanako sa Saksi ang Mateo 6:9, 10 ug gipatin-aw nga ang ngalan sa Diyos gihisgotan diha sa Pag-ampo sa Ginoo. Nalipay gayod ako ug mihangyo kaniya sa pagtuon sa Bibliya uban kanako.”
Matuman ang Kabubut-on sa Diyos Dinhi sa Yuta
“Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Sa unsang paagi matuman kining bahina sa modelong pag-ampo ni Jesus? Kadaghanang tawo naghunahuna sa langit ingong dapit nga malinawon ug walay kasamok. Ang Kasulatan nagtumong sa langit ingong “halangdong puloy-anan [ni Jehova] sa pagkabalaan ug katahom.” (Isaias 63:15) Maoy hinungdan nga kita moampo nga matuman unta ang kabubut-on sa Diyos dinhi sa yuta “maingon sa langit”! Apan mahitabo ba gayod kini?
Ang manalagna ni Jehova nga si Daniel nagtagna: “Ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang [yutan-ong] gingharian, ug kini mobarog hangtod sa panahong walay tino.” (Daniel 2:44) Kining maong langitnong Gingharian, o kagamhanan, molihok sa dili madugay aron magpahinabog tibuok-yutang pakigdait ilalom sa matarong nga pagmando.—2 Pedro 3:13.
Ang pag-ampo nga moanhi ang Gingharian sa Diyos ug matuman unta ang iyang kabubut-on dinhi sa yuta maoy usa ka pagpahayag sa pagtuo nga dili gayod makapahigawad. Ang Kristohanong apostoles nga si Juan misulat: “Nadungog ko ang usa ka makusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’” Dayon si Juan midugang: “Ug ang Usa nga naglingkod sa trono miingon: . . . ‘Isulat kini, tungod kay kining mga pulonga kasaligan ug matuod.’”—Pinadayag 21:3-5.
Pag-ampo Maylabot sa Atong Pisikal nga mga Panginahanglan
Pinaagi sa iyang giingon diha sa modelong pag-ampo, gipakita ni Jesus nga ang atong pangunang kabalak-an sa dihang mag-ampo mao ang may kalabotan sa ngalan ug kabubut-on sa Diyos. Bisan pa niana, ang modelong pag-ampo nagpadayon uban sa personal nga mga hangyo nga haom nga isulti ngadto kang Jehova.
Ang una mao kini: “Ihatag kanamo karong adlawa ang among tinapay alang niining adlawa.” (Mateo 6:11) Kini dili hangyo alang sa materyal nga bahandi. Si Jesus nagdasig kanato sa pag-ampo alang sa “[atong] tinapay alang niining adlawa sumala sa gikinahanglan niining adlawa.” (Lucas 11:3) Uyon sa Pag-ampo sa Ginoo, kita makaampo uban ang pagtuo nga ang Diyos motagana sa atong adlaw-adlaw nga mga panginahanglan kon siya atong higugmaon ug sugton.
Tungod sa sobrang pagkabalaka sa kalisod sa panginabuhi basin atong mapasagdan ang atong espirituwal nga panginahanglan ug sa ingon mapakyas kita sa pagbuhat kon unsay gidahom sa Diyos kanato. Apan kon atong unahon ang pagsimba sa Diyos diha sa atong kinabuhi, makaseguro kita nga ang atong mga hangyo alang sa materyal nga mga panginahanglan, sama sa pagkaon ug besti, pagadunggon gayod. Si Jesus miingon: “Magpadayon sa pagpangita pag-una sa gingharian ug sa . . . pagkamatarong [sa Diyos], ug kining tanang ubang mga butang igadugang ra kaninyo.” (Mateo 6:33) Ang pagpangita sa pagkamatarong sa Gingharian dili sayon, tungod kay kitang tanan makasasala ug nagkinahanglag kapasayloan. (Roma 5:12) Gihisgotan usab kana sa Pag-ampo sa Ginoo.
Ang Atong mga Pag-ampo Maylabot sa Kapasayloan
“Pasayloa kami sa among mga utang, ingon nga kami nagapasaylo usab sa mga nakautang kanamo.” (Mateo 6:12) Diha sa rekord ni Lucas sa Pag-ampo sa Ginoo, kini nga “mga utang” gihisgotan ingong “mga sala.” (Lucas 11:4) Pasayloon ba gayod ni Jehova nga Diyos ang atong mga sala?
Bisan pag si Haring David sa karaang Israel nakahimog grabeng mga sala, siya mahinulsolon ug masaligong miampo: “Ikaw, Oh Jehova, maayo ug andam sa pagpasaylo; ug dagaya ang mahigugmaong-kalulot alang niadtong tanan nga nagatawag kanimo.” (Salmo 86:5) Pagkamakahupay nga hunahuna kana! Ang atong langitnong Amahan “andam sa pagpasaylo” sa mga sala niadtong mahinulsolong mosangpit kaniya. Maingon nga ang usa ka utang seguradong bug-os nga makanselar, seguradong bug-os nga pasayloon usab ni Jehova nga Diyos ang atong mga sala.
