Giuna ba ang Diyos Diha sa Inyong Pamilya?

“Higugmaon mo gayod si Jehova nga imong Diyos sa tibuok mong kasingkasing.”​—MARCOS 12:29, 30.

 1. Unsa ka hinungdanon nga atong higugmaon si Jehova?

“ASANG sugoa ang una sa tanan?” nangutana ang usa ka eskriba kang Jesus. Inay ihatag ang iyang kaugalingong hunahuna, gitubag ni Jesus ang iyang pangutana pinaagi sa pagkutlo sa Pulong sa Diyos sa Deuteronomio 6:4, 5. Mitubag siya: “Ang una mao, ‘Paminaw, Oh Israel, si Jehova nga atong Diyos usa ka Jehova, ug higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.’”​—Marcos 12:28-30.

 2. (a) Unsang pagsupak ang giatubang ni Jesus? (b) Nganong tingalig lisod usahay ang pagpahimuot kang Jehova?

² Ang pagsugot sa gitawag ni Jesus ug unang sugo​—ang labing hinungdanon​—manginahanglan nga buhaton nato kanunay kon unsay makapahimuot kang Jehova. Gibuhat kana ni Jesus, bisan tuod sa usa ka higayon si apostol Pedro mitutol sa dalan ni Jesus, ug sa laing higayon mitutol usab ang iya mismong suod nga mga paryente. (Mateo 16:21-23; Marcos 3:21; Juan 8:29) Unsa na man kon ikaw maanaa sa susamang kahimtang? Pananglit kon buot sa mga membro sa pamilya nga ihunong nimo ang imong pagtuon sa Bibliya ug ang imong pagpakig-uban sa mga Saksi ni Jehova. Unahon mo ba ang Diyos pinaagi sa pagbuhat kon unsay makapahimuot kaniya? Pagaunahon ba ang Diyos, bisan pag ang mga membro sa pamilya tingali mosupak sa imong mga paningkamot sa pag-alagad kaniya?

Ang Lit-ag sa Pagsupak sa Pamilya

 3. (a) Unsa tingali ang sangpotanan sa mga pagtulon-an ni Jesus nganha sa pamilya? (b) Sa unsang paagi ikapakita sa mga membro sa pamilya kon kinsa ang labaw nilang gimahal?

³ Wala ibale-wala ni Jesus ang kalisdanan nga mahimong mosangpot sa dihang ang uban diha sa pamilya mosupak sa membro nga modawat sa iyang mga pagtulon-an. “Ang mga kaaway sa tawo mao unya ang mga sakop sa iyang kaugalingong panimalay,” matod ni Jesus. Apan, bisan pa nianang makapasubong sangpotanan, gipakita ni Jesus kon kinsa ang angay mauna pinaagi sa pag-ingon: “Siya nga may labawng pagmahal sa amahan o inahan kay kanako dili takos kanako; ug siya nga may labawng pagmahal sa anak nga lalaki o anak nga babaye kay kanako dili takos kanako.” (Mateo 10:34-37) Giuna nato si Jehova nga Diyos pinaagi sa pagsunod sa mga pagtulon-an sa iyang Anak, si Jesu-Kristo, kinsa mao “ang tukma nga representasyon sa mismong pagkamao [sa Diyos].”​—Hebreohanon 1:3; Juan 14:9.

 4. (a) Unsay giingon ni Jesus nga nalangkit sa pagkahimong iyang sumusunod? (b) Sa unsang diwa ang mga Kristohanon magadumot sa mga membro sa pamilya?

