Kinabuhi ug Ministeryo ni Jesus

Pagtagana sa Umaabot Pinaagig Mapuslanong Kaalam

SI Jesus bag-o pang nagsugid sa estorya sa anak nga mausikon ngadto sa usa ka panon nga nag-apil sa iyang mga tinun-an, sa limbongang mga maniningil ug buhis ug sa ubang iladong mga makasasala, ug sa mga eskriba ug sa mga Pariseo. Karon, sa nakigsulti sa iyang mga tinun-an, giasoy niya ang usa ka sambingay mahitungod sa usa ka tawong dato nga nakadawat ug dili-maayong taho mahitungod sa tagdumala sa iyang panimalay, o piniyalan.

Sumala kang Jesus, ang tawong dato nagpatawag sa iyang piniyalan ug nagsulti niya nga iya siyang papahawaon. “Unsa may akong buhaton, sanglit langkaton man sa akong agalon ang pagkapiniyalan gikan kanako?” nahibulong ang piniyalan. “Ako dili kusgan nga igo aron magbugwal, ako maulaw nga magpakilimos. Ah, nahibalo na ako kon unsay akong buhaton, aron nga, kon ako papahawaon sa pagkapiniyalan, dawaton ako sa mga tawo sa ilang mga balay.”

Unsa ang plano sa piniyalan? Aw, gipatawag niya kadtong nakautang sa iyang agalon. “Pila bay utang nimo?” nangutana siya.

‘2,200 litros nga lana sa olibo,’ mitubag ang nahauna.

‘Dawata ang sinulat nga kasabotan ug lingkod ug isulat pagdali ang 1,100,’ siya miingon kaniya.

Iyang gipangutana ang lain: ‘Karon ikaw, pila ang imong utang?’

‘22,000 litros nga trigo,’ siya miingon.

‘Dawata ang imong sinulat nga kasabotan ug isulat ang 18,000.’

Ang piniyalan may katungod sa pagkunhod sa mga bayranan nga giutang gikan sa iyang agalon, sanglit siya pa ang nagdumala sa pinansiyal nga kahimtang sa iyang agalon. Busa pinaagi sa pagkunhod sa mga kantidad, siya nakighigala niadtong makabalos sa iyang mga pabor kon mawad-an siya sa iyang trabaho.

Sa nakadungog ang agalon kon unsay nahitabo, siya nakadayeg. Sa pagkatinuod, iyang “gidayeg ang piniyalan, bisan pag dili matarong, tungod kay siya milihok uban sa mapuslanong kaalam.” Sa pagkamatuod, si Jesus midugang: “Ang mga anak niining sistema sa mga butang labi pang maalamon sa mapuslanong paagi bahin sa ilang kaugalingong kaliwatan kay sa mga anak sa kahayag.”

Karon, sa paghatag ug pagtulon-an alang sa iyang mga tinun-an, si Jesus midasig: “Paghimo kamog mga higala pinaagi sa malimbongong bahandi, aron nga, inigkahurot niini, basin kamo ilang pagadawaton ngadto sa mga puluy-anan nga walay kataposan.”

Si Jesus wala magdayeg sa piniyalan tungod sa iyang pagkadili-matarong kondili tungod sa iyang layog-panglantaw, mapuslanong kaalam. Kadaghanan “ang mga anak niining sistema sa mga butang” maigmatong nagagamit sa ilang salapi o posisyon aron makighigala niadtong makabalos kanila. Busa ang mga alagad sa Diyos, “ang mga anak sa kahayag,” kinahanglan usab nga mogamit sa ilang materyal nga katigayonan, sa ilang “malimbongong bahandi,” sa maalamong paagi nga makahatag kanilag kaayohan.

Apan sumala sa giingon ni Jesus, angay sila maghimog mga higala pinaagi sa maong mga bahandi uban niadtong magadawat nila “ngadto sa mga puluy-anang walay kataposan.” Alang sa mga sakop sa gamayng panon, ang maong mga dapit maoy sa langit; sa ubang mga karnero, kana diha sa Paraisong yuta. Sanglit si Jehova nga Diyos lamang ug ang iyang Anak ang makadawat ug mga tawo nganha sa maong mga dapit, angay kitang magkugi sa paggamit sa “malimbongong bahandi” nga tingali atong nabatonan sa pagsuportar sa intereses sa Gingharian ug sa ingon makapalambo sa pakighigala uban kanila. Unya, inigkahurot o inigkawala sa materyal nga bahandi, ingon nga tinong mahitabo, ang atong umaabot nga walay kataposan matino.

Si Jesus nagpadayon sa pag-ingon nga ang mga tawong matinumanon sa pag-atiman bisan niining materyal, o labing gamay, nga mga butang magmatinumanon usab sa pag-atiman sa mga butang nga labi pang hinungdanon. “Busa,” siya nagpadayon, “kon kamo wala magpamatuod nga matinumanon maylabot sa malimbongong bahandi, kinsay mosalig kaninyo sa butang matuod, [nga mao, sa espirituwal, o Gingharianong intereses]? Ug kon kamo wala magpamatuod nga kamo matinumanon maylabot sa butang nga iya sa lain [ang intereses sa Gingharian nga gisalig sa Diyos sa iyang mga alagad], kinsay mohatag kaninyo kon unsay alang kaninyo [ang ganti nga kinabuhi sa mga puluy-anang walay kataposan]?”

Kita yanong dili mahimong matuod nga mga alagad sa Diyos ug sa samang panahon maulipon sa malimbongong bahandi, ang materyal nga bahandi, sumala sa gihinapos ni Jesus: “Walay sulugoon sa panimalay ang mahimong ulipon sa duha ka agalon; kay, mahimong pagadumtan niya ang usa ug higugmaon ang lain, o siya mounong sa usa ug tamayon ang lain. Dili kamo mahimong mga ulipon sa Diyos ug sa bahandi.” Lucas 15:1, 2; 16:1-13.

◆ Sa unsang paagi ang piniyalan sa sambingay ni Jesus nakighigala niadtong makatabang kaniya sa ulahi?

◆ Unsa ang “malimbongong bahandi,” ug sa unsang paagi kita makahimog mga higala pinaagi kanila?

◆ Kinsay makadawat nato “ngadto sa mga puluy-anang walay kataposan,” ug unsa ba ang maong mga dapit?