Maayo Gyod nga Magpabawtismo!

Si Jesus nagtudlo nga ang mga Kristohanon kinahanglang magpabawtismo. (Basaha ang Mateo 28:19, 20.) Pero unsa ang bawtismo? Ug unsay kinahanglang himoon sa usa ka tawo aron mabawtismohan siya?

1. Unsa ang bawtismo?

Ang pulong nga “pagbawtismo” naggikan sa Gregong termino nga nagkahulogang “pagtuslob” sa tubig. Dihang si Jesus gibawtismohan, siya gituslob sa Suba sa Jordan, ug dayon ‘mihaw-as siya sa tubig.’ (Marcos 1:9, 10) Sa susama, ang tinuod nga mga Kristohanon bawtismohan pinaagi sa pagtuslob sa tibuok lawas diha sa tubig.

2. Unsay gipakita sa usa ka tawo dihang magpabawtismo siya?

Dihang magpabawtismo ang usa ka tawo, iyang gipakita nga iya nang gipahinungod, o gidedikar, ang iyang kaugalingon kang Jehova nga Diyos. Sa unsang paagi himoon ang pagpahinungod? Sa dili pa magpabawtismo, iyang isulti kang Jehova diha sa personal nga pag-ampo nga gusto niyang alagaron si Jehova hangtod sa hangtod. Siya mosaad nga si Jehova lang ang iyang simbahon ug nga himoon niyang pinakaimportante sa iyang kinabuhi ang pagbuhat sa kabubut-on sa Diyos. Siya modesisyon nga “dumilian ang iyang kaugalingon ug . . . padayong mosunod” sa mga pagtulon-an ug ehemplo ni Jesus. (Mateo 16:24) Ang iyang pagpahinungod ug pagpabawtismo magpaposible nga mahimo siyang suod nga higala ni Jehova ug sa mga nagsimba kang Jehova.

3. Unsay kinahanglang himoon sa usa ka tawo aron mabawtismohan siya?

Makapangandam ka sa bawtismo pinaagi sa pagkat-on bahin kang Jehova ug sa pagbaton ug lig-ong pagtuo kaniya. (Basaha ang Hebreohanon 11:6.) Samtang magkadako ang imong kahibalo ug pagtuo, magkadako pod ang imong gugma kang Jehova. Unya gusto na nimong mosangyaw bahin niya ug magkinabuhi sumala sa iyang mga sukdanan. (2 Timoteo 4:2; 1 Juan 5:3) Dihang ang usa ka tawo magkinabuhi na nga “takos sa ngalan ni Jehova aron bug-os [niya] siyang mapalipay,” tingali gusto na niyang ipahinungod ang iyang kinabuhi sa Diyos ug magpabawtismo.—Colosas 1:9, 10.a

TUN-IG DUGANG

4. Makakat-on ta sa bawtismo ni Jesus

Basaha ang Mateo 3:13-17 para sa dugang detalye sa bawtismo ni Jesus. Dayon hisgoti kini nga mga pangutana:

• Si Jesus ba bag-o pang natawo dihang siya gibawtismohan?

• Sa unsang paagi siya gibawtismohan? Giwisikwisikan lang ba siyag tubig?

Gisugdan ni Jesus ang gihatag kaniya sa Diyos nga espesyal nga buluhaton dinhi sa yuta dihang siya gibawtismohan. Basaha ang Lucas 3:21-23 ug Juan 6:38, ug dayon hisgoti kini nga pangutana:

• Human mabawtismohi si Jesus, unsang buluhaton ang iyang giuna sa iyang kinabuhi?

5. Kaya nimong himoon ang pagpabawtismo

Sa primero, morag lisod tingali himoon ang pagpahinungod ug pagpabawtismo. Pero moabot gyod ang panahon nga mobati ka nga andam na kang mohimo sa maong importanteng desisyon. Aron makita nimo ang uban nga nakahimo ana, i-play ang VIDEO.

VIDEO: Pagpakigsuod Kang Jehova (1:11)

Basaha ang Juan 17:3 ug Santiago 1:5, ug dayon hisgoti kini nga pangutana:

• Unsay makatabang sa usa ka tawo aron maandam siya sa bawtismo?

1. Magpahinungod ta pinaagi sa pagsulti kang Jehova nga gusto nato siyang alagaron hangtod sa hangtod

2. Pinaagi sa pagpabawtismo, atong gipakita sa publiko nga nagpahinungod na ta sa Diyos

6. Pinaagi sa pagpabawtismo, ang usa mahimong bahin sa pamilya ni Jehova

Dihang magpabawtismo ang usa, mahimo siyang bahin sa nagkahiusang pamilya sa tibuok kalibotan. Bisag naa mi sa lainlaing lugar ug lainlain mig kagikan, parehas ra mig gituohan ug gisunod nga moral nga mga sukdanan. Basaha ang Salmo 25:14 ug 1 Pedro 2:17, ug dayon hisgoti kini nga pangutana:

• Sa unsang paagi ang pagpabawtismo makaapektar sa relasyon sa usa ka tawo kang Jehova ug sa uban nga nagsimba Kaniya?

SUMARYO

Si Jesus nagtudlo nga ang mga Kristohanon kinahanglang magpabawtismo. Aron makapangandam ang usa ka tawo niana, kinahanglan niyang palig-onon ang iyang pagtuo kang Jehova, magkinabuhi siya sumala sa Iyang mga sukdanan, ug magpahinungod sa iyang kaugalingon Kaniya.

Review

• Unsa ang bawtismo, ug nganong importante kini?

• Unsay gipakita sa usa ka tawo dihang magpabawtismo siya?

• Unsay kinahanglang himoon sa usa ka tawo sa dili pa siya magpahinungod ug magpabawtismo?

SUSIHA

Sayra kon unsa ang bawtismo ug kon unsa ang sayop nga mga ideya bahin niini.

“Unsa ang Bawtismo?” (Web article)

Tan-awa pag-usab kon unsay kinahanglang himoon sa usa ka tawo aron mabawtismohan siya.

“Ang Gugma ug Apresasyon Kang Jehova Magpalihok Nimo sa Pagpabawtismo” (Ang Bantayanang Torre, Marso 2020)

Basaha ang eksperyensiya sa usa ka tawo kinsa midesisyon nga magpabawtismo dili lang tungod sa emosyon.

“Gusto Nilang Masayran Nako Mismo Kon Unsay Giingon sa Bibliya” (Ang Bantayanang Torre, Pebrero 1, 2013)

Sayra kon unsay kaayohan sa pagpabawtismo ug kon sa unsang paagi ka makapangandam para niana.

“Angay ba Akong Magpabawtismo?” (Mga Pangutanang Gisukna sa mga Batan-on—Mga Tubag nga Mosaler, Tomo 2, kapitulo 37)