⁴ Sa laing higayon nga naghisgot si Jesus kon unsay nalangkit gayod sa pagkahimong matuod niyang sumusunod, siya miingon: “Kon ang bisan kinsa moanhi kanako ug dili magdumot sa iyang amahan ug inahan ug asawa ug mga anak ug mga igsoong lalaki ug mga igsoong babaye, oo, ug bisan sa iyang kaugalingong kalag, dili siya mahimong akong tinun-an.” (Lucas 14:26) Dayag nga si Jesus wala magpasabot nga ang iyang mga sumusunod literal nga magdumot sa mga sakop sa ilang pamilya, sanglit siya nagsugo sa mga tawo sa paghigugma bisan sa ilang mga kaaway. (Mateo 5:44) Hinunoa, gipasabot dinhi ni Jesus nga kinahanglang menos ang paghigugma sa iyang mga sumusunod sa mga sakop sa pamilya kay sa ilang paghigugma sa Diyos. (Itandi ang Mateo 6:24.) Nahiuyon sa maong pagsabot, ang Bibliya nag-ingon nga “gidumtan” ni Jacob si Lea ug gihigugma si Raquel, nga nagkahulogang ang iyang paghigugma kang Lea dili sama sa iyang paghigugma sa iyang manghod nga babaye, si Raquel. (Genesis 29:30-32) Bisan ang atong kaugalingong “kalag,” o kinabuhi, matod ni Jesus, angay nga dumtan, o higugmaon ug menos, kay kang Jehova!

 5. Sa unsang paagi si Satanas malinglahong nagpahimulos sa pamilyahanong kahikayan?

⁵ Isip Maglalalang ug Maghahatag-Kinabuhi, si Jehova takos sa bug-os nga debosyon gikan sa tanan niyang mga alagad. (Pinadayag 4:11) “Ginapiko ko ang akong mga tuhod ngadto sa Amahan,” misulat si apostol Pablo, “kang kinsa utang sa tanang kabanayan sa langit ug sa yuta ang ngalan niini.” (Efeso 3:14, 15) Gimugna ni Jehova ang pamilyahanong kahikayan sa kahibulongan kaayong paagi nga ang mga membro sa pamilya adunay kinaiyanhong pagbati sa usag usa. (1 Hari 3:25, 26; 1 Tesalonica 2:7) Ugaling, si Satanas nga Yawa sa malinglahon nagpahimulos niining kinaiyanhong pagbati sa pamilya, nga naglakip sa tinguhang magpahimuot sa mga minahal. Siya nagpaypay sa mga kalayo sa pagsupak sa pamilya, ug daghan ang nalisdan nga mobarog alang sa kamatuoran sa Bibliya sa dihang giatubang niini.​—Pinadayag 12:9, 12.

Pag-atubang sa Hagit

 6, 7. (a) Sa unsang paagi ang mga membro sa pamilya katabangan sa pagpabili sa kahinungdanon sa pagtuon sa Bibliya ug sa Kristohanong pagpakig-uban? (b) Sa unsang paagi ikapasundayag nato nga tinuod natong gihigugma ang mga membro sa atong pamilya?

⁶ Unsay imong buhaton kon pugson ka pagpili tali sa pagpahimuot sa Diyos o pagpahimuot sa usa ka membro sa pamilya? Mangatarongan ka ba nga ang Diyos dili magdahom nga kita magtuon sa iyang Pulong ug magpadapat sa mga prinsipyo niini kon ang pagbuhat niana magmugnag panagbangi sa pamilya? Apan palandonga kini. Kon moangka ka ug ihunong ang imong pagtuon sa Bibliya o pagpakig-uban sa mga Saksi ni Jehova, sa unsang paagi hisabtan sa mga minahal nga ang tukmang kahibalo sa Bibliya maoy butang nga nagkahulogan kaha sa kinabuhi ug kamatayon?​—Juan 17:3; 2 Tesalonica 1:6-8.

