Ang Diyos May Pagtagad Kanimo

SI Mary, usa ka Kristohanong babaye nga duol nang mag-50 anyos, daghag pag-antos sa iyang kinabuhi. Ang pagpanapaw sa iyang bana misangko sa diborsiyo kapin nag napulo ka tuig kanhi. Human niadto, gipaningkamotan ni Mary nga matuman ang iyang papel isip nag-inusara nga ginikanan alang sa iyang upat ka anak. Apan mamingawon gihapon siya, ug ang kamingaw usahay maorag dili maantos. Si Mary nahibulong, ‘Kini ba nagpasabot nga walay pagtagad ang Diyos kanako o sa akong mga anak nga walay amahan?’

Kon ugaling ikaw nakaagi ug susamang kalisdanan o wala, sa tino mosimpatiya ka sa mga pagbati ni Mary. Kitang tanan nag-antos sa masulayong mga kahimtang, ug kita mahimong nahibulong kon kanus-a ug kon sa unsang paagi nga si Jehova molihok alang kanato. Pipila nianang mga kasinatiana maoy laktud nga resulta sa pagsunod nato sa mga balaod sa Diyos. (Mateo 10:16-18; Buhat 5:29) Ang uban maoy resulta sa atong pagkadili-hingpit nga mga tawo nga nagkinabuhi sa usa ka kalibotang gimandoan ni Satanas. (1 Juan 5:19) Si apostol Pablo misulat: “Ang tanang kalalangan padayong nagaagulo nga tingob ug tingob nga anaa sa kasakit.”​—Roma 8:22.

Bisan pa niana, ang kamatuoran nga ikaw nag-atubang ug bug-at nga pagsulay wala magpasabot nga si Jehova mibiya kanimo o dili interesado sa imong kaayohan. Sa unsang paagi makapaneguro ka niini? Unsay nagpakita nga may pagtagad ang Diyos kanimo?

Usa ka Karaang Panig-ingnan

Ang Bibliya naghatag ug matin-aw nga ebidensiya bahin sa pagtagad ni Jehova alang sa katawhan ingong mga indibiduwal. Tagda si David. Si Jehova may personal nga kaikag niining batan-ong magbalantay sa kahayopan, nga nag-isip nga siya “usa ka tawong nauyonan sa iyang kasingkasing.” (1 Samuel 13:14) Sa ulahi, sa dihang si David nagmando ingong hari, gisaaran siya ni Jehova: “Ako magauban kanimo bisan diin ka moadto.”​—2 Samuel 7:9.

Nagpasabot ba kini nga si David nagkinabuhig “nindot kaayo” nga kinabuhi, nga wala ing kalisdanan? Wala, giatubang ni David ang bug-at nga mga pagsulay una pa ug panahon sa iyang pagmando. Sa ubay-ubayng katuigan sa wala pa mahari, siya gigukod nga walay hunong sa matinguhaong-mopatay nga Haring Saul. Sulod niining yugtoa sa iyang kinabuhi, si David misulat: “Ang akong kalag anaa sa taliwala sa mga liyon . . . bisan sa mga anak sa mga tawo, kansang mga ngipon maoy mga bangkaw ug mga udyong.”​—Salmo 57:4.

Sa gihapon, nianang tanang kalisdanan si David kombinsido sa personal nga pagtagad ni Jehova. “Ang pagkahimo nakong kagiw ikaw mismo nagtaho,” nagpahayag siya diha sa pag-ampo kang Jehova. Oo, alang kang David kadto nahisamag si Jehova nagtala sa tibuok nga mapait nga kasinatian. Dayon si David midugang: “Isulod ang akong mga luha sa imong botelyang panit. Dili ba nga sila anaa man sa imong basahon?”a (Salmo 56:8) Pinaagi sa maong ilustrasyon, gipahayag ni David ang pagsalig nga si Jehova nasayod dili lamang sa kahimtang kondili sa emosyonal usab nga epekto niana.

Sa hinapos sa iyang kinabuhi, si David nakasulat gikan sa personal nga kaagi: “Pinaagi ni Jehova ang mga lakang mismo sa usa ka tawong kusgan giandam, ug sa iyang dalan Siya nagkalipay. Bisan pag siya mapukan, siya dili malup-og, kay si Jehova nagatukod sa iyang kamot.” (Salmo 37:23, 24) Ikaw usab makasalig nga bisan pag ang imong mga pagsulay maluguton ug mapadayonon, gimatikdan ug gipabilhan ni Jehova ang imong pag-agwanta. Si Pablo misulat: “Ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nakaalagad sa mga balaan ug padayong nagaalagad.”​—Hebreohanon 6:10.

