Ang Presensiya ni Kristo—Unsay Kahulogan Niini Alang Kanimo?
“Unsa man unya ang ilhanan sa imong presensiya ug sa kataposan sa sistema sa mga butang?”—MAT. 24:3.
1. Unsang makaiikag nga pangutana ang gisukna sa mga apostoles ni Jesus kaniya?
MGA duha ka libo ka tuig kanhi, may gipangutana ang upat ka apostoles ni Jesus kaniya didto sa Bukid sa mga Olibo nga silasila ra. Sila misukna: “Kanus-a man mahitabo kining mga butanga, ug unsa man unya ang ilhanan sa imong presensiya ug sa kataposan sa sistema sa mga butang?” (Mat. 24:3) Nianang pangutanaha, ang mga apostoles naggamit ug duha ka makaiikag kaayo nga mga pamulong, “imong presensiya” ug “kataposan sa sistema sa mga butang.” Unsay gipasabot sa maong mga pamulong?
2. Unsay kahulogan sa pulong “kataposan”?
2 Sa paghisgot una sa ikaduhang pamulong, tagda ang terminong “kataposan.” Sa orihinal nga pinulongang Grego, duha ka pulong ang gihubad nga “kataposan.” Ang usa mao ang syn·teʹlei·a nga nagkahulogan nga “konklusyon o kataposang yugto sa panahon,” ug ang lain mao ang te’los nga nagkahulogan nga “kataposan.” Ang kalainan niining mga pulonga ikailustrar sa usa ka pakigpulong diha sa Kingdom Hall. Ang konklusyon sa pakigpulong mao ang kataposang seksiyon, diin repasohon kadiyot sa mamumulong kon sa unsang paagi ang impormasyon mapadapat sa mamiminaw. Ang kataposan sa pakigpulong maoy sa dihang mobiya na ang mamumulong gikan sa plataporma. Sa samang paagi, sumala sa pagkagamit diha sa Bibliya, ang pamulong nga “kataposan sa sistema sa mga butang” nagtumong sa konklusyon o yugto sa panahon nga motultol ngadto sa kataposan niini.
3. Unsang mga butanga ang mahitabo panahon sa presensiya ni Jesus?
3 Unsang matanga sa “presensiya” ang gitumong sa mga apostoles? Kini ang hubad sa Gregong pulong nga pa·rou·siʹa.a Ang pa·rou·siʹa o presensiya ni Kristo nagsugod sa dihang gipalingkod si Jesus ingong Hari sa langit niadtong 1914 ug magpadayon hangtod sa “dakong kasakitan,” dihang siya moanhi aron sa paglaglag sa mga daotan. (Mat. 24:21) Daghang butang ang mahitabo panahon sa presensiya ni Jesus, lakip na ang “kataposang mga adlaw” niining daotang sistema sa mga butang, ang pagpanigom sa mga pinili, ug ang ilang pagkabanhaw ngadto sa langitnong kinabuhi. (2 Tim. 3:1; 1 Cor. 15:23; 1 Tes. 4:15-17; 2 Tes. 2:1) Kita makaingon nga ang yugto nga naglangkob sa “kataposan [o konklusyon] sa sistema sa mga butang” (syn·teʹlei·a) maoy sama sa yugto nga gitawag ug presensiya (pa·rou·siʹa) ni Kristo.
Usa ka Taas nga Yugto sa Panahon
4. Sa unsang paagi ang presensiya ni Jesus susama sa mga panghitabo sa adlaw ni Noe?
4 Kay ang pa·rou·siʹa nagtumong man sa taas nga yugto sa panahon, kini nahiuyon sa giingon ni Jesus maylabot sa iyang presensiya. (Basaha ang Mateo 24:37-39.) Matikdi nga si Jesus wala magtandi sa iyang presensiya ngadto sa mubong yugto sa panahon dihang nahitabo ang Lunop sa adlaw ni Noe. Hinunoa, iyang gitandi kini sa mas taas nga yugto sa panahon nga misangko sa Lunop. Naglakip kini sa pagtukod ni Noe sa arka ug sa iyang pagsangyaw, hangtod sa pag-abot mismo sa Lunop. Kini nahitabo sulod sa daghang katuigan. Sa samang paagi, ang presensiya ni Kristo naglakip sa mga panghitabo nga mosangko sa dakong kasakitan.—2 Tes. 1:6-9.
