Maayong Balita Alang sa Tanang Katawhan!
“NAKITA ko ang laing manulonda nga naglupad sa tungatunga sa langit, ug siya nagdala sa walay-kataposang maayong balita nga igapahayag ingon nga malipayong balita ngadto sa mga nagapuyo sa yuta, ug ngadto sa tanang nasod ug banay ug pinulongan ug katawhan.” (Pinadayag 14:6) Pinaagi nianang mga pulonga, gibatbat sa tigulang nga apostol si Juan ang iyang dinasig matagnaong panan-awon, usa ka panan-awon nga natuman sa atong adlaw mismo. Pagkamakahupay nga masayod nga adunay maayong balita niining panahon sa nagausbaw nga krimen, polusyon, terorismo, gubat, ug kaylap ekonomikanhong kadili-piho! Apan unsang balitaa ang maayo kaayo nga kinahanglan nga manulonda ang magasangyaw niini? Unsang balitaa ang makalipay gayod nga takos ipahayag ngadto sa tanang nasod ug banay ug pinulongan ug katawhan?
Makatubag kita niana kon hinumdoman nato ang laing higayon dihang ang usa ka manulonda nagpahibalo mismo ug maayong balita. Kadto maoy sa dihang nagkatapos na ang unang siglo W.K.P., nga halos usa ka gatos ka tuig una si Juan makakita sa iyang panan-awon. Ang mga magbalantay sa karnero didto sa gawas kauban sa ilang mga panon sa kapatagan duol sa Bethlehem, ug usa ka manulonda mipakita aron ipahibalo ang pagkatawo ni Jesus, nga miingon: “Tan-awa! ako magapahayag kaninyo sa maayong balita sa dakong kalipay nga mabatonan sa tanang katawhan, tungod kay natawo nganha kaninyo karong adlawa ang usa ka Manluluwas, nga mao ang Kristo nga Ginoo, sa siyudad ni David.”—Lucas 2:10, 11.
Ang pagkatawo ni Jesus maoy tinuod nga “maayong balita sa dakong kalipay.” Siya mitubo nga nahimong sinaad nga Kristo ug Manluluwas, ang usa nga naghatag sa hingpit niyang tawhanong kinabuhi aron mabuhi unta ang mga magtutuo nga matarong ug kasingkasing. Labaw pa niana, siya mao ang mahimong Hari sa Gingharian sa Diyos, ang “Prinsipe sa Pakigdait,” nga ilalom kaniya ang hustisya ug kalinaw sa kataposan moabot sa katawhan. (Isaias 9:6; Lucas 1:33) Sa pagkamatuod, ang iyang pagkatawo maoy maayong balita nga angayang ipahibalo sa usa ka manulonda!
Si Jesus Maoy Hari
Niadtong unang siglo, si Jesus nagtuman sa daghan sa mga katuyoan sa Diyos alang kaniya, apan siya niadto wala pa maglingkod sa trono ingong Hari sa Gingharian sa Diyos. Sumala sa subsob gipunting niining magasina, kana wala mahitabo hangtod sa 1914. Sumala sa tin-awng ginapakita sa katumanan sa tagna, niadtong tuiga ang Gingharian sa Diyos natukod sa mga langit. (Pinadayag 12:10, 12) Bisan pag may daotan kaayong balita sa 1914—pag-ulbo sa Gubat sa Kalibotan I—ang pagkatawo sa Gingharian sa Diyos mao ang pinakamaayong balita. Kana ang hinungdan si Jesus mitagna alang sa atong adlaw: “Kining maayong balita sa gingharian igawali sa tibuok pinuy-anang yuta ingon nga usa ka pamatuod sa tanang nasod.”—Mateo 24:14.
Natuman ba ang tagna ni Jesus? Ang tubag maoy oo! Ug ang matagnaong panan-awon ni Juan natuman usab. Matuod, dili kita makakita sa di-makitang manulonda nga nakita ni Juan. Apan ang mga Saksi ni Jehova makita kaayo samtang sila nagamantala sa maayong balita sa manulonda “ngadto sa tanang nasod ug banay ug pinulongan ug katawhan.” Sa 212 ka kayutaan ug kaislahan sa dagat, ang ilang mga tingog nadungog. Ug ang kapid-an nagasanong. Ang mga kasinatian sa pipila kanila mopakita nga maayo gayod ang balita mahitungod sa Gingharian sa Diyos.