‘Paghimog mga Higala Pinaagi sa Dili-Matarong nga mga Bahandi’

“Paghimog mga higala alang sa inyong kaugalingon pinaagi sa dili-matarong nga mga bahandi . . . Ang tawo nga kasaligan sa unsay labing gamay kasaligan usab sa dako.”​—LUCAS 16:9, 10.

 1. Giunsa pagdayeg ni Moises ug sa mga anak sa Israel si Jehova human sa ilang pagkagawas sa Ehipto?

NALUWAS pinaagi sa usa ka milagro​—makapalig-on gayod sa pagtuo nga kasinatian! Ang pagkagawas sa Israel sa Ehipto ikapasidungog lamang kang Jehova, ang Labing Gamhanan. Dili katingalahan nga si Moises ug ang mga Israelinhon miawit: “Ang akong kusog ug ang akong gahom mao si Jah, sanglit siya nagaalagad alang sa akong kaluwasan. Siya mao ang akong Diyos, ug ako siyang pagadayegon; ang Diyos sa akong amahan, ug ako siyang pagabayawon sa kahitas-an.”​—Exodo 15:1, 2; Deuteronomio 29:2.

 2. Unsay gidala sa katawhan ni Jehova sa ilang pagbiya sa Ehipto?

² Pagkalahi ang bag-ong-nakaplagan nga kagawasan sa Israel kay sa kahimtang nila sa Ehipto! Sa maong panahon sila makasimba na kang Jehova nga walay babag. Ug sila wala mamahawa sa Ehipto nga walay dala. Si Moises miasoy: “Ang mga anak sa Israel . . . nangayo sa mga Ehiptohanon sa mga butang nga binuhat sa salapi ug sa bulawan ug mga biste. Ug si Jehova mihatag ug pabor sa katawhan diha sa mga mata sa mga Ehiptohanon, mao nga ilang gihatag kanila kon unsay gipangayo; ug ilang gihukasan ang mga Ehiptohanon.” (Exodo 12:35, 36) Apan giunsa nila paggamit ang maong mga bahandi sa Ehipto? Misangpot ba kadto sa ‘pagbayaw kang Jehova sa kahitas-an’? Unsay atong makat-onan gikan sa ilang panig-ingnan?​—Itandi ang 1 Corinto 10:11.

“Amot Alang Kang Jehova”

 3. Ang paggamit sa Israel ug bulawan diha sa bakak nga pagsimba miaghat sa unsang reaksiyon gikan ni Jehova?

³ Panahon sa 40-ka-adlaw nga pag-estar ni Moises sa Bukid sa Sinai aron pagdawat ug mga instruksiyon sa Diyos alang sa Israel, ang mga tawo nga nagpaabot sa ubos nabalaka. Nga gitangtang ang ilang bulawang mga ariyos, sila nagsugo kang Aaron sa paggamag usa ka imahen aron ilang pagasimbahon. Si Aaron nagtukod usab ug usa ka halaran alang kanila, ug sayo sa pagkasunod adlaw, sila naghalad ug mga halad didto. Ang maong paggamit nila sa ilang bulawan nakapamahal ba kanila sa ilang Manluluwas? Tino nga wala! “Karon pasagdi ako,” si Jehova mipahayag kang Moises, “aron ang akong kasuko mahimong mosilaob batok kanila ug sila mahimong akong laglagon.” Tungod lamang sa pangaliyupo ni Moises nga si Jehova wala maglaglag sa nasod, bisan tuod ang rebelyosong mga lider gipatay sa usa ka hampak gikan sa Diyos.​—Exodo 32:1-6, 10-14, 30-35.

 4. Unsa ang “amot alang kang Jehova,” ug kinsay mihatag niana?

⁴ Sa ulahi, ang Israel nakahigayon sa paggamit sa mga bahandi nga ilang nabatonan sa paagi nga nagpahimuot kang Jehova. Gihimo nila “ang usa ka pag-amot alang kang Jehova.”a Ang bulawan, salapi, tumbaga, asul nga hilo, lainlaing tinina nga materyales, mga panit sa karnero, mga panit sa poka, ug kahoy sa akasya nahiapil sa mga donasyon alang sa pagtukod ug pagdayandayan sa tabernakulo. Ang asoy nagtumong sa atong pagtagad sa tinamdan sa mga miamot. “Pasagdi nga ang matag usa nga may andam nga kasingkasing magdala niana ingong amot alang kang Jehova.” (Exodo 35:5-9) Ang Israel naghatag nga madagayaon. Busa, ang tabernakulo maoy usa ka gambalay nga “matahom ug labing hamili,” sa pagkutlo sa mga pulong sa usa ka eskolar.

