Kon Nganong ang mga Milagro Lamang Dili Makapaugmad ug Pagtuo
MOTUO ko kon makita ko. Mao kana ang panglantaw sa daghan. Ang pipila nag-ingon nga sila motuo sa Diyos kon siya magpadayag sa iyang kaugalingon diha sa pipila ka milagrosong paagi. Tingali tinuod kana, apan ang maong pagtuo ba motultol sa tinuod nga pagtuo?
Palandonga ang mga Israelinhong si Core, Dathan, ug Abiram. Ang Bibliya nagpakita nga sila maoy mga saksing-nakakita niining makalilisang nga mga milagro gikan sa Diyos: ang napulo ka hampak batok sa Ehipto, ang pag-ikyas sa nasod sa Israel latas sa Pulang Dagat, ug ang pagkalaglag sa Ehiptohanong si Paraon ug sa iyang kasundalohan. (Exodo 7:19–11:10; 12:29-32; Salmo 136:15) Si Core, Dathan, ug Abiram nakadungog usab kang Jehova nga nagsulti gikan sa langit sa Bukid sa Sinai. (Deuteronomio 4:11, 12) Apan, wala magdugay human mahitabo kini nga mga milagro, ang tulo ka lalaki nanulsol ug pag-alsa batok kang Jehova ug sa iyang dinihogang mga alagad.—Numeros 16:1-35; Salmo 106:16-18.
Duolan sa 40 ka tuig sa ulahi, usa ka manalagnang ginganlag Balaam nakasaksi usab ug milagro. Bisan ang pagpangilabot sa manulonda wala makapugong kaniya sa pagdapig sa mga kaaway sa Diyos, ang mga Moabihanon. Bisan pa niana nga milagro, si Balaam nagpadayon ug mibarog batok kang Jehova nga Diyos ug sa Iyang katawhan. (Numeros 22:1-35; 2 Pedro 2:15, 16) Apan, ang pagkakulang ug pagtuo ni Balaam wala ra sa kumingking kon itandi sa pagkakulang ug pagtuo ni Judas Iscariote. Bisag suod nga kauban ni Jesus ug usa ka saksing-nakakita sa talagsaong nagkalainlaing mga milagro, gibudhian ni Judas si Kristo alang sa katloan ka buok nga salapi.—Mateo 26:14-16, 47-50; 27:3-5.
Ang Hudiyohanong relihiyosong mga lider nahibalo usab sa daghang milagro ni Jesus. Human banhawa niya si Lazaro, sila gani miadmitir: “Kining tawhana nagabuhat ug daghang ilhanan.” Apan ang pagkakita sa buhi-na-karong si Lazaro nagpahumok ba sa ilang mga kasingkasing ug naghatag kanila ug pagtuo? Wala, wala gayod. Hinunoa, sila naglaraw sa pagpatay kang Jesus ug kang Lazaro!—Juan 11:47-53; 12:10.
Bisan ang direktang pagpangilabot sa Diyos wala makapaugmad ug pagtuo niadtong daotang mga lalaki. Samtang si Jesus diha sa dapit sa templo sa usa ka okasyon, siya kusog nga nag-ampo: “Amahan, himayaa ang imong ngalan.” Si Jehova mitubag diha sa usa ka tingog nga migula gikan sa langit: “Gihimaya ko na kini ug pagahimayaon ko kini pag-usab.” Bisan pa, kining milagrosong hitabo wala makaugmad ug pagtuo diha sa mga kasingkasing niadtong anaa. Nag-ingon ang Bibliya: “Bisan tuod siya nakahimog daghan kaayong mga ilhanan atubangan kanila, sila wala managbutang ug pagtuo kaniya.”—Juan 12:28-30, 37; itandi ang Efeso 3:17.
