Paghupot sa Atong Mata nga “Yano” Diha sa Buluhaton sa Gingharian

ANG German Democratic Republic (G.D.R.), o ang nailhan niadto nga Silangang Alemanya, hapit wala makaabot sa iyang kinatung-ang kagulangon. Ang kap-atag-usa ka tuig nga paglungtad natapos niadtong Oktubre 3, 1990, sa dihang ang teritoryo niini, nga halos samag gidak-on sa Liberia o sa estado sa Tennessee sa Tinipong Bansa, giusa diha sa Pederal nga Republika sa Alemanya, nga niadto gitawag ug Kasadpang Alemanya.

Ang panag-usa sa duha ka Alemanya nagkinahanglan ug daghan kaayong mga reporma. Dili lamang pisikal nga utlanan, ang nagpabulag sa duha ka nasod, kondili utlanan sa mga ideolohiya. Unsay kahulogan niining tanan alang sa mga tawo didto, ug sa unsang paagi nausab ang kinabuhi sa mga Saksi ni Jehova?

Ang Wende, ang rebolusyon niadtong Nobyembre 1989 nga maoy nagpaposible sa panag-usa, misunod dayon sa upat ka dekadang higpit nga sosyalismo. Sulod sa maong yugto, ang kalihokan sa mga Saksi ni Jehova gidili, ug usahay grabe ang paglutos kanila.a Sa dihang miabot ang kagawasan sa G.D.R., ang kalipay mikaylap sa tibuok nga populasyon. Apan sa milurang na ang kalipay, daghan ang naglibog, nahigawad, nalugda pa gani. Ang buluhaton sa pag-usa sa duha ka Alemanya aron mahimong usa ka nasod sa katilingbanhon, sa politikanhon, ug sa ekonomikanhon malisod kaayo.

Sumala sa seryal sa “162 Tage Deutsche Geschichte” (162 Days of German History) sa Der Spiegel, human sa panag-usa dihay kaylap nga kahadlok sa pagkawalay-trabaho, implasyon, ug pagtaas sa mga abangan. “May igo ba kaha ako nga pensiyon?” nangutana ang daghan diha sa kanhi G.D.R. Komosta ang bahin sa balay? “Sa tibuok G.D.R., ang karaang mga tinukod nangagabok na, ang tibuok nga mga kalye dili na kapuy-an.” Ang polusyon miabot sa makalilisang nga sukod.

Nagaatubang sa maong kagubot sa katilingbanhon ug ekonomikanhon, sa unsang paagi nakatigayon ang mga Saksi ni Jehova diha sa kanhi G.D.R.?

Paghupot sa Mata nga Hustong Nakapunting

Ang mga Saksi ni Jehova walay mga utlanan sa ideolohiya. Ang ilang pinasukad sa Bibliya nga pagtuo mao gihapon, sa Silangan man o sa Kasadpan. Uban sa ilang nagakausab nga sosyal nga kahimtang, ang kadaghanang mga Saksi nagahupot sa ilang espirituwal nga katimbang pinaagi sa paghupot sa ilang mata nga nakapunting diha sa pangunang tumong sa pag-alagad kang Jehova. Nganong kini hinungdanon?

Tungod kay “ang talan-awon niining kalibotana nagabag-o.” (1 Corinto 7:31) Usa ka Kristohanong ansiano miingon nga ang pagsangyaw samtang may pagdili una pa sa Wende nagkinahanglan ug kaisog; kadto nagtudlo sa mga Saksi sa pagsalig kang Jehova ug gibansay sila sa pagdumala sa Bibliya. Karon, hinunoa, “kami kinahanglang dugang mag-amping nga dili malinga sa materyalismo ug sa mga kabalaka sa kinabuhi.”

Ang kagawasan ug pag-uswag sagad gisukod sa materyal nga mga termino. Daghang tawo niining rehiyona mibati sa panginahanglan sa pagbawi sa nausik nga panahon o tingali sa mga kalingawan nga nasayloan kaniadto. Kini dayag nga makita sa dihang ang usa magmaneho diha sa binakbakan ug bato nga mga dalan sa kalungsoran ug kabaryohan sa Thuringia ug Saxony sa habagatan. Ang mga dalan hayan nagkinahanglan nga ayohon, pinobre ang mga pinuy-anan, apan pagkadaghang antena sa telebisyon nga pormag-panaksan! Sayon matonto ang tawo sa pagtuo nga ang kasegurohan ug kalipay maangkon gikan sa pagbaton sa tanang butang nga makita sa mata. Pagkapeligrosong lit-ag kana!

