ALAGAD, MINISTRO

Kini nga termino gihubad gikan sa Hebreohanong pulong nga mesha·rethʹ ug sa Gregong pulong nga di·aʹko·nos. Ang Hebreohanong termino maoy usa ka participle sa berbong sha·rathʹ, nga nagkahulogang “pagsilbi” o “pag-alagad” sa usa ka superyor, ug gigamit sa sekular o sa relihiyosong diwa. (Gen 39:4; Deu 10:8) Mahitungod sa pulong nga di·aʹko·nos, si D. Edmond Hiebert misulat diha sa Bibliotheca Sacra: “Gituohan nga kini nga termino maoy usa ka kombinasyon sa preposisyong [di·aʹ], nga nagkahulogang ‘moagi,’ ug sa nombreng [koʹnis], ‘abog,’ sa ingon kini nga termino nagtumong sa usa nga nagdali sa pag-agi sa abog aron buhaton ang iyang pag-alagad. Apan kining gisugyot nga gigikanan niini nga pulong wala dawata sa kadaghanan karong adlawa. Lagmit gayod nga ang lintunganayng berbo maoy [di·eʹko], ‘pag-abot gikan sa usa ka dapit ngadto sa lain,’ nga kaamgid sa berbong [di·oʹko], ‘nagdali sa paggukod, pag-agpas.’ Busa ang lintunganayng ideya mao ang usa kinsa naningkamot nga makugihon ug malahutayon aron makaalagad sa uban.”​—1983, Tomo 140, p. 153.

Sa Hebreohanon ug Grego kini nga mga pulong ug ang ilang kaamgid nga mga porma parehong gipadapat ngadto sa lalaki ug babaye. (2Sa 13:​17, 18; 1Ha 1:​4, 15; 2Co 3:6; Rom 16:1) Si Josue maoy alagad (o, tig-alagad) ni Moises “sukad pa sa iyang pagkabatan-on.” (Num 11:28; Jos 1:​1, ftn sa Rbi8) Ang tig-alagad ni Eliseo gitawag nga iyang alagad ug tigsilbi. (2Ha 4:43; 6:15) Ang mga hari ug mga prinsipe adunay ilang harianong mga tig-alagad o mga alagad (2Cr 22:8; Est 2:2; 6:3), ang uban kanila nagsilbi sa harianong mga lamesa.​—1Ha 10:​4, 5; 2Cr 9:​3, 4.

Ang mga Manulondang Alagad ni Jehova. Gilalang ni Jehova nga Diyos ang mga manulonda nga tinagpulo ka milyon, silang tanan maoy ilalom sa iyang pagkontrolar ug kinsa sa walay duhaduha mahimo niyang tawgon pinaagi sa ilang mga ngalan, ingon sa iyang pagtawag sa dili-maihap nga kabituonan. (Sal 147:4) Kini sila maoy iyang mga alagad nga nagabuhat sa iyang kabubut-on diha sa uniberso. (Sal 103:​20, 21) Ang salmista nag-ingon bahin kang Jehova nga siya naghimo “sa iyang mga manulonda nga mga espiritu, sa iyang mga alagad nga nagalamoy nga kalayo.” (Sal 104:4) Sila gihubit ingong “mga espiritu alang sa publikong pag-alagad, nga gipadala aron mag-alagad niadtong magapanunod sa kaluwasan.” (Heb 1:​13, 14) Ang mga manulonda nag-alagad kang Jesu-Kristo didto sa kamingawan human nga iyang napukgo ang mga paningkamot ni Satanas sa pagpatipas kaniya gikan sa pagkamasinugtanon kang Jehova (Mat 4:11); nagpakita usab ang usa ka manulonda nga nagpalig-on kaniya sa dihang siya nag-ampo didto sa Getsemane. (Luc 22:43) Sa panan-awon ni manalagnang Daniel, diin “dihay sama sa anak sa tawo” nga gihatagan ug pagmando nga mohangtod sa panahong walay tino ibabaw sa tanang katawhan ug mga pinulongan, minilyon ka manulonda ang gipakita nga nag-alagad sa palibot sa trono sa Karaan sa mga Adlaw.​—Dan 7:9-14.