Kon Nganong ang mga Milagro Wala Makapaugmad ug Pagtuo
Nganong ang maong pagkakulang ug pagtuo naglungtad atubangan sa daghan kaayong milagro? Ang pagsalikway kang Jesus sa Hudiyohanong relihiyosong mga lider daw ilabinang makalibog kon imong palandongon nga sa panahon mismo nga siya nagsugod sa iyang ministeryo, ang mga Hudiyo sa katibuk-an ‘nagpaabot sa Kristo,’ o sa Mesiyas. (Lucas 3:15) Bisan pa, ang problema anaa sa kon unsa kadtong matanga sa mga pagdahom. Ang leksikograpo nga si W. E. Vine nagkutlo sa usa ka iladong eskolar sa Bibliya nga nag-ingon nga ang mga Hudiyo nalinga sa ideya sa usa ka Mesiyas nga maghatag kanila ug “yutan-ong kadaogan” ug “materyal nga kauswagan.” Busa, sila wala maandam sa mapaubsanon, dili-politikanhong Jesus sa Nasaret, nga mitungha sa taliwala kanila ingong ang matuod nga Mesiyas sa 29 K.P. Ang relihiyosong mga lider nahadlok usab nga ang mga pagtulon-an ni Jesus makasamok sa naglungtad nga mga kalihokan sa estado ug makadaot sa ilang prominenteng mga posisyon. (Juan 11:48) Ang ilang mapihigon nga mga ideya ug kahakog nagbuta kanila sa kahulogan sa mga milagro ni Jesus.
Ang Hudiyohanong relihiyosong mga lider ug ang uban sa ulahi nagsalikway sa milagrosong pamatuod nga ang mga sumusunod ni Jesus nagpahimulos sa pabor sa Diyos. Pananglitan, sa dihang ang iyang mga tinun-an nag-ayo sa usa ka tawong bakol sukad pa sa pagkatawo, ang nasukong mga membro sa Hudiyohanong hataas nga korte nangutana: “Unsay atong buhaton niining mga tawhana? Tungod kay, sa pagkatinuod, usa ka takos-tagdon nga ilhanan ang nahitabo pinaagi kanila, usang dayag ngadto sa tanang molupyo sa Jerusalem; ug kita dili makalimod niini. Bisan pa, aron nga kini dili dugang pang mokaylap taliwala sa katawhan, atong sultihan sila uban ang mga hulga nga dili na gayod mosulti pa pinasukad niining ngalana ngadto kang bisan kinsang tawhana.” (Buhat 3:1-8; 4:13-17) Tin-aw, kining kahibulongang milagro wala makapaugmad o makapatunghag pagtuo diha sa mga kasingkasing niadtong mga tawhana.
Ang ambisyon, garbo, ug kadalo maoy mga hinungdan nga nagtukmod sa daghan sa pagpatig-a sa ilang mga kasingkasing. Kini mopatim-awng mao ang kahimtang ni Core, Dathan, ug Abiram, nga gihisgotan sa sinugdan. Ang kasina, kahadlok, ug daghan pang ubang makadaot nga mga tinamdan ang nagpugong sa uban. Kita gipahinumdoman, usab, sa masupilong mga manulonda, sa mga demonyo, kinsa kas-a nakabatog pribilehiyo sa pagkakita sa mismong nawong sa Diyos. (Mateo 18:10) Sila wala magduhaduha sa paglungtad sa Diyos. Sa pagkatinuod, “ang mga demonyo nagatuo man ug nagapangurog.” (Santiago 2:19) Bisan pa, sila walay pagtuo sa Diyos.