⁷ Ikailustrar nato ang kahimtang niining paagiha: Tingali ang usa ka membro sa pamilya nagiyan na pag-ayo sa alkoholikong ilimnon. Ang dili pagtagad o pagkonsentir sa iyang problema sa pag-inom makaayo ba gayod kaniya? Mas maayo bang mentenahon ang kalinaw pinaagi sa pag-angka ug walay himoon bahin sa iyang suliran? Dili, lagmit mouyon ka nga labing maayong sulayan nga tabangan siya sa pagbuntog sa iyang problema sa pag-inom, bisan pag kana nagkahulogan nga atubangon ang iyang kasuko ug mga bahad. (Proverbio 29:25) Sa susama, kon tinuod nimong gihigugma ang mga membro sa imong pamilya, dili ka moangka sa ilang mga paningkamot nga pugngan ka sa pagtuon sa Bibliya. (Buhat 5:29) Pinaagi lamang sa pagbarog nga lig-on nga matabangan mo sila sa pagpabili nga ang pagsunod sa mga pagtulon-an ni Kristo nagkahulogan sa atong kinabuhi mismo.

8. Sa unsang paagi kita makabatog kaayohan gikan sa kamatuorang matinumanong gibuhat ni Jesus ang kabubut-on sa Diyos?

⁸ Ang pag-una sa Diyos tingalig lisod kaayo usahay. Apan hinumdomi, si Satanas naghimo usab nga lisod aron mabuhat ni Jesus ang kabubut-on sa Diyos. Bisan pa niana si Jesus wala moangka; giantos pa gani niya ang kasakitan sa usa ka kahoy sa pagsakit alang kanato. “Si Jesu-Kristo [mao] ang atong Manluluwas,” nag-ingon ang Bibliya. “Siya namatay alang kanato.” (Tito 3:6; 1 Tesalonica 5:10) Dili ba kita mapasalamaton nga si Jesus wala moangka tungod sa pagsupak? Tungod kay giantos niya ang usa ka haladnong kamatayon, kita adunay kalaoman sa kinabuhing walay kataposan diha sa usa ka malinawong bag-ong kalibotan sa pagkamatarong pinaagi sa pagpakitag pagtuo sa iyang inula nga dugo.​—Juan 3:16, 36; Pinadayag 21:3, 4.

Usa ka Posibleng Dakong Ganti

9. (a) Sa unsang paagi ang mga Kristohanon makaambit sa pagluwas sa uban? (b) Unsa ang pamilyahanong kahimtang ni Timoteo?

⁹ Nakaamgo ka ba nga ikaw usab mahimong makabaton ug bahin sa pagluwas sa uban, lakip ang minahal kaayong mga paryente? Si apostol Pablo miagda kang Timoteo: “Pabilin niining mga butanga [nga gikatudlo kanimo], kay pinaagi sa pagbuhat niini imong maluwas ang imong kaugalingon ug kadtong kinsa mamati kanimo.” (1 Timoteo 4:16) Si Timoteo nagpuyo sa usa ka panimalay nga nabahin, kay ang iyang Gregong amahan dili magtutuo. (Buhat 16:1; 2 Timoteo 1:5; 3:14) Bisan pag wala kita masayod kon ang amahan ni Timoteo nahimo ba gayong magtutuo, ang posibilidad nga tingali siya nahimong magtutuo napausbaw pag-ayo sa matinumanong panggawi sa iyang asawa, si Eunice, ug ni Timoteo.

10. Unsay mahimo sa mga Kristohanon alang sa ilang dili-magtutuo nga mga kapikas?

¹⁰ Ang Kasulatan nagpadayag nga ang mga bana ug mga asawa nga malig-ong naglaban sa kamatuoran sa Bibliya makatabang ngadto sa pagluwas sa ilang dili-Kristohanong mga kapikas pinaagi sa pagtabang kanila nga mahimong mga magtutuo. Si apostol Pablo misulat: “Kon si kinsa man nga igsoon ang may asawang dili-magtutuo, apan uyon siyang makigpuyo uban kaniya, ayaw siya pabiyaa kaniya; ug ang usa ka babaye nga may banang dili-magtutuo, apan uyon siyang makigpuyo uban kaniya, ayaw siya pabiyaa sa iyang bana. Kay, unsaon god nimo pagkahibalo, asawa, nga maluwas mo ang imong bana? O, unsaon god nimo pagkahibalo, bana, nga maluwas mo ang imong asawa?” (1 Corinto 7:12, 13, 16) Sa pagkatinuod, si apostol Pedro nagbatbat kon sa unsang paagi ang mga asawa mahimong makaluwas sa ilang mga bana, nga miagda: “Magpasakop sa inyong kaugalingong mga bana, aron nga, kon aduna may dili masinugtanon sa pulong, sila mangakabig nga walay pulong pinaagi sa panggawi sa ilang mga asawa.”​—1 Pedro 3:1.

