Kinabuhi ug Ministeryo ni Jesus

Sa Iyang Lungsod Natawhan sa Sinagoga

SA MIPAULI si Jesus sa lungsod natawhan, atong mahanduraw ang kagubot sa Nazaret. Sa wala pa siya mogikan aron mabawtismohan ni Juan sa kapin lamang sa usa ka tuig nga miagi, nailhan si Jesus nga usa ka panday. Apan karon kaylap ang iyang dungog nga tighimog milagro. Ang lumad nga mga molupyo naghinamhinam sa pagtan-aw kaniya sa paghimo niining katingalahang mga butang sa ilang taliwala.

Misamot ang ilang kahinam sa dihang si Jesus, sumala sa iyang naandang batasan, miadto sa sinagoga. Sa panahon sa mga serbisyo, mibarog siya sa pagbasa, ug gitunolan siya sa basahon ni propetang Isaias. Iyang nakita ang bahin nga naghisgot niining Usa nga dinihogan sa balaang espiritu ni Jehova, diin kining dapita sa atong Bibliya karon mao ang kapitulo 61.

Human sa pagbasa kon sa unsang paagi kining Usa magwali sa kagawasan sa mga binihag, sa pag-ayo sa panan-aw sa buta, ug bahin sa madinawatong tuig ni Jehova, gihatag ug balik ni Jesus ang basahon ngadto sa kabulig ug milingkod. Ang tanang mata nagtutok kaniya. Dayon namulong siya ngadto kanila, tingali hataas nga panahon, nga nag-ingon: “Karong adlawa natuman kining bahina sa kasulatan nga bag-o pa lang ninyong nadunggan.”

Natingala ang mga tawo sa iyang “makaikag nga mga pulong” ug miingon sa usag usa: “Dili ba mao man kini siya ang anak ni Jose?” Sanglit nasayod nga gusto silang motan-aw kaniya nga maghimog mga milagro, si Jesus mipadayon: “Sa walay duhaduha inyong igaingon kanako kining maong pasumbingay, ‘Doktor, ayoha ang imong kaugalingon; ang among nadungog nga imong gipamuhat didto sa Capernaum buhata usab dinhi sa imong kaugalingong lungsod.’” Seguro, gibati sa mga silingan kaniadto ni Jesus nga kinahanglang magsugod ang pagpangayo sa iyang kaugalingong lungsod, alang sa kaayohan sa iyang katagilungsod. Busa naghunahuna sila nga walay pagtagad si Jesus kanila.

Nakamatikod sa ilang hunahuna, miasoy si Jesus ug pila ka aplikadong kasaysayan. Dihay daghang balong babaye sa Israel sa panahon ni Elias siya miingon, apan wala ipadala ngadto kanila si Elias. Hinunoa, miadto siya sa dili Israelinhong babayeng balo sa Sidon, diin didto naghimo siya ug nakaluwas ug kinabuhing milagro. Ug sa mga adlaw ni Eliseo dihay daghang mga sanlahon, apan gihinloan lamang ni Eliseo si Naaman sa Siria.

Nasuko niining dili maayong pagtandi sa kasaysayan nga nagladlad sa ilang kahakog ug sa kakulang sa pagtuo, kadtong diha niadtong tungora sa sinagoga nanindog ug giabog si Jesus gawas sa siyudad. Didto, sa ngilit sa bukid nga niini natukod ang Nazaret, misulay sila sa paghulog kaniya sa pangpang. Apan nakaikyas si Jesus gikan sa ilang paghawid. Lucas 4:16-30; 1 Hari 17:8-16; 2 Hari 5:8-14.

◆ Nganong nagkagubot ang Nazaret?

◆ Unsay hunahuna sa mga tawo sa pakigpulong ni Jesus, apan nganong nasuko kaayo sila?

◆ Unsay gisulayan sa mga tawo nga buhaton diha kang Jesus?