Mga Amot Alang sa Templo

 5, 6. May kalabotan sa templo, giunsa paggamit ni David ang iyang mga bahandi, ug unsay sanong sa uban?

⁵ Bisan tuod si Haring Solomon sa Israel ang nagdumala sa pagtukod ug usa ka permanenteng balay alang sa pagsimba ni Jehova, si David, nga iyang amahan, mihimog dakong pagpangandam alang niana. Gitigom niya ang daghan kaayong bulawan, salapi, tumbaga, puthaw, kahoy, ug mahalong mga bato. “Sanglit ako nagakalipay sa balay sa akong Diyos,” giingnan ni David ang iyang katawhan, “aduna pay linain kong kabtangan, bulawan ug salapi; ihatag ko kini ngadto sa balay sa akong Diyos ibabaw ug labaw sa tanan nga akong giandam alang sa balaang balay: tulo ka libong talento nga bulawan . . . ug pito ka libong talento nga linunsayng salapi, aron ihal-op sa mga bungbong sa mga balay.” Si David midasig sa uban nga magmahinatagon usab. Ang sanong maoy labihan ka daghan: mas daghang bulawan, salapi, tumbaga, puthaw, ug mahalong mga bato. “Uban sa bug-os nga kasingkasing,” ang katawhan mihimog “kinabubut-ong mga amot alang kang Jehova.”​—1 Cronicas 22:5; 29:1-9.

⁶ Pinaagi niining boluntaryong mga amot, ang mga Israelinhon nagpahayag ug lalom nga apresasyon alang sa pagsimba ni Jehova. Si David mapaubsanong miampo: “Kinsa ba ako ug kinsa ba ang akong katawhan, aron nga kami magahawid ug gahom sa paghimog kinabubut-ong mga halad nga ingon niini?” Ngano? “Kay ang tanang butang nagagikan man kanimo, ug gikan sa imong kaugalingong kamot kami naghatag kanimo. . . . Ako, sa akong bahin, sa katul-id sa akong kasingkasing kinabubut-ong naghatag niining tanang butang.”​—1 Cronicas 29:14, 17.

 7. Unsang pasidaang pagtulon-an ang atong makat-onan gikan sa adlaw ni Amos?

⁷ Bisan pa niana, ang mga tribo sa Israel napakyas sa pagbutang nga una sa pagsimba ni Jehova diha sa ilang mga hunahuna ug mga kasingkasing. Sa pagkasiyam nga siglo W.K.P., ang nabahin nga Israel nahimong sad-an sa espirituwal nga pagpasagad. Mahitungod sa amihanan napulog-tribo nga gingharian sa Israel, si Jehova mipahayag pinaagi ni Amos: “Alaot sila nga naa sa kasayon sa Sion ug silang nagasalig sa bukid sa Samaria!” Iyang gibatbat sila ingong mga tawo nga “nagahigda sa mga higdaanan nga garing . . . nga nanaghay-ad ibabaw sa ilang mga higdaanan, . . . nga nagakaon sa mga nating karnero gikan sa usa ka panon ug sa nating mga toro gikan sa taliwala sa pinatambok nga mga nating baka; . . . nga nagainom gikan sa mga tagayan sa bino.” Apan ang ilang kadagaya dili panalipod. Ang Diyos nagpasidaan: “Sila pagabihagon uban sa unang mga binihag, ug ang paghudyaka sa mga nanaghay-ad sa higdaanan mahanaw gayod.” Niadtong 740 W.K.P., ang Israel nag-antos diha sa mga kamot sa Asirya. (Amos 6:1, 4, 6, 7) Ug sa nahaigong panahon ang habagatang gingharian sa Juda nabiktima usab sa materyalismo.​—Jeremias 5:26-29.