Dugang pa, si Jehova mahimong molihok alang kanimo pinaagi sa paghatag kanimog kusog aron maagwanta ang bisan unsang ali nga gibutang sa imong agianan. “Daghan ang mga katalagman sa usang matarong,” misulat si David, “apan gikan kanilang tanan si Jehova magaluwas kaniya.” (Salmo 34:19) Sa pagkamatuod, ang Bibliya nagtug-an kanato nga ang mga mata ni Jehova “nagalirawliraw sa tibuok yuta aron ipakita ang iyang kusog alang kanila kansang kasingkasing maoy hingpit ngadto kaniya.”​—2 Cronicas 16:9.

Si Jehova Nagkabig Kanimo

Ang dugang nga ebidensiya sa personal nga pagtagad ni Jehova hikaplagan diha sa mga pulong ni Jesus. “Walay tawo nga makaari kanako,” matod niya, “gawas kon ang Amahan, kinsa nagpadala kanako, magkabig kaniya.” (Juan 6:44) Oo, si Jehova motabang sa katawhan sa tinagsatagsa aron magpahimulos sa mga kaayohan sa halad ni Kristo. Sa unsang paagi? Sa dakong paagi, kini pinaagi sa buluhatong pagwali sa Gingharian. Tinuod, kining buluhatona nagsilbing “usa ka pamatuod sa tanang nasod,” apan kini makaabot sa mga tawo nga tinagsatagsa. Ang kamatuoran nga ikaw nagapamati ug nagasanong sa mensahe sa maayong balita maoy ebidensiya sa personal nga kabalaka ni Jehova alang kanimo.​—Mateo 24:14.

Pinaagi sa balaang espiritu, si Jehova magakabig ug mga indibiduwal nganha sa iyang Anak ug sa paglaom nga kinabuhing dayon. Kini makapaarang sa matag usa sa pagsabot ug pagpadapat sa espirituwal nga mga kamatuoran bisan pa sa kinaiyanhong mga limitasyon ug mga pagkadili-hingpit. Sa pagkamatuod, ang usa dili makasabot sa mga katuyoan sa Diyos kon wala ang tabang sa espiritu sa Diyos. (1 Corinto 2:11, 12) Sumala sa gisulat ni Pablo ngadto sa mga taga-Tesalonica, “ang pagtuo wala mabatoni sa tanang tawo.” (2 Tesalonica 3:2) Si Jehova nagahatag sa iyang espiritu ngadto lamang sa mga nagpasundayag sa kaandam nga makabig niya.

Si Jehova magakabig sa mga tawo tungod kay iya silang gihigugma ingong mga indibiduwal ug buot nga sila mahidangat sa kaluwasan. Pagkalig-ong ebidensiya sa personal nga pagtagad ni Jehova! Matod ni Jesus: “Dili usa ka tilinguhaong butang alang sa akong Amahan nga anaa sa langit nga malaglag ang usa niining mga gagmay.” (Mateo 18:14) Oo, sa mga mata sa Diyos ang matag tawo mahinungdanon ingong usa ka linaing indibiduwal. Kanay hinungdan nga si Pablo nakasulat: “Siya magabalos sa matag usa sumala sa iyang binuhatan.” (Roma 2:6) Ug si apostol Pedro miingon: “Ang Diyos dili mapihigon, apan sa matag nasod ang tawo [ang tinagsa ka tawo] nga magakahadlok kaniya ug magabuhat ug pagkamatarong dalawaton kaniya.”​—Buhat 10:34, 35.

Ang mga Milagro ni Jesus

Ang personal nga kaikag sa Diyos diha sa mga tawo sa pagkamakapatandog gipasundayag diha sa mga milagrong gihimo sa iyang Anak, si Jesus. Ang maong mga pagpang-ayo giubanan sa dulot nga pagbati. (Marcos 1:40, 41) Sanglit si Jesus “dili makabuhat sa usa ka butang sa iyang kaugalingong pagbuot, kondili kon unsa lamang ang iyang makita nga ginabuhat sa Amahan,” ang iyang kaluoy nagpaila sa makapatandog nga hulagway sa kabalaka ni Jehova alang sa matag usa sa iyang mga alagad.​—Juan 5:19.

