Paraiso—Handurawan Lamang?
Sinulat sa koresponsal sa “Pagmata!” sa Hawaii
MATIN-AWNG asul nga panganod, mainit balasong mga baybayon, naglukotlukot nga mga balod—mao ba kini ang imong ideya sa paraiso? Ang mga palwa sa lubi nga naglubaylubay sa mainit tropikal nga mga huyohoy, lunhawng mga bukid nga nanuybo ngadto sa mga panganod, nagdahunog nga mga busay nga nagbusagak diha sa mabugnaw ug halayong mga linaw, mabulokong bangaw, matahom kaayong pagsalop sa adlaw—mga panan-awon sa paraiso ginahimo niining mga butanga.
Siyempre, ang tropikal nga isla dili tingali maoy ideya sa tanan bahin sa paraiso. Ang usa ka batan-on nga mibalhig puyo sa isla sa Pasipiko miingon nga mapangandoyon: “Gimingaw ako sa mabugnaw, hayahayng mga adlaw sa tinghunlak dihang ang mga kahoy mamula sa ilang mga dahon. Gimingaw usab ako, sa malinawng mga gabii sa tingtugnaw dihang ang tanan bukotan sa preskong niyebe.”
Bisag nagkalainlain ang mga handurawan sa paraiso, adunay pipila ka butang nga gusto sa tanan. Ang usa mao nga makauban unta nimo didto ang imong minahal. Lain mao nga matagamtam unta ang pagbati sa kalinaw ug kasegurohan, oo, mawala unta ang mga problema karon sa atong kinabuhi.
Apan realistiko ba ang pagtuo nga makaplagan ang paraiso karon? Ang pagbalhin bag usa ka lugar diin matagamtam sa usa ang katahom sa kinaiyahan diha sa maanindot nga mga palibot mao ang tubag?
“Paraiso sa Pasipiko”
Bisan pa nga daghang matahom nga mga dapit sa tibuok kalibotan gidayeg sa mga bisita nga samag paraiso, ang Hawaii mao ang kinaham sa kadaghanang listahan sa mga tawo. Karon ang Hawaii ginaduaw kapin sa kuwatro milyones ka turista sa usa ka tuig ug nakaangkon sa iyang kaugalingon ug maanindot nga ngalan “Paraiso sa Pasipiko.”
Ang kadaghanang mga bisita nadani sa ilang nakita dinhi—ang tagsaong katahom sa mga bukid, sa mga pangpang, ug mga busay; ang matin-aw, asul nga katubigan sa dagat ug maputi balasong mga baybay; ang pagkaabunda sa mga bulak ug mga nagapamungang mga kahoy; ang mabugnawng klima; ug ang mahigalaong lokal nga katawhan.
Ang matag grupo sa isla sa Hawaii dunay iyang tagsaong katahom. Pananglitan, diha sa Kauai, ang “Isla nga Tanaman,” matingala ang mga bisita sa “Grand Canyon of the Pacific,” nga nailhan usab nga Waimea Canyon. Ang Oahu ilado sa kalibotan sa iyang Waikiki Beach ug sa Diamond Head. Ang makahahadlok apan matahom nga Haleakala Crater, nga maoy paboritong lugar sa pagtan-aw sa pagsubang sa adlaw, anaa sa Maui. Ang isla sa Hawaii, o ang Big Island, adunay duha sa labing dako aktibong bolkan sa kalibotan—ang Kilauea ug Mauna Loa—nga magpasundayag sa ilang nagakalayong katahom sa matag karon ug unya. Dinhi imong makita usab ang tagsaon maitom nga mga baybay. Bisag asa ka motan-aw, katingalahan ug matahom nga mga butang mopukaw sa imong mga galamhan.
Apan hulat una! Sa dili ka pa manghipos ug ibalhin ang imong pamilya ug mga kabtangan dinhi, palandonga: Ang Hawaii ba tinuod nga maoy imong handurawan sa paraiso? Tugotan ta nga kini adunay kinaiyanhong katahom ug tagsaong mga talan-awon, bisan pa ang Hawaii ba maoy imong paglantaw nga usa ka paraiso?
Usa ka Tinuod nga Paraiso?