Tukmang Paggamit sa Kahinguhaan sa Kristohanong Kapanahonan

 8. Unsang maayong panig-ingnan ang gihatag ni Jose ug ni Maria bahin sa paggamit sa kahinguhaan?

⁸ Ingong kaatbang, ang kabos nga kahimtang sa mga alagad sa Diyos sa ulahing kapanahonan wala magpugong kanila sa pagpasundayag ug kadasig alang sa matuod nga pagsimba. Tagda pananglitan si Maria ug si Jose. Sa pagsugot sa sugo ni Cesar Agosto, sila mipanaw ngadto sa lungsod sa ilang pamilya, ang Betlehem. (Lucas 2:4, 5) Didto si Jesus natawo. Kap-atan ka adlaw sa ulahi, si Jose ug si Maria miduaw sa templo sa haduol nga Jerusalem aron sa pagtanyag sa gibaod nga halad sa pagpahinlo. Nagpaila sa ilang kakabos sa materyal, si Maria mihalad ug duha ka gagmayng langgam. Ni siya o si Jose nagpasangil sa ilang kakabos aron dili maghalad kang Jehova. Hinunoa, sa kamasinugtanon ilang gigamit ang diyutay nilang kahinguhaan.​—Levitico 12:8; Lucas 2:22-24.

 9-11. (a) Ang mga pulong ni Jesus sa Mateo 22:21 mohatag ug unsang giya bahin sa kon unsaon nato paggamit ang salapi? (b) Nganong ang gamayng amot sa babayeng balo wala ihatag nga kawang?

⁹ Sa ulahi, ang mga Pariseo ug ang mga sumusunod sa partido ni Herodes misulay pagbitik kang Jesus, nga miingon: “Busa, sultihi kami, Unsay imong hunahuna? Subay ba sa balaod nga mobayad ug kada-ulo nga buhis ngadto kang Cesar o dili?” Ang tubag ni Jesus nagpadayag sa iyang panabot. Nga nagtumong sa sensilyo nga ilang gihatag kaniya, si Jesus nangutana: “Kang kinsa bang dagway ug mga kinulit kini?” Sila mitubag: “Kang Cesar.” Siya maalamong mihinapos: “Busa, ibayad ang mga butang ni Cesar ngadto kang Cesar, apan ang mga butang sa Diyos ngadto sa Diyos.” (Mateo 22:17-21) Si Jesus nasayod nga ang awtoridad nga nagluwat sa sensilyo nagdahom nga ang mga buhis pagabayran. Apan didto ang samang mga sumusunod ug mga kaaway niya iyang gitabangan sa pagkaamgo nga ang usa ka matuod nga Kristohanon maningkamot usab nga ibayad “ang mga butang sa Diyos ngadto sa Diyos.” Kini naglakip sa tukmang paggamit sa materyal nga kahinguhaan sa usa.

¹⁰ Usa ka hitabo nga nasaksihan ni Jesus sa templo nag-ilustrar niini. Bag-o pa niyang gisaway ang hakog nga mga eskriba nga ‘naglamoy sa mga balay sa mga babayeng balo.’ “Sa miyahat siya iyang nakita ang mga dato nga nanghulog sa ilang mga gasa sa mga panudlanag bahandi,” mitaho si Lucas. “Unya nakita [ni Jesus] ang usa ka kabos nga babayeng balo nga naghulog didto ug duha ka gagmayng sinsilyo nga kubos kaayog bili, ug siya miingon: ‘Ako magasulti kaninyo sa pagkamatuod, Kini nga babayeng balo, bisan kabos, mihulog ug labaw pa kay sa gihimo sa tanan. Kay ang tanan kanila mihulog ug mga gasa gikan sa ilang mga sobra, apan kini nga babaye gikan sa iyang kawalad-on mihulog sa tanang kahinguhaan nga gibatonan niya.’” (Lucas 20:46, 47; 21:1-4) Ang pipila ka tawo naghisgot nga ang templo nadayandayanan sa mahalong mga bato. Si Jesus mitubag: “Kon bahin niining mga butanga nga inyong nakita, moabot ang mga adlaw diin walay bato nga magpabilin dinhi nga napatong sa usa ka bato ug dili pagatumpagon.” (Lucas 21:5, 6) Nakawang ba ang gamayng amot niadtong babayeng balo? Tinong wala. Siya misuportar sa kahikayan nga gipahimutang ni Jehova niadtong panahona.

¹¹ Giingnan ni Jesus ang iyang matuod nga mga sumusunod: “Walay sulugoon sa balay nga mahimong ulipon sa duha ka agalon; kay, mahimong iyang dumtan ang usa ug higugmaon ang lain, o siya motapot sa usa ug tamayon ang lain. Dili mahimo nga mga ulipon kamo ngadto sa Diyos ug ngadto sa mga bahandi.” (Lucas 16:13) Sa ingon, sa unsang paagi atong ikapasundayag ang tukmang katimbang sa paggamit sa atong panalapi?

