Ang Hunahuna sa Bibliya

Kinahanglan ba nga Mahimong Kabos ang mga Kristohanon?

GISULTIHAN kanhi ni Jesus ang usa ka adunahan nga batan-ong magmamando nga kinahanglang ibaligya niya ang tanan niyang kabtangan ug ipanghatag sa mga kabos. Ang asoy nag-ingon nga nagmasulub-on ang maong lalaki sa gisulti ni Jesus ug milakaw nga magul-anon, “kay siya naghupot man ug daghang kabtangan.” Dayon miingon si Jesus sa iyang mga tinun-an: “Pagkalisod gayod alang sa mga sapian ang pagsulod sa gingharian sa Diyos!” Si Jesus midugang: “Mas sayon pa sa usa ka kamelyo nga makalusot sa mata sa dagom kay sa usa ka datong tawo nga makasulod sa gingharian sa Diyos.”​—Marcos 10:21-23; Mateo 19:24.

Unsay gipasabot ni Jesus? Magkasumpaki ba ang bahandi ug matuod nga pagsimba? Angay bang bation sa mga Kristohanon nga sila sad-an kon sila sapian? Gibaod ba sa Diyos nga hikawan gayod nila ang ilang kaugalingon sa materyal?

Ang Diyos Nagdawat sa “Tanang Matang sa mga Tawo”

Sa karaang kapanahonan ang Diyos wala magbaod nga ang mga Israelinhon magkinabuhi nga kabos. Hunahunaa: Human makapahiluna sa yuta nga gipahat kanila, ang mga tawo nag-uma ug nagnegosyo aron masustentohan ang ilang kaugalingon ug ang ilang mga minahal. Ang mga kahimtang sa ekonomiya, klima, panglawas, o abilidad sa pagnegosyo, nag-apektar sa kalamposan sa ilang mga paningkamot. Ang Balaod ni Moises nagsugo sa mga Israelinhon nga magmabination kon dunay maglisod sa panalapi ug mahimong kabos. (Levitico 25:35-40) Sa laing bahin, ang pipila nahimong dato. Si Boaz, usa ka tawo sa pagtuo ug integridad nga nahimong kagikan ni Jesu-Kristo, gihubit ingong “usa ka lalaki nga gamhanan tungod sa bahandi.”​—Ruth 2:1.

Ingon gihapon niana ang kahimtang sa panahon ni Jesus. Sa dihang nakig-estorya sa adunahang tawo nga gihisgotan sa sinugdanan, dili tuyo ni Jesus nga ipasiugda ang sobrang paghikaw sa kaugalingon. Hinunoa, siya nagtudlo ug usa ka hinungdanong leksiyon. Sa panglantaw sa tawo, morag imposible nga ang mga adunahan magpakitag pagkamapaubsanon ug modawat sa paagi sa Diyos alang sa kaluwasan. Apan, si Jesus nag-ingon: “Sa mga tawo kini imposible, apan sa Diyos ang tanang butang posible.”​—Mateo 19:26.

Ang unang-siglo nga Kristohanong kongregasyon nagdawat sa “tanang matang sa mga tawo.” (1 Timoteo 2:4) Naglakip kini sa pipila nga adunahan, sa uban nga may hamugaway nga panginabuhi, ug sa daghang kabos. Tingali ang pipila nakatigom ug bahandi sa wala pa mahimong mga Kristohanon. Ang uban nahimong sapian sa ulahi tungod sa paborableng mga kahimtang ug maalamong mga desisyon sa negosyo.

Sa susama, ang Kristohanong panag-igsoonay karon gilangkoban ug mga tawong dunay lainlaing mga kahimtang sa panalapi. Silang tanan naningkamot sa pagsunod sa giya sa Bibliya bahin sa salapi, sanglit ang materyalismo makaapektar kang bisan kinsa. Ang leksiyon nga gitudlo ni Jesus maylabot sa adunahan nga batan-ong magmamando makapaalisto sa matag Kristohanon sa kusog kaayong impluwensiya sa salapi ug mga kabtangan diha sa usa ka tawo.​—Marcos 4:19.

Pasidaan Alang sa mga Adunahan

Bisan tuod ang bahandi mismo wala sawaya diha sa Bibliya, ang gugma sa salapi gisaway. Ang magsusulat sa Bibliya nga si Pablo nag-ingon: “Ang gugma sa salapi maoy gamot sa tanang matang sa makadaot nga mga butang.” Siya nag-ingon nga pinaagi sa pagpasagad sa espirituwal nga mga intereses tungod sa pangandoy nga maadunahan, “ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.”​—1 Timoteo 6:10.

Makaiikag, si Pablo naghatag ug espesipikong mga instruksiyon alang sa mga adunahan. Siya miingon: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan.” (1 Timoteo 6:17) Dayag nga dunay kapeligrohan nga ang mga tawong adunahan basin mahimong garboso ug mobati nga sila labaw sa uban. Dugang pa, basin matental sila sa paghunahuna nga ang bahandi makahatag ug tinuod nga kasegurohan​—usa ka butang nga Diyos lamang ang makahatag sa bug-os.

Ang mga Kristohanong kuwartahan makabantay batok niini nga mga kapeligrohan pinaagi sa pagkahimong ‘dato sa maayong mga buhat.’ Kining maong mga buhat naglakip sa pagkahimong ‘mahinatagon, andam sa pagpaambit,’ nga matinabangon kaayo niadtong nanginahanglan. (1 Timoteo 6:18) Ang mga Kristohanon​—adunahan o kabos​—makagamit usab sa uban nilang kahinguhaan sa pagpakaylap sa maayong balita sa Gingharian, nga mao ang pangunang gikaikagan sa matuod nga mga Kristohanon karon. Kining manggihatagon nga espiritu nagpadayag ug hustong tinamdan maylabot sa materyal nga kabtangan ug maghimo sa usa ka tawo nga hiligugmaon kang Jehova nga Diyos ug kang Jesu-Kristo, kinsa nahigugma sa malipayong mga maghahatag.​—Mateo 24:14; Lucas 16:9; 2 Corinto 9:7.

Ang Mas Hinungdanong mga Butang

Tin-aw nga ang mga Kristohanon wala baori nga mahimong kabos. Kinahanglan usab nga sila dili mahimong ‘determinado nga madato.’ (1 Timoteo 6:9) Sila nagkugi lang sa pagtrabaho aron makabaton ug rasonableng pangabuhian. Depende sa lainlaing mga hinungdan ug sa sistema sa ekonomiya sa lugar nga ilang gipuy-an, ang ilang mga paningkamot makabaton ug lainlaing mga sukod sa kalamposan.​—Ecclesiastes 11:6.

Bisag unsa pa ang ilang pinansiyal nga mga kahimtang, ang mga Kristohanon kinahanglang maningkamot sa ‘pagtino sa mas hinungdanong mga butang.’ (Filipos 1:10) Pinaagi sa pag-una sa espirituwal nga mga sukdanan, sila “maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.”​—1 Timoteo 6:19.