11, 12. (a) Unsang ganti ang nadawat sa kaliboang Kristohanon, ug unsay ilang gibuhat aron madawat kana? (b) Iasoy ang usa ka kasinatian sa usa ka membro sa pamilya nga gigantihan tungod sa matinumanong paglahutay.

¹¹ Sa bag-o pang katuigan kaliboan ang nahimong mga Saksi ni Jehova human sa mga bulan ug mga tuig pa nga pagsupak sa ilang Saksing mga paryente sa Kristohanong buluhaton. Pagkadakong ganti kini alang sa mga Kristohanon nga nagpabiling malig-on, ug pagkadakong panalangin alang sa kanhi mga magsusupak! Uban sa punog-emosyon nga tingog, usa ka 74-anyos nga Kristohanong ansiano miasoy: “Kanunay nakong pasalamatan ang akong asawa ug mga anak tungod sa pagpabilin sa kamatuoran sulod sa katuigan nga ako silang gisupak.” Siya miingon nga sulod sa tulo ka tuig sa pagkamagahion wala gani niya tugoti ang iyang asawa sa paghisgot kaniya bahin sa Bibliya. “Apan migamit siyag sikolohiya kanako,” matod niya, “ug misugod pagsangyaw kanako samtang gimasahe niya ang akong mga tiil. Dako gayod ang akong pasalamat nga wala siya moangka tungod sa akong pagsupak!”

¹² Ang laing bana nga misupak sa iyang pamilya misulat: ‘Ako ang labing daotang kaaway sa akong asawa tungod kay human siya makakat-on sa kamatuoran, ako siyang gibaharan, ug mag-away kami adlaw-adlaw; nga buot ingnon, ako ang kanunayng mosugod sa away. Apan kawang ang tanan; ang akong asawa mipabilin sa Bibliya. Sa ingon milabay ang napulog-duha ka tuig nga mapait nakong pagpakig-away batok sa kamatuoran ug batok sa akong asawa ug anak. Alang kanila, ako ang Yawa nga nagpakatawo.’ Sa kadugayan ang maong tawo misugod pagsusi sa iyang panggawi. ‘Nakita nako kon unsa ka mapintason ako,’ siya misaysay. ‘Gibasa nako ang Bibliya, ug tungod sa pagtulon-an niini, ako karon usa na ka bawtismadong Saksi.’ Hunahunaa ang dakong ganti sa asawa, oo, ang pagtabang sa ‘pagluwas sa iyang bana’ pinaagi sa matinumanong pag-antos sa iyang pagsupak sulod ug 12 ka tuig!

Pagkakat-on Gikan ni Jesus

13. (a) Unsa ang pangunang pagtulon-an nga angay makat-onan sa mga bana ug mga asawa gikan sa pagkinabuhi ni Jesus? (b) Sa unsang paagi ang katawhang nalisdan sa pagpasakop sa kabubut-on sa Diyos makabatog kaayohan gikan sa panig-ingnan ni Jesus?