Kasaligang mga Tinugyanan

12-14. (a) Ang mga Kristohanon maoy mga tinugyanan sa unsang kahinguhaan? (b) Sa unsang talagsaong mga paagi ang katawhan ni Jehova karong adlawa matinumanong nagatuman sa ilang pagkatinugyanan? (c) Asa magagikan ang salaping ginasuportar sa buluhaton sa Diyos karong adlawa?

¹² Sa dihang gipahinungod nato ang atong mga kinabuhi kang Jehova, kita sa pagkamatuod nag-ingon nga ang tanang butang nga atong nabatonan, ang tanan natong kahinguhaan, iyaha. Nan, sa unsang paagi angay natong gamiton ang atong nabatonan? Sa paghisgot sa Kristohanong pag-alagad diha sa kongregasyon, si Igsoong C. T. Russell, ang unang presidente sa Watch Tower Society, misulat: “Ang matag usa angay magaisip sa iyang kaugalingon ingong tinudlo sa Ginoo aron mahimong tinugyanan sa iyang kaugalingong panahon, impluwensiya, kuwarta, ubp., ug ang matag usa magatinguha sa paggamit niining mga hiyasa sumala sa labing maarangan niya, sa himaya sa Agalon.”​—The New Creation, panid 345.

¹³ “Ang gipangita diha sa mga tinugyanan mao nga ang usa ka tawo makaplagang kasaligan,” nag-ingon ang 1 Corinto 4:2. Ingong usa ka internasyonal nga organisasyon, ang mga Saksi ni Jehova naningkamot sa paglihok sumala sa maong kabatbatan, nga nagagamit sa labing daghan nilang panahon kutob sa ilang mahimo diha sa Kristohanong ministeryo, nga mabinantayong nagaugmad sa ilang mga katakos sa pagpanudlo. Dugang pa, ang mga pundok sa mga boluntaryo ubos sa pagdumala sa Rehiyonal nga mga Komite sa Pagpanukod kinabubut-ong nagahatag sa ilang panahon, kusog, ug kahibalo sa pagtukod ug labing maayong mga tigomanan aron gamiton sa pagsimba. Niining tanan, si Jehova nahimuot pag-ayo.

¹⁴ Diin ba gikan ang salapi nga nagasuportar niining dako kaayong kampanya sa pagpanudlo ug buluhatong pagpanukod? Gikan sa mga tawong andam sa kasingkasing, sama ra sa nahitabo sa mga adlaw sa pagtukod sa tabernakulo. Sa tinagsatagsa, kita ba nagapakigbahin? Ang paagi ba sa atong paggamit sa atong panalapi nagpasundayag nga ang pag-alagad ni Jehova labawng hinungdanon kanato? Kon bahin sa salapi, hinaot unta nga kita maoy kasaligang mga tinugyanan.

Usa ka Sulundan sa Pagkamahinatagon

15, 16. (a) Giunsa pagpasundayag sa mga Kristohanon sa adlaw ni Pablo ang pagkamahinatagon? (b) Unsaon nato pag-isip ang atong gihisgotan karon?

¹⁵ Si apostol Pablo misulat mahitungod sa mahinatagong espiritu sa mga Kristohanon sa Macedonia ug Acaya. (Roma 15:26) Bisan pag sila timawa mismo, sila miamot dayon aron tabangan ang ilang mga igsoon. Gidasig ni Pablo ang mga Kristohanon sa Corinto sa paghatag usab nga madagayaon, nga maghatag sa ilang kapin aron mahulipan ang kakulangan sa uban. Walay usa ang tukmang makaakusar kang Pablo sa pagpanghukhuk. Siya misulat: “Siya nga nagapugas nga tagidiyot magaani usab nga tagidiyot; ug siya nga nagapugas nga madagayaon magaani usab nga madagayaon. Ipabuhat sa matag usa ang sumala sa iyang gikahukom diha sa iyang kasingkasing, dili nga kontragusto o pinugos, kay gihigugma sa Diyos ang usa ka masayahong maghahatag.”​—2 Corinto 8:1-3, 14; 9:5-7, 13.