Ang Kahulogan sa Matuod nga Pagtuo
Ang pagtuo labaw pa kay sa gituohan lamang. Kini usab labaw pa kay sa daklit emosyonal nga reaksiyon sa pipila ka milagro. Nag-ingon ang Hebreohanon 11:1: “Ang pagtuo mao ang may katinoan nga pagdahom sa mga butang nga gilaoman, ang tataw nga pagpanghimatuod sa mga katinuoran bisan tuod wala makita.” Ang usa ka indibiduwal nga nagbatog pagtuo kombinsido diha sa iyang kasingkasing nga ang tanang saad ni Jehova nga Diyos ingon sa natuman na. Dugang pa, ang dili ikalimod nga pamatuod sa dili makitang mga katinuoran gamhanan kaayo nga ang pagtuo mismo gikaingong katumbas niana nga ebidensiya. Oo, ang pagtuo maoy pinasukad sa ebidensiya. Ug sa nangaging panahon, ang mga milagro hinungdanon sa pag-ugmad ug pagtuo o sa pagtukod niana. Ang mga ilhanan nga gibuhat ni Jesus nagsilbi sa pagkombinsir sa uban nga siya mao ang gisaad nga Mesiyas. (Mateo 8:16, 17; Hebreohanon 2:2-4) Sa susama, ang maong mga gasa sa balaang espiritu, o aktibong puwersa, sa Diyos, sama sa milagrosong pagpang-ayo ug pagsultig mga dila nagpamatuod nga si Jehova wala nay pag-uyon sa mga Hudiyo apan ang iyang pag-uyon anaa na karon sa Kristohanong kongregasyon, nga gitukod sa iyang Anak, si Jesu-Kristo.—1 Corinto 12:7-11.
Lakip sa milagrosong mga gasa sa espiritu mao ang katakos sa pagpanagna. Sa dihang ang mga dili-magtutuo nakaobserbar niini nga milagro, ang pipila natukmod sa pagsimba kang Jehova, nga nag-ingon: “Ang Diyos anaa gayod taliwala kaninyo.” (1 Corinto 14:22-25) Ugaling, dili katuyoan ni Jehova nga Diyos nga ang mga milagro mahimong permanenteng bahin sa Kristohanong pagsimba. Sa ingon, si apostol Pablo nagsulat: “Kon aduna may mga gasa sa pagpropesiya, kini sila wagtangon ra; kon aduna may mga dila, kini sila mohunong.” (1 Corinto 13:8) Kining mga gasaha dayag nahunong uban sa kamatayon sa mga apostol ug niadtong kinsa nakadawat sa maong mga gasa pinaagi kanila.
Nan pasagdan ba ang mga tawo nga walay pasukaranan sa pagtuo? Dili, kay si Pablo miingon: “Wala [sa Diyos] biyai ang iyang kaugalingon nga walay saksi sa pagkaagi nga siya naghimo ug maayo, nga naghatag kaninyog ulan gikan sa langit ug mabungahong mga panahon, nga nagbuhong sa inyong mga kasingkasing sa pagkaon ug sa kasaya.” (Buhat 14:17) Sa pagkatinuod, alang sa tim-os ug kasingkasing nga mga tawo nga andam sa pagbukas sa ilang mga hunahuna ug kasingkasing sa ebidensiya nga naglibot kanato, ang kang Jehova nga Diyos nga “dili-makita nga mga hiyas tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, bisan gani ang iyang dayong gahom ug pagka-Diyos, mao nga sila [kadtong nagalimod sa Diyos] walay-ikapangatarongan.”—Roma 1:20.
Labaw pa ang gikinahanglan kay sa pagtuo nga naglungtad ang Diyos. Si Pablo nag-awhag: “Hunong na sa pagpaumol sumala niining sistemaha sa mga butang, apan mag-usab pinaagi sa pagbag-o sa inyong kaisipan, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Kini mahimo pinaagi sa masibotong pagtuon sa Kasulatan uban ang tabang sa Kristohanong mga publikasyon, sama niining magasina. Ang pagtuo nga gipasukad sa tukmang kahibalo sa Pulong sa Diyos, ang Bibliya, dili huyang o mabaw. Kadtong kinsa nakasabot sa kabubut-on sa Diyos ug nagabuhat niana nga may pagtuo nagahatag ug sagradong pag-alagad sa Diyos.—Roma 12:1.