Ang Tribo ni Levi. Human nga ang mga Israelinhon giluwas gikan sa Ehipto, ug sa dihang ang nasod giorganisar ilalom sa pakigsaad sa Balaod, gipili ni Jehova ang mga lalaki sa tribo ni Levi ingong iyang linaing mga alagad. (Num 3:6; 1Cr 16:4) Ang pipila kanila, ang banay ni Aaron, maoy mga saserdote. (Deu 17:12; 21:5; 1Ha 8:11; Jer 33:21) Ang mga Levihanon adunay lainlaing mga katungdanan sa ilang pag-alagad; sila maoy mga tig-atiman sa sangtuwaryo lakip sa tanang galamiton niini, mga alagad sa pag-awit, ug uban pa.​—Num 3:​7, 8; 1Cr 6:32.

Mga Manalagna. Dugang pa sa paggamit sa tanang kalalakin-an sa tribo ni Levi, gigamit ni Jehova ang uban aron sa pag-alagad sa iyang katawhang Israel sa linaing paagi. Sila mao ang mga manalagna, kinsa nag-alagad lamang ingong tinudlo ug sinugo ni Jehova nga tinagsatagsa. Ang pipila kanila maoy kaliwat usab sa mga saserdote, apan daghan ang naggikan sa ubang mga tribo sa Israel. (Tan-awa ang MANALAGNA.) Sila maoy mga mensahero ni Jehova; sila gisugo aron magpasidaan sa nasod sa dihang kini motipas gikan sa Balaod, ug ilang gipaningkamotan nga pabalikon ang mga hari ug ang katawhan ngadto sa tinuod nga pagsimba. (2Cr 36:​15, 16; Jer 7:​25, 26) Ang ilang mga tagna nakatabang, nakadasig, ug nakapalig-on sa mga tawong matarong ug kasingkasing, ilabina sulod sa mga panahon sa espirituwal ug moral nga kadunotan, ug sa mga panahon nga ang Israel gihulga sa ilang mga kaaway sa palibot.​—2Ha 7; Isa 37:21-38.

Ang ilang mga tagna nagpunting usab kang Jesu-Kristo ug sa Mesiyanikong Gingharian. (Pin 19:10) Si Juan nga Tigbawtismo naghimog talagsaong buluhaton, nga nagpabalik ‘sa kasingkasing sa mga amahan ngadto sa mga anak, ug sa kasingkasing sa mga anak ngadto sa mga amahan’ samtang iyang giandam ang dalan alang sa hawas ni Jehova, ang Ginoong Jesu-Kristo. (Mal 4:​5, 6; Mat 11:​13, 14; Luc 1:77-79) Ang mga manalagna dili lamang nag-alagad ngadto sa ilang mga katalirongan, kay si apostol Pedro misulat sa mga Kristohanon: “Kini gipadayag ngadto kanila nga, dili sa ilang kaugalingon, kondili kaninyo, sila nag-alagad labot sa mga butang nga karon gipahibalo na kaninyo pinaagi kanila nga nagpahayag sa maayong balita kaninyo uban sa balaang espiritu nga gipadala gikan sa langit. Niini mismong mga butanga nga ang mga manulonda nangandoy sa pagsud-ong.”​—1Pe 1:10-12.

Si Jesu-Kristo. Si Jesu-Kristo maoy pangunang alagad o ministro (di·aʹko·nos) ni Jehova. Siya “nahimong ministro sa mga tinuli alang sa pagkamatinud-anon sa Diyos, aron lig-onon ang saad nga Iyang gihatag sa ilang mga katigulangan,” aron usab “nga ang mga nasod makahimaya sa Diyos tungod sa iyang kaluoy.” Busa, “diha kaniya ang mga nasod managlaom.”​—Rom 15:8-12.