¹⁶ Ang dagkong mga amot nga gihimo sa atong mga igsoon ug mga tawong interesado alang sa tibuok-kalibotang buluhaton sa Gingharian karong adlawa naghatag ug ebidensiya kon unsa ka dako ang ilang pagtamod niining pribilehiyoa. Apan, sumala sa gipahinumdom ni Pablo sa mga taga-Corinto, maayo nga isipon nato kining paghisgota ingong usa ka pahinumdom.

17. Unsang sulundan sa paghatag ang gidasig ni Pablo, ug kini ba mapadapat karong adlawa?

¹⁷ Giagda ni Pablo ang mga igsoon sa pagsunod sa usa ka organisadong kahikayan sa ilang pagpanghatag. “Matag unang adlaw sa semana,” matud niya, “ang matag usa kaninyo diha sa iyang kaugalingong balay pagahina ingong pagtigom sumala sa iyang pag-uswag.” (1 Corinto 16:1, 2) Kana mahimong usa ka panig-ingnan alang kanato ug sa atong mga anak sa atong pag-amot, kon kaha atong gihimo kini pinaagi sa kongregasyon o direkta ngadto sa labing duol nga sangang-buhatan sa Watch Tower Society. Usa ka magtiayong misyonaryo nga naasayn sa pagsangyaw sa usa ka lungsod sa Sidlakang Aprika nagdapit ug mga tawong interesado nga moduyog kanila alang sa usa ka pagtuon sa Bibliya. Pagkahuman niadtong unang tigom, ang mga misyonaryo mainampingong naghulog ug pila ka sensilyo diha sa usa ka kahon nga minarkahag “Amot alang sa buluhaton sa Gingharian.” Ang ubang mga tumatambong nagbuhat usab niana. Sa ulahi, human maorganisar kining mga bag-ohan nga usa ka Kristohanong kongregasyon, ang magtatan-aw sa sirkito miduaw ug mikomento bahin sa pagkaregular sa ilang mga amot.​—Salmo 50:10, 14, 23.

18. Sa unsang paagi kita makatabang sa atong mga igsoong anaa sa kalisdanan?

¹⁸ Kita usab adunay pribilehiyo sa paggamit sa atong kahinguhaan aron tabangan ang mga biktima sa mga katalagman sa kinaiyahan ug kadtong nagpuyo sa mga dapit nga gidaot sa gubat. Pagkadako sa atong kalipay sa pagkabasa bahin sa hinabang nga gipadala ngadto sa Sidlakang Uropa samtang ang ekonomikanhon ug politikanhong kagubot milampornas nianang bahina sa kalibotana! Ang mga amot nga manggad ug salapi nagpasundayag sa pagkamahinatagon ug pagkanahugpong sa atong mga igsoon uban sa naalaot nga mga Kristohanon.b​—2 Corinto 8:13, 14.

19. Unsang praktikal nga mga butang ang atong mahimo sa pagtabang niadtong anaa sa bug-os-panahong pag-alagad?

¹⁹ Gipabilhan nato pag-ayo ang buluhaton sa atong mga igsoon nga nagabuhat diha sa bug-os-panahong pag-alagad isip mga payunir, nagapanawng mga magtatan-aw, mga misyonaryo, ug mga boluntaryo sa Bethel, dili ba? Sumala sa itugot sa atong mga kahimtang, kita tingali makaarang sa paghatag kanila nga direkta ug diyutayng materyal nga tabang. Pananglitan, dihang moduaw ang magtatan-aw sa sirkito sa inyong kongregasyon, basin makaarang kamo sa pagtagana kaniyag puy-anan, mga pagkaon, o tabang sa iyang galastohan sa pagsakaysakay. Ang maong pagkamahinatagon himatikdan gayod sa atong langitnong Amahan, kinsa nagtinguha nga maatiman ang iyang mga alagad. (Salmo 37:25) Pila ka tuig kanhi usa ka igsoon nga nakaarang lamang sa pagdulot ug meryenda midapit sa usa ka nagapanawng magtatan-aw ug iyang asawa ngadto sa iyang balay. Sa pagbiya sa magtiayon alang sa gabii nga pagsangyaw, ang igsoong lalaki mitunol ug sobre sa iyang mga bisita. Diha sa sulod ang usa ka papel de bangko (ang katumbas sa usa ka dolyar nga T.B.) uban kining sinulat-kamot nga nota: “Alang sa usa ka tasang tsa o usa ka galon nga gasolina.” Pagkanindot ang apresasyon nga gipahayag niining mapaubsanong paagi!