Nagtuo Bisag Wala Makakita
Ang apostol nga si Tomas naglisod sa pagpakitag pagtuo sa pagkabanhaw kang Jesus gikan sa mga patay. “Gawas kon akong makita diha sa iyang mga kamot ang inagian sa mga lansang ug ikatuslok ang akong tudlo sa inagian sa mga lansang ug ikatuslok ang akong kamot sa iyang kilid, ako dili gayod motuo,” miingon si Tomas. Sa dihang si Jesus sa ulahi nagmateryalisar ug lawas nga nagpakita sa samad sa paglansang kaniya, si Tomas misanong nga mauyonon niining milagroha. Apan, si Jesus miingon: “Malipayon kadtong kinsa wala makakita apan nagatuo.”—Juan 20:25-29.
Karong adlawa, minilyon sa mga Saksi ni Jehova ang “nagalakaw pinaagi sa pagtuo, dili pinaagi sa panan-aw.” (2 Corinto 5:7) Bisag wala sila makakita sa mga milagro nga girekord sa Bibliya, sila malig-ong nagtuo nga kini nahitabo. Ang mga Saksi nagpakitag pagtuo sa Diyos ug sa iyang Pulong. Uban sa tabang sa iyang espiritu, sila nakaarang sa pagsabot sa mga pagtulon-an sa Bibliya ug sa pangunang tema niini—ang pagbayaw sa pagkasoberano ni Jehova nga Diyos pinaagi sa iyang langitnong Gingharian. (Mateo 6:9, 10; 2 Timoteo 3:16, 17) Uban ang dakong kaayohan sa ilang kaugalingon, kining tinuod nga mga Kristohanon nagpadapat sa maalamong tambag sa Bibliya diha sa kinabuhi. (Salmo 119:105; Isaias 48:17, 18) Gidawat nila ang dili malalis nga pamatuod nga ang mga tagna sa Bibliya nagtimaan sa atong panahon ingong ang “kataposang mga adlaw,” ug sila may pagtuo nga ang gisaad nga bag-ong kalibotan sa Diyos haduol na. (2 Timoteo 3:1-5; Mateo 24:3-14; 2 Pedro 3:13) Alang kanila usa ka kalipay nga ikapaambit ang kahibalo bahin sa Diyos sa uban. (Proverbio 2:1-5) Sila nasayod nga pinaagi lamang sa pagtuon sa Kasulatan nga kadtong nagpangita sa Diyos makakaplag gayod kaniya.—Buhat 17:26, 27.
Nahinumdom ka ba kang Albert, nga gihisgotan sa nag-unang artikulo? Pipila ka adlaw human sa iyang pag-ampo alang sa usa ka milagro nga wala tubaga, siya giduaw sa usa sa mga Saksi ni Jehova, usa ka edarang babaye nga nagbilin kaniya ug pipila ka literatura nga pinasukad-sa-Bibliya. Si Albert human niadto midawat sa libreng pagtuon sa Bibliya sa balay. Samtang siya dugang nakasabot sa mensahe sa Bibliya, ang iyang kahigawad nahimong kaukyab. Siya misugod sa pagkaamgo nga nakaplagan na niya ang Diyos.
Ang Kasulatan nag-awhag: “Pangitaa si Jehova, kamong katawhan, samtang siya makaplagan pa. Sangpita siya samtang siya anaa pa sa duol.” (Isaias 55:6) Mahimo nimo kini, dili pinaagi sa pagpaabot sa modernong-adlawng milagro gikan sa Diyos, kondili pinaagi sa pagbatog tukmang kahibalo bahin sa iyang Pulong. Kini maoy kinahanglanon, kay ang milagro lamang dili makapaugmad ug pagtuo.
[Hulagway sa panid 5]
Bisan ang milagrosong pagkabanhaw kang Lazaro wala magtukmod sa mga kaaway ni Jesus sa pagbatog pagtuo
[Hulagway sa panid 7]
Ang pagtuo kinahanglang pinasukad sa tukmang kahibalo sa Bibliya