BALAY-ABOTANAN

Sa Grego, ang pan·do·kheiʹon sa literal nagkahulogang “usa ka dapit diin ang tanan gidawat o gipasaka,” nga mao, ang dapit nga ang mga magpapanaw makakaplag ug mga abtanan alang sa ilang kaugalingon ug sa ilang mga hayop. Tingali ang karaang mga balay-abotanan sa Tungang Sidlakan maoy susama niadtong gipangtukod didto sa mas bag-o pang kapanahonan. Kini kasagaran maoy usa ka pinarilan nga dapit nga usa lamang ang entrada. Ubay sa mga paril diha sa usa ka gipahabog nga plataporma adunay dili-sinangkapan nga mga lawak nga kasak-an sa mga magpapanaw ug kapahilunaan sa mga butang, ug ang usa makasulod niini agi sa sulod nga sawang. Ang mga hayop ibilin diha sa dakong sawang, nga sagad may usa ka atabay nga nahimutang sa tunga. Ang mga magbalantay sa balay-abotanan sa karaang kapanahonan nagtaganag pipila ka mahinungdanong mga kinahanglanon alang sa mga magpapanaw ug nag-atiman sa mga tawo nga gitugyan kanila, ug sila nakadawat ug bayad sa ilang mga serbisyo.​—Luc 10:33-35.