Magmaandam Kanunay sa Adlaw ni Jehova

 1. Unsay angay natong buhaton aron maluwas sa adlaw ni Jehova?

DIHANG ang Bibliya maghisgot bahin sa “adlaw ni Jehova,” kini nagtumong sa panahon nga laglagon ni Jehova ang iyang mga kaaway ug luwason ang iyang katawhan. Kaniadto, may mga panahon nga si Jehova nagpahamtang ug silot sa iyang mga kaaway. (Isa. 13:1, 6; Ezeq. 13:5; Sof. 1:8) Sa atong panahon, ang “adlaw ni Jehova” magsugod dihang atakehon ang Bantogang Babilonya ug matapos sa gubat sa Armagedon. Aron maluwas nianang adlawa, kinahanglan tang mangandam karon. Gitudloan ta ni Jesus nga dili lang kay basta mahimo tang andam sa “dakong kasakitan,” kondili “andam kanunay” alang niini.—Mat. 24:21; Luc. 12:40.

 2. Nganong makabenepisyo ta sa 1 Tesalonica?

² Sa unang sulat ni Pablo sa mga taga-Tesalonica, migamit siyag mga ilustrasyon aron tabangan ang mga Kristohanon nga mahimong andam sa dakong adlaw ni Jehova sa paghukom. Nahibalo si Pablo nga ang adlaw ni Jehova dili pa moabot niadtong panahona. (2 Tes. 2:1-3) Pero iya gihapong gidasig ang mga Kristohanon kaniadto nga mangandam nianang adlawa, nga sama bag moabot kana pagkasunod adlaw, ug mapadapat pod nato ang iyang tambag. Atong konsiderahon ang iyang giingon bahin sa (1) kon sa unsang paagi moabot ang adlaw ni Jehova, (2) kon kinsay dili maluwas nianang adlawa, ug (3) kon unsay atong himoon aron maluwas.

 3. Sa unsang paagi ang adlaw ni Jehova moabot nga samag kawatan sa kagabhion? (Tan-awa sab ang hulagway.)

³ “Samag kawatan sa kagabhion.” (1 Tes. 5:2) Kini ang una sa tulo ka ilustrasyon nga naghisgot kon sa unsang paagi moabot ang adlaw ni Jehova. Ang mga kawatan sagad kalit nga moabot sa gabii, sa panahon nga wala damha sa mga biktima. Ang adlaw ni Jehova kalit sab nga moabot, ug kadaghanan sa mga tawo makurat niini. Bisan ang tinuod nga mga Kristohanon makuratan pod tingali sa kalit nga mga panghitabo. Pero dili sama sa mga daotan, dili ta malaglag.

 4. Sa unsang paagi ang adlaw ni Jehova sama sa kasakit nga bation sa babayeng manganakay?

⁴ “Sama sa kasakit nga bation sa babayeng manganakay.” (1 Tes. 5:3) Ang mabdos nga babaye dili makatagna sa eksaktong oras nga manganak siya, pero segurado siya nga mahitabo na. Kon magbati na siya, ang kasakit nga iyang bation tingali kalit, grabe kaayo, ug dili mapugngan. Sa samang paagi, wala ta mahibalo sa adlaw ug oras nga magsugod ang adlaw ni Jehova. Pero segurado ta nga moabot ni, ug ang paghukom sa Diyos sa mga daotan kalit nga mahitabo ug dili sila makaikyas.

 5. Sa unsang paagi ang dakong kasakitan sama sa kadlawon?

⁵ Sama sa kadlawon. Ang ikatulong ilustrasyon ni Pablo naghisgot gihapon ug mga kawatan nga nangawat panahon sa kagabhion. Pero niining higayona, daw gipakasama ni Pablo ang adlaw ni Jehova sa kadlawon. (1 Tes. 5:4) Ang mga kawatan nga moanhag gabii posibleng mapokus pag-ayo sa pagpangawat maong dili na sila makabantay sa oras. Basin makurat na lang sila nga hayag na ang adlaw ug makita sila. Sa dakong kasakitan, makita pod kadtong samag mga kawatan nga nagpabilin sa kangitngit ug padayong nagbuhat sa mga butang nga gidumtan sa Diyos. Dili sama nila, mahimo tang andam kon atong likayan ang mga buhat nga gidumtan ni Jehova ug tinguhaon ang “tanang matang sa pagkamaayo ug pagkamatarong ug kamatuoran.” (Efe. 5:8-12) Hisgotan nato karon ang duha ka ilustrasyon ni Pablo nga nagpakita kon kinsay dili maluwas.

