Nagatuo Ka ba Gayod sa Maayong Balita?
“Ang gingharian sa Diyos haduol na. Paghinulsol kamo, ug pagbaton ug pagtuo sa maayong balita.”—MARCOS 1:15.
1, 2. Unsaon nimo pagpatin-aw ang Marcos 1:14, 15?
KADTO maoy tuig 30 K.P. Gisugdan ni Jesu-Kristo ang iyang talagsaong ministeryo sa Galilea. Siya nagwali “sa maayong balita sa Diyos,” ug daghang Galileanhon ang napalihok sa iyang giingon: “Ang tinudlong panahon natuman na, ug ang gingharian sa Diyos haduol na. Paghinulsol kamo, ug pagbaton ug pagtuo sa maayong balita.”—Marcos 1:14, 15.
2 “Ang tinudlong panahon” miabot na nga sugdan ni Jesus ang iyang ministeryo ug mohimo ang mga tawo ug desisyon nga maghimo kanilang inuyonan sa Diyos. (Lucas 12:54-56) “Ang Gingharian sa Diyos haduol na” tungod kay si Jesus presente sa ilang taliwala ingong Tinudlong-Hari. Ang iyang buluhatong pagsangyaw nagpalihok sa mga matarong ug kasingkasing sa paghinulsol. Apan sa unsang paagi sila nagpasundayag ug sa unsang paagi kita makapasundayag ug “pagtuo sa maayong balita”?
3. Pinaagi sa pagbuhat sa unsa nga ang mga tawo nagpakita nga sila adunay pagtuo sa maayong balita?
3 Sama kang Jesus, giawhag ni apostol Pedro ang mga tawo nga magmahinulsolon. Namulong sa mga Hudiyo sa Jerusalem panahon sa Pentekostes 33 K.P., si Pedro miingon: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala, ug inyong madawat ang walay bayad nga gasa nga balaang espiritu.” Libolibo ang naghinulsol, nabawtismohan, ug nahimong mga sumusunod ni Jesus. (Buhat 2:38, 41; 4:4) Sa 36 K.P., ang mahinulsolong mga Hentil mihimog susamang mga lakang. (Buhat 10:1-48) Sa atong adlaw, ang pagtuo sa maayong balita nagpalihok sa libolibo sa paghinulsol sa ilang mga sala, pagpahinungod ngadto sa Diyos, ug pagpabawtismo. Ilang gidawat ang maayong balita sa kaluwasan ug nagpasundayag ug pagtuo sa halad lukat ni Jesus. Dugang pa, sila nagabuhat sa pagkamatarong ug mibarog dapig sa Gingharian sa Diyos.
4. Unsa ang pagtuo?
4 Apan unsa ang pagtuo? Si apostol Pablo misulat: “Ang pagtuo mao ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita.” (Hebreohanon 11:1) Tungod sa atong pagtuo makaseguro kita nga ang tanang gisaad sa Diyos diha sa iyang Pulong sama rag natuman na. Sama rag nabatonan na nato ang titulo nga nagpamatuod nga nanag-iya kita ug usa ka propiedad. Ang pagtuo mao usab ang “dayag nga pagpasundayag,” o pamatuod sa kombiksiyon, labot sa mga butang nga wala makita. Ang atong pagsabot ug ang mapasalamatong kasingkasing magkombinsir kanato nga tinuod ang maong mga butang, bisan pag wala nato kana makita.—2 Corinto 5:7; Efeso 1:18.
Nagkinahanglan Kita ug Pagtuo!