Apan, may kondisyon nga gihisgotan si Jesus: Aron pasayloon sa Diyos, kinahanglang pasayloon usab nato ang uban. (Mateo 6:14, 15) Bisan tuod ang matarong nga tawong si Job gipasipad-an sa iyang tulo ka kauban, siya nagpasaylo kanila ug nag-ampo pa gani alang kanila. (Job 42:10) Kon atong pasayloon kadtong nakasala batok kanato, atong mapahimut-an ang Diyos ug mapahimuslan ang iyang kaluoy.
Ang pagkaandam sa Diyos sa pagpatalinghog sa atong mga pangaliya angayng magtukmod kanato sa pagtinguha sa iyang pag-uyon. Ug atong mahimo kana bisan pag kita dili hingpit. (Mateo 26:41) Niining bahina usab, si Jehova makatabang kanato sama sa gipakita ni Jesus pinaagi sa pagtapos sa modelong pag-ampo uban ang usa ka hinungdanong hangyo.
Pag-ampo Alang sa Tabang Aron Makasubay sa Matarong nga Dalan
“Ayaw kami dad-a ngadto sa tentasyon, apan luwasa kami gikan sa usa nga daotan.” (Mateo 6:13) Kita dili pasagdan ni Jehova nga walay mahimo batok sa tentasyon o mahulog sa sala. Ang iyang Pulong nag-ingon: “Ang Diyos dili masulayan sa daotang mga butang ni siya mosulay kang bisan kinsa.” (Santiago 1:13) Ang Diyos magtugot kanato nga masulayan, apan siya makaluwas kanato gikan sa Dakong Manenental—ang “usa nga daotan” nga nailhang Satanas nga Yawa.
Giawhag ni apostol Pedro ang iyang mga isigka-Kristohanon: “Hupti ninyo ang maayong panghunahuna, magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” (1 Pedro 5:8) Aw, gitental man gani ni Satanas ang hingpit nga tawong si Jesu-Kristo! Unsay tumong sa Yawa? Aron ipahilayo si Jesus gikan sa matuod nga pagsimba kang Jehova nga Diyos. (Mateo 4:1-11) Kon maningkamot ka sa pag-alagad sa Diyos, ang tumong ni Satanas mao ang pagtukob usab kanimo!
Pinaagi sa kalibotan nga nailalom sa iyang pagkontrolar, sulayon tingali kita sa Yawa sa paghimo sa mga buhat nga wala uyoni sa Diyos. (1 Juan 5:19) Busa hinungdanon nga kita regular nga modangop sa Diyos alang sa tabang, ilabina kon kita kanunay nga ginatental. Ug kon kita mosimba kang Jehova sumala sa iyang inspirado nga Pulong, ang Bibliya, kita iyang luwason pinaagi sa pagtabang kanato sa pagsukol sa Yawa. “Ang Diyos kasaligan,” matod pa sa Bibliya kanato, “ug dili niya itugot nga tentalon kamo nga labaw sa inyong maantos.”—1 Corinto 10:13.
Hinungdanon ang Pagtuo sa Diyos
Pagkamakapalipay ang pagkahibalo nga ang atong langitnong Amahan interesado sa matag usa kanato! Gitudloan pa gani kita sa iyang Anak, si Jesu-Kristo, kon unsaon pag-ampo. Dayag nga tungod niini buot natong pahimut-an si Jehova nga Diyos. Sa unsang paagi atong mahimo kana?
Ang Bibliya nag-ingon: “Kon walay pagtuo imposible ang pagpahimuot [sa Diyos], kay siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Sa unsang paagi mabatonan ang maong pagtuo? “Ang pagtuo mosunod sa butang nadungog,” nag-ingon ang Bibliya. (Roma 10:17) Ang mga Saksi ni Jehova malipay sa pagpakigsulti bahin sa Kasulatan uban sa tanan nga buot moalagad sa Diyos pinaagi sa matuod nga pagtuo.
Hinaot nga kining maong paghisgot sa Pag-ampo sa Ginoo nakapalalom sa imong pagpabili sa kahulogan niini. Pinaagi sa pagkuhag dugang kahibalo bahin kang Jehova ug sa iyang mga ganti alang niadtong “matinuorong nagapangita kaniya,” imong mapalig-on ang imong pagtuo sa Diyos. Hinaot mokat-on ka pa ug dugang bahin kaniya ug sa iyang mga katuyoan aron imong matagamtam ang suod nga relasyon uban sa imong langitnong Amahan sa walay kataposan.—Juan 17:3.
[Blurb sa panid 5]
“Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta. Ihatag kanamo karong adlawa ang among tinapay alang niining adlawa; ug pasayloa kami sa among mga utang, ingon nga kami nagapasaylo usab sa mga nakautang kanamo. Ug ayaw kami dad-a ngadto sa tentasyon, apan luwasa kami gikan sa usa nga daotan.”—Mateo 6:9-13
[Hulagway sa panid 7]
Si Jehova motagana sa mga panginahanglan niadtong nahigugma kaniya
[Hulagway sa panid 7]
Ang Diyos motabang usab kanato sa pagsukol sa Yawa
[Hulagway sa panid 7]
Kon kita, sama kang Job, magpasaylo niadtong nakasala kanato, atong mapahimuslan ang kaluoy sa Diyos