Tagda ang asoy sa usa ka milagro nga gihimo ni Jesus, nga nahitala sa Marcos 7:31-37. Si Jesus dinhi nag-ayo sa usa ka tawong bungol ug nag-antos sa pagkaamang. Iyang “gidala [ang tawo] nga layo sa panon nga sila ra,” nag-asoy ang Bibliya. Dayon, “nga miyahat sa langit nanghupaw siyag lawom ug miingon kaniya: ‘Ephʹpha·tha,’ nga mao, ‘Mabuksan ka.’”

Nganong gipalayo ni Jesus kadtong tawhana gikan sa panon? Aw, lagmit nga ang usa ka tawong bungol nga lugos makasulti mobatig kaulaw sa kaugalingon atubangan sa mga tumatan-aw. Si Jesus mahimong nakamatikod sa kaalingasa niadtong tawhana, ug maoy hinungdan nga siya mipalabi nga ayohon siya nga silasila ra. “Ang tibuok nga estorya,” nagpahayag ang usa ka eskolar sa Bibliya, “nagpadayag kanato sa labing tin-aw nga wala lamang isipa ni Jesus ang maong tawo ingong usa ka kaso; kondili iyang giisip siya nga usa ka indibiduwal. Ang tawo may linain nga panginahanglan ug linain nga suliran, ug uban ang labing malumong kamahunahunaon siya gitratar ni Jesus sa paaging ang iyang mga pagbati wala madaot ug sa paaging iyang nasabtan.”

Kining asoya nagpakita nga si Jesus may personal nga kabalaka alang sa katawhan. Makatino ka nga siya sama ra ka maikagon kanimo. Tinuod, ang iyang haladnong kamatayon maoy usa ka pahayag sa gugma alang sa tibuok kalibotan sa malukat nga katawhan. Bisan pa, mahimo nimong sabton ang maong lihok sa personal nga paagi, sama kang Pablo, kinsa misulat: “Ang Anak sa Diyos . . . nahigugma kanako ug nagtugyan sa iyang kaugalingon alang kanako.” (Galacia 2:20) Ug sanglit si Jesus miingon nga “siya nga nakakita kanako nakakita na usab sa Amahan,” kita makatino nga si Jehova adunay samang kaikag sa matag usa sa iyang mga alagad.​—Juan 14:9.

Si Jehova Mahimong Tigganti

Ang pagkuhag kahibalo bahin sa Diyos naglangkit sa pagkahibalo sa matag bahin sa iyang personalidad sumala sa pagpadayag niini diha sa Bibliya. Ang ngalan mismong Jehova nagkahulogang “Siya Nagapahinabo,” nga nagpasabot nga si Jehova mahimong mao bisan kon unsay iyang pilion aron matuman ang iyang kabubut-on. Sa tibuok kasaysayan, siya nagtuman sa lainlaing mga papel, lakip ang papel sa Maglalalang, Amahan, Soberanong Ginoo, Magbalantay, Jehova sa mga panon, Tigpatalinghog sa pag-ampo, Maghuhukom, Halangdong Magtutudlo, ug Manlulukat.b

Aron maila ang bug-os nga kahulogan sa ngalan sa Diyos, kinahanglang maila usab nato si Jehova ingong usa ka Tigganti. Si Pablo misulat: “Kon walay pagtuo imposible sa pagpahimuot kaniya pag-ayo, kay siya nga nagaduol sa Diyos kinahanglang motuo nga siya mao ug nga siya maoy tigganti sa mga matinuorong nagapangita kaniya.”​—Hebreohanon 11:6.

Si Jehova nagsaad ug kinabuhing walay kataposan diha sa usa ka paraisong yuta ngadto niadtong mopili karong adlawa sa pag-alagad kaniya sa bug-os nga kasingkasing. Dili hinakog ang pagpaabot sa katumanan nianang tagsaong saad, ni mapangahason ang paghanduraw nga ikaw nagpuyo didto. Si Moises “mitutok sa bayad sa ganti.” (Hebreohanon 11:26) Si Pablo susamang idlot nga nagpaabot sa pagkatuman sa saad sa Diyos alang sa matinumanong dinihogang mga Kristohanon. Siya misulat: “Nagapangagpas ako sa tumong alang sa ganti nga pagkatinawag sa Diyos ngadto sa itaas pinaagi ni Kristo Jesus.”​—Filipos 3:14.