20. Unsang pribilehiyo ug responsabilidad ang dili nato buot pasagdan?

²⁰ Sa espirituwal nga paagi, ang katawhan ni Jehova maoy bulahan! Gipahimuslan nato ang espirituwal nga mga kombira panahon sa atong mga asembliya ug mga kombensiyon, diin kita makadawat ug bag-ong mga basahon, maayong pagtulon-an, ug praktikal nga tambag. Uban sa mga kasingkasing nga punog apresasyon alang sa atong espirituwal nga mga panalangin, dili nato kalimtan ang atong pribilehiyo ug responsabilidad sa pag-amot ug salapi aron gamiton sa pagpauswag sa intereses sa Gingharian sa Diyos sa tibuok kalibotan.

‘Paghimog mga Higala Pinaagi sa Dili-Matarong nga mga Bahandi’

21, 22. Unsay mahitabo sa dili madugay sa “dili-matarong nga mga bahandi,” nga nagaobligar kanato sa pagbuhat sa unsa karon?

²¹ Sa pagkatinuod, adunay daghang paagi nga kita makapakita nga ang pagsimba ni Jehova labing hinungdanon sa atong mga kinabuhi, ug ang usa ka linaing hinungdanong paagi sa pagpakita niini naglangkit sa atong pagsunod sa tambag ni Jesus: “Paghimog mga higala alang sa inyong kaugalingon pinaagi sa dili-matarong nga mga bahandi, aron nga, sa dihang kana mapakyas, sila magadawat kaninyo ngadto sa walay-kataposang mga puy-anang dapit.”​—Lucas 16:9.

²² Matikdi nga si Jesus naghisgot mahitungod sa kapakyasan sa dili-matarong nga mga bahandi. Oo, ang adlaw moabot sa dihang ang salapi niining sistemaha mahimong walay pulos. “Ngadto sa kadalanan ipanglabay nila ang ilang salapi mismo, ug ang ilang kaugalingong bulawan mahimong usa ka dulumtanang butang,” mitagna si Ezekiel. “Ni ang ilang salapi ni ang ilang bulawan makaarang sa pagluwas kanila sa adlaw sa kapungot ni Jehova.” (Ezekiel 7:19) Hangtod nga mahitabo kini, kinahanglang ipakita nato ang kaalam ug panabot sa paagi sa atong paggamit sa atong materyal nga kahinguhaan. Sa ingon kita dili maghinumdom nga may pagbasol tungod sa pagkapakyas sa pagpamati sa pasidaan ni Jesus: “Kon wala ninyo mapamatud-i ang inyong kaugalingon nga kasaligan may kalabotan sa dili-matarong nga mga bahandi, kinsa may magasalig kaninyo sa unsay matuod? . . . Dili mahimo nga mga ulipon kamo ngadto sa Diyos ug ngadto sa mga bahandi.”​—Lucas 16:11-13.

23. Unsay gamiton nato sa maalamong paagi, ug unsa unya ang atong ganti?

²³ Nan, kitang tanan unta sa pagkamatinuohon mamati niining mga pahinumdom sa pagbutang sa pagsimba ni Jehova nga una sa atong mga kinabuhi ug paggamit nga maalamon sa tanan natong kahinguhaan. Sa ingon padayon natong mahuptan ang atong pagpakighigala kang Jehova ug kang Jesus, kinsa nagsaad nga dihang mapakyas ang salapi sila magadawat kanato ngadto sa “walay-kataposang puy-anang mga dapit,” uban ang kalaoman nga kinabuhing dayon diha kaha sa langitnong Gingharian o sa usa ka paraisong yuta.​—Lucas 16:9.

[Footnote]

Nahinumdom Ka Ba?

◻ Unsay sanong sa Israel sa pagdapit ni Jehova nga moamot alang sa pagtukod sa tabernakulo?

◻ Nganong ang amot sa babayeng balo wala makawang?

◻ Unsang responsabilidad ang giabaga sa mga Kristohanon sa paagi sa paggamit nila sa ilang kahinguhaan?

◻ Sa unsang paagi makalikay kita sa pagbasol tungod sa atong paggamit sa salapi?

[Hulagway sa panid 15]

Ang amot sa babayeng balo, bisag gamay,wala makawang

[Mga hulagway sa panid 16, 17]

Ang atong mga amot nagsuportar sa buluhaton sa Gingharian sa tibuok kalibotan