“Tingali sa miagi,” miingon ang ikaduhang kaliwatan nga lumad nga may dugong Hapon. “Hinuon, karon, may mga problema kami sama sa uban—naghuot nga trapiko, pagdasok, polusyon, ug krimen.” Ingong ulo sa pamilya ug amahan sa tulo, siya miingon: “Ang problema sa pagkawalay trabaho ug ang hataas nga bili sa pagkinabuhi nagpalisod sa pagtagana alang sa imong pamilya. Ang mga pangawat ug ang pagpanulis nakadugang sa imong mga problema.”
“Tinuod, kon itandi sa daghang mga dapit nga akong naadtoan,” miingon ang Hawaiiano-Intsik nga negosyante nga nakabiyahe sa tibuok Oryente, sa Tinipong Bansa, ug sa Pasipiko. “Apan, ang kadaghanan sa mas simple, walay problema, dili-komplikadong kinabuhi sa Daang Hawaii nawala na.” Nagapanumdom, siya mipadayon: “Sa bata pa, kanunay akong mobisita sa mga silingan. Ang tanan nag-inambitay sa among nabatonan, ug walay mangandado sa iyang mga pultahan. Apan dili na karon. Ang mga tawo karon mapanukohon.” Dayon, milakbit sa ulohan nga dili kasagarang hisgotan, siya miingon: “Ang usa sa tinuod nga kadaot sa modernong Hawaii mao ang nagalambong pagpanguma ug droga. Tingali tungod kini sa klima ug sa problema usab sa modernong katilingban nga nagasuportar sa pangandoy sa pag-ikyas.”
Ang mga komento nga sama niini nagpunting kon unsay nagakahitabo sa Hawaii ug sa ubang “samag paraiso” nga mga lugar sa tibuok kalibotan. Ang mga tawo, sa ilang kaikag sa pagtagamtam sa kinabuhi diha sa usa ka ‘maanindot nga lokasyon,’ nanghugop niining matahom nga mga isla. Ang resulta dili lamang usa ka dili-hitupngang pagtubo ug pagdako sa populasyon ug ekonomiya sa Hawaii—lakip sa bahin niini sa sosyal nga mga problema—kondili ang malaglagong epekto sa natural nga palibot niini.
Sa pagkatinuod, ang polusyon sa natural nga kahinguhaan, maingon man sa ubang mga problema sa palibot, nakadaot sa tanang suok sa kalibotan. Ang krimen, pag-abuso sa droga, ug paghuot nga kondisyon sa panimuyo mihampak sa mga siyudad sa tibuok kalibotan. Ang sakit, pagkatigulang, ug kamatayon misakit sa mga tawo sa tanang dapit.
Sa matin-aw, ang tinuod labaw pa ang paraiso sa usa lamang ka matahom nga dapit nga pagapuy-an. Ang katawhan ug ang paagi sa pagkinabuhi ang nagpahimo sa usa ka matahom nga dapit nga paraiso. Tingali nagpuyo ka sa labing matahom nga lugar sa kalibotan, apan kon ang krimen, kawalay trabaho, taas nga mga prisyo, ug ubang mga problema naglungtad, wala ka magpuyo sa tinuod nga paraiso.
Nagpasabot ba kini nga ang pagpuyo diha sa usa ka tinuod nga paraiso usa lamang ka damgo, usa ka handurawan? May panahon ba nga ang yutan-ong paraiso—usa ka tibuok-globong paraiso—matuman?
Sukaranan sa Paglaom
Ang kamatuoran mao, ang paglaom sa kadaghanang tawo alang sa tibuok-yutang paraiso malig-on kaayo. Alang kanila, ang mga pulong ni Jesu-Kristo, nga gipamulong sa mga kasiglohan kanhi, madanihon gihapong pamation dihang una kining gibungat: “Ikaw magauban kanako sa Paraiso.”—Lucas 23:43.
Usa ba lamang kini ka pangandoy sa hunahuna, o paglaom kon ang mga butang dili maayo, sa ilang bahin? Unsa kanang Paraiso nga gisaad ni Jesus? Ug sa unsang paagi motungha kini?