Ang pagkatudlo ni Jesus naggikan kang Jehova mismo. Sa dihang iyang gipresentar ang iyang kaugalingon alang sa bawtismo, “ang mga langit nabuksan,” ang asoy nag-ingon, “ug iyang [si Juan nga Tigbawtismo] nakita nga mikunsad diha kaniya [kang Jesus] ang espiritu sa Diyos ingon sa usa ka salampati. Tan-awa! Dihay tingog usab gikan sa mga langit nga nag-ingon: ‘Kini mao ang akong Anak, ang hinigugma, nga akong giuyonan.’” (Mat 3:​16, 17) Sa wala pa siya maglungtad ingong tawo, si Jesus nag-alagad na kang Jehova sulod sa dili-matinong mga yugto sa kapanahonan, apan niining higayona siya misulod sa usa ka bag-ong ministeryo. Gipamatud-an ni Jesus nga siya gayod ministro sa Diyos, nga nag-alagad sa Diyos ug sa iyang mga isigkatawo. Busa, didto sa sinagoga sa lungsod sa Nasaret nga iyang gidak-an, nakahigayon si Jesus sa pagkuha sa linukot nga basahon ni Isaias ug sa pagbasa sa gitawag karon nga kapitulo 61, mga bersikulo 1, 2: “Ang espiritu sa Soberanong Ginoong Jehova ania kanako, tungod kay si Jehova nagdihog kanako sa pagsulti sa maayong balita ngadto sa mga maaghop. Siya nagpadala kanako aron sa pagbugkos sa mga may gun-ob nga kasingkasing, sa pagmantala ug kagawasan niadtong mga gidalang binihag ug sa pagpabuka pag-ayo sa mga mata bisan sa mga binilanggo; sa pagmantala sa tuig sa maayong kabubut-on sa bahin ni Jehova.” Unya iyang gisultihan kadtong mga nagkatigom, “Karong adlawa kining kasulatan nga bag-o lang ninyo nga nadungog natuman.”​—Luc 4:16-21.

Sa dihang si Pedro nagwali ngadto sa unang kinabig nga Hentil nga si Cornelio, siya naghubit sa pagkinabuhi ni Jesus sulod sa iyang yutan-ong ministeryo nga tulo ug tunga ka tuig, nga nagpunting sa pagtagad ni Cornelio ngadto kang “Jesus nga taga-Nasaret, kon giunsa sa Diyos pagdihog kaniya ug balaang espiritu ug gahom, ug gilibot niya ang kayutaan nga nagbuhat ug maayo ug nag-ayo nilang tanan nga gisakit sa Yawa; tungod kay ang Diyos uban man kaniya.” (Buh 10:38) Si Jesus sa literal milakaw latas sa tibuok niyang tinudlo nga teritoryo sa pag-alagad kang Jehova ug sa katawhan. Dili lamang kay kana ra, kondili gitugyan gayod niya ang iya mismong kalag ingong lukat alang sa uban. Siya miingon: “Ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat baylo sa daghan.”​—Mat 20:28.

Kristohanong mga Ministro. Sa iyang pagministeryo gikuyog ni Jesus ang daghan pang uban, mga apostoles ug mga tinun-an, kinsa iyang gibansay sa pagbuhat sa samang pagministeryo. Una iyang gipadala ang 12, dayon ang 70 ka uban pa. Ang aktibong puwersa sa Diyos nag-uban usab kanila, nga tungod niana sila nakahimog daghang milagro. (Mat 10:​1, 5-15, 27, 40; Luc 10:1-12, 16) Apan ang dakong buluhaton nga kinahanglan nilang buhaton mao ang pagwali ug pagtudlo sa maayong balita sa Gingharian sa Diyos. Ngani, ang mga milagro gihimo aron pangunang mohatag ug publikong pamatuod nga sila gitudlo ug giuyonan ni Jehova.​—Heb 2:​3, 4.

