Ang Kristohanong Panghunahuna Bahin sa Awtoridad
“Walay awtoridad gawas nga pinaagi sa Diyos.”—ROMA 13:1.
1. Nganong ikaingon nga si Jehova mao ang Supremong Awtoridad?
ANG awtoridad nalambigit sa pagkamaglalalang. Ang Supremong Usa nga mihatag ug kalungtaran sa tanang kalalangan, may-kinabuhi ug way-kinabuhi, mao si Jehova nga Diyos. Siya sa walay duhaduha mao ang Supremong Awtoridad. Ang matuod nga mga Kristohanon nagbaton sa samang mga pagbati sa langitnong mga linalang nga nagpahayag: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”—Pinadayag 4:11.
2. Sa unsang paagi ang unang tawhanong mga magmamando sa usa ka diwa miangkon nga sila walay kinaiyanhong katungod nga magmando sa ilang isigkatawo, ug unsay gisulti ni Jesus kang Poncio Pilato?
2 Ang yanong kamatuoran nga daghan sa kinaunahang tawhanong mga magmamando misulay pagpakamatarong sa ilang awtoridad pinaagi sa pag-angkong diyos o hawas sa usa ka diyos maoy tataw nga pag-ila nga walay tawo ang adunay kinaiyanhong katungod sa pagmando ibabaw sa ubang mga tawo.a (Jeremias 10:23) Ang bugtong makataronganong tinubdan sa awtoridad mao si Jehova nga Diyos. Gisultihan ni Kristo si Poncio Pilato, ang Romanong gobernador sa Judea: “Wala ka gayod untay awtoridad batok kanako gawas kon gikatugot kini kanimo gikan sa itaas.”—Juan 19:11.
“Walay Awtoridad Gawas nga Pinaagi sa Diyos”
3. Unsay giingon ni apostol Pablo mahitungod sa “labaw nga mga awtoridad,” ug unsang mga pangutana ang gipatungha sa mga pamulong ni Jesus ug ni Pablo?
3 Si apostol Pablo misulat ngadto sa mga Kristohanon nga nagpuyo ilalom sa pagmando sa Romanhong Empiryo: “Magpasakop ang tanang kalag sa labaw nga mga awtoridad, kay walay awtoridad gawas nga pinaagi sa Diyos; ang nagalungtad nga mga awtoridad napahimutang diha sa ilang relatibong mga posisyon pinaagi sa Diyos.” (Roma 13:1) Unsay gipasabot ni Jesus sa miingon siya nga ang awtoridad ni Pilato gitugot kaniya “gikan sa itaas”? Ug sa unsang paagi giisip ni Pablo nga ang politikanhong mga awtoridad sa iyang adlaw napahimutang diha sa ilang mga posisyon pinaagi sa Diyos? Gipasabot ba nila nga si Jehova mao sa personal ang responsable sa pagkatudlo sa matag indibiduwal nga politikanhong magmamando niining kalibotana?
4. Si Jesus ug Pablo nagtawag kang Satanas nga unsa, ug unsang pangangkon ni Satanas ang wala supaka ni Jesus?
4 Unsaon pagkamatuod niana, sanglit si Jesus mitawag man kang Satanas “ang magmamando niining kalibotana,” ug si apostol Pablo nagngalan kaniyang “ang diyos niining sistema sa mga butang”? (Juan 12:31; 16:11; 2 Corinto 4:4) Dugang pa, sa gitental si Jesus, si Satanas mitanyag kaniyag “awtoridad” ibabaw sa “tanang gingharian sa gipuy-ang yuta,” nga miangkong kining maong awtoridad gikatugyan na kaniya. Si Jesus wala modawat sa iyang tanyag, apan siya wala mosupak nga ang maong awtoridad maoy iya ni Satanas nga mahimo niyang ihatag.—Lucas 4:5-8.
5. (a) Unsaon nato pagsabot ang mga pulong ni Jesus ug Pablo mahitungod sa tawhanong awtoridad? (b) Sa unsang diwa ang labaw nga mga awtoridad “napahimutang diha sa ilang relatibong mga posisyon pinaagi sa Diyos”?