 6. Sa unsang paagi tulog ang kadaghanan sa mga tawo karon? (1 Tesalonica 5:6, 7)

⁶ “Kadtong matulog.” (Basaha ang 1 Tesalonica 5:6, 7.) Gipakasama ni Pablo kadtong dili maluwas sa adlaw ni Jehova sa mga tawo nga nangatulog. Wala sila mahibalo sa nagakahitabo sa ilang palibot o kon unsang orasa na. Busa dili sila makamatikod sa importanteng mga hitabo o makahimog aksiyon bahin niana. Kadaghanan sa mga tawo karon tulog sa espirituwal. (Roma 11:8) Gibalewala nila ang ebidensiya nga nagkinabuhi na ta sa “kataposang mga adlaw” ug hapit nang moabot ang dakong kasakitan. Tungod sa dagkong mga hitabo sa kalibotan, ang uban makamata tingali sa ilang espirituwal nga pagkatulog ug magpakitag gamayng interes sa mensahe sa Gingharian. Pero daghan ang mobalik sa pagkatulog imbes padayong magmata. Bisan ang pipila nga nagtuo nga naay adlaw sa paghukom naghunahuna nga dugay pa ning moabot. (2 Ped. 3:3, 4) Pero nahibalo ta nga ang tambag nga magpabiling nagmata importante kaayo samtang mas nagkaduol ang adlaw ni Jehova.

 7. Nganong kadtong makaagom sa kasuko sa Diyos gipakasamag mga hubog?

⁷ “Kadtong maghuboghubog.” Ang mga tawo nga makaagom sa kasuko sa Diyos gipakasama ni apostol Pablo sa mga palahubog. Ang mga tawong hubog dili dayon molihok bisan pa sa nagakahitabo sa ilang palibot, ug dili sila makahimog maayong mga desisyon. Sa samang paagi, ang mga daotan dili molihok bisan pa sa mga pasidaan sa Diyos. Gipili nila ang paagi sa pagkinabuhi nga moresulta sa ilang kalaglagan. Pero ang mga Kristohanon gitambagan nga huptan ang maayong panghunahuna ug mahimong alerto. (1 Tes. 5:6) Sumala sa usa ka eskolar sa Bibliya, ang maayong panghunahuna maoy “kalmado, balanseng panghunahuna nga makatimbangtimbang sa mga butang sa hustong paagi ug makatabang nato sa paghimog hustong desisyon.” Nganong angay tang magpabiling kalmado ug balanseg panghunahuna? Aron dili ta madala sa mga isyu nga gidebatehan sa mga tawo karon o sa politika. Samtang magkaduol ang adlaw ni Jehova, mosamot pod ang presyur nga papilion ta kon asa ta modapig. Pero dili ta angayng mabalaka kon unsay atong himoon. Tabangan ta sa balaang espiritu sa Diyos nga makabaton ug kalmado ug balanseng panghunahuna aron makahimo tag maayong mga desisyon.—Luc. 12:11, 12.

 8. Sa 1 Tesalonica 5:8, giunsa pag-ilustrar ang mga hiyas nga makatabang nato nga magpabiling nagmata ug mahuptan ang maayong panghunahuna? (Tan-awa sab ang hulagway.)

⁸ “Isul-ob ang panagang sa dughan . . . ug ang helmet.” Gipakasama ta ni Pablo sa mga sundalo nga alerto ug nagsul-ob ug kompletong armadura sa gubat. (Basaha ang 1 Tesalonica 5:8.) Ang usa ka sundalo gidahom nga andam kanunay sa pagpakiggubat. Ingon ana pod ta. Makapabilin tang andam sa adlaw ni Jehova kon isul-ob nato ang panagang sa dughan nga mao ang pagtuo ug gugma, ug ang helmet nga mao ang paglaom. Kini nga mga hiyas makatabang pag-ayo nato.