Gibansay ni Jesus ang iyang mga tinun-an pinaagi sa pulong ug panig-ingnan. Siya nagtudlo dili lamang sa publikong mga dapit kondili usab sa pribadong mga balay, nga direktang naghatod sa maayong balita ngadto sa mga tawo. (Mat 9:​10, 28; Luc 7:36; 8:1; 19:​1-6) Pinasukad sa mga asoy nga gihatag sa mga magsusulat sa mga Ebanghelyo, dayag nga ang mga tinun-an ni Jesus presente sa daghang higayon nga siya naghatag ug pamatuod ngadto sa nagkalainlaing matang sa katawhan tungod kay ang mismong mga panagsultihanay girekord. Sumala sa basahon sa Mga Buhat, ang iyang mga tinun-an misunod sa maong panig-ingnan, nga miduaw sa balay ug balay aron ipahayag ang mensahe sa Gingharian.​—Buh 5:42; 20:20; tan-awa ang MAGWAWALI, PAGWALI (“Sa Balay ug Balay”).

Gisultihan ni Jesus ang iyang mga tinun-an kon unsa ang tinuod nga alagad o ministro sa Diyos, nga nag-ingon: “Ang mga hari sa mga nasod mahariharion kanila, ug kadtong adunay awtoridad ibabaw kanila gitawag nga mga Tigpanalangin. Apan dili kamo angay nga manig-ingon niana. Kondili siya nga labing dako kaninyo mahimong sama sa kamanghoran, ug ang nagasilbi nga pangulo sama sa usa nga nagaalagad. Kay kinsa ba ang labaw, ang nagahirag sa lamesa o ang nagaalagad? Dili ba ang nagahirag sa lamesa?” Dayon, migamit sa iyang kaugalingong buhat ug panggawi ingong pananglitan, siya miingon: “Apan ako ania sa inyong taliwala ingon nga usa nga nagaalagad.” (Luc 22:25-27) Sa maong okasyon, siya kusganong nagpasundayag niini nga mga prinsipyo, lakip sa pagkamapainubsanon, pinaagi sa paghugas sa mga tiil sa mga tinun-an.​—Ju 13:5.

Dugang pa, gipasiugda ni Jesus ngadto sa iyang mga tinun-an nga ang tinuod nga mga alagad o mga ministro sa Diyos dili modawat ug magarbohong relihiyosong mga titulo alang sa ilang kaugalingon, ni ilang ihatag kini sa uban. “Kamo, ayaw kamo pagpatawag nga Rabbi, kay usa ra ang inyong magtutudlo, samtang kamong tanan mga igsoon. Dugang pa, ayaw ninyo tawgang amahan si bisan kinsa dinhi sa yuta, kay usa ra ang inyong Amahan, ang langitnong Usa. Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo. Apan ang labing dako taliwala kaninyo kinahanglang mahimong inyong alagad [o, sulugoon]. Si bisan kinsa nga magabayaw sa iyang kaugalingon igapaubos, ug si bisan kinsa nga magapaubos sa iyang kaugalingon pagabayawon.”​—Mat 23:8-12.

Ang dinihogang mga sumusunod ni Ginoong Jesu-Kristo gihisgotan ingong ‘mga ministro sa maayong balita,’ sama kang Pablo (Col 1:23); sila usab maoy “mga ministro sa usa ka bag-ong pakigsaad,” nga nailalom sa maong pakigsaad uban kang Jehova nga Diyos, diin si Kristo mao ang Tigpataliwala. (2Co 3:6; Heb 9:​14, 15) Niini nga paagi sila maoy mga ministro sa Diyos ug ni Kristo. (2Co 6:4; 11:23) Ang ilang kuwalipikasyon naggikan sa Diyos pinaagi kang Jesu-Kristo, dili gikan sa bisan kinsa nga tawo o sa bisan unsa nga organisasyon. Ang ebidensiya sa ilang ministeryo dili maoy pinaagi sa papel o sertipiko, sama sa usa ka sulat sa rekomendasyon o awtoridad. Ang ilang “sulat” sa rekomendasyon makita diha sa mga tawo nga ilang gitudloan ug gibansay nga mahisama kanila, mga ministro ni Kristo. Bahin niining butanga si apostol Pablo nag-ingon: “Kami ba, kaha, sama sa pipila ka tawo, nanginahanglan ug mga sulat sa rekomendasyon nganha kaninyo o gikan kaninyo? Kamo mismo mao ang among sulat, nakudlit sa among mga kasingkasing ug naila ug ginabasa sa tanang tawo. Kay kamo gipakita ingong sulat ni Kristo nga gisulat namo ingong mga ministro, nakudlit dili pinaagig tinta kondili pinaagig espiritu sa buhing Diyos, dili diha sa batong mga papan, kondili sa unodnong mga papan, sa mga kasingkasing.” (2Co 3:1-3) Dinhi gipakita sa apostol ang gugma ug ang kasuod, ang kamainiton sa pagmahal ug pag-atiman sa Kristohanong ministro alang niadtong iyang gialagaran, sanglit sila ‘nakudlit diha sa kasingkasing [sa ministro].’