Gihimo ni Jesus kanang saara sa usa ka mahinulsolong kriminal nga gisilotan sa kamatayon diha sa kahoy nga estaka. Gikan sa mahinulsolong kasingkasing, ang kriminal miingon: “Jesus, hinumdomi ako inig-abot nimo sa imong gingharian.” Sa pagtubag, si Jesus miingon kaniya: “Sa pagkatinuod magaingon ako kanimo karong adlawa, Ikaw magauban kanako sa Paraiso.”—Lucas 23:40-43.
Namatikdan ba nimo niining pagsultihay kon unsa ang yawi sa Paraiso? Wala sultihi ni Jesus ang mamumuhat ug daotan nga siya adunay dili-mamatay nga kalag nga mobulag ngadto sa paraiso sa laing kalibotan niadtong adlawa. Bisan si Jesus mismo naghulat pa ug gibanhaw sa Diyos sa tulo ka adlaw sa ulahi. Hinunoa, si Jesus nagpunting sa umaabot nga paraiso nga tukoron dinhi ning yuta dihang siya moabot sa gahom sa Gingharian. Oo, ang yawi sa Paraiso mao ang Gingharian sa Diyos, ang usa nga maoy gitudlo ni Jesus nga iampo sa iyang mga sumusunod: “Paanhia ang imong gingharian.”—Mateo 6:10.
Apan sa unsang paagi ipatungha sa Gingharian sa Diyos ang tibuok-yuta nga paraiso? Realistiko ba ang pagtuo nga molampos kini dihang ang tanang mga gingharian, ug tanang matang sa kagamhanan napakyas?
Ang Gingharian sa Diyos sa Pagluwas
Klarong gipadayag sa Bibliya ang mga lakang nga himoon sa Gingharian sa Diyos sa pagpasig-uli sa Paraiso sa yuta. Nagpanan-aw niadtong panahona, ang basahon sa Bibliya sa Pinadayag nagtug-an kanato kon unsa ang unang mahitabo, sa pag-ingon: “Ang mga kanasoran nangapungot, apan miabot ang imong kapungot, ug ang tinudlong panahon . . . sa paglaglag sa nagalaglag sa yuta.”—Pinadayag 11:17, 18.
Dihang motan-aw si Jehova nga Diyos sa pagdaot sa tawo sa hangin, tubig, ug yuta tungod sa ilang hakog nga pagpahimulos sa kahinguhaan sa yuta ug sa ilang madugoon ug malaglagong gubat, may igo siyang katarongan nga masuko ug sa paglihok sa paghunong sa ilang binuang nga dalan. Maoy hinungdan nga iyang “laglagon kadtong nagalaglag sa yuta” sa dili pa ulahi ang tanan. Motugot unya kini sa kinaiyanhong gahom sa pag-ayo sa yuta sa pagbaliskad sa kadaot nga nahimo ug sa pagbalik sa yuta nga samag paraisong kahimtang.
Atimanon usab sa Gingharian ang krimen ug mga kriminal nga nagapangawat sa kasegurohan ug kalipay nga maoy gikinahanglan kaayo sa Paraiso. “Kay ang mga mamumuhat ug daotan pagaputlon,” misulat ang salmista, “apan kadtong nagahulat kang Jehova mao ang makapanunod sa yuta.” Ilalom sa pagmando sa Gingharian, ang tanan mga managhigala ug tinuod nga silingan. Wala nay kinahanglan pa sa mga kandado, mga sistema sa seguridad, ug mga polis. “Sila makakaplag gayod sa ilang tumang kalipay diha sa kadagaya sa pakigdait,” nagsaad ang Bibliya.—Salmo 37:9, 11.
Ang pagkatigulang, sakit, ug kamatayon—kadtong dagkong tigbalda sa kalipay—maoy mga butang na unya sa nangagi. “Walay pumoluyo nga moingon: ‘May sakit ako,’” matud pa ni propetang Isaias kanato. “Ug ang kamatayon mawala, ug wala na usab unyay pagminatay ni paghilak ni kasakit. Kay ang unang mga butang nangagi na.”—Isaias 33:24; Pinadayag 21:4.