Ikaw usab mahimong makapanan-aw sa unahan sa ganti nga gisaad ni Jehova ngadto niadtong makalahutay. Ang pagpaabot sa maong ganti maoy di-malaksing bahin sa imong kahibalo bahin sa Diyos ug sa imong pag-agwanta diha sa iyang pag-alagad. Busa palandonga matag adlaw ang mga panalangin nga gitagana ni Jehova alang kanimo. Si Mary, nga gihisgotan sa sinugdanan, sa linain naningkamot sa pagbuhat niini. “Sa unang panahon sa akong kinabuhi,” siya miingon, “sa dili pa dugay akong nadawat nga ang halad lukat ni Jesus mapadapat kanako. Misugod na ako sa pagbati nga may pagtagad si Jehova kanako ingong persona. Ako usa ka Kristohanon sulod sa kapig 20 ka tuig, apan karong bag-o pa lamang nga ako misugod gayod sa pagtuo niini.”

Pinaagi sa pagtuon ug kinasingkasing nga pamalandong sa Bibliya, si Mary, duyog sa minilyon pang uban, nahidangat sa kasayoran nga si Jehova may pagtagad sa iyang katawhan dili lamang ingong usa ka grupo kondili ingong mga indibiduwal usab. Si apostol Pedro kombinsido kaayo niini nga siya misulat: “Itugyan ang tanan ninyong mga kabalaka [sa Diyos], kay siya aduna may kahangawa kaninyo.” (1 Pedro 5:7) Oo, ang Diyos may pagtagad kanimo!

[Mga footnote]

[Kahon sa panid 6]

Ang Pagkabanhaw​—Pamatuod nga ang Diyos May Pagtagad

ANG makapatuo nga pamatuod sa kaikag sa Diyos diha sa matag indibiduwal hikaplagan diha sa Bibliya sa Juan 5:28, 29: “Ang takna nagasingabot nga ang tanang anaa sa handumanang mga lubnganan makadungog sa tingog [ni Jesus] ug manggula.”

Makaiikag, ang Gregong pulong nga mne·meiʹon (handumanang lubnganan) maoy gigamit dinhi inay ang taʹphos (lubong). Ang pulong nga taʹphos yanong naghatag sa ideya sa usa ka paglubong. Apan ang mne·meiʹon nagpasabot nga ang paagi sa pagkinabuhi sa tawo nga namatay hinumdoman.

Niining bahina, hunahunaa lamang kon unsay kinahanglang buhaton ni Jehova nga Diyos labot sa pagkabanhaw. Sa pagpabalik sa usa ka tawo sa kinabuhi, kinahanglang siya mahibalo sa tanang butang bahin sa maong tawo​—lakip ang iyang napanunod nga mga kinaiya ug bug-os nga memorya. Sa maong panahon lamang nga ang maong indibiduwal mapasig-uli uban ang samang pagkatawo.

Hinuon, imposible kini gikan sa tawhanong punto de vista, apan “ang tanang butang mahimo sa Diyos.” (Marcos 10:27) Siya makasusi gani kon unsay anaa sa kasingkasing sa usa ka tawo. Bisan pag ang usa ka tawo namatay na sa daghang kasiglohan, ang panumdoman sa Diyos bahin kaniya dili mahanaw; kini dili molubad. (Job 14:13-15) Busa, sa dihang naghisgot kang Abraham, Isaac, ug Jacob, si Jesus nakaingon bisan mga siglo pa human sila mamatay nga si Jehova “maoy Diyos, dili sa mga patay, kondili sa mga buhi, kay silang tanan buhi alang kaniya.”​—Lucas 20:38.

Busa, ang minilyong nangamatay anaa sa panumdoman ni Jehova nga Diyos nga detalyado sa bug-os. Pagkatalagsaong pamatuod nga ang Diyos may pagtagad sa mga tawo sa tinagsatagsa!

[Hulagway sa panid 7]

Si Jesus may personal nga kaikag niadtong iyang giayo