5. Sa unsang paagi gipaila sa mga pulong nga natala sa Pinadayag kapitulo 6 nga ang presensiya ni Jesus maoy taas nga yugto sa panahon?
5 Dayag nga gipakita sa ubang mga tagna sa Bibliya nga ang presensiya ni Kristo nagtumong sa usa ka taas nga yugto sa panahon ug dili lamang sa iyang pag-anhi aron sa paglaglag sa mga daotan. Ang basahong Pinadayag naghulagway kang Jesus nga nagsakay sa puti nga kabayo ug gihatagag korona. (Basaha ang Pinadayag 6:1-8.) Human siya maentrono ingong Hari niadtong 1914, si Jesus gihulagway nga “miasdang nga nagapangdaog ug sa pagtapos sa iyang pagpangdaog.” Dayon gipakita sa asoy nga siya gisundan sa mga magkakabayo nga nagsakay sa mga kabayo nga lainlaig kolor. Kini matagnaong naghawas sa gubat, kanihit sa pagkaon, kamatay, nga ang tanan nahitabo sa taas nga yugto sa panahon nga gitawag ug “kataposang mga adlaw.” Kita nakakita sa katumanan niining tagnaa sa tibuok natong kinabuhi.
6. Sa unsang paagi ang Pinadayag kapitulo 12 motabang kanato sa pagsabot bahin sa presensiya ni Kristo?
6 Ang Pinadayag kapitulo 12 naghatag ug dugang detalye bahin sa pagkatukod sa Gingharian sa Diyos didto sa langit. Atong mabasa nga may nahitabong gubat didto. Si Miguel—si Jesu-Kristo sa iyang langitnong katungdanan—ug ang iyang mga manulonda nakiggubat sa Yawa ug sa iyang mga demonyo. Ingong resulta, si Satanas nga Yawa ug ang iyang mga demonyo gitambog nganhi sa yuta. Sukad niadto, ang asoy nagtug-an kanato nga ang Yawa nasuko pag-ayo, “kay nahibalo nga hamubo na lamang ang iyang panahon.” (Basaha ang Pinadayag 12:7-12.) Nan, tin-aw nga ang pagkatukod sa Gingharian ni Kristo sa langit gisundan sa usa ka yugto sa panahon nga gitiman-an sa daghang ‘kaalaot’ sa yuta ug sa mga nagpuyo niini.
7. Unsay gihisgotan sa ikaduhang salmo, ug unsang kahigayonan ang gibatbat niini?
7 Ang ikaduhang salmo naghisgot usab bahin sa matagnaong pag-entrono kang Jesus ingong Hari diha sa langitnong Bukid sa Zion. (Basaha ang Salmo 2:5-9; 110:1, 2.) Apan gipaila usab niining salmoha nga adunay yugto sa panahon dihang ang mga magmando sa yuta ug ang ilang mga ginsakpan gihatagag kahigayonan sa pagpasakop sa pagmando ni Kristo. Sila giawhag nga ‘mogamit ug hait nga salabotan’ ug “magpatul-id.” Sa pagkatinuod, nianang panahona “malipayon silang tanan nga modangop kaniya [Diyos]” pinaagi sa pag-alagad kang Jehova ug sa iyang tinudlong Hari. Busa, ang mga magmamando ug ang ilang mga ginsakpan gihatagag kahigayonan sa paghimog mga kausaban panahon sa presensiya ni Jesus.—Sal. 2:10-12.
Pag-ila sa Ilhanan
8, 9. Kinsay makaila sa ilhanan sa presensiya ni Kristo ug makasabot sa kahulogan niini?
