Nahibalo Ka Ba?
Nganong inanay mang giayo ni Jesus ang usa ka tawong buta?
Sa Marcos 8:22-26, atong mabasa nga giayo ni Jesus ang usa ka tawong buta didto sa Betsaida. Ang asoy nag-ingon nga gipahiran una ni Jesus ug laway ang mata sa tawo ug dayon gipangutana niya siya kon unsay iyang nakita. Ang tubag sa tawo nagpakita nga daw naglibog siya: “Nakakita ako ug mga tawo, tungod kay nakita ko ang daw mga kahoy, apan sila naglakawlakaw.” Unya gitapion pag-usab ni Jesus ang iyang kamot diha sa mata sa tawo, nga tungod niana “ang tawo nakakita nga tin-aw, ug siya naulian, ug iyang nakita ang tanang butang nga tin-aw.” Dayag nga siya inanay nga giayo ni Jesus. Ngano man?
Ang Bibliya walay detalyadong tubag niini, apan mahimo natong tagdon ang usa ka kaamgid nga situwasyon nga makapatin-aw niining partikular nga hitabo. Kon makakita ang tawo sa unang higayon human sa daghang tuig o sa tibuok kinabuhi nga pagkabuta, kinahanglan pang magpasibo ang mata aron mahimong normal ang panan-aw. Sa pag-ilustrar: Kaniadto, ang gagmayng mga kabayo gipatrabaho diha sa tunel sa mga minahan. Kay naanad man sila sa kangitngit, iniggawas nila, dangtan unag mga usa ka adlaw ayha pa makapasibo ang ilang mata sa kahayag sa gawas. Sa kaso sa tawong buta, labaw pa nga pagpasibo ang gikinahanglan. Sa modernong panahon, may pipila ka higayon nga naayo sa mga siruhano ang mga depekto sa mata sa mga tawong buta, mao nga sila nakakita pag-usab. Apan maglibog ang utok sa pasyente tungod sa kadaghan sa mga butang nga iyang makita—ang nagkalidadis nga mga kolor, porma, ug distansiya—mao nga sila dili makaila bisan sa ordinaryong mga butang. Sa ngadtongadto, masabtan ra sa utok ang mga butang nga makita sa mata.
Ang inanay nga pag-ayo ni Jesus sa tawong buta nagpadayag sa iyang gugma ug kahangawa ngadto kaniya. Sa kataposan, ‘nakita ra sa maong tawo ang tanang butang nga tin-aw,’ ug nakahimo na siya sa pag-ila niana.
Nganong dili man sayon ang pagbasa sa linukot nga basahon sa panahon ni Jesus?
Ang mga panid sa linukot nga basahon sagad may gitas-on nga 23 ngadto sa 28 sentimetros ug gilapdon nga 15 ngadto sa 23 sentimetros. Kini sumpaysumpayon pinaagig pagpapilit o kaha pagtahi sa isigka-kilid niini ginamit ang lino nga hilo. Usahay tag-as nga panid ang ilang gamiton. Ang Linukot nga Basahon ni Isaias sa Patayng Dagat may 17 ka panid nga gama sa panit sa mananap. Sa pagkakaron, ang napreserbar nga bahin niini halos siyete metros ang gitas-on. Lagmit, ingon usab niana ang gitas-on sa linukot nga basahon ni Isaias nga gigamit ni Jesus kaniadto sa sinagoga sa Nasaret.—Lucas 4:16, 17.
Bahin niining maong asoy, si Alan Millard nag-ingon diha sa iyang libro nga Discoveries From the Time of Jesus: “Gunitan sa nagbasa ang linukot nga basahon ug bukharon kana sa iyang wala nga kamot, unya anamon ug lukot sa iyang tuong kamot ang bahin nga iya nang nabasa. Aron mabasa ang Isaias 61, ang kapitulo nga gibasa ni Jesus sa sinagoga, halos nabukhad na niya ang tibuok linukot nga basahon.”
Nianang panahona, ang basahon ni Isaias wala pa mabahin sa mga kapitulo ug bersikulo. Sa dihang gibasa ni Jesus ang linukot nga basahon ni Isaias didto sa sinagoga sa Nasaret, kinahanglan pa niyang pangitaon ang teksto nga nailhan karon nga Isaias 61:1, 2 diha sa atong Bibliya. Dali rang ‘nakaplagan ni Jesus ang dapit’ diin kana nahisulat, ug kini nagpamatuod nga siya sinati sa Pulong sa Diyos.