5. Nganong hinungdanon kaayo ang pagtuo?
5 Kita natawo nga dunay espirituwal nga panginahanglan apan kita wala matawo nga dunay pagtuo. Gani, “ang pagtuo wala mabatoni sa tanang tawo.” (2 Tesalonica 3:2) Apan, ang mga Kristohanon kinahanglang makabaton ug pagtuo aron makapanunod sa mga saad sa Diyos. (Hebreohanon 6:12) Human hisgoti ang daghang panig-ingnan sa pagtuo, si Pablo misulat: “Sanglit gilibotan man kita sa ingon kabagang panganod sa mga saksi, tangtangon usab nato ang tanang kabug-at ug ang sala nga daling makasabod kanato, ug daganon nato nga malahutayon ang lumba nga gibutang sa atong atubangan, samtang atong tutokan ang Pangulong Ahente ug Maghihingpit sa atong pagtuo, si Jesus.” (Hebreohanon 12:1, 2) Unsa “ang sala nga daling makasabod kanato”? Mao kana ang kakulang sa pagtuo, pagkawala pa gani sa pagtuo nga nabatonan kanhi. Aron magpabiling lig-on ang pagtuo, kita kinahanglang ‘motutok kang Jesus’ ug mosunod sa iyang ehemplo. Kinahanglan usab natong isalikway ang imoralidad, makigbugno sa mga buhat sa unod, ug likayan ang materyalismo, kalibotanong mga pilosopiya, ug dili-kasulatanhong mga tradisyon. (Galacia 5:19-21; Colosas 2:8; 1 Timoteo 6:9, 10; Judas 3, 4) Dugang pa, kita kinahanglang motuo nga ang Diyos nagauban kanato ug nga ang tambag diha sa iyang Pulong mosaler gayod.
6, 7. Nganong haom nga moampo alang sa pagtuo?
6 Dili nato mapatungha ang atong pagtuo pinaagi sa atong kaugalingong determinasyon. Ang pagtuo maoy bahin sa balaang espiritu, o aktibong gahom, sa Diyos. (Galacia 5:22, 23) Busa, komosta kon ang atong pagtuo kinahanglang palig-onon? Si Jesus miingon: “Kon kamo . . . mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Lucas 11:13) Oo, mag-ampo kita alang sa balaang espiritu, kay kini makapatungha diha kanato sa pagtuo nga gikinahanglan sa pagtuman sa kabubut-on sa Diyos bisan ilalom sa malisod kaayong mga sirkumstansiya.—Efeso 3:20.
7 Haom nga moampo alang sa dugang pagtuo. Sa dihang hapit nang pagulaon ni Jesus ang demonyo gikan sa usa ka bata, ang amahan sa bata nangaliyupo: “Ako may pagtuo! Tabangi ako kon asa ako nakulangan ug pagtuo!” (Marcos 9:24) “Hatagi kami ug dugang pa nga pagtuo,” miingon ang mga tinun-an ni Jesus. (Lucas 17:5) Busa, mag-ampo kita alang sa pagtuo, nga masaligon nga ang Diyos motubag sa maong mga pag-ampo.—1 Juan 5:14.
Hinungdanon ang Pagtuo sa Pulong sa Diyos
8. Sa unsang paagi ang pagtuo sa Pulong sa Diyos makatabang kanato?
8 Sa hapit na ang iyang haladnong kamatayon, giingnan ni Jesus ang iyang mga tinun-an: “Ayaw tugoti nga mabalisa ang inyong mga kasingkasing. Pagpasundayag ug pagtuo sa Diyos, pagpasundayag usab ug pagtuo kanako.” (Juan 14:1) Ingong mga Kristohanon, kita nagatuo sa Diyos ug sa iyang Anak. Apan komosta ang Pulong sa Diyos? Kini makahatag ug kaayohan sa atong kinabuhi kon kita magtuon ug magpadapat niana nga masaligon nga kini magtagana sa kinamaayohang tambag ug pagtultol nga mabatonan nato.—Hebreohanon 4:12.
9, 10. Unsaon nimo pagpatin-aw ang giingon bahin sa pagtuo diha sa Santiago 1:5-8?
9 Ang atong kinabuhi ingong dili-hingpit nga mga tawo natugob sa kasamok. Apan, ang pagtuo sa Pulong sa Diyos makatabang gayod kanato. (Job 14:1) Pananglitan, ibutang ta nga wala kita mahibalo kon unsaon pagdumala sa usa ka pagsulay. Gitambagan kita sa Pulong sa Diyos: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya. Apan magpadayon siya sa pagpangayo diha sa pagtuo, nga dili gayod magduhaduha, kay siya nga nagduhaduha maoy sama sa balod sa dagat nga ginakusokuso ug ginapadpad sa hangin. Sa pagkatinuod, dili angay nga maghunahuna kanang tawhana nga siya adunay madawat gikan kang Jehova; siya usa ka tawong maduhaduhaon, mabalhinon sa tanan niyang mga dalan.”—Santiago 1:5-8.