¹³ Ang pangunang leksiyon nga angay makat-onan sa mga bana ug mga asawa gikan sa pagkinabuhi ni Jesus mao ang pagkamasinugtanon ngadto sa Diyos. “Ako kanunayng nagbuhat sa mga butang nga makapahimuot kaniya,” matod ni Jesus. “Ako nangita, dili sa akong kaugalingong kabubut-on, kondili sa kabubut-on niya nga nagpadala kanako.” (Juan 5:30; 8:29) Bisan pag sa usa ka panahon si Jesus wala makaangay sa usa ka linaing bahin sa kabubut-on sa Diyos, siya nagmasinugtanon. “Kon buot mo, kuhaa kining kopa gikan kanako,” siya miampo. Apan siya midugang dayon: “Bisan pa niana, ipahinabo, dili ang akong kabubut-on, kondili ang imoha.” (Lucas 22:42) Si Jesus wala mohangyo nga usbon sa Diyos ang Iyang kabubut-on; iyang gipakita nga tinuod niyang gihigugma ang Diyos pinaagi sa masinugtanong pagpasakop ngadto sa bisan unsa nga kabubut-on sa Diyos alang kaniya. (1 Juan 5:3) Ang pag-una kanunay sa kabubut-on sa Diyos, sama sa gibuhat ni Jesus, hinungdanon sa kalamposan dili lamang sa kinabuhing tagsaanon kondili sa minyo ug pamilyahanong kinabuhi usab. Tagda kon nganong kini matuod.

14. Unsay dili-tukmang pangatarongan sa pila ka Kristohanon?

¹⁴ Sumala sa giingon na, kon unahon sa mga magtutuo ang Diyos, tinguhaon nilang magpabilin kauban sa ilang dili-magtutuo nga mga kapikas ug kasagarang makatabang kanila nga mahimong takos sa kaluwasan. Bisan pag ang magtiayon maoy mga magtutuo, ang ilang kaminyoon tingali dili mithianon. Tungod sa makasasalang mga hilig, ang mga bana ug mga asawa dili kanunayng may mahigugmaong mga hunahuna alang sa usag usa. (Roma 7:19, 20; 1 Corinto 7:28) Ang pipila maghingapin pa nga sila magtinguhag laing kapikas, bisan pag wala silay Kasulatanhong mga pasikaranan alang sa diborsiyo. (Mateo 19:9; Hebreohanon 13:4) Mangatarongan sila nga alang kanila kini ang labing maayo, nga ang kabubut-on sa Diyos nga magpabiling mag-ipon ang mga bana ug mga asawa labihan ka lisod. (Malakias 2:16; Mateo 19:5, 6) Sa walay duhaduha kini lain lang nga kaso sa paghunahuna sa mga hunahuna sa tawo inay niadtong sa Diyos.

15. Nganong ang pag-una sa Diyos usa ka panalipod?

¹⁵ Dako gayong panalipod nga unahon ang Diyos! Ang mga magtiayon nga nagbuhat niini maningkamot nga magpadayon sa pag-ipon ug magsulbad sa ilang mga suliran pinaagi sa pagpadapat sa tambag sa Pulong sa Diyos. Sa ingon malikayan nila ang tanang matang sa mga kasakit sa kasingkasing nga mosangpot sa dihang dili tagdon ang iyang kabubut-on. (Salmo 19:7-11) Giilustrar kini sa usa ka batan-ong magtiayon kinsa, sa dihang hapit nang magdiborsiyo, mihukom nga sundon ang tambag sa Bibliya. Katuigan sa ulahi sa dihang ang asawa naghinumdom sa kalipay nga iyang napahimuslan sa iyang panagtiayon, siya miingon: “Molingkod ug maghilak gayod ako inigpalandong nako sa posibilidad nga nagpuyo unta akong bulag sa akong bana nianang tanang katuigan. Unya ako moampo kang Jehova nga Diyos ug pasalamatan siya tungod sa iyang tambag ug giya nga naghiusa kanamo sa maong malipayong relasyon.”

Mga Bana, mga Asawa​—Sundoga si Kristo!

