Kinabuhi ug Ministeryo ni Jesus

Ang Tinubdan sa Kalipay

PANAHON sa iyang ministeryo sa Galilea, gihimo ni Jesus ang mga milagro, ug karon kini gisubli niya sa Judea. Pananglitan, gipagula niya gikan sa usa ka lalaki ang usa ka demonyo nga nakapugong kaniya sa pagsulti. Nahingangha ang mga panon, apan ang mga kritiko nagpatungha sa samang pagtutol sama sa gipatungha didto sa Galilea. “Siya nagapagula sa mga demonyo pinaagi ni Beelzebub nga punoan sa mga demonyo,” mao ang ilang pangangkon. Gusto sa uban ang labaw nga ebidensiya gikan kang Jesus kon bahin sa iyang ilhanan, ug gisulayan nila ang pagtental kaniya pinaagi sa pagpangayog usa ka ilhanan gikan sa langit.

Kay nahibalo kon unsay ilang gihunahuna, gihatag ni Jesus ang samang tubag ngadto sa iyang mga kritiko sa Judea sama sa iyang gihatag ngadto niadtong didto sa Galilea. Siya nagpahayag nga ang matag gingharian nga nabahin sa kaugalingon mapukan. “Busa,” siya nangutana, “kon si Satanas nabahin usab sa iyang kaugalingon, unsaon pagbarog sa iyang gingharian?” Gipakita niya ang peligrosong kahimtang sa mga kritiko niya sa pag-ingon: “Kon pinaagi sa tudlo sa Diyos ako nagapagulag mga demonyo, ang gingharian sa Diyos nakaapas gayod kaninyo.”

Kadtong nakakita sa mga milagro ni Jesus angay mosanong niana sa samang paagi nga sa kasiglohang nangagi misanong kadtong nakakita sa paghimo ni Moises sa usa ka milagro. Mipatugbaw sila: “Kini ang tudlo sa Diyos!” Ang “tudlo sa Diyos” mao usab ang nagkulit sa Napulo ka Sugo ibabaw sa mga papan nga bato. Ug ang “tudlo sa Diyos”—ang iyang balaang espiritu, o aktibong gahom, mao ang nakapaarang kang Jesus sa pagpagulag mga demonyo ug pag-ayo sa masakiton. Busa ang Gingharian sa Diyos nakaapas gayod sa maong mga kritiko, sanglit si Jesus, ang gitudlong Hari sa Gingharian, didto mismo sa ilang taliwala.

Dayon giilustrar ni Jesus nga ang iyang katakos sa pagpagulag mga demonyo maoy ebidensiya sa iyang gahom ibabaw kang Satanas, sama gayod sa dihang ang usa ka lalaking kusgan moabot ug magpildi sa usa ka lalaking sinangkapag maayo nga nagabantay sa iyang palasyo. Gisubli usab niya ang ilustrasyon nga iyang gisugilon sa Galilea mahitungod sa usa ka mahugaw nga espiritu nga mogula sa usa ka tawo, apan kon dili sudlan sa tawo ang walay sulod nga lugar, ang espiritu mobalik kauban sa pito pa, ug ang kahimtang sa tawo mas daotan kay sa sinugdan.

Samtang namati niining mga pagtulon-ana, ang usa ka babaye gikan sa panon natandog sa pagpatugbaw sa kusog: “Malipayon ang tiyan nga nagsamkon kanimo ug ang mga dughan nga nagpasuso kanimo!” Sanglit ang tinguha sa matag Hudiyong babaye mao ang pagkainahan sa usa ka propeta ug ilabina sa Mesiyas, hisabtan nga isulti kini niadtong bayhana. Dayag, naghunahuna siya nga si Maria malipay ilabina tungod kay siya ang inahan ni Jesus.

Ugaling, daling gitul-id ni Jesus ang babaye mahitungod sa matuod nga tinubdan sa kalipay. “Dili,” siya mitubag, “hinunoa, Malipayon kadtong nagapamati sa pulong sa Diyos ug nagabantay niini!” Si Jesus wala gayod magpasabot nga ang iyang inahan, si Maria, pagahatagag linaing pasidungog. Hinunoa, iyang gipakita nga ang matuod nga kalipay hikaplagan sa pagkahimong matinumanong alagad sa Diyos, dili sa pisikal nga mga relasyon o kahimoan.

Sama sa iyang gibuhat sa Galilea, si Jesus nagpadayon ngadto sa pagbadlong sa mg tawo tungod sa pagpangayog usa ka ilhanan gikan sa langit. Gisultihan niya sila nga walay ilhanan nga igahatag gawas sa ilhanan ni Jonas. Si Jonas nahimong usa ka ilhanan pinaagi sa pagkadidto niya sulod sa isda sa tulo ka adlaw ug pinaagi sa maisogon niyang pagwali, nga misangpot nga ang mga taga-Nineve natandog sa paghinulsol. “Apan, tan-awa!” miingon si Jesus, “ania ang usa nga labaw pa kay kang Jonas.” Sa samang paagi, ang rayna sa Sheba nahibulong sa kaalam ni Solomon. “Apan, tan-awa!” si Jesus miingon usab, “ania ang usa nga labaw kay kang Solomon.”

Gipatin-aw ni Jesus nga dihang dagkotan sa usa ka tawo ang usa ka lamparahan, dili niya kana ibutang sulod sa usa ka tipiganan o sa usa ka bukag kondili ibabaw sa usa ka tangkawan aron ang mga tawo makakita sa kahayag. Tingali gipasabot niya nga ang pagtudlo ug paghimog mga milagro atubangan sa maong gahiang mga tawo sa iyang mamiminaw nahisama sa pagtago sa kahayag sa usa ka lamparahan. Ang mga mata sa maong mga maniniid dili yano, o napokos, mao nga wala matuman ang katuyoan sa iyang mga milagro.

Si Jesus bag-o pang nagpagulag demonyo ug nakapasulti sa usa ka amang nga lalaki. Kadto angay magdasig sa katawhan nga may yano, o napokos, nga mga mata sa pagdayeg sa maong mahimayaong kahimoan ug pagmantala sa maayong balita! Bisan pa niana, uban sa maong mga kritiko, kadto dili mao ang nahitabo. Busa si Jesus mihinapos: “Busa, magmaigmat. Tingali ang kahayag nga anaa kanimo maoy kangitngit. Busa, kon sanag ang tibuok mong lawas nga walay bahin ang mangitngit, kini mahimong sanag sama sa dihang ang usa ka lamparahan mohatag ug kahayag pinaagi sa mga silaw niini.” Lucas 11:14-36; Exodo 8:18, 19; 31:18; Mateo 12:22, 28.

◆ Unsa ang pagsanong sa giayo ni Jesus ang lalaki?

◆ Unsa ang tudlo sa Diyos, ug sa unsang paagi ang Gingharian sa Diyos nakaapas sa mga naminaw ni Jesus?

◆ Unsa ang tinubdan sa matuod nga kalipay?

◆ Sa unsang paagi ang usa ka tawo makabatog yano nga mata?