 9. Sa unsang paagi ang atong pagtuo manalipod nato?

⁹ Ang panagang sa dughan manalipod sa kasingkasing sa sundalo. Ang pagtuo ug gugma manalipod sa atong simbolikong kasingkasing. Makatabang ni nato nga padayong alagaron ang Diyos ug sundon si Jesus. Kon naa tay pagtuo, makasalig ta nga panalanginan ni Jehova ang atong paningkamot nga alagaran siya sa tibuok natong kasingkasing. (Heb. 11:6) Kini mopalihok nato nga magpabiling maunongon sa atong Lider, si Jesus, bisan pa sa mga kalisdanan. Mapalig-on nato ang atong pagtuo ug malahutay ang mga kalisdanan kon mokat-on ta sa ehemplo sa mga igsoon nga nagpabiling matinumanon bisan pag gilutos o nalisdan sa panginabuhi. Ug malikayan nato ang pagkahimong materyalistiko kon sundogon nato kadtong nagpasimple sa ilang kinabuhi aron unahon ang Gingharian.b

10. Sa unsang paagi ang atong gugma sa Diyos ug sa mga tawo makatabang nato nga padayong mosangyaw?

¹⁰ Ang gugma importante pod aron magpabilin tang nagmata ug mahuptan ang maayong panghunahuna. (Mat. 22:37-39) Ang atong gugma sa Diyos motabang nato nga mopadayon sa pagsangyaw bisan pag moresulta nig mga kalisdanan. (2 Tim. 1:7, 8) Kay gihigugma nato kadtong wala mag-alagad kang Jehova, padayon tang mosangyaw ug atong kobrehan ang atong teritoryo, nga mosangyaw pa gani pinaagig telepono ug sulat. Dili ta mawad-ag paglaom nga ang mga tawo magbag-o ug mosugod sa pagbuhat kon unsay husto.—Ezeq. 18:27, 28.

11. Sa unsang paagi ang atong gugma sa mga igsoon makatabang nato? (1 Tesalonica 5:11)

¹¹ Gihigugma pod nato ang atong mga igsoon. Mapakita nato ni pinaagi sa ‘pagdinasigay ug paglig-onay’ sa usag usa. (Basaha ang 1 Tesalonica 5:11.) Samag mga sundalo nga nagtinabangay panahon sa gubat, kita magdinasigay sa usag usa. Siyempre, posibleng masamdan sa sundalo ang iyang kauban panahon sa gubat, pero dili gyod na niya tuyoon paghimo. Sa susama, dili gyod nato tuyoon nga pasakitan ang atong mga igsoon o manimalos nila. (1 Tes. 5:13, 15) Mapakita pod nato ang atong gugma pinaagi sa pagtahod sa mga brader nga nanguna sa kongregasyon. (1 Tes. 5:12) Dihang gisulatan ni Pablo ang mga Kristohanon sa Tesalonica, wala pay usa ka tuig ang ilang kongregasyon. Posible nga ang mga nagdumala didto dili pa eksperyensiyado ug nakahimog mga sayop. Pero angay gihapon silang tahoron. Samtang magkaduol ang dakong kasakitan, kinahanglan tingali tang mas mosalig sa mga ansiyano para sa direksiyon, nga labaw pa sa atong ginahimo karon. Mawad-an tingali tag kontak sa hedkuwarter ug sangang buhatan maong karon pa lang, importante nga atong higugmaon ug tahoron ang mga ansiyano. Bisag unsa pay mahitabo, huptan nato ang maayong panghunahuna, nga dili magpokus sa ilang sayop o kahuyangan. Hinuon, hunahunaon nato nga si Jehova ang naggiya niining matinumanong mga lalaki pinaagi sa Kristo.

12. Sa unsang paagi ang atong paglaom manalipod sa atong panghunahuna?

¹² Sama sa helmet nga manalipod sa ulo sa sundalo, ang atong paglaom sa kaluwasan manalipod sa atong panghunahuna. Kon lig-on ang atong paglaom, isipon nato nga walay pulos ang mga butang nga gitanyag sa kalibotan. (Filip. 3:8) Ang atong paglaom makatabang nato nga magpabiling kalmado ug lig-on. Tinuod ni kang Wallace ug Laurinda, nga nag-alagad sa Africa. Sulod sa tulo ka semana, ang matag usa nila namatyan ug ginikanan. Tungod sa COVID-19 nga pandemic, dili sila makauli sa ilang mga pamilya. Si Wallace misulat: “Ang paglaom sa pagkabanhaw nakatabang nako nga dili magsigeg hinumdom sa ilang kahimtang sa hapit na silang mamatay, kondili mag-imagine ko kon unsa unya sila ka malipayon dihang mabanhaw na sila sa bag-ong kalibotan. Tungod niini nga paglaom, mokalma ko dihang maguol ko o mingawon pag-ayo nila.”