Busa, human si Kristo mikayab sa langit, siya naghatag ug “mga gasa nga mga lalaki” ngadto sa Kristohanong kongregasyon. Lakip niini mao ang mga apostoles, mga manalagna, mga tig-ebanghelyo, mga magbalantay, ug mga magtutudlo, nga gihatag “alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas ni Kristo.” (Efe 4:7-12) Ang ilang kuwalipikasyon ingong mga ministro naggikan sa Diyos.​—2Co 3:4-6.

Ang Pinadayag nga gihatag ngadto kang apostol Juan naglarawan sa “usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan.” Kini sila wala hisgoti ingong nailalom sa bag-ong pakigsaad sama sa dinihogang mga igsoon ni Jesu-Kristo ug busa sila dili mga alagad o mga ministro niini nga pakigsaad; bisan pa niana, sila gipakita nga adunay mahinlong baroganan sa atubangan sa Diyos ug “nagahatag kaniya ug sagradong pag-alagad adlaw ug gabii diha sa iyang templo.” Busa sila nagaalagad ug haom nga tawgong mga alagad o mga ministro sa Diyos. Ingon sa gipakita sa panan-awon sa Pinadayag ug ni Jesus mismo (pinaagig sambingay), sa panahon sa presensiya ni Kristo diha sa iyang mahimayaong trono, anaa ang maong mga tawo kinsa usab mahigugmaong moalagad sa mga igsoon ni Jesu-Kristo, nga mobulig, moatiman, ug motabang kanila.​—Pin 7:9-15; Mat 25:31-40.

Ministeryal nga mga Alagad sa Kongregasyon. Human itala ang mga kinahanglanon alang niadtong mag-alagad ingong “mga magtatan-aw” (e·piʹsko·poi) sa mga kongregasyon, gitala ni apostol Pablo ang mga kinahanglanon alang niadtong itudlo ingong “ministeryal nga mga alagad” (di·aʹko·noi). (1Ti 3:1-10, 12, 13) Ang Gregong pulong nga di·aʹko·nos yanong gihubad diha sa ubang mga teksto ingong “alagad.” (Mat 20:26; 22:13) Sanglit ang tanang Kristohanon maoy “mga ministro” (mga alagad) sa Diyos, dayag nga ang terminong di·aʹko·noi dinhi adunay usa ka partikular nga diwa, usa nga may kalabotan sa kahikayan ug gambalay sa kongregasyon. Busa, adunay duha ka grupo sa mga lalaki nga naghupot ug mga responsibilidad sa kongregasyon: ang “mga magtatan-aw,” o “mga ansiyano,” ug ang “ministeryal nga mga alagad.” Kasagaran nga adunay ubay-ubayng mga magtatan-aw ug katabang nga mga ministeryal sa matag kongregasyon.​—Flp 1:1; Buh 20:​17, 28.

Ang talaan sa mga kinahanglanon alang sa ministeryal nga mga alagad kon itandi nianang sa mga magtatan-aw, maingon man ang mga ngalan alang sa duha ka posisyon, nagpaila nga ang ministeryal nga mga alagad wala hatagig responsibilidad sa pagtudlo o sa buluhaton ingong magbalantay (ang usa ka magbalantay maoy usa ka magtatan-aw sa mga karnero). Ang katakos sa pagtudlo dili kinahanglanon alang sa ilang buluhaton. Ang ngalang di·aʹko·nos mismo nagpaila nga kini nga mga lalaki nag-alagad ingong mga katabang sa lawas sa mga magtatan-aw diha sa kongregasyon, ug ang ilang pangunang responsibilidad mao ang pag-atiman sa mga butang nga walay kalangkitan sa buluhaton ingong magbalantay aron ang mga magtatan-aw makasentro sa ilang panahon ug pagtagad sa ilang buluhatong pagpanudlo ug pagkamagbalantay.