Komusta ang pangunang mga panginahanglan sa tawo alang sa pagkaon, puloy-anan, ug magantihong buluhaton? Karon, ang kakulangan sa pagkaon ug kagutmanan misakit sa minilyon. Ang dakong bahin sa katawhan nagpuyo sa ubos sa sukdanang kahimtang ug dakog panginahanglan ug trabaho o walay trabaho. Aron matuman ang tibuok-yutang paraiso, kining mga problemaha kinahanglang wad-on. Mahimo kaha kining buluhatona sa Gingharian? Pamatia kining katingalahang pagbatbat kon unsay kahimtang unya sa kinabuhi ilalom sa pagmando sa Gingharian:
“Sila magatukod ug mga balay ug magapuyo niini; ug sila magapananom ug paras ug magakaon sa ilang mga bunga. Sila dili magatukod ug lain ang magapuyo; sila dili magatanom ug lain ang magakaon. Kay ingon sa mga adlaw sa usa ka kahoy mao man usab ang mga adlaw sa akong katawhan; ug ang akong mga pinili magapahimulos pag-ayo sa buhat sa ilang mga kamot. Sila dili magabuhat nga walay kapuslanan, ni manganak sila alang sa kagul-anan; kay sila mao ang kaliwatan nga gipanalanginan ni Jehova.”—Isaias 65:21-23.
Dili ba mao man kana ang imong paghanduraw nga maoy kahimtang sa Paraiso? Kini ug daghan pang ubang katingalahang mga butang nga gisulat diha sa Bibliya dili kay usa lamang ka handurawan kun mga damgo! Naghisgot niining mga panalangina sa Gingharian, masubsob nga idugang sa Bibliya ang ekspresyong “ang kakugi sa mga panon ni Jehova maoy magahimo niini.” (Isaias 9:7; 37:32) Kini nagpasalig kanato nga si Jehova nga Diyos, may katakos ug gahom sa ‘pagtagbaw sa tinguha sa tanang buhing butang,’ andam ug maikagon usab sa paghimo niini. (Salmo 145:16) Oo, pinaagi sa kabubut-on ni Jehova, ang paglaom alang sa tibuok-yuta nga paraiso sa dili madugay matuman.
Nagapaningkamot Alang sa Paraiso
Ang katingalahang palaabuton sa umaabot nga paraiso sa yuta tingali malisod kanimong tuohan. Tingali mobati ka nga sobra ra kini nga mahimong tinuod. Apan ang atong kinaiyanhong tinguha alang sa pakigdait ug kalipay nagsulti kanato nga realistiko ang paglaom ug Paraiso. Ang atong Maglalalang, nga maoy nagbutang diha kanato sa pagpangandoy niining mga butanga, nagpakita kanato kon sa unsang paagi kanang paglaoma makab-ot.
Ang mga hitabo sa kalibotan ug ang natumang mga tagna sa Bibliya nagpakita nga ang panahon alang sa Diyos sa pagpasig-uli sa Paraiso sa tibuok yuta haduol na. Busa, inay magpanghanduraw lamang sa pagpuyo sa paraiso o sa paggugol sa imong panahon ug salapi nga imong maabot, paggahin ug panahon ug kusog sa pagsusi kon unsay gipamulong sa Bibliya mahitungod niining butanga.
Gibutyag ni Jesu-Kristo ang sukaranan sa pagtagamtam sa kinabuhi diha sa usa ka tinuod nga paraiso dihang siya miingon: “Kini nagkahulogang kinabuhing walay kataposan, ang ilang pagkuhag kahibalo kanimo, ang bugtong tinuod nga Diyos, ug sa usa nga imong gipadala, si Jesu-Kristo.” (Juan 17:3) Ang pagkuhag tukmang kahibalo sa kabubut-on sa Diyos ug sa pagkinabuhi sumala niana mao lamang ang paagi nga makab-ot sa usa ang paglaom nga Paraiso. Ikaw ba nagapaningkamot niana?
[Mga Letrato sa panid 19]
Usa ka paraisong isla nga gidaot sa malaglagong epekto sa mga palibot niini
[Tinubdan sa Letrato sa panid 17]
Hawaiian Visitors Bureau photos