10 Dili kita pakaulawan ni Jehova nga Diyos tungod sa kakulang sa kaalam ug pag-ampo alang niana. Hinunoa, motabang siya kanato sa paglantaw sa pagsulay sa hustong paagi. Mahimong mapukaw ang atong pagtagad sa makatabang nga mga kasulatan pinaagi sa atong mga isigkamagtutuo o samtang kita nagtuon sa Bibliya. O mahimong giyahan kita sa balaang espiritu ni Jehova sa usa ka paagi. Ang atong langitnong Amahan mohatag kanato ug kaalam sa pagsagubang sa mga pagsulay kon kita ‘magpadayon sa pagpangayo diha sa pagtuo, nga dili gayod magduhaduha.’ Kon kita mahisama sa balod sa dagat nga ginakusokuso sa hangin, dili kita makadahom nga dunay madawat gikan sa Diyos. Ngano? Tungod kay kini magpasabot nga kita maduhaduhaon ug dili-makanunayon sa pag-ampo o sa ubang mga paagi—oo, bisan sa atong pagpasundayag ug pagtuo. Busa kinahanglang mabatonan nato ang lig-ong pagtuo diha sa Pulong sa Diyos ug sa giya nga ihatag niana. Konsiderahon nato ang pipila ka pananglitan kon sa unsang paagi kini naghatag ug tabang ug pagtultol.
Pagtuo ug Pagkaon
11. Ang pagtuo sa Pulong sa Diyos mohatag kanato ug unsang pasalig mahitungod sa atong adlaw-adlawng mga panginahanglan?
11 Komosta kon karon kita nag-antos tungod sa kakulang sa pagkaon ug puy-anan o nag-antos sa kakabos? Ang pagtuo sa Pulong sa Diyos naghatag kanato ug kasaligan nga palaaboton nga si Jehova mag-atiman sa atong adlaw-adlawng mga panginahanglan ug sa ngadtongadto mohimog dagayang tagana alang sa tanan nga nahigugma kaniya. (Salmo 72:16; Lucas 11:2, 3) Basin madasig kita sa pagpalandong kon sa unsang paagi si Jehova nagtagana ug pagkaon alang sa iyang manalagna nga si Elias panahon sa kanihit sa pagkaon. Sa ulahi, ang Diyos naghatag ug harina ug lana sa milagrosong paagi nga tungod niini ang usa ka babaye, ang iyang anak, ug si Elias nakapabiling buhi. (1 Hari 17:2-16) Sa susama si Jehova nagtagana sa mga panginahanglan ni manalagnang Jeremias panahon sa paglikos sa Babilonya sa Jerusalem. (Jeremias 37:21) Bisan tuod diyutay ra ang pagkaon ni Jeremias ug Elias, giatiman sila ni Jehova. Gibuhat usab niya ang susama niana alang niadtong nagpasundayag ug pagtuo kaniya karon.—Mateo 6:11, 25-34.
12. Sa unsang paagi ang pagtuo motabang kanato nga makabaton sa sukaranang mga panginahanglan?
12 Ang pagtuo nga duyogan sa pagpadapat sa mga prinsipyo sa Bibliya dili makapadato kanato sa materyal nga paagi, apan kini motabang kanato nga makabaton sa sukaranang mga panginahanglan. Sa pag-ilustrar: Ang Bibliya nagtambag kanato nga mahimong matinud-anon, episyente, kugihan nga mga tawo. (Proverbio 22:29; Ecclesiastes 5:18, 19; 2 Corinto 8:21) Dili gayod nato pakamenoson ang bili sa pagbaton ug maayo kaayong dungog ingong trabahador. Bisan diha sa mga dapit diin nihit ang dakog-suweldo nga mga trabaho, ang matinud-anon, hanas, kugihan nga mga trabahador adunay mas maayong kahigayonan kay sa uban. Bisan tuod ang maong mga trabahador diyutay ra tingalig materyal nga mga butang, sila kasagarang nakabaton sa sukaranang mga panginahanglan ug sa katagbawan sa pagkaon ug pagkaon nga ilang gihagoan mismo.—2 Tesalonica 3:11, 12.
