HERODES, MGA SUMUSUNOD SA PARTIDO NI
Dayag nga kini sila maoy Hudiyong mga tigpaluyo o mga sumusunod sa partido sa dinastiya sa mga Herodes, nga nakabaton sa awtoridad niini gikan sa Roma. Panahon sa yutan-ong ministeryo ni Jesu-Kristo, si Herodes Antipas mao ang nangulo niini nga dinastiya.
Wala maghisgot ang sekular nga kasaysayan bahin sa mga Herodiano, ug diyutay ra ang paghisgot kanila diha sa Kasulatan. (Mat 22:16; Mar 3:6; 12:13) Apan, dunay hugot nga mga pagsupak bahin sa pagtuo, ingon sa gituohan sa pipila, nga ang mga Herodiano maoy mga sulugoon sa panimalay ni Herodes, nga sila maoy iyang mga sundalo, o nga sila maoy iyang mga opisyal sa palasyo.
Sa politika, ang mga Herodiano anaa sa tungatunga, sa usa ka bahin gisupak sa mga Pariseo ug sa Hudiyong mga zealot kinsa midapig sa kawsa alang sa usa ka Hudiyohanong gingharian nga bug-os independente sa pagmando sa Roma, ug sa laing bahin gisupak niadtong mga midapig sa kawsa alang sa bug-os nga pagkasakop sa Judea sa Imperyo sa Roma. Ang pipila sa mga Saduseo, nga giisip ingong mga tawong may independenteng panghunahuna ug may makasaranganong panglantaw sa Judaismo, lagmit maoy sakop sa Herodianhong pundok sa mga tawo nga samag mga ideolohiya. Kining ulahing konklusyon namugna gikan sa mga taho ni Mateo ug Marcos mahitungod sa mga pulong ni Jesus bahin sa lebadura. Sumala sa Mateo 16:6, si Jesus miingon, “Pagbantay sa lebadura sa mga Pariseo ug sa mga Saduseo,” samtang ang Marcos 8:15 nag-ingon, “Pagbantay sa lebadura sa mga Pariseo ug sa lebadura ni Herodes.” Ang pagsubli sa pulong nga “lebadura” nagpasiugda nga adunay kalainan sa makadaot nga mga pagtulon-an sa duha ka partido. Imbes nga “Herodes,” kining ulahi nga teksto mabasa nga “mga Herodiano” diha sa pipila ka manuskrito, nga mao, ang Chester Beatty Papyrus Num. 1 (P45), ang Codex Washingtonianus I, ug ang Codex Koridethianus.—The Interpreter’s Dictionary of the Bible, giedit ni G. A. Buttrick, 1962, Tomo 2, p. 594; Our Bible and the Ancient Manuscripts, ni Sir Frederic Kenyon, 1958, pp. 215, 216.
Usa ka butang ang tino: ang mga sumusunod sa partido ni Herodes ug ang mga Pariseo, bisan tuod dayag nga magkaatbang bahin sa ilang politikal ug Hudiyohanong mga panglantaw, bug-os nagkahiusa sa ilang mapintas nga pagsupak kang Jesus. Labing menos sa duha ka higayon kining magkaatbang nga mga partido tingob nga nagsabotsabot labot sa kon unsa ang labing maayong paagi sa pagpatay sa ilang komon nga kaaway. Ang una nga gitahong panghitabo nahitabo wala madugay human sa Paskuwa, niadtong 31 K.P., panahon sa dakong ministeryo ni Jesus sa Galilea. Sa pagkakita nga giayo ni Jesus ang nakuyos nga kamot sa usa ka tawo panahon sa Igpapahulay, “ang mga Pariseo nanggula ug dihadiha nakigsabot sa mga sumusunod sa partido ni Herodes batok kaniya, aron sa pagpatay kaniya.”—Mar 3:1-6; Mat 12:9-14.
Ang ikaduhang higayon nga gitaho nahitabo duolan sa duha ka tuig sa ulahi, tulo ka adlaw na lang sa wala pa patya si Jesus, sa dihang ang mga tinun-an sa mga Pariseo ug sa mga sumusunod sa partido ni Herodes naghiusa sa pagsulay kang Jesus labot sa pagbayad ug buhis. Kining mga tawhana sekretong gisuholan “nga magpakaaron-ingnon nga sila matarong, aron sa pagbitik kaniya sa iyang mga sulti, aron itugyan siya sa kagamhanan ug sa awtoridad sa gobernador.” (Luc 20:20) Ilang gisugdan ang ilang direktang pangutana labot sa mga buhis pinaagi sa pag-ulog-ulog aron dili makabantay si Jesus. Apan, kay nakaamgo sa ilang malalangon nga pagkadaotan, si Jesus miingon: “Nganong ibutang ninyo ako sa pagsulay, mga salingkapaw?” Dayon iyang bug-os nga napahilom sila pinaagi sa iyang tubag bahin sa pagbayad ug buhis.—Mat 22:15-22; Luc 20:21-26.