13. Unsay atong himoon aron madawat ang balaang espiritu?

¹³ “Ayaw palonga ang kalayo sa espiritu.” (1 Tes. 5:19) Ang balaang espiritu gipakasama ni Pablo sa kalayo nga naa sa sulod nato. Kon naa kanato ang balaang espiritu sa Diyos, madasigon ta sa pagbuhat kon unsay husto ug kugihan ta sa mga buluhaton para kang Jehova. (Roma 12:11) Unsay atong himoon aron madawat ang balaang espiritu? Ato kining iampo, tun-an ang Pulong sa Diyos, ug magpabilin sa organisasyon nga giniyahan sa balaang espiritu. Kon ato ning himoon, maugmad nato “ang bunga sa espiritu.”—Gal. 5:22, 23.

14. Unsay angay natong likayan aron padayong madawat ang balaang espiritu sa Diyos? (Tan-awa sab ang hulagway.)

¹⁴ Dihang madawat na nato ang balaang espiritu sa Diyos, mag-amping ta nga dili ‘mapalong ang kalayo sa espiritu.’ Kadto lang nagpabiling hinlo sa hunahuna ug panggawi ang hatagan sa Diyos sa iyang espiritu. Dili niya padayong ihatag ang iyang espiritu kon magsige tag hunahunag hugawng mga butang ug mohimo niana. (1 Tes. 4:7, 8) Aron padayong madawat ang balaang espiritu, kinahanglang dili pod nato ‘tamayon ang mga tagna.’ (1 Tes. 5:20) Kini nga “mga tagna” nagtumong sa mga mensahe nga gihatag ni Jehova pinaagi sa iyang balaang espiritu, apil ang bahin sa adlaw ni Jehova ug ang pagkadinalian sa atong panahon. Dili ta maghunahuna nga layo pa ang maong adlaw, nga ang Armagedon dili moabot sa atong panahon. Hinuon, ipakita nato nga kombinsido ta nga duol na kaayo ni pinaagi sa pagpabiling hinlo sa atong binuhatan ug padayong pagkugi sa “mga buhat nga nagpakitag debosyon sa Diyos” kada adlaw.—2 Ped. 3:11, 12.

15. Unsay atong himoon aron dili ta mailad sa sayop nga mga impormasyon ug mga propaganda sa mga demonyo? (1 Tesalonica 5:21)

¹⁵ Ang mga kaaway sa Diyos hapit nang modeklarar ug “kalinaw ug kasegurohan!” (1 Tes. 5:3) Kaylap unya kaayo ang mga propaganda nga gikan sa mga demonyo, ug daghan ang mailad ug motuo niana. (Pin. 16:13, 14) Pero komosta sa atong bahin? Dili ta mailad kon atong ‘seguroon [o, sulayan] ang tanang butang.’ (Basaha ang 1 Tesalonica 5:21.) Ang Gregong pulong nga gihubad ug “seguroa” gigamit may kalabotan sa paagi sa pagsulay sa bililhong mga metal, sama sa bulawan ug silver, aron maseguro kon tinuod ba kini. Busa kinahanglan natong seguroon kon tinuod ba ang atong nadunggan o nabasa. Kon kinahanglan nang himoon sa mga taga-Tesalonica kaniadto, labaw na gyod nga ato nang himoon samtang nagkaduol ang dakong kasakitan. Imbes motuo dayon sa giingon sa uban, gamiton nato ang atong maayong panghunahuna ug ikomparar ang atong nabasa o nadungog sa kon unsay giingon sa Bibliya ug sa organisasyon ni Jehova. Kon ato nang himoon, dili ta mailad sa bisan unsang propaganda sa mga demonyo o sa sayop nga mga impormasyon.—Prov. 14:15; 1 Tim. 4:1.

16. Unsang seguradong paglaom ang atong nabatonan, ug unsay determinado natong himoon?

¹⁶ Ingong grupo, ang katawhan sa Diyos maluwas sa dakong kasakitan. Pero ang matag usa nato wala mahibalo kon unsay mahitabo kanato sa umaabot. (Sant. 4:14) Makalabang buhi man ta sa dakong kasakitan o mamatay sa dili pa na moabot, makadawat tag kinabuhing walay kataposan kon magpabilin tang matinumanon. Ang mga dinihogan makauban sa Kristo sa langit. Ang ubang mga karnero magpuyo sa paraisong yuta. Hinaot nga kitang tanan magpokus sa atong nindot kaayong paglaom ug magpabiling andam sa adlaw ni Jehova!