Ang Pagtuo Motabang Kanato sa Pag-antos sa Kaguol
13, 14. Sa unsang paagi ang pagtuo motabang kanato sa pag-antos sa kaguol?
13 Ang Pulong sa Diyos makataronganong nagpakita nga kinaiyanhon nga mobatig kaguol sa dihang mamatay ang usa ka minahal. Ang matinumanong patriarka nga si Abraham nagbalata sa kamatayon sa iyang pinalanggang asawa, si Sara. (Genesis 23:2) Si David naguol pag-ayo human makadungog nga ang iyang anak nga si Absalom namatay. (2 Samuel 18:33) Bisan ang hingpit nga tawong si Jesus mihilak tungod sa kamatayon sa iyang higala nga si Lazaro. (Juan 11:35, 36) Sa dihang mamatay ang usa ka minahal, mahimong masinati nato ang tumang kasubo, apan ang pagtuo sa mga saad sa Pulong sa Diyos makatabang kanato sa pag-antos sa maong kaguol.
14 “Ako adunay paglaom diha sa Diyos,” miingon si Pablo “nga aduna unyay pagkabanhaw sa mga matarong ug sa mga dili-matarong.” (Buhat 24:15) Kinahanglan kitang makabaton ug pagtuo sa kahikayan sa Diyos nga panonpanon sa katawhan ang pagabanhawon. (Juan 5:28, 29) Lakip unya kanila mao si Abraham ug Sara, Isaac ug Rebeca, Jacob ug Lea—nga ang tanan karon nangatulog sa kamatayon ug nagpaabot sa pagkabanhaw didto sa bag-ong kalibotan sa Diyos. (Genesis 49:29-32) Pagkadakong kalipay unya ang bation sa dihang ang mga minahal momata gikan sa pagkatulog sa kamatayon aron mabuhi dinhi sa yuta! (Pinadayag 20:11-15) Sa kasamtangan, ang pagtuo dili makawagtang sa tanang kasubo, apan kini mopasuod kanato sa Diyos, kinsa motabang kanato sa pag-antos sa pagbangotan.—Salmo 121:1-3; 2 Corinto 1:3.
Ang Pagtuo Makapalig-on sa Nagmagul-anon
15, 16. (a) Nganong makaingon kita nga ang kaguol dili talagsaon taliwala niadtong nagpasundayag ug pagtuo? (b) Unsay mahimo aron masagubang ang kaguol?
15 Ang Pulong sa Diyos nagpakita usab nga bisan kadtong nagpasundayag ug pagtuo mobati usab ug kaguol. Panahon sa iyang grabeng pagsulay, gibati ni Job nga gitalikdan na siya sa Diyos. (Job 29:2-5) Ang gun-ob nga kahimtang sa Jerusalem ug sa mga paril niini nakapasubo kang Nehemias. (Nehemias 2:1-3) Nasubo pag-ayo si Pedro human niya ilimod si Jesus nga siya “mihilak sa hilabihan.” (Lucas 22:62) Ug giawhag ni Pablo ang mga isigkamagtutuo sa kongregasyon sa Tesalonica sa ‘paghupay sa magul-anong mga kalag.’ (1 Tesalonica 5:14) Busa, ang pagbatig kaguol niadtong nagpasundayag ug pagtuo karon dili talagsaon. Nan, unsay atong mahimo aron sa pagsagubang sa kagul-anan?
16 Kita maguol tingali tungod kay kita nag-atubang ug ubay-ubayng grabe nga mga problema. Inay kay isipon kana ingong usa ka bug-at nga problema, mahimong anam-anamon nato pagsulbad kini pinaagi sa pagpadapat sa mga prinsipyo sa Bibliya. Makatabang kini sa pagpamenos sa atong kaguol. Ang timbang nga kalihokan ug igong pagpahulay makatabang usab. Usa ka butang ang seguro: Ang pagtuo sa Diyos ug sa iyang Pulong magpatungha ug kaayohan sa espirituwal tungod kay kini magpalig-on sa atong kombiksiyon nga siya may kahingawa gayod kanato.
