Mga Pangutana Gikan sa mga Magbabasa

Sa hapit nang mamatay si Jesus, nganong gikutlo niya ang giingon ni David sa Salmo 22:1?

Apil sa kataposang mga pulong nga gisulti ni Jesus sa hapit na siyang mamatay mao nang narekord sa Mateo 27:46: “Diyos ko, Diyos ko, nganong gitalikdan mo ako?” Sa pag-ingon niini, gituman ni Jesus ang giingon ni salmistang David sa Salmo 22:1. (Mar. 15:34) Sayop ang paghunahuna nga gikutlo ni Jesus kining mga pulonga kay siya nadismayar o temporaryong nawad-ag pagtuo. Nasabtan pag-ayo ni Jesus ang rason kon nganong kinahanglan siyang mamatay, ug andam siyang mohimo niana. (Mat. 16:21; 20:28) Nahibalo sab siya nga panahon sa iyang kamatayon, kinahanglan nga dili siya ‘panalipdan’ ni Jehova. (Job 1:10) Busa gitugotan ni Jehova si Jesus nga pamatud-an nga magpabilin siyang matinumanon bisag unsa ka lisod ang iyang kamatayon.—Mar. 14:35, 36.

Busa nganong gisulti ni Jesus ang mga pulong niini nga salmo? Bisag dili ta makaseguro, hisgotan nato ang pipila ka posibilidad.a

Sa pagsulti niining mga pulonga, gipasiugda kaha ni Jesus nga si Jehova dili mangilabot sa iyang kamatayon? Kinahanglang bayran ni Jesus ang lukat nga walay tabang ni Jehova. Niadtong tungora, siya tawo ug kinahanglang mamatay aron ‘makatilaw ug kamatayon para sa tanang tawo.’—Heb. 2:9.

Sa pagkutlog pipila ka pulong niana nga salmo, gusto kaha ni Jesus nga mahunahunaan sa mga tawo ang tibuok salmo? Niadtong panahona, naandan na sa mga Hudiyo ang pagmemoryag daghang salmo. Kon makadungog silag usa ka bahin sa salmo, awtomatikong mahunahunaan nila ang tibuok salmo. Kon mao ni naa sa hunahuna ni Jesus, aw, natabangan niya ang iyang Hudiyong mga sumusunod sa paghinumdom sa daghang tagna niini nga salmo bahin sa panghitabo una ug human sa iyang kamatayon. (Sal. 22:7, 8, 15, 16, 18, 24) Dugang pa, sa hinapos nga bahin niana nga salmo, si Jehova gidayeg ug gihisgotan ingong Hari sa tibuok yuta.—Sal. 22:27-31.

Sa pagkutlo niini nga mga pulong ni David, gipakita kaha ni Jesus nga wala siyay sala? Sa wala pa siya mamatay, si Jesus ilegal nga gihusay ug gihukmang sad-an sa pagpasipala. (Mat. 26:65, 66) Ang husay gidalidali paghimo sa lawom nang gabii ug dili gyod subay sa legal nga proseso. (Mat. 26:59; Mar. 14:56-59) Pinaagi sa pagsulti niining mga pulonga ingong retorikal nga pangutana, posibleng gipakita ni Jesus nga wala siyay nahimo nga takos sa kamatayon.

Gipahinumdoman kaha ni Jesus ang uban nga bisag si David, ang magsusulat niini nga salmo, gitugotan nga mag-antos, wala ni magpasabot nga si David nawad-an sa pag-uyon ni Jehova? Ang pangutana ni David wala magpasabot nga nawad-an siyag pagtuo sa Diyos. Human niya isukna ang maong pangutana, gipahayag niya ang iyang pagsalig nga si Jehova makaluwas sa iyang katawhan, ug si Jehova padayong nagpanalangin kaniya. (Sal. 22:23, 24, 27) Sa susama, bisan tuod si Jesus, “ang Anak ni David,” nag-antos diha sa estaka sa pagsakit, wala ni magpasabot nga wala na siya uyoni ni Jehova.—Mat. 21:9.

Gipahayag kaha ni Jesus ang iyang grabeng kaguol kay dili siya panalipdan ni Jehova aron bug-os niyang mapamatud-an ang iyang integridad? Dili orihinal nga katuyoan ni Jehova nga ang iyang Anak mag-antos ug mamatay. Gikinahanglan lang kadto human morebelde si Adan ug Eva. Si Jesus walay nahimong sala, pero kinahanglan siyang mag-antos ug mamatay aron matubag ang mga isyu nga gipatungha ni Satanas ug aron mabayran ang lukat ug mapalit ug balik ang giwala sa tawo. (Mar. 8:31; 1 Ped. 2:21-24) Mahimo lang ni kon temporaryong kuhaon ni Jehova ang iyang proteksiyon gikan kang Jesus sa unang higayon sa iyang kinabuhi.

Gusto kaha ni Jesus nga tabangan ang iyang mga sumusunod nga magpokus sa rason kon nganong gitugot ni Jehova nga mamatay siya niining paagiha?b Nahibalo si Jesus nga daghan ang mapandol niining matanga sa kamatayon ingong kriminal diha sa estaka sa pagsakit. (1 Cor. 1:23) Kon ang iyang mga sumusunod magpokus sa tinuod nga rason sa iyang kamatayon, ilang masabtan ang tinuod nga kahulogan niana. (Gal. 3:13, 14) Busa, isipon nila siya ingong Manluluwas ug dili ingong kriminal.

Bisag unsa pay rason nga gikutlo ni Jesus kining mga pulonga, nahibalo siya nga pinaagi sa iyang kamatayon diha sa estaka sa pagsakit, iyang gibuhat ang kabubut-on ni Jehova. Wala madugay human kutloa ni Jesus kini nga salmo, siya miingon: “Natuman na!” (Juan 19:30; Luc. 22:37) Oo, pinaagi sa temporaryong pagkuha ni Jehova sa iyang proteksiyon, gitugotan niya si Jesus sa pagtuman sa bug-os sa katuyoan kon nganong gipadala siya dinhi sa yuta. Pinaagi sab niini, gitugotan niya si Jesus nga tumanon ang tanang butang nga nahisulat bahin kaniya “diha sa Balaod ni Moises, sa sinulat sa mga Propeta, ug sa mga Salmo.”—Luc. 24:44.