2. Unsay mga panalangin ni Jehova sa iyang bawtismadong mga Saksi?

Dihang magpabawtismo ka, mahimo kang sakop sa malipayong pamilya ni Jehova. Dayon imong maeksperyensiyahan ang iyang gugma para nimo sa daghang paagi, ug mas masuod pa ka kaniya. (Basaha ang Malaquias 3:16-18.) Gawas nga mahimo nimong Amahan si Jehova, naa pod kay espirituwal nga pamilya sa tibuok kalibotan nga nahigugma niya ug nahigugma nimo. (Basaha ang Marcos 10:29, 30.) Siyempre, naa kay kinahanglang himoon aron mabawtismohan ka. Kinahanglan kang makakat-on bahin kang Jehova, mahigugma niya, ug magpakitag pagtuo sa iyang Anak. Sa kataposan, kinahanglan nimong ipahinungod ang imong kinabuhi kang Jehova. Kon himoon nimo ning tanan ug dayon magpabawtismo ka, mahimong posible nga mabuhi ka hangtod sa hangtod. Ang Pulong sa Diyos nag-ingon: “Ang bawtismo . . . nagaluwas sab [kanimo] karon.”—1 Pedro 3:21.

Si Jesus nahibalo pag-ayo nga posibleng naay mga membro sa atong pamilya nga dili gustong moalagad ta kang Jehova. Basaha ang Mateo 10:34-36, ug dayon hisgoti kini nga pangutana:

• Kon ang usa moalagad kang Jehova, unsa tingali ang isulti o himoon sa mga membro sa iyang pamilya?

VIDEO: Gisagop Mi ni Jehova (5:13)

• Unsay imong himoon kon pugngan ka sa imong paryente o higala sa pag-alagad kang Jehova?

Basaha ang Salmo 27:10 ug Marcos 10:29, 30. Human mabasa ang matag teksto, hisgoti kini nga pangutana:

• Nganong makatabang ni nga saad dihang supakon ka sa imong pamilya o higala?