Ang usa ka pananglitan sa prinsipyo may kalabotan niini nga kahikayan makaplagan diha sa gihimo sa mga apostoles sa dihang mitungha ang mga suliran maylabot sa pag-apod-apod (sa literal, sa pag-alagad, di·a·ko·niʹa) sa mga suplay nga pagkaon nga gitagana adlaw-adlaw alang niadtong mga Kristohanon nga nanginahanglan didto sa Jerusalem. Kay miingon nga dili ‘makapahimuot alang kanila nga biyaan ang pulong sa Diyos’ aron magmapuliki sa ilang kaugalingon sa pagdumala sa mga suliran bahin sa materyal nga pagkaon, gisugo sa mga apostoles ang mga tinun-an sa ‘pagpangita ug pito ka lalaki sa inyong taliwala nga napanghimatud-ang maayo, puno sa espiritu ug kaalam, aron among itudlo sila ibabaw niining hinungdanong atimanonon; apan among ideboto ang among kaugalingon sa pag-ampo ug sa pagministeryo [di·a·ko·niʹai] sa pulong.’ (Buh 6:1-6) Mao kini ang prinsipyo; apan kini wala gayod magkahulogan nga ang pito ka lalaki nga gipili maoy, niining bahina, dili kuwalipikado ingong “mga ansiyano” (pre·sbyʹte·roi), kay dili kini usa ka normal o naandang kahimtang kondili usa ka linaing suliran nga mitungha, usa nga may pagkaseryoso tungod sa pagbati nga dihay pagpihigpihig tungod sa nasyonalidad. Sanglit kadto nakaapektar sa tibuok Kristohanong kongregasyon, kadto maoy usa ka suliran nga nagkinahanglag “espiritu ug kaalam,” ug busa ang pito ka lalaki nga napili lagmit gayod sa espirituwal nga diwa maoy “mga ansiyano.” Apan sila karon temporaryong nagbuhat sa usa ka tinudlong buluhaton nga sama nianang naandang gidumala sa “ministeryal nga mga alagad.” Kadto maoy usa ka buluhaton nga ‘hinungdanon’ apan dili sama ka importante sa “pagministeryo sa pulong.”

Ang mga apostoles nagpakitag hustong panglantaw niini nga aksiyon, ug mahimong dahomon nga ang mga lawas sa mga magtatan-aw diha sa mga kongregasyon nga naporma sa gawas sa Jerusalem mosunod sa ilang panig-ingnan sa paghatag ug mga buluhaton ngadto sa “ministeryal nga mga alagad.” Sa walay duhaduha dihay daghang pisikal, naandan, o mekanikal nga mga buluhaton nga nagkinahanglag pagtagad, tingali lakip ang pagpalit sa materyales nga gamiton sa pagkopya sa Kasulatan o bisan gani ang pagkopya mismo niini.

Ang mga kuwalipikasyon nga kinahanglang kab-oton sa katabang nga mga ministeryal nagtaganag mga sukdanan nga manalipod sa kongregasyon gikan sa bisan unsang lehitimong akusasyon bahin sa pagpili niini ug mga lalaki alang sa partikular nga mga katungdanan, sa ingon padayong mahuptan ang usa ka matarong nga baroganan uban sa Diyos ug usa ka hinlong reputasyon taliwala sa mga tagagawas. (Itandi ang 1Ti 3:10.) Ang mga kuwalipikasyon maoy maylabot sa moralidad, panggawi, ug espirituwalidad ug, kon kini makita, ikatudlo diha sa pag-alagad ang mga lalaki nga may salabotan, matinud-anon, mahunahunaon, ug kasaligan. Kadtong nag-alagad sa maayong paagi makabaton alang sa ilang kaugalingon ug “maayong pagbarog ug dakong kagawasan sa pagsulti diha sa pagtuo maylabot kang Kristo Jesus.”​—1Ti 3:13.