Diha sa Wali sa Bukid, si Jesus naghisgot mahitungod sa mga kapeligrohan sa paghatag ug labawng pagtagad sa materyal nga mga butang ug sa mga kabalaka sa kinabuhi. “Hunong na sa pagtigom sa imong kaugalingon ug mga bahandi sa yuta,” siya nagpasidaan. Siya midugang: “Ang suga sa lawas mao ang mata. Nan, kon yano ang imong mata, ang tibuok nimong lawas mahayag.” (Mateo 6:19, 22) Unsay buot niyang ipasabot? Ang yanong mata mao ang usa nga nagapunting ug nagapadalag tin-aw nga mga hulagway ngadto sa hunahuna. Ang espirituwal yanong mata nagahupot sa hulagway sa Gingharian sa Diyos nga matin-aw. Busa ang hukom sa usa ka Kristohanon sa paghupot sa iyang mata nga yano, sa tin-aw nagapunting diha sa Gingharian sa Diyos, ug ang paghiklin sa mga kabalaka motabang sa paghupot kaniyang timbang sa espirituwal.

Kini ikailustrar pinaagi sa kasinatian sa usa ka magtiayon gikan sa Zwickau, Saxony, kinsa nagpakita ug interes sa Bibliya sa panahon sa Wende. Ang ilang negosyo makahurot kaayo ug panahon, apan ilang giuna ang espirituwal nga mga intereses, nagatambong sa tanang Kristohanong tigom. “Kon bahin sa among negosyo, dili kami makausik ug panahon,” sila miangkon, “apan sa espirituwal gikinahanglan namo kana.” Pagkamaalamong desisyon!

Palandonga, usab, ang usa ka pamilya sa Plauen, diha usab sa Saxony. Ang bana relohero, usa ka batid nga artesano nga may kaugalingong negosyo. Human sa Wende, ang abang sa iyang mga puwesto grabeng mitaas. Unsay iyang buhaton? “Mogasto kinig dakong salapi, ug nakakat-on ako sa kamatuoran sa pagkinabuhi alang sa kamatuoran.” Busa mibalhin siya ngadto sa puwesto nga dili kaayo kombeniyente apan mas barato ug abang. Oo, ang relohero dali kaayong nakakat-on sa paghupot sa iyang mata nga yano.

Ang pipila, hinunoa, nakakat-on nga ulahi na kaayo. Usa ka Kristohanong ansiano, nangatarongan nga ang bag-ong gipailailang libreng pagnegosyo masaaron kaayo, nagnegosyo. Usa ka nagapanaw nga magtatan-aw malulutong miawhag kaniya sa dili pagtugot nga ilang ibaylo ang espirituwalidad sa mga palakaw sa negosyo. Apan, ikasubo, mao kana ang nahitabo. Pipila ka bulan sa ulahi ang igsoon miundang sa pagkaansiano. Siya misulat sa ulahi: “Sumala sa akong kasinatian, itambag ko ngadto kang bisan kinsang igsoon nga nagapangab-ot sa mga pribilehiyo sa pag-alagad sa dili pagsulod ug iyang kaugalingong negosyo.” Kini wala magpasabot nga ang pagbatog kaugalingong negosyo sayop alang sa usa ka Kristohanon. Apan kon kita adunay kaugalingong negosyo o wala, ang paghatag ug sobrang pagtagad sa mga kabalaka sa panalapi sa di-tinuyo mopahimo kanatong ulipon sa bahandi. Gipakita ni Jesus ang sangpotanan: “Walay usa ang mahimong ulipon sa duha ka agalon; kay mahimo nga iyang dumtan ang usa ug ang usa higugmaon, o unongan niya ang usa ug ang usa iyang tamayon.” (Mateo 6:24) Ang Aleman nga magbabalak nga si Goethe miingon: “Wala nay labaw pa nga naulipon kay sa niadtong kinsa bakak nga nagtuo nga sila may kagawasan.”

Kon masapnan sa literal nga bagyo tingali kinahanglan nga atong diyongon o salimbongan ang ibabaw sa atong mga mata sa kamot aron makita ang atong tumong. Kon pagalibotan sa kagubot nga politikanhon, ekonomikanhon, o sa katilingbanhon, ang pagsentro sa hunahuna hinungdanon aron padayong makita ang atong espirituwal nga tumong. Unsay gihimo sa pipila ka Kristohanon aron huptang yano ang ilang mata diha sa buluhaton sa Gingharian?