17. Sa unsang paagi kita nahibalo nga si Jehova may kahingawa kanato?
17 Si Pedro naghatag kanato niining makapahupay nga pasalig: “Ipaubos ang inyong kaugalingon ilalom sa gamhanang kamot sa Diyos, aron nga kamo iyang bayawon sa takdang panahon; samtang inyong itugyan kaniya ang tanan ninyong mga kabalaka, kay siya may kahingawa kaninyo.” (1 Pedro 5:6, 7) Ang salmista miawit: “Si Jehova nagasapnay sa tanan nga napukan, ug nagabangon sa tanan nga naumod.” (Salmo 145:14) Angay kitang motuo niining maong mga pasalig, kay anaa kini sa Pulong sa Diyos. Bisan tuod magpadayon tingali ang kagul-anan, pagkamakapalig-on sa pagtuo ang pagkahibalo nga ikatugyan nato ang tanan natong kabalaka ngadto sa atong mahigugmaon nga langitnong Amahan!
Ang Pagtuo ug ang Ubang mga Pagsulay
18, 19. Sa unsang paagi ang pagtuo motabang kanato sa pagsagubang sa balatian ug sa paghupay sa masakiton natong mga isigkamagtutuo?
18 Masinati tingali nato ang dakong pagsulay sa atong pagtuo sa dihang kita o ang atong mga minahal mag-antos sa grabeng sakit. Bisan tuod ang Bibliya wala magtaho ug milagrosong pagkaayo sa mga Kristohanon sama kang Epafrodito, Timoteo, ug Trofimo, sa walay duhaduha gitabangan sila ni Jehova nga molahutay. (Filipos 2:25-30; 1 Timoteo 5:23; 2 Timoteo 4:20) Dugang pa, mahitungod sa usa nga “nagabuhat uban ang pagkamahunahunaon sa timawa,” miawit ang salmista: “Si Jehova magpalig-on kaniya sa ibabaw sa higdaanan sa balatian; ang tibuok niyang higdaanan imong bag-ohon gayod sa panahon sa iyang pagkasakit.” (Salmo 41:1-3) Sa unsang paagi ang mga pulong sa salmista makatabang kanato sa paghupay sa masakiton nga mga isigkamagtutuo?
19 Ang usa ka paagi sa pagtagana ug espirituwal nga tabang mao ang pag-ampo uban ug alang niadtong nagmasakiton. Bisan tuod dili mohangyo ug milagrosong pagkaayo karon, kita makahangyo nga hatagan sila sa Diyos ug kalig-on sa hunahuna aron maantos ang ilang balatian ug hatagan usab sila ug kusog aron makalahutay nianang maong mga yugto sa pagkaluya. Si Jehova magpalig-on kanila, ug ang ilang pagtuo mapalig-on pinaagi sa paglantaw sa unahan ngadto sa panahon sa dihang “walay molupyo nga moingon: ‘Ako masakiton.’” (Isaias 33:24) Pagkadakong kahupayan ang pagkahibalo nga pinaagi sa nabanhawng Jesu-Kristo ug pinaagi sa Gingharian sa Diyos, ang masinugtanong katawhan makadawat ug permanenteng kagawasan gikan sa sala, sakit, ug kamatayon! Tungod niining maanindot nga mga palaaboton, kita magpasalamat kang Jehova, ‘kinsa mag-ayo sa tanan natong mga balatian.’—Salmo 103:1-3; Pinadayag 21:1-5.
20. Nganong ikaingon nga ang pagtuo makatabang kanato latas sa “malisod nga mga adlaw” sa pagkatigulang?
20 Ang pagtuo motabang usab kanato sa paglahutay sa “malisod nga mga adlaw” sa pagkatigulang, sa dihang ang panglawas ug kusog nagakaluya. (Ecclesiastes 12:1-7) Busa ang mga tigulang sa atong taliwala makaampo sama sa tigulang nga salmista kinsa miawit: “Kay ikaw mao ang akong paglaom, Oh Soberanong Ginoong Jehova . . . Ayaw ako isalikway sa panahon sa akong pagkatigulang; sa diha nga ang akong kusog maluya na, ayaw ako pagbiyai.” (Salmo 71:5, 9) Gibati sa salmista ang panginahanglan sa pagpaluyo ni Jehova, sama sa daghan sa atong mga isigka-Kristohanon kinsa natigulang na sa pag-alagad sa Diyos. Tungod sa ilang pagtuo, sila makaseguro nga mabatonan nila ang kanunayng pagpaluyo sa mga bukton ni Jehova nga magpabilin hangtod sa hangtod.—Deuteronomio 33:27.