8 Sa dihang gisukna si Jesus sa mga Pariseo bahin sa panahon sa pag-abot sa Gingharian, siya mitubag nga kini dili moabot “uban ang talagsaong pagkadayag” sumala sa ilang gihunahuna. (Luc. 17:20, 21) Dili gayod kini masabtan sa mga dili magtutuo. Wala gani sila mahibalo nga si Jesus mao ang ilang umaabot nga Hari. Busa kinsa kahay makaila sa ilhanan sa presensiya ni Kristo ug makasabot sa kahulogan niini?
9 Si Jesus miingon nga tin-awng makita sa iyang mga tinun-an ang ilhanan maingon nga tin-aw nilang makita ang “kilat, pinaagi sa pangidlap niini, [nga] modan-ag gikan sa usa ka bahin sa ilalom sa langit ngadto sa laing bahin.” (Basaha ang Lucas 17:24-29.) Makaiikag usab ang pagmatikod nga ang Mateo 24:23-27 direktang naglangkit sa samang butang uban sa ilhanan sa presensiya ni Kristo.
Ang Kaliwatan nga Makakita sa Ilhanan
10, 11. (a) Unsang pagpatin-aw ang gihatag kaniadto bahin sa “kaliwatan” nga gihisgotan sa Mateo 24:34? (b) Kinsay nasabtan sa mga tinun-an ni Jesus nga mahimong bahin sa maong “kaliwatan”?
10 Gipatin-aw kaniadto niining magasina nga sa unang siglo, ang gihisgotan sa Mateo 24:34 nga “kining kaliwatana” nagtumong sa “katalirongang kaliwatan sa dili-matinuohong mga Hudiyo.”b Morag makataronganon ang maong katin-awan tungod kay ang tanang ubang natala nga paggamit ni Jesus sa terminong “kaliwatan” maoy negatibo, ug kasagaran, si Jesus naggamit ug negatibong pulong, sama sa “daotan,” sa paghubit sa maong kaliwatan. (Mat. 12:39; 17:17; Mar. 8:38) Busa, gituohan kaniadto nga sa modernong katumanan niini, si Jesus nagtumong sa daotang “kaliwatan” sa mga dili-magtutuo nga makakita sa mga ilhanan sa “kataposan sa sistema sa mga butang.”
11 Tinuod nga sa dihang gigamit ni Jesus ang pulong “kaliwatan” sa negatibong paagi, siya nagtumong sa daotang katawhan sa iyang adlaw. Apan ang daotang katawhan ba sa iyang adlaw ang gitumong sa “kaliwatan” nga iyang gihisgotan diha sa Mateo 24:34? Hinumdomi nga giduol si Jesus sa iyang upat ka tinun-an nga “silasila ra.” (Mat. 24:3) Sanglit wala man mogamit si Jesus ug negatibong pulong sa dihang iyang gihisgotan kanila ang bahin sa ‘maong kaliwatan,’ nasabtan gayod sa mga apostoles nga sila ug ang ilang mga isigkatinun-an mao ang mahimong bahin sa “kaliwatan” nga dili gayod mahanaw “hangtod nga mahitabo kining tanang butanga.”
12. Unsay gibutyag sa konteksto bahin niadtong gitumong ni Jesus sa dihang gigamit niya ang terminong “kaliwatan”?
12 Nganong nakahinapos kita niana? Tungod sa pagsusi pag-ayo sa konteksto. Ingon sa natala sa Mateo 24:32, 33, si Jesus miingon: “Karon tun-i ninyo kining puntoha gikan sa kahoyng igos ingong usa ka sambingay: Sa dihang ang linghod nga sanga niini manglumoy ug manalingsing, mahibalo kamo nga ang ting-init haduol na. Ingon man usab kamo, sa dihang makita ninyo kining tanang butanga, hibaloi nga siya haduol na sa mga pultahan.” (Itandi ang Marcos 13:28-30; Lucas 21:30-32.) Dayon, sa Mateo 24:34, atong mabasa: “Sa pagkatinuod ako magaingon kaninyo nga kining kaliwatana dili gayod mahanaw hangtod nga mahitabo kining tanang butanga.”