16. Unsang panig-ingnan ang gihatag ni Jesus alang sa mga bana ug mga asawa?

¹⁶ Si Jesus, kinsa kanunayng nag-una sa Diyos, mihatag ug talagsaong panig-ingnan alang sa mga bana ug mga asawa, ug maayo nga mohatag silag mainampingong pagtagad niini. Ang mga bana giagda sa pagsundog sa paagi sa paggamit ni Jesus sa malumong pagkaulo ibabaw sa mga membro sa Kristohanong kongregasyon. (Efeso 5:23) Ug ang Kristohanong mga asawa makakat-on gikan sa walay-ikasaway nga panig-ingnan ni Jesus sa pagpasakop ngadto sa Diyos.​—1 Corinto 11:3.

17, 18. Sa unsang mga paagi si Jesus mihatag ug maayong panig-ingnan alang sa mga bana?

¹⁷ Ang Bibliya nagsugo: “Mga bana, padayong higugmaa ang inyong mga asawa, maingon nga ang Kristo usab nahigugma sa kongregasyon ug mitugyan sa iyang kaugalingon alang niini.” (Efeso 5:25) Ang usa ka hinungdanong paagi nga gipakita ni Jesus ang iyang gugma alang sa iyang kongregasyon sa mga sumusunod maoy pinaagi sa pagkahimong ilang suod nga higala. “Gitawag ko kamong mga higala,” matod ni Jesus, “tungod kay ang tanang butang nga akong nadungog gikan sa akong Amahan akong gipahibalo kaninyo.” (Juan 15:15) Hunahunaa ang tanang panahong gigugol ni Jesus sa pagpakigsulti sa iyang mga tinun-an​—ang daghan, daghang pakighisgot niya uban kanila​—ug ang iyang pagsalig kanila! Dili ba kana ekselenteng panig-ingnan alang sa mga bana?

¹⁸ Si Jesus naikag pag-ayo sa iyang mga tinun-an ug may tiunayng kahimuot kanila. (Juan 13:1) Sa dihang ang iyang mga pagtulon-an dili tin-aw alang kanila, mapailobon siyang migahin ug panahon sa pribado aron ipatin-aw ang mga butang. (Mateo 13:36-43) Mga bana, ang espirituwal nga kaayohan ba sa inyong asawa maoy sama ka hinungdanon alang kaninyo? Naggugol ka bag panahon uban kaniya, nga nagtinong kamong duha nakabaton sa mga kamatuoran sa Bibliya nga tin-aw sa kaisipan ug kasingkasing? Si Jesus mikuyog sa iyang mga tinun-an diha sa ministeryo, nga tingali nagbansay pa sa matag usa kanila. Gikuyogan mo ba ang imong asawa sa ministeryo, nga nakig-ambit sa balay-ug-balay nga mga pagduaw ug pagdumalag mga pagtuon sa Bibliya?

19. Sa unsang paagi ang pagsagubang ni Jesus sa sugmatsugmat nga mga kahuyangan sa iyang mga apostol mihatag ug panig-ingnan alang sa mga bana?

¹⁹ Si Jesus mihatag ug labing maayong panig-ingnan alang sa mga bana ilabina sa pagsagubang sa mga kasaypanan sa iyang mga apostol. Panahon sa kataposan niyang pagpangaon uban sa iyang mga apostol, siya nakamatikod sa sugmatsugmat nga espiritu sa panag-indig. Iya ba silang gibadlong nga mapintason? Wala, kondili sa kamapainubsanon iyang gihugasan ang mga tiil sa matag usa. (Marcos 9:33-37; 10:35-45; Juan 13:2-17) Nagpakita ka bag ingon nga pailob sa imong asawa? Inay moreklamo bahin sa sugmatsugmat nga kahuyangan, mapailobon ka bang naninguha nga tabangan siya ug tandogon ang iyang kasingkasing pinaagi sa imong panig-ingnan? Ang mga asawa lagmit mosanong ngadto sa maong mahigugmaong kahangawa, sama ra sa mga apostol sa kadugayan.

20. Unsay angay nga dili gayod kalimtan sa Kristohanong mga asawa, ug kinsay gitagana nga usa ka panig-ingnan alang kanila?