Nag-uswag nga Buluhaton sa Gingharian

Sa tibuok G.D.R. niadto, ang mga Saksi migugol ug daghang panahon sa pagsangyaw sukad-masukad. Sa kataposang duha ka tuig, ang aberids nga oras nga gigugol sa buluhaton sa kanataran miuswag ngadto sa 21 porsiento. Ang resulta mao ang madulaong 34-porsiento nga pag-uswag sa mga pagtuon sa Bibliya sa balay. Dugang pa, ang gidaghanon sa regular nga mga payunir sa pagkakaron maoy upat ka beses nga mas taas kay sa miaging duha ka tuig lamang! Samtang ang uban nabalaka ug nagareklamo, ginasagubang sa kapin sa 23,000 ka Kristohanon sa G.D.R. niadto ang kahimtang pinaagi sa paghupot sa ilang mata nga yano. Kini ang nakaamot sa katingalahang pag-uswag sa buluhaton sa Gingharian.​—Itandi ang Josue 6:15.

Ang napadakong buluhaton nagkahulogan nga ang teritoryo naatiman pag-ayo sa habagatan, diin ang kinabag-ang mga Saksi nagpuyo. Daghang ngalan sa dapit maoy talagsaon ug pamilyar sa kasaysayan. Kon gusto kaayo ka ug porselanang mga pinggan, mailhan mo ang lungsod sa Meissen, duol sa Dresden, ingong gigikanan sa pipila sa labing pinong porselana sa kalibotan. Ang Meissen karon mao ang pinuy-anan sa duolan sa 130 ka magmamantala sa Gingharian. O palandonga ang Weimar, “ang klasikal nga kaulohan sa Alemanya.” Ang Goethe-Schiller Memorial diha sa sentro sa lungsod nagpamatuod sa hamiling mga koneksiyon sa Weimar uban niadtong duha ka magsusulat ug maoy usa ka tuboran sa garbo alang sa daghan didto. Karong adlawa mahimong ikapasigarbo sa Weimar ang kapin sa 150 ka magmamantala niini sa maayong balita.

Sa amihanan, hinunoa, lahi kaayo ang mga butang, nga mas diyutay ang mga magmamantala ug lagyong mga distansiya sa matag kongregasyon. Ilabina nga nihit ang mga trabaho. Daghan niadtong adunay trabaho napugos sa pag-obertaym aron makapabilin sa ilang trabaho. Usa ka igsoon nga nag-alagad ingong usa ka bug-os panahong magwawali sa amihanan misaysay: “Samtang may pagdili ang matag igsoon nagkinahanglan sa proteksiyon ni Jehova diha sa pag-alagad sa kanataran, apan ang pagpangitag trabaho dili malisod. Karon nabali. Kami may kagawasan na sa pagsangyaw, apan among gikinahanglan ang iyang pagtultol maylabot sa panarbaho. Kinahanglang anaron mo ang imong kaugalingon sa maong kausaban.”

Ang mga magmamantala nalipay ba nga makasangyaw na kanunay? Hunahuna pa ni Wolfgang: “Mas maayo pa nga mao ra gihapong magmamantala ang magbalikbalik ug sangyaw sa samang teritoryo. Modako ang pagsalig sa mga tawo kaniya ug mas bukas silang makigsulti.” Gawas pa niana, ang mga tagbalay “dili na maulaw nga makigsulti bahin sa relihiyon diha sa pultahan, bisag may makadungog pang mga lumalabay. Ang relihiyon wala na idili nga ulohan.” Si Ralf ug Martina miuyon. “Kami nalipay nga mosangyaw nga mas subsob sa among teritoryo. Makaila namo sa personal ang mga tawo ug usab nalipay sa daghang nagkalainlaing literatura nga mabatonan.”

Apresasyon sa Atong Literatura

Si Ralf ug Martina ilabinang nagpabili sa librong Life​—How Did It Get Here? By Evolution or by Creation? Alang sa daghan nga nagtuo nga walay Diyos diha sa kanhi G.D.R., kining libroha napamatud-ang usa ka katingalahang tabang sa pagtuon sa Bibliya. Nangandoy usab sila ug mas mubo nga publikasyon nga naundan sa samang materyal. “Pagkadako sa among kalipay sa giluwat ang brosyur nga Tinuod Bang May Pagtagad Ang Diyos Kanato? sa 1992 nga ‘Mga Tigdala sa Kahayag’ Distritong Kombensiyon sa Dresden. Kadto maoy tubag sa among mga pag-ampo.”

