BALAY-TIPIGANAN

Usa ka bodega o tinukod diin tipigan ang bino ug lana, ingon man usab ang bililhong mga metal ug mga bato ug uban pang mga butang. Ang kamalig maoy usa ka tinukod nga gigamit ingong tipiganan sa giniok nga mga lugas. Ang mga dapa, mga torre, ug mga pasilidad nga tipiganan maoy komon sa karaang kapanahonan (1Cr 27:25; 2Cr 32:​27, 28; Joe 1:17; Hag 2:19), ug may pipila ka siyudad nga pangunang gigamit ingong mga tipiganan.​—Ex 1:11.

Maylabot sa sangtuwaryo, ang mga balay-tipiganan gikinahanglan aron sa pag-atiman sa mga ikapulo ug sa mga amot gikan sa kaumahan, prutasan, ug mga parasan nga gihatag sa Israel ngadto sa mga Levihanon. (Mal 3:10) Ang pipila ka Levihanon gihimong tinugyanan sa mga tipiganan ug ilang giapod-apod ang maong mga tagana ngadto sa ilang kaigsoonan.​—1Cr 26:​15, 17; Neh 12:44; 13:​12, 13.

Sa karaang Ehipto ang mga kamalig lainlain ug porma sa estruktura. Ang usa ka matang niini adunay pultahan sa ibabaw alang sa pagpasulod sa mga lugas (pinaagi sa pagkatkat sa hagdan) ug adunay gagmayng madailos nga mga pultahan diha sa kinaubsang bahin niini aron sa pagkuha sa mga lugas. Ang mga kamalig sa ilalom sa yuta dugay na usab nga gigamit sa Tungang Sidlakan, ug dayag nga kini ang mas gipalabi nga gigamit diha sa nihit ug pumoluyo nga mga dapit tungod kay kini dili makita sa mga bandido.

Masambingayong Paggamit. Si Jesu-Kristo, sa pag-awhag sa iyang mga tinun-an nga dili mabalaka bahin sa materyal nga mga panginahanglan, kondili mangita lamang sa ilang “tinapay alang niining adlawa,” nagpahinumdom kanila nga ang Diyos nagpakaon sa mga langgam bisan tuod sila wala magtigom ug mga butang ngadto sa mga balay-tipiganan o mga kamalig. (Mat 6:​11, 25, 26; Luc 12:​22, 24) Aron ipakita nga ang kinabuhi wala maggikan sa mga butang nga gipanag-iya sa usa ka tawo, si Jesus miasoy ug usa ka sambingay bahin sa usa ka datong tawo kinsa nagplano nga pulihan ang iyang mga balay-tipiganan ug mas dagko nga mga tipiganan aron kabutangan sa daghan niyang abot, apan namatay hinuon siya; busa ang iyang materyal nga mga bahandi walay kapuslanan kaniya.​—Luc 12:13-21.

Imbes nga magdasig kanato nga mosalig sa yutan-ong mga manggad ug sa ingon magtigom ug daghan niana, ang maalamong magsusulat sa Mga Proverbio nag-ingon: “Pasidunggi si Jehova pinaagi sa imong bililhong mga butang . . . Unya ang imong mga dapa mapuno sa kadagaya.” (Pr 3:​9, 10) Kini gipakita sa kasinatian sa nasod sa Israel, nga sa dihang sila masinugtanong nag-alagad kang Jehova ug nagdala sa bug-os nga ikapulo ngadto sa sangtuwaryo, sila dagayang gipanalanginan. (Deu 28:​1, 8; 1Ha 4:20; 2Cr 31:4-10; Mal 3:10) Dayag nga ang maong materyal nga mga panalangin tungod sa pagkamasinugtanon ang gihisgotan ni Haring David sa Salmo 144:​13-15. Gawas sa pagluwas ni Jehova kang David ug sa mga tawo niini ug paghatag kanilag kadaogan batok sa ilang mga kaaway, apil sa panalangin ni Jehova ang pagpuno sa ilang mga balay-tipiganan ug mga abot ug ang paghatag kanilag abundang materyal nga mga butang. Sa pagpakita nga si Jehova gyod ang gigikanan sa ilang kauswagan ug kalipay, gitapos ni David kini nga salmo pinaagi sa pag-ingon, “Malipayon ang katawhan kansang Diyos mao si Jehova!”

Mahulagwayong Paggamit. Gipasidan-an ni Juan nga Tigbawtismo ang mga Pariseo ug mga Saduseo bahin sa ilang peligrosong kahimtang, nga nagpakasama sa tinuod nga mga naghinulsol ngadto sa trigo nga pagatigomon, apan nagtandi sa maong mga pangulo ngadto sa tahop. Siya miingon kanila: “Ang usa nga moanhi sunod kanako . . . magtigom sa iyang trigo ngadto sa balay-tipiganan, apan ang tahop iyang sunogon sa kalayo nga dili mapalong.” (Mat 3:7-12; Luc 3:​16, 17) Gitagna ni Jesus ang usa ka “pag-ani,” nga iyang gipakasama sa “kataposan sa sistema sa mga butang” ug nga niana ang mga manulonda nga “mga mag-aani” magtigom sa simbolikong “mga bunglayon” aron sunogon, samtang “ang trigo” pagatigomon ngadto sa “balay-tipiganan” sa Diyos, ang gipasig-uli nga Kristohanong kongregasyon, diin sila makabaton ug pag-uyon ug panalipod sa Diyos.​—Mat 13:24-30, 36-43.

Si Jehova namulong mahitungod sa mga butang nga sa palibot niana siya nagbutang ug mga utlanan pinaagi sa gilalang nga mga puwersa, o mga balaod sa kinaiyahan, ingon man sa mga butang nga iyang giandam ilalom sa iyang paggahom alang sa linaing mga katuyoan, nga ingon ug anaa sa sulod sa “mga balay-tipiganan.” Ang dagat giingon nga ‘ginatigom nga samag usa ka diki, nga gibutang sulod sa mga balay-tipiganan.’ (Sal 33:7) Bahin sa uban pang mga panghitabo sa kinaiyahan nga usahay iyang gigamit batok sa iyang mga kaaway, siya usab misukna kang Job: “Nakasulod ka na ba sa mga balay-tipiganan sa niyebe, o imo bang nakita bisan ang mga balay-tipiganan sa ulan nga yelo, nga akong gipugngan una alang sa panahon sa kasakit, alang sa adlaw sa panag-away ug sa gubat?” (Job 38:​22, 23; itandi ang Jos 10:8-11; Huk 5:​20, 21; Sal 105:32; 135:7.) Bisan ang kasundalohan sa mga Medianhon ug mga Persianhon ilalom ni Haring Ciro gigamit ni Jehova ingong lakip sa “mga hinagiban sa iyang mahukmanong pagsaway” nga gikuha niya gikan sa iyang “balay-tipiganan” batok sa Babilonya.​—Jer 50:​25, 26.