Hupti ang Pagtuo sa Pulong sa Diyos
21, 22. Kon duna kitay pagtuo, sa unsang paagi kana makaapektar sa atong relasyon sa Diyos?
21 Ang pagtuo sa maayong balita ug sa tibuok Pulong sa Diyos motabang kanato nga masuod pa kang Jehova. (Santiago 4:8) Tinuod, siya mao ang atong Soberanong Ginoo, apan siya usab ang atong Maglalalang ug Amahan. (Isaias 64:8; Mateo 6:9; Buhat 4:24) “Ikaw mao ang akong Amahan, ang akong Diyos ug ang Bato sa akong kaluwasan,” miawit ang salmista. (Salmo 89:26) Kon kita magpasundayag ug pagtuo kang Jehova ug sa iyang inspiradong Pulong, mahimo usab nato siyang isipon ingong ‘Bato sa atong kaluwasan.’ Pagkanindot nga pribilehiyo!
22 Si Jehova mao ang Amahan sa inanak-sa-espiritu nga mga Kristohanon ug sa ilang mga kauban nga adunay yutan-ong paglaom. (Roma 8:15) Ug ang pagtuo nato sa atong langitnong Amahan dili gayod mosangpot sa kahigawad. Si David miingon: “Kon ugaling biyaan ako sa akong amahan ug sa akong inahan, si Jehova mismo magsagop kanako.” (Salmo 27:10) Dugang pa, gipasaligan kita: “Si Jehova dili motalikod sa iyang katawhan tungod sa iyang dakong ngalan.”—1 Samuel 12:22.
23. Unsay gikinahanglan aron matagamtam nato ang dumalayong relasyon uban kang Jehova?
23 Siyempre, aron matagamtam ang dumalayong relasyon uban kang Jehova kita kinahanglang motuo sa maayong balita ug modawat sa Kasulatan sumala sa kon unsa gayod kini—ang Pulong sa Diyos. (1 Tesalonica 2:13) Kita kinahanglang adunay bug-os nga pagtuo kang Jehova ug tugotan nato ang iyang Pulong nga moiwag sa atong alagianan. (Salmo 119:105; Proverbio 3:5, 6) Ang atong pagtuo modako samtang kita mag-ampo kaniya nga nagasalig sa iyang pagkamabination, kaluoy, ug pagpaluyo.
24. Unsang makapahupayng hunahuna ang gipresentar diha sa Roma 14:8?
24 Ang pagtuo motukmod kanato sa pagpahinungod sa Diyos hangtod sa hangtod. Tungod kay dunay lig-on nga pagtuo, bisan pag kita mamatay, kita maoy iyang dedikadong mga alagad nga dunay paglaom sa pagkabanhaw. Oo, “kon kita mabuhi ug kon kita mamatay, kita iya ni Jehova.” (Roma 14:8) Huptan nato kanang makapahupayng hunahuna diha sa atong kasingkasing samtang ipadayon nato ang atong pagsalig sa Pulong sa Diyos ug batonan kanunay ang pagtuo sa maayong balita.
Unsaon Nimo Pagtubag?
• Unsa ang pagtuo, ug nganong gikinahanglan nato kining hiyasa?
• Nganong hinungdanon nga kita motuo sa maayong balita ug sa tibuok Pulong sa Diyos?
• Sa unsang paagi ang pagtuo motabang kanato sa pagsagubang sa lainlaing mga pagsulay?
• Unsay motabang kanato nga mahuptan ang atong pagtuo?
[Mga hulagway sa panid 12]
Gipaluyohan ni Jehova si Jeremias ug Elias tungod kay sila dunay pagtuo
[Mga hulagway sa panid 13]
Si Job, Pedro, ug Nehemias dunay lig-ong pagtuo
[Mga hulagway sa panid 15]
Aron matagamtam ang dumalayong relasyon uban kang Jehova, kita kinahanglang motuo sa maayong balita