13, 14. Nganong makaingon kita nga ang “kaliwatan” nga gihisgotan ni Jesus mao gayod ang iyang mga tinun-an?
13 Si Jesus miingon nga ang iyang mga tinun-an, nga pagadihogan sa balaang espiritu, mao ang makahimog mga konklusyon sa dihang ilang makita nga mahitabo “kining tanang butanga.” Busa siya lagmit nagtumong sa iyang mga tinun-an sa dihang siya miingon: “Kining kaliwatana dili gayod mahanaw hangtod nga mahitabo kining tanang butanga.”
14 Lahi sa mga dili magtutuo, ang mga tinun-an ni Jesus dili lamang makaila sa ilhanan kondili makasabot usab sa kahulogan niini. Sila ‘makakat-on’ gikan sa mga bahin sa maong ilhanan ug ‘makahibalo’ sa tinuod nga kahulogan niini. Bug-os nilang masabtan nga “siya haduol na diha sa mga pultahan.” Bisan tuod limitado lamang ang nakitang katumanan sa dili-magtutuong mga Hudiyo ug sa matinumanong dinihogang mga Kristohanon bahin sa giingon ni Jesus sa unang siglo, ang iyang dinihogang mga sumusunod lamang niadto ang makakat-on gikan sa maong mga panghitabo, ug sila lamang ang makasabot sa tinuod nga kahulogan sa ilang nakita.
15. (a) Kinsay naglangkob sa modernong-adlawng “kaliwatan” nga gihisgotan ni Jesus? (b) Nganong dili kita makakalkulo sa eksaktong gitas-on ‘niining kaliwatana’? (Tan-awa ang kahon sa panid 25.)
15 Kadtong walay espirituwal nga pagsabot karon naghunahuna nga walay ‘talagsaong pagpadayag’ maylabot sa ilhanan sa presensiya ni Jesus. Sila mangatarongan nga ang tanang butang nagpadayon nga mao ra gayod sukad pa kaniadto. (2 Ped. 3:4) Sa laing bahin, ang matinumanong dinihogang mga igsoon ni Kristo, ang modernong-adlawng Juan nga matang, nakaila niini nga ilhanan ingon ka tin-aw sa kidlap sa kilat ug nakasabot sa tinuod nga kahulogan niini. Ingong grupo, kining maong mga dinihogan ang naglangkob sa modernong-adlawng “kaliwatan” nga dili mahanaw “hangtod nga mahitabo kining tanang butanga.”c Kini nagpasabot nga ang pipila ka dinihogang mga igsoon ni Kristo mahimong buhi pa gihapon dinhi sa yuta inigsugod sa gitagnang dakong kasakitan.
“Magpadayon sa Pagbantay”
16. Unsay kinahanglang buhaton sa tanang tinun-an ni Kristo?
16 Apan, labaw pa ang gikinahanglan kay sa pag-ila lamang sa ilhanan. Si Jesus nag-ingon: “Ang ginasulti ko kaninyo ginasulti ko sa tanan, Magpadayon sa pagbantay.” (Mar. 13:37) Kini hinungdanon kaayo alang kanatong tanan karon, membro man kita sa mga dinihogan o sa dakong panon. Kapin na sa 90 ka tuig ang milabay human maentrono si Jesus ingong Hari sa langit sa 1914. Bisan pag malisod tingali kini, kinahanglan natong pamatud-an nga kita andam ug padayong nagbantay. Ang pagkahibalo nga si Kristo nagmando na ingong Hari sa Gingharian motabang kanato sa pagpadayon sa pagbantay. Kini motabang usab kanato nga magmaandam kanunay kay sa dili madugay siya moabot aron sa paglaglag sa iyang mga kaaway “sa takna nga wala [nato] hunahunaa.”—Luc. 12:40.
17. Ang atong pagsabot sa kahulogan sa presensiya ni Kristo motabang kanato sa pagbati sa unsa, ug unsay determinado natong buhaton?
