‘Unsaon man Nila Pagkadungog?’
1 Si Jesus kusganong miingon: “Sa tanang kanasoran ang maayong balita kinahanglang igawali una.” (Mar. 13:10) Bisan pa sa atong makugihong mga paningkamot, anaa gihapoy gatosan ka milyon ka tawo nga wala pa masangyawi sa personal nga paagi. Ang pipila ka gobyerno nagdili sa atong buluhaton. Daghang nasod adunay dakong populasyon nga padayong kusog nga midaghan. Busa, ‘unsaon man nila pagkadungog?’—Roma 10:14.
2 Salig Kang Jehova: Angay natong hinumdoman nga si Jehova nahibalo sa kahimtang sa kasingkasing sa tanang tawo. Bisag unsa pay kahimtang sa usa ka tawo, kon sinsero niyang pangitaon ang kamatuoran bahin sa Diyos, makaplagan niya kini.—1 Cron. 28:9.
3 Nabalaka si Abraham bahin sa mga molupyo sa Sodoma ug Gomora. Apan gipasaligan siya sa Diyos nga dili laglagon ang Sodoma bisan kon napulo lamang ka tawong matarong ang makaplagan didto. (Gen. 18:20, 23, 25, 32) Wala gayod laglaga ni Jehova ang matarong duyog sa daotan, ingon sa gipakita sa pagluwas kang Lot ug sa iyang mga anak nga babaye.—2 Ped. 2:6-9.
4 Kas-a nagtuo si Elias nga siya na lang gayod ang nag-alagad sa matuod nga Diyos. Apan, gipasaligan siya ni Jehova nga wala gayod siya mag-inusara ug ang buluhaton nga iyang gisugdan pagataposon. (1 Hari 19:14-18) Komosta man ang kahimtang sa atong adlaw?
5 Pabiling Puliki sa Pag-alagad sa Diyos: Kon unsa ka dako ang pagsangyaw nga buluhaton nga pagahimoon pa, wala kita mahibalo. Si Jehova ang responsable niining buluhatona ug naggamit sa iyang mga manulonda sa pagdumala niini. (Pin. 14:6, 7) Siya mao ang magtino kon sa unsang gilapdon ang pagsangyaw himoon ngadto sa tanang kanasoran. Kon buot ni Jehova, iyang tinoon nga ang mensahe sa Gingharian masabwag diha sa mga paagi nga wala nato hunahunaa aron mas daghang tawo ang ‘makadungog sa pulong sa maayong balita ug managpanuo.’ (Buh. 15:7) Kon unsay pagabuhaton ni Jehova maoy bug-os nga nahiuyon kon kinsa siya—usa ka mahigugmaon, maalamon, ug matarong nga Diyos.
6 Maoy atong pribilehiyo ang pagbuhat nga nahiuyon sa kabubut-on ni Jehova, nga nagbuhat sa atong kinamaayohan aron makadungog ang tanan sa maayong balita.—1 Cor. 9:16.