²⁰ Ang mga asawa kinahanglang magpalandong usab kang Jesus, kinsa wala gayod malimot nga “ang ulo ni Kristo mao ang Diyos.” Kanunay siyang nagpasakop ngadto sa iyang langitnong Amahan. Sa susama, ang mga asawa angay nga dili malimot nga “ang ulo sa usa ka babaye mao ang lalaki,” oo, nga ang ilang bana mao ang ilang ulo. (1 Corinto 11:3; Efeso 5:23) Si apostol Pedro miagda sa Kristohanong mga asawa nga palandongon ang panig-ingnan sa “mga babayeng balaan” sa karaang kapanahonan, ilabina ang kang Sara, kinsa “nagmasinugtanon kang Abraham, nga nagtawag kaniyang ‘ginoo.’”​—1 Pedro 3:5, 6.

21. Nganong ang kaminyoon ni Abraham ug Sara malamposon apan pakyas ang iya ni Lot ug sa iyang asawa?

²¹ Si Sara lagmit mibiya sa usa ka hamugawayng balay diha sa mauswagong siyudad aron mopuyo sa mga balongbalong diha sa usa ka langyawng yuta. Ngano? Tungod ba kay gipalabi niya ang maong estilo-sa-kinabuhi? Lagmit dili. Tungod ba kay gihangyo siya sa iyang bana nga moadto? Sa walay duhaduha kadto usa ka hinungdan, sanglit gihigugma ug gitahod ni Sara si Abraham tungod sa iyang diyosnong mga hiyas. (Genesis 18:21) Apan ang pangunang hinungdan nga mikuyog siya sa iyang bana mao ang iyang gugma kang Jehova ug iyang kinasingkasing nga tinguha sa pagsunod sa pagtultol sa Diyos. (Genesis 12:1) Siya nagkalipay sa pagsugot sa Diyos. Ang asawa ni Lot, sa laing bahin, nagpanuko sa pagbuhat sa kabubut-on sa Diyos ug sa ingon mitan-awng mawilihon sa mga butang nga gibiyaan sa iyang lungsod sa Sodoma. (Genesis 19:15, 25, 26; Lucas 17:32) Pagkamakapasubo gayong kataposan sa maong kaminyoon​—ang tanan tungod sa iyang pagkamasupilon ngadto sa Diyos!

22. (a) Unsang pagsusi-sa-kaugalingon ang maalamong himoon sa mga membro sa pamilya? (b) Unsay atong hisgotan sa atong sunod nga pagtuon?

²² Busa isip bana o asawa, hinungdanong suknaon nimo ang imong kaugalingon, ‘Giuna ba ang Diyos diha sa among pamilya? Naningkamot ba gayod ako nga tumanon ang pamilyahanong papel nga gihatag kanako sa Diyos? Gihimo ko ba ang tinuod nga panlimbasog nga higugmaon ang akong kapikas ug tabangan siya nga makabaton o padayong makahupot ug maayong relasyon uban kang Jehova?’ Sa kadaghanang pamilya anaa usab ang mga anak. Atong sunod nga hisgotan ang papel sa mga ginikanan ug ang panginahanglan nga unahon nilang duha ug sa ilang mga anak ang Diyos.

Nahinumdom Ka Ba?

◻ Unsa tingali ang mga sangpotanan sa mga pagtulon-an ni Jesus nganha sa daghang pamilya?

◻ Unsang ganti ang nadawat sa kaliboang lig-ong mga Kristohanon?

◻ Unsay motabang sa mga kapikas sa paglikay sa imoralidad ug diborsiyo?

◻ Unsay makat-onan sa mga bana gikan sa panig-ingnan ni Jesus?

◻ Sa unsang paagi ang mga asawa makaamot ngadto sa malipayong kaminyoon?

[Hulagway sa panid 10]

Sa unsang paagi si Sara nakaamot ngadto sa kalamposan sa iyang kaminyoon?