Yutan-ong mga Magmamando. Ang Diyos nagtugot sa mga kagamhanan niining kalibotana sa paggahom hangtod nga moabot ang iyang takdang panahon nga taposon kini, ug human niana ang Gingharian ni Kristo magamando na gayod. (Dan 2:44; Pin 19:11-21) Sa panahon nga sila gitugotan sa pagmando, sila naghimog daghang serbisyo alang sa katawhan, sama sa paghimog mga dalan, mga tunghaan, mga departamento sa kapolisan ug sa sunog, ug uban pang mga serbisyo. Sila usab adunay mga balaod sa pagsilot sa mga kawatan, mga mamumuno, ug uban pang mga maglalapas sa balaod. Busa, samtang sila nagabuhat niini nga mga serbisyo ug makataronganong nagpatuman niini nga mga balaod, sila maoy ‘mga ministro’ (di·aʹko·noi) sa Diyos. Kon si bisan kinsa, bisan usa ka Kristohanon, molapas sa maong mga balaod, ang silot nga iyang madawat gikan sa mga kamot sa kagamhanan maoy silot gikan sa Diyos sa dili direktang paagi, kay ang Diyos batok sa tanang pagkadaotan. Dugang pa, kon ang kagamhanan manalipod sa mga Kristohanon gikan sa mga malinapason sa balaod, kini nagalihok ingong usa ka ministro sa Diyos. Nan kon ang magmamando magaabuso sa iyang awtoridad ug molihok batok sa Diyos, siya may tulubagon ug kinahanglang manubag sa Diyos tungod niini. Kon ang maong daotang magmamando mag-aghat sa mga Kristohanon sa paglapas sa balaod sa Diyos, nan siya wala magalihok ingong ministro sa Diyos ug siya makadawat ug silot gikan sa Diyos.​—Rom 13:1-4.

Mini nga mga Ministro. Adunay mga tawo nga nangangkong mga ministro sa Diyos apan kinsa mga salingkapaw, ug sa pagkatinuod mga ministro diay ni Satanas nga nakigbatok sa Diyos. Si apostol Pablo kinahanglang makigbatok sa maong mga ministro nga nagsamok sa kongregasyon sa Corinto. Bahin kanila, siya miingon: “Ang maong mga tawo mini nga mga apostoles, malimbongong mga mamumuhat, nga naghimo sa ilang kaugalingon nga mga apostoles ni Kristo. Ug dili ikatingala, kay si Satanas kanunayng naghimo sa iyang kaugalingon nga usa ka manulonda sa kahayag. Busa dili talagsaon kon ang iyang mga ministro usab kanunayng maghimo sa ilang kaugalingon nga mga ministro sa pagkamatarong. Apan ang ilang kataposan maoy sumala unya sa ilang mga buhat.”​—2Co 11:13-15.

Ang pagtungha sa maong mini nga mga ministro gitagna sa makadaghan diha sa Kasulatan. Gisultihan ni Pablo ang mga magtatan-aw sa kongregasyon sa Efeso nga human sa iyang pagbiya, ang malupigong mga lobo mosulod sa taliwala sa kongregasyon ug dili magtagad sa panon uban ang kalumo; sila magsultig tinuis nga mga butang aron ipahilayo ang mga tinun-an ngadto kanila. (Buh 20:​29, 30) Si Pablo nagpasidaan usab bahin sa maong mga apostata diha sa iyang mga sulat (2Te 2:3-12; 1Ti 4:1-5; 2Ti 3:1-7; 4:​3, 4); si Pedro naghubit kanila (2Pe 2:1-3); ug si Jesu-Kristo mismo nagtagna sa ilang paglungtad ug sa ilang kalaglagan (Mat 13:24-30, 36-43).​—Tan-awa ang TAWO SA KALAPASAN.