17 Ang atong pagsabot sa kahulogan sa presensiya ni Kristo motabang kanato sa pagbati nga dinalian gayod ang atong buluhaton. Kita nahibalo nga si Jesus anaa na ug nagmando na ingong Hari sa langit sukad sa 1914. Sa dili madugay iya nang laglagon ang mga daotan ug mohimo na siyag dagkong mga kausaban sa tibuok yuta. Busa kinahanglang magmadeterminado kita karon nga aktibong makigbahin sa buluhaton nga gitagna ni Jesus dihang siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan [teʹlos].”—Mat. 24:14.
[Mga footnote]
a Ang kahulogan sa pa·rou·siʹa makita diha sa kalainan sa “presensiya” o ‘pagkaanaa diha’ ug sa ‘pagkawala diha’ ni apostol Pablo nga gihisgotan sa 2 Corinto 10:10, 11 ug sa Filipos 2:12. Alang sa detalyadong paghisgot, tan-awa ang Insight on the Scriptures, Tomo 2, panid 676-9.
c Ang yugto sa panahon diin nagkinabuhi “kining kaliwatana” morag motakdo sa yugto sa panahon nga gikobrehan sa unang panan-awon diha sa basahong Pinadayag. (Pin. 1:10–3:22) Ang gitas-on niining bahina sa adlaw sa Ginoo maoy gikan sa 1914 hangtod sa pagkamatay ug pagkabanhaw sa kataposang membro sa matinumanong mga dinihogan.—Tan-awa ang Pinadayag—Hingpit nga Sangkoanan Niini Haduol Na! panid 24, parapo 4.
Unsay Imong Tubag?
• Giunsa nato pagkahibalo nga ang presensiya ni Jesus maoy usa ka taas nga yugto sa panahon?
• Kinsay makaila sa ilhanan sa presensiya ni Jesus ug makasabot sa kahulogan niini?
• Kinsay naglangkob sa modernong-adlaw nga kaliwatan nga gihisgotan sa Mateo 24:34?
• Nganong dili kita makakalkulo sa eksaktong gitas-on ‘niining kaliwatana’?
[Kahon sa panid 25]
Ato Bang Makalkulo ang Gitas-on ‘Niining Kaliwatana’?
Ang pulong “kaliwatan” kasagarang nagtumong sa mga tawo nga lainlaig pangedaron nga nagkinabuhi sulod sa usa ka yugto sa panahon o hitabo. Pananglitan, ang Exodo 1:6 nag-ingon kanato: “Sa kataposan si Jose namatay, ug usab ang tanan niyang mga igsoon ug ang tanan niadtong kaliwatana.” Si Jose ug ang iyang mga igsoon lainlaig pangedaron, apan sila nagkinabuhi sulod sa samang yugto sa panahon. Lakip “niadtong kaliwatana” mao ang mga igsoon ni Jose nga nangatawo una kaniya. Ang pipila kanila mas taas pag kinabuhi kay kang Jose. (Gen. 50:24) Ang uban “niadtong kaliwatana,” sama kang Benjamin, ulahing natawo kang Jose ug lagmit buhi pa human siya mamatay.
Busa kon gamiton ang terminong “kaliwatan” sa pagtumong sa mga tawo nga nagkinabuhi sa usa ka yugto sa panahon, ang eksaktong gitas-on niini dili ikasulti, gawas nga kini adunay kataposan ug dili ra taas kaayo. Busa, sa paggamit sa terminong “kining kaliwatana,” ingon sa natala sa Mateo 24:34, si Jesus wala maghatag ug pormula sa iyang mga tinun-an aron ilang matino kon kanus-a matapos ang “kataposang mga adlaw.” Hinunoa, gipasiugda ni Jesus nga dili nila mahibaloan ‘kanang adlawa ug taknaa.’—2 Tim. 3:1; Mat. 24:36.
[Hulagway sa panid 22, 23]
Human maentrono si Jesus ingong Hari sa 1914, siya gihulagway ingong “nagapangdaog”
[Hulagway sa panid 24]
“Kining kaliwatana dili gayod mahanaw hangtod nga mahitabo kining tanang butanga”