Kinabuhi ug Ministeryo ni Jesus

Si Jesus Milagrosong Nagpakaon sa Libolibo

ANG 12 ka apostol nakapahimulos sa talagsaong paglibot nga nagwali sa tibuok Galilea. Karon, wala madugay tapos sa pagpatay kang Juan, sila namalik ngadto kang Jesus ug nag-asoy sa ilang kahibulongang mga kasinatian. Sa pagkakita nga sila gikapoy ug daghan kaayong tawo ang nagaabot ug nagalakaw nga sila wala ganiy panahon sa pagkaon, si Jesus miingon: ‘Mangadto ta nga kitakita ra sa usa ka mingaw nga dapit aron kamo makapahulay.’

Nga misakay sa ilang sakayan, lagmit sa duol sa Capernaum, sila mipadulong sa usa ka nahilit nga dapit, nga lagmit silangan sa Jordan saylo sa Betsaida. Ugaling, daghang tawo ang nakakita kanila nga milakaw, ug ang uban nahibalo niana. Kini silang tanan nanagan nga nag-una ubay sa baybayon, ug sa pagdunggo sa sakayan, sila didto na sa pagsugat kanila.

Sa pagkawas sa sakayan ug sa pagkakita sa dakong panon, si Jesus giabot ug kaluoy tungod kay ang mga tawo nahisamag mga karnero nga walay magbalantay. Busa giayo niya ang ilang mga masakiton ug gisugdan niya ang pagpanudlo kanila sa daghang butang.

Ang panahon daling milabay, ug ang mga tinun-an ni Jesus miduol kaniya ug miingon: “Ang dapit nahilit, ug nagkahapon na. Palakta na sila, aron sila mangadto sa kabanikanhan ug mga balangay sa palibot ug makapalit silag makaon.”

Ugaling, ingong tubag si Jesus miingon: “Hatagi ninyo silag makaon.” Dayon, sanglit si Jesus nasayod na kon unsay iyang buhaton, iyang gisulayan si Filipe pinaagi sa pagpangutana kaniya: “Asa ba kita makapalit ug mga tinapay aron makaon niini nila?”

Gikan sa hunahuna ni Filipe ang kahimtang imposible. Aw, may duolag 5,000 ka lalaki, ug lagmit kapin sa 10,000 ka tawo kon ihapon usab ang mga babaye ug mga bata! “Ang duha ka gatos ka denario [usa ka denario mao ang suhol niadto sa usa ka adlaw] nga bili sa mga tinapay dili igo alang kanila, mao nga ang matag usa makabaton ug diyutay,” mitubag si Filipe.

Tingali sa pagpakita sa pagkaimposible sa pagpakaon sa daghan kaayo, si Andres miboluntaryo: “Aniay usa ka batang lalaki nga may lima ka tinapay sa sebada ug duha ka gagmayng isda,” nga midugang: “Apan kini dili igo tungod sa daghan kaayong tawo?”

Sanglit kadto tingpamulak, sa dayon na ang Paskuwa sa 32 K.P., dihay daghang lunhawng balili. Busa gipasultihan ni Jesus sa iyang mga tinun-an nga manglingkod ang mga tawo sa kabalilihan nga ginurupo sa 50 ug 100. Iyang gikuha ang lima ka tinapay ug duha ka isda, mihangad sa langit, ug milihok sa usa ka panalangin. Dayon iyang gitipiktipik ang mga tinapay ug gibahin ang mga isda. Kadto iyang gihatag sa iyang mga tinun-an, si kinsa, sa baylo, nanghatag niana sa katawhan. Katingalahan, ang tanang tawo nakakaon hangtod sila nabusog!

Tapos niadto giingnan ni Jesus ang iyang mga tinun-an: “Tapoka ang mga salin nga nahibilin, aron walay mausik.” Sa dihang gibuhat nila kana, napuno nila ang 12 ka bukag sa mga salin sa ilang gikaon! Mateo 14:13-21; Marcos 6:30-44; Lucas 9:10-17; Juan 6:1-13.

◆ Nganong si Jesus nangitag dapit nga awaaw alang sa iyang mga apostol?

◆ Diin dad-a ni Jesus ang iyang mga tinun-an, ug nganong wala sila makapahulay?

◆ Sa dihang hapon na, unsay giawhag sa mga tinun-an, apan giunsa ni Jesus pagpakaon ang mga tawo?