Daghang dili-Saksi ang nakadayeg sa mga publikasyon sa Watch Tower. Sa miaging Hulyo 1992 usa ka lekturero sa sosyal nga edukasyon misulat aron ipahayag ang iyang “dako nga pagtahod ug mainitong mga pasalamat” alang sa mga publikasyon, nga iyang gigamit sa pag-andam ug mga pakigpulong. Sa Enero 1992 usa ka babaye sa Rostock midawat ug usa ka kopya sa librong Ikaw Mabuhing Walay Kataposan sa Paraiso sa Yuta gikan sa duha ka Saksi nga miduaw sa iyang pultahan. Siya misulat ngadto sa sangang buhatan sa Alemanya: “Ako sakop sa Lutheran Church. Hataas kaayo ang akong pagtamod sa mga kalihokan sa organisasyon sa mga Saksi ni Jehova. Kusganon nilang gipadayag nga ang tawo dili gayod mahimong maglungtad nga walay pagtultol sa Diyos.”

Unsa ka dako sa espirituwal nga pagtultol ang gihatag sa mga simbahan sa Kakristiyanohan sa ilang mga membro? Ang iladong mantalaang Die Zeit mikomento sa Disyembre 1991 nga samtang ang Lutheran Church “nalipay sa dungog sa hamubo nga panahon ingong inahan sa malinawong rebolusyon, ang popularidad niini daw kusog nga nagakawala.” Sa pagkatinuod, ang usa ka hawas sa Lutheran Church mimulo: “Nasaypan ug sabot sa mga tawo ang kinabuhi sa libreng pagnegosyo nga paraiso.” Usa ka membro sa simbahan sa Magdeburg misulat nga nangayog impormasyon. Ngano? “Human sa daghang tuig sa pagpahiyom sa pagkadili-makatuo,” misulat ang lalaki, “karon ako kombinsido na gayod nga kining kalibotana anaa na sa kataposang mga adlaw niini ug nga atong pagaatubangon ang dagkong mga kalisod sa haduol nga umaabot.”​—2 Timoteo 3:1-5.

Pagpanukod Alang sa Pagpalapad

Una pa sa Wende, ang mga Kingdom Hall gidili sa G.D.R. Karon kini gikinahanglan kaayo; ang pagtukod niini mao ang gihatagan ug unang pagtagad. Kini maoy laing bahin sa matuod nga pagsimba nga miagig talagsaong kausaban. Ang kasinatian sa usa ka igsoong lalaki nag-ilustrar kon unsa ka kusog kini nga kausaban.

Niadtong Marso 1990, mga oras lamang human nga nadawat sa mga Saksi ni Jehova ang legal nga pag-ila sa G.D.R., usa ka igsoong lalaki ang gidapit sa paghatag ug pakigpulong sa usa ka grupo sa mga Saksi, migamit ug mikropono sa unang higayon sa iyang kinabuhi. Duha ug tunga ka tuig sa ulahi, ang kongregasyon nga iyang gipasakopan nagpahinungod sa usa ka bag-ong Kingdom Hall. Sa kataposan sa 1992, pito ka Kingdom Hall ang gitukod alang sa 16 ka kongregasyon. Kapin sa 30 pang uban, lakip na ang usa ka matahom nga Assembly Hall, giplano na.

Ang Mata Nakapunting sa Gingharian sa Diyos

“Dili pa dugay human sa Wende,” matud sa usa ka Kristohanong ansiano, “gisalikway sa daghang tawo ang Bibliya. Gibutang nila ang ilang paglaom diha sa bag-ong kagamhanan, nga nagtanyag ug usa ka saad alang sa mas maayong kahimtang sa kataposan.” Ang paglaom ba nila natuman? “Sulod sa duha ka tuig giusab nila ang ilang mga hunahuna. Ang mga tawo karon mouyon na kanamo nga ang tawhanong kagamhanan dili gayod makahatag ug pakigdait ug pagkamatarong.”

Ang kinabag-an nalipay sa pagkahugno sa higpit nga sosyalismo diha sa G.D.R., gisangyaw ang giisip nilang usa ka bulawanong mga panahon sa ideolohiya sa Kasadpan. Apan sila nahigawad. Bisag unsa pa nga kagamhanan ang nagamando, ang mga Saksi ni Jehova naghupot sa ilang mga mata nga yano ug lig-ong nagapunting diha sa Gingharian sa Diyos, nga nagasidlak samag bituon sa kalangitan. Ang maong paglaom dili gayod mapakyas.​—Roma 5:5.

[Footnote]

[Mga hulagway sa panid 26]

Gigamit sa mga Saksi sa Alemanya ang ilang kagawasan aron dugang ug dugang ang malangkit sa buluhaton sa Gingharian