5 Gitugyan ni Jehova ang pagmando ibabaw niining kalibotana ngadto kang Satanas pinaagi sa pagtugot kaniyang mabuhi human sa iyang pagrebelde ug human sa iyang pagtental kang Adan ug Eva ug pagdani kanila sa pagrebelde batok sa Iyang pagkasoberano. (Genesis 3:1-6; itandi ang Exodo 9:15, 16.) Busa, ang mga pulong ni Jesus ug ni Pablo nagkahulogan gayod nga human isalikway sa unang magtiayon sa Eden ang teokrasya, o pagmando sa Diyos, gitugotan ni Jehova ang mga tawong nahibulag kaniya sa pagmugnag mga gambalay sa awtoridad nga magtugot kanila sa pagpuyo sa mahusay nga katilingban. Usahay, aron molampos ang iyang katuyoan, gipahinabo ni Jehova ang pagkapukan sa tinong mga magmamando o mga kagamhanan. (Daniel 2:19-21) Ang uban gitugotan niyang magpabilin sa gahom. Mahitungod sa mga magmamando kansang paglungtad gitugot ni Jehova, ikaingon nga sila “napahimutang diha sa ilang relatibong mga posisyon pinaagi sa Diyos.”
Unang mga Kristohanon ug ang Romanhong mga Awtoridad
6. Unsay pag-isip sa unang mga Kristohanon sa Romanhong mga awtoridad, ug ngano?
6 Ang unang mga Kristohanon wala makig-anib sa Hudiyong mga sekta nga nagsabotsabot ug nakig-away batok sa mga Romano nga nag-okupar sa Israel. Mahitungod sa Romanhong mga awtoridad, uban sa ilang nakodigong legal nga sistema, nga nagtipig sa kahusay sa mamala ug sa dagat; nagtukod ug daghang mapuslanong mga agianan sa tubig, mga karsada, ug mga taytayan; ug sa kasagaran milihok alang sa kaayohan sa tanan, ang mga Kristohanon nag-isip kanila nga ‘ministro [o, “alagad,” potnot] sa Diyos alang kanila sa ilang kaayohan.’ (Roma 13:3, 4) Ang balaod ug kahusay mipatungha sa usa ka kalikopan nga nakapaarang sa mga Kristohanon sa pagsangyaw sa maayong balita sa bisan diin, sumala sa gisugo ni Jesus. (Mateo 28:19, 20) Diha sa bug-os maayong tanlag, sila nakabayad sa mga buhis nga gipahamtang sa mga Romano, bisan pag ang bahin sa salapi gigamit alang sa mga katuyoang wala uyoni sa Diyos.—Roma 13:5-7.
7, 8. (a) Unsay gipadayag sa mainampingong pagbasa sa Roma 13:1-7, ug unsay gipakita sa konteksto? (b) Ubos sa unsang mga kahimtang nga ang Romanhong mga awtoridad wala molihok ingong “ministro sa Diyos,” ug niining kahimtanga unsang tinamdan ang gisagop sa unang mga Kristohanon?
7 Ang mainampingong pagbasa sa unang pito ka bersikulo sa Roma kapitulo 13 magpadayag nga ang politikanhong “labaw nga mga awtoridad” maoy “ministro sa Diyos” aron dayegon kadtong nagabuhat kon unsay maayo ug silotan kadtong nagabuhat kon unsay daotan. Gipakita sa konteksto nga ang Diyos, dili ang labaw nga mga awtoridad, maoy magtino kon unsay maayo ug kon unsay daotan. Busa, kon ang Romanong emperador o ubang politikanhong awtoridad mangayo sa mga butang nga gidili sa Diyos o, sa balit-ad, magdili sa mga butang nga gipangayo sa Diyos, siya wala na maglihok ingong ministro sa Diyos. Si Jesus mipahayag: “Ibayad . . . ang mga butang ni Cesar ngadto kang Cesar, apan ang mga butang sa Diyos ngadto sa Diyos.” (Mateo 22:21) Kon gipangayo sa Romanhong Estado ang mga butang nga iya sa Diyos, sama sa pagsimba o sa kinabuhi sa usa ka tawo, gisunod sa matuod nga mga Kristohanon ang apostolikanhong tambag: “Kinahanglang among sugton ang Diyos ingong magmamando inay kay sa mga tawo.”—Buhat 5:29.
8 Ang pagdumili sa unang mga Kristohanon sa pagsimba sa emperador ug pagsimbag diyosdiyos, pagsalikway sa ilang Kristohanong mga tigom, ug paghunong sa pagwali sa maayong balita mipahinabog paglutos. Sagad nga gituohan nga gipatay si apostol Pablo segun sa mando ni Emperador Nero. Ang ubang mga emperador, ilabina si Domitian, Marcus Aurelius, Septimius Severus, Decius, ug Diocletian, naglutos usab sa unang mga Kristohanon. Sa dihang ang maong mga emperador ug ang ilang ubos nga mga awtoridad naglutos sa mga Kristohanon, sa tino wala na sila maglihok ingong “ministro sa Diyos.”
9. (a) Unsay nagpabiling matuod mahitungod sa politikanhong labaw nga mga awtoridad, ug ang politikanhong mananap nakadawat sa gahom ug awtoridad gikan ni kinsa? (b) Sa pagkamakataronganon unsay ikaingon mahitungod sa Kristohanong pagpasakop sa labaw nga mga awtoridad?
9 Kining tanan nag-ilustrar nga bisan pag ang politikanhong labaw nga mga awtoridad sa pila ka bahin nag-alagad ingong “ang kahikayan sa Diyos” aron padayong mahuptan ang mahusay tawhanong katilingban, sila nagpabiling usa ka bahin sa kalibotanong sistema sa mga butang nga ang diyos mao si Satanas. (1 Juan 5:19) Sila sakop sa tibuok-kalibotang politikanhong organisasyon nga gisimbolohan sa “mapintas nga mananap” sa Pinadayag 13:1, 2. Ang maong mananap nagdawat sa gahom ug awtoridad niini gikan sa “dakong dragon,” si Satanas nga Yawa. (Pinadayag 12:9) Busa, makataronganong ang Kristohanong pagpasakop sa maong mga awtoridad maoy relatibo, dili absoluto.—Itandi ang Daniel 3:16-18.
Hustong Pagtahod sa Awtoridad
10, 11. (a) Giunsa pagpakita ni Pablo nga kita angay magmatinahoron sa mga tawong anaa sa awtoridad? (b) Sa unsang paagi ug nganong ang mga pag-ampo mahimong himoon “labot sa mga hari ug kanilang tanan nga anaa sa hataas nga pangatungdanan”?
10 Hinuon, kini wala magkahulogang ang mga Kristohanon angay magsagop ug mapangahason, masuklanong tinamdan bahin sa politikanhong labaw nga mga awtoridad. Tinuod, daghan niining mga tawhana dili angayan sa pagtahod sa ilang pribado, o bisan sa ilang publiko, nga mga kinabuhi. Bisan pa, ang mga apostol, pinaagi sa ilang panig-ingnan ug sa ilang tambag, nagpakita nga ang mga tawong anaa sa awtoridad angay pagatahoron. Sa dihang si Pablo miatubang sa tig-unay nga Haring Herodes Agripa II, siya nakigsulti kaniya uban ang angayng pagtahod.—Buhat 26:2, 3, 25.
11 Si Pablo mipahayag pa nga haom nga hisgotan ang kalibotanong mga awtoridad sa atong mga pag-ampo, ilabina sa dihang awhagon sila sa paghimog mga desisyon nga mag-apektar sa atong mga kinabuhi ug sa Kristohanong mga kalihokan. Siya misulat: “Busa ako magaawhag, una sa tanan, nga ang mga pangamuyo, mga pag-ampo, mga pangaliya alang sa uban, mga pagpasalamat, pagahimoon labot sa tanang matang sa mga tawo, labot sa mga hari ug kanilang tanan nga anaa sa hataas nga pangatungdanan; aron kita padayong magkinabuhi sa usa ka walay-gubot ug malinawong kinabuhi uban ang bug-os nga diyosnong pagkamahinalaron ug pagkaugdang. Kini maoy maayo ug dalawaton sa panan-aw sa atong Manluluwas, ang Diyos, kansang kabubut-on mao nga ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:1-4) Ang atong matinahorong tinamdan ngadto sa maong mga awtoridad basin mosangpot nga sila motugot kanato sa pagtuman nga mas gawasnon sa atong buluhaton sa pagtinguha pagluwas sa “tanang matang sa mga tawo.”
12, 13. (a) Unsang timbang nga tambag mahitungod sa awtoridad ang gihatag ni Pedro? (b) Sa unsang paagi mapukgo nato “ang walay-alamag nga mga sulti sa dili-makataronganong mga tawo” nga nagmugnag pagkamapihigon batok sa mga Saksi ni Jehova?
12 Si apostol Pedro misulat: “Tungod ug alang sa Ginoo magpasakop kamo sa matag tawhanong linalang: kon sa hari man ingong labaw o sa mga gobernador ingong mga pinadala niya aron sa pagpahamtang ug silot sa mga mamumuhat sa daotan apan sa pagdayeg sa mga mamumuhat sa maayo. Kay maoy kabubut-on sa Diyos, nga pinaagi sa paghimo sa maayo inyong mapahilom ang walay-alamag nga mga sulti sa dili-makataronganong mga tawo. Manig-ingon kamo ug gawasnong katawhan, apan hupti ang inyong kagawasan, dili ingong salimbong sa pagkadaotan, apan ingong mga ulipon sa Diyos. Pasidunggi ang tanang matang sa tawo, pagbaton ug gugma alang sa tibuok kapunongan sa mga igsoon, magmahadlokon sa Diyos, magmapasidunggon sa hari.” (1 Pedro 2:13-17) Pagkabalanse nga tambag! Nautang nato ang bug-os nga pagpasakop sa Diyos ingong iyang mga ulipon, ug ihatag nato ang relatibo ug matinahorong pagpasakop sa politikanhong mga awtoridad nga gipadala sa pagsilot sa mga mamumuhat ug daotan.
13 Nakaplagan nga daghang sekular nga mga awtoridad nagbaton sa labing katingad-anang sayop nga mga pagtuo bahin sa mga Saksi ni Jehova. Kini kasagaran maoy tungod kay sila gihatagag sayop nga impormasyon sa madinaotong mga kaaway sa katawhan sa Diyos. O mahimong ang ila lang nahibaloan bahin kanato nasayran nila gikan sa pangmasa nga palaumagian sa balita, nga dili kanunayng dili-mapihigon sa ilang pagbalita. Usahay atong mawagtang ang maong pagkamapihigon pinaagi sa atong matinahorong tinamdan ug, kon mahimo, pinaagi sa pagtagana sa mga awtoridad ug tukmang kabatbatan sa buluhaton ug mga tinuohan sa mga Saksi ni Jehova. Alang sa puliking opisyales, ang brosyur nga Mga Saksi ni Jehova sa Ikakawhaang Siglo nagtaganag matin-aw nga saysay. Alang sa mas bug-os nga kasayoran, sila kahatagan sa librong Mga Saksi ni Jehova—Mga Magmamantala sa Gingharian sa Diyos, usa ka maayong kasangkapan nga takos sa usa ka dapit diha sa mga estanteg libro sa lokal ug nasyonal nga publikong mga librarya.
Awtoridad Sulod sa Kristohanong mga Balay
14, 15. (a) Unsa ang pasikaranan sa awtoridad sulod sa Kristohanong panimalay? (b) Angay unsa ang tinamdan sa Kristohanong mga asawa ngadto sa ilang mga bana, ug ngano?
14 Dayag nga kon ang mga Kristohanon gibaoran sa Diyos nga magpakitag angayng pagtahod sa kalibotanong mga awtoridad, angay usab nga ilang tahoron ang gambalay sa awtoridad nga gitukod sa Diyos sulod sa Kristohanong mga panimalay. Si apostol Pablo mihubit sa laktud nga mga termino sa prinsipyo sa pagkaulo nga maglungtad taliwala sa katawhan ni Jehova. Siya misulat: “Apan buot kong mahibalo kamo nga ang ulo sa matag lalaki mao ang Kristo; sa baylo ang ulo sa usa ka babaye mao ang lalaki; sa baylo ang ulo sa Kristo mao ang Diyos.” (1 Corinto 11:3) Kini mao ang prinsipyo sa teokrasya, o pagmando sa Diyos. Unsay nalangkit niini?
15 Ang pagtahod sa teokrasya magsugod diha sa balay. Ang Kristohanong asawa nga dili magpakitag angayng pagtahod sa awtoridad sa iyang bana—kon kaha siya kaubang magtutuo o dili—maoy dili teokratikanhon. Si Pablo mitambag sa mga Kristohanon: “Magpasakop sa usag usa diha sa pagkahadlok kang Kristo. Papasakopa ang mga asawa sa ilang mga bana sama ug ngadto sa Ginoo, tungod kay ang bana maoy ulo sa iyang asawa maingon nga ang Kristo usab maoy ulo sa kongregasyon, ingon nga siya usa ka manluluwas sa maong lawas. Sa pagkatinuod, maingon nga ang kongregasyon nagapasakop sa Kristo, mao man usab ang mga asawa angay nga ingon ngadto sa ilang mga bana sa tanang butang.” (Efeso 5:21-24) Maingon nga ang Kristohanong mga lalaki kinahanglang magpasakop sa pagkaulo ni Kristo, ang Kristohanong mga babaye angay mag-ila sa kaalam sa pagpasakop sa hinatag-Diyos nga awtoridad sa ilang mga bana. Kini maghatag kanilag dakong katagbawan sa kahiladman ug, mas importante, panalangin ni Jehova.
16, 17. (a) Sa unsang paagi ang mga batang gimatuto diha sa Kristohanong mga panimalay makapalahi sa ilang kaugalingon gikan sa daghang batan-on karong adlawa, ug unsang panukmod ang nabatonan nila? (b) Sa unsang paagi si Jesus usa ka maayong panig-ingnan alang sa mga batan-on karong adlawa, ug sila madasig sa pagbuhat sa unsa?
16 Ang teokratikanhong mga anak malipay nga magpakitag angayng pagtahod alang sa ilang mga ginikanan. Mahitungod sa batan-ong kaliwatan sa kataposang mga adlaw, gitagna nga sila mahimong “dili-masinugtanon sa mga ginikanan.” (2 Timoteo 3:1, 2) Apan ngadto sa Kristohanong mga anak ang inspiradong Pulong sa Diyos nag-ingon: “Kamong mga anak, magmasinugtanon sa inyong mga ginikanan sa tanang butang, kay kini makapahimuot pag-ayo diha sa Ginoo.” (Colosas 3:20) Ang pagtahod sa awtoridad sa ginikanan magpahimuot kang Jehova ug magdala sa iyang panalangin.
17 Kini giilustrar sa kahimtang ni Jesus. Ang asoy ni Lucas nag-ingon: “Siya milugsong uban kanila [iyang mga ginikanan] ug nahiabot sa Nasaret, ug siya padayong nagpasakop kanila. . . . Ug si Jesus padayong nagauswag sa kaalam ug sa lawasnong pagtubo ug sa pabor sa Diyos ug sa mga tawo.” (Lucas 2:51, 52) Si Jesus maoy 12 anyos niadtong tungora, ug ang Gregong berbong porma nga gigamit dinhi nagpasiugda nga siya “padayong nagpasakop” sa iyang mga ginikanan. Busa ang iyang pagpasakop wala matapos sa pagsulod niya sa katuigan sa iyang pagkatin-edyer. Kon kamong mga batan-on buot mouswag sa espirituwalidad ug sa pag-uyon ni Jehova ug sa diyosnong mga tawo, inyong ipakita ang pagtahod sa awtoridad sa sulod ug sa gawas sa inyong balay.
Awtoridad Sulod sa Kongregasyon
18. Kinsa ang Ulo sa Kristohanong kongregasyon, ug kinsa ang iyang gitugyanan ug awtoridad?
18 Sa paghisgot sa panginahanglan sa kahusay sulod sa Kristohanong kongregasyon, si Pablo misulat: “Kay ang Diyos usa ka Diyos, dili sa kasamok, kundili sa kalinaw. . . . Hinuon ipahinabo ang tanang butang nga may kahapsay ug pinaagig kahikayan [o, “sumala sa kahusay,” potnot].” (1 Corinto 14:33, 40) Aron ang tanang butang mahitabo sa mahusay nga paagi, si Kristo, ang Ulo sa Kristohanong kongregasyon, nagtugyan ug awtoridad ngadto sa matinumanong mga lalaki. Atong mabasa: “Iyang gihatag ang pipila ingong mga apostol, ang pipila ingong mga propeta, ang pipila ingong mga tig-ebanghelyo, ang pipila ingong mga pastol ug mga magtutudlo, alang sa pagpasibo ug balik sa mga balaan, alang sa ministeryal nga buluhaton . . . Apan nga nagapamulong sa kamatuoran, managtubo kita sa tanang butang pinaagi sa gugma ngadto kaniya nga mao ang ulo, si Kristo.”—Efeso 4:11, 12, 15.
19. (a) Kinsa ang gitudlo ni Kristo ibabaw sa tanan niyang yutan-ong kabtangan, ug kinsay iyang gihatagag espesyal nga awtoridad? (b) Unsang pagtugyan ug awtoridad ang mahitabo diha sa Kristohanong kongregasyon, ug unsay gikinahanglan niini sa atong bahin?
19 Niining panahon sa kataposan, gitudlo ni Kristo ang tiningob nga “matinumanon ug maalamong ulipon” ibabaw sa “tanan niyang kabtangan,” o intereses sa Gingharian sa yuta. (Mateo 24:45-47) Ingon sa unang siglo, kining ulipona gihawasan sa usa ka nagamandong lawas sa dinihogang Kristohanong mga lalaki nga gihatagan ni Kristo ug awtoridad sa paghimog mga desisyon ug sa pagtudlo sa ubang mga magtatan-aw. (Buhat 6:2, 3; 15:2) Sa baylo, ang Nagamandong Lawas nagtugyan ug awtoridad ngadto sa mga Komite sa Sanga, distrito ug sirkitong mga magtatan-aw, ug sa mga ansiano sulod sa matag usa sa kapig 73,000 ka kongregasyon sa mga Saksi ni Jehova sa tibuok yuta. Kining tanang debotadong Kristohanong mga lalaki takos sa atong pagpaluyo ug pagtahod.—1 Timoteo 5:17.
20. Unsang panig-ingnan ang nagpakitang si Jehova wala mahimuot niadtong walay pagtahod sa isigka-Kristohanong may awtoridad?
20 Mahitungod sa pagtahod nga angay ihatag niadtong anaa sa awtoridad sulod sa Kristohanong kongregasyon, ang makaiikag nga pagtandi mahimo uban sa pagpasakop nga angay natong ihatag ngadto sa sekular nga mga awtoridad. Kon ang usa ka tawo molapas sa usa ka tawhanong balaod nga giuyonan sa Diyos, ang silot nga ipahamtang “niadtong nagamando” maoy, sa tinuoray, dili-direktang pagpahayag sa kapungot sa Diyos “diha sa usang nagabuhat kon unsay daotan.” (Roma 13:3, 4) Kon si Jehova masuko sa dihang ang usa ka tawo magalapas sa tawhanong mga balaod ug walay hustong pagtahod alang sa kalibotanong mga awtoridad, pagkalabaw pa nga siya dili mahimuot kon ang usa ka dedikadong Kristohanon magatamay sa mga prinsipyo sa Bibliya ug magapakitag kawalay-tahod alang sa isigka-Kristohanon nga anaa sa awtoridad!
21. Unsang Kasulatanhong tambag ang malipayon natong sundon, ug unsay pagahisgotan sa mosunod nga artikulo?
21 Inay maagoman ang kasuko sa Diyos pinaagi sa pagsagop ug rebelyoso o independenteng tinamdan, sundon nato ang tambag ni Pablo ngadto sa mga Kristohanon sa Filipos: “Tungod niana, akong mga hinigugma, sa paagi nga kamo kanunay nagmasinugtanon, dili lamang sa panahong ako anaa, kundili labi pa gayod karon sa panahong ako wala diha, padayong panlimbasogi ang inyong kaugalingong kaluwasan uban ang kahadlok ug pagpangurog; kay ang Diyos mao ang usa nga, tungod ug alang sa iyang maayong kahimut-anan, nagalihok sa sulod kaninyo aron kamo mobuot ug ingon man mobuhat. Padayong buhata ang tanang butang nga walay mga pagbagulbol ug mga panag-ergo, aron kamo mahimong walay-ikasaway ug inosente, mga anak sa Diyos nga walay lama taliwala sa baliko ug lubag nga kaliwatan, nga taliwala kanila kamo nagasidlak ingong mga magbabanwag sa kalibotan.” (Filipos 2:12-15) Lahi sa baliko ug hiwing kaliwatan karon nga nagpahinabo sa krisis sa awtoridad sa iyang kaugalingon, ang katawhan ni Jehova dali nga magpasakop sa awtoridad. Sa ingon sila magaanig dagkong mga benepisyo, sumala sa makita nato sa mosunod nga artikulo.
[Footnote]
a Tan-awa ang naunang artikulo.
Agig Pagsubli
◻ Kinsa ang Supremong Awtoridad, ug nganong ang iyang awtoridad angayan?
◻ Sa unsang diwa ang labaw nga mga awtoridad “napahimutang diha sa ilang relatibong mga posisyon pinaagi sa Diyos”?
◻ Kanus-a ang labaw nga mga awtoridad mohunong sa pagkahimong “ministro sa Diyos”?
◻ Unsang gambalay sa awtoridad ang naglungtad sulod sa Kristohanong mga pamilya?
◻ Unsang pagtugyan ug awtoridad ang naglungtad sulod sa Kristohanong kongregasyon?
[Hulagway sa panid 18]
Si Jesus miingon: “Ibayad ang mga